45ǁÎ ǁKHĀǁKHĀǃÂS
Mâ ǀgaub ǃnâb Jehovaba ra huida, î da aoǁnâ sîsen-e dī?
“ǁÎn ge nî ǂan kēbo-ao-i ǁîn ǁaegu hâ ǃkhaisa.”—ESE. 2:5.
67ǁÎ ǁNAETSANAS “Mîsa aoǁnâ re”
ǃKHŌǀHAOS a
1. Tae-e da a ǃâubasen ǁkhā? Tsî tae-i ǂgomǃgâsiba da a ūhâ ǁkhā?
ǃÂUBASEN ǁkhā da ge a ǀnî khoen aoǁnâ da ra hîna nî mâǃoa dasa. Tsî da ge ǀgaisase hānîǁaeb ǃnâ nî mâǃoahe. (Dan. 11:44; 2Tim. 3:12; J.ǂHa. 16:21) Xawe da ge a ǂgomǃgâ ǁkhā, Jehovaba ǂhâ da hâ huiba a māda ǁkhāsa. Tae-i ǃaroma? Jehovab ge hoaǁae ǁîb di ǃoaba-aona gere hui, în ǁîn ǁgaumâide dīǀoaǀoa. Mati ǀgui i ga ǃgom xawe. Aiǁgause, ǀkhī re î da ǀnî xūn hîna ge kēbo-aob Esegieli ûib ǃnâ gere īna ǃhoaǃgao. Hîna ge Babilons ǃnâ hâ i Jodeǁî ǃkhōsabena gere aoǁnâba ba.
2. Jehovaba mati Esegieli gere aoǁnâba khoen xa ge mî? Tsî tae-e da nē ǁkhāǁkhāǃâs ǃnâ nî ǃhoaǃgao? (Esegieli 2:3-6)
2 Mâǃnôa khoenab ge Esegiela gere aoǁnâba? Jehovab ge ge mî ǁîn ge ‘mâǃoaxa, ǃnâudanaxa tsî a khâikhâisenxa.’ ǁÎn ge ǁkhūn tsî ǁaruben khami ge ǁkhōǁkhōsa i. ǁNā-amagab ge Jehovaba Esegiela ǃnās hoasa gere mîba: “Tā ǁîn xa ǃao.” (Khomai re Esegieli 2:3-6 sa.) Esegieli ge ǁîb sîsen-e ge dī ǁkhā i, saora xūn ǃaroma. (1) Jehovab xab ge ge sîhe. (2) Jehovab gagab xab ge ge ǀgaiǀgaihe. (3) Elobmîs ge ǁîb ǂgomsa ge ǀgaiǀgai. Nē ǃnona xūna mati Esegiela ge hui? Tsî matin nētsē sida ra hui?
JEHOVAB GE ESEGIELA GE SÎ
3. Esegiela mâ mîdi xa ge ǀgaiǀgaihe? Tsî matib ge Jehovaba ǁîb di ǂkhâǃnâsa ǁapoǁapoba bi?
3 Jehovab ge Esegiela ge mîba: “Tita ge ǁîn ǃoa ra sî tsi.” (Ese. 2:3, 4) ǁNā mîdi ge Esegiela ge ǀgaiǀgai. Tae-i ǃaroma? Esegieli ge ǀnîsi ge ǂâihō, Jehovab ge ǁnā mîde Moseb tsî Jesajab tsîna a mîbasa. ǁÎb di kēbo-aokha aseb ge a ǁhûi kha o. (Eks. 3:10; Jes. 6:8) Esegieli tsîn ge ge ǂan i matib ge Jehovaba. ǁNā ǀgam kēbo-aokha a huisa ǁîkha di ǃgom ǁgaumâide dīǀoaǀoasa. Jehovab ge Esegiela ǀgamǁî ǃnāsa ge mîba: “Tita ge ǁîn ǃoa ra sî tsi.” Ob ge kēbo-aob Esegiela ǃgâi ǃaromasa ge ūhâ i, Jehovab di ǂkhâǃnâs ǃnâ ǂgomsa. Esegieli tsîn ge ǂgui ǃnāde ge xoa: ‘Jehovab di mîdi ge tita ǃoa ge hā.’ (Ese. 3:16) ‘Jehovab ge ǁkhapa tita ǃoa ge mî.’ Di hâ mîs ge ǂgui ǃnāde xoasa. (Ese. 6:1) Amaseb ge Esegiela gere ǂgom Jehovab xab ge sîhesa. Esegieli dadab ge ge pristeri i, tsîb ge ǁîba ǀnîsi Esegiela gere ǁkhāǁkhā. Jehovab ge hoaǁae ǁîb di kēbo-aoga gere mîbasa ǁîkhab nî hui ti. Jehovab ge Isaki, Jakob tsî Jeremiab ǃoa nē mîde ge mî: ‘Tita sats ǀkha hâ xuige.’—Gen. 26:24; 28:15; Jer. 1:8.
4. Esegiela mâ ǁkhaeǂgao mîdi xa ge ǀgaiǀgaihe?
4 Matin ǃnāsa Israelǁîna nî tanisen Esegieli aoǁnâs ǃoagu? Jehovab ge ge mî: ‘Xawe Israeli khoen ge ǃgâ tsi tide, ǁîn ǃgâ te ǂgao tama xui-ao.’ (Ese. 3:7) Esegielan ge ūǃoa tama hâ i on ge khoena, Jehovaba ge ūǃoa tama hâ i. ǁNā mîdi ge Esegiela ge ǁapoǁapoba, ǁgaiseb ge kēbo-aob ase dī tama hâ i ǃkhaisa. Khoen ge ūǃoa bi tama hâ i xawe. Jehovab ge Esegieli tsîna ge ǁapoǁapoba. ǁÎb da aoǁnâ kēbos ga ama kai, on khoena nî “ǂan kēbo-ao-i ǁîn ǁaegu hâ ǃkhaisa.” (Ese. 2:5; 33:33) ǂGom ǁkhā da ge a, ǁnā ǁkhaeǂgao mîdi ge Esegiela ǂhâb hâ ǀgaiba a māsa. Îb ǁîb di aoǁnâ sîsen-e dīǀoaǀoa.
NĒTSĒ DA GE JEHOVAB XA SÎHE HÂ
Esegieli khami da ge khoen xa ǃgâ-e tama tsî ra mâǃoahe. Xawe da ge a ǂan Jehovab sida ǀkha hâsa (5-6ǁÎ xoaǀgora ra khomai re)
5. Jesajab 44:8 ǃoagu da mapa xu ǁkhoaǂgaosiba ra hō?
5 Sida tsîn ge ǁkhoaǂgasiba ūhâ. ǂAn da a amaga, Jehovab xa da ge sîhesa î da aoǁnâ. ǁÎb ge ra ǃgôada tsî ǁîb ‘ǃkhō-amaon’ ti ra ǂgaida. (Jes. 43:10) ǁNāb ge kai aiǂhanuba. Jehovab ge Esegiela: “tā ǃao” di a mîba khamib ge sida tsîna ra mîba, î da “tā ǃao tamas ka io ǃhuri.” Tae-i ǃaroma da sida mâǃoa-aona ǃao tide? Esegieli khami da ge Jehovab xa sîhe hâ. Tsî ǁîb di ǂkhâǃnâsa ūhâ.—Khomai re Jesajab 44:8 sa.
6. (a) Jehovaba mati ǁîb di ǂkhâǃnâsa ra ǁapoǁapoba da? (b) Tae-e xu da ǁkhaeǂgaos tsî ǀgaib tsîna ra hō?
6 Jehovab ge huidab nî ǃkhaisa ra mîmâiba da. Aiǁgause, “Sadu ge ti ǃkhō-amaodo” dib nî mîs aiǃâb ge ge mî: “ǁGammi ǃnâ-uts ga ǃkharu, o ta ge sats ǀkha nî hâ, ǃāgu tsîn ge dâuǂam tsi tide. ǀAes ǃnâ-uts ga ǃkharu, xawets ge ǂhubi tide tsî ǀaeǁhabub on ge ǂhubi tsi tide.” (Jes. 43:2) Aoǁnâ da ra hîna da ge ǀnî ǁaegu ai. Xūn hîna ǁgam dâus khami ra ǁkhaedana ra hōǃâ. Tsî kai ǃgomsin hîna da ǀaes ǀkha a ǀgopeǀnō ǁkhāna. ǁNāti i ga ī xawe da ge Jehovab huib ǀkha ra aoǁnâ ǀgara. (Jes. 41:13) Esegieli di tsēdi ǃnâ i ge ī-i khamin ge ǂgui khoena sida haisi-amsa ūǃoa tama. ǂÂis ǃnâ da ge nî ūhâ. ǁÎn ūǃoa tamas ge ǂâibasen tama hâ, ǃgâise da aoǁnâ tama hâ ti. Jehovab ge a ǂkhî ǂgomǂgomsase da ga aiǃgû. Tsî ǁîb di haisi-amsa ga ra aoǁnâ o. ǁNāsa ǂansa xu da ge ǁkhaeǂgaos tsî ǀgaib tsîna ra hō. Apostel Paulub ge ge mî: “Mâb hoab ge ǁîb di mādawa-amsa ǁîb di sîsenni ǂûb ǃoa nî ǃkhōǃoa.” (1Kor. 3:8; 4:1, 2) ǀGui ǃgâsas ǂgui kurina aimâba-aose ra sîsens ge ra mî: “Kai ǃgâiaǂgaoba i ge ra māte. ǂAnsa Jehovab dī ta ra dītsâte ra mādawa-am ǃkhaisa.”
ESEGIELI GE ELOB GAGAB XA GE ǀGAIǀGAIHE
Esegieli ge kēbos ǃnâ kunisa ge mû. Hîna ge ǁîb ǂgomǃgâsiba a ǀgaiǀgaisa Jehovab ǃnâ. Tsîb ǁîba nî huibisa aoǁnâ sîsen-e dīǀoaǀoasa (7ǁî xoaǀgorasa khomai re)
7. Esegiela mati ge tsâ mûb ge ai-īsib xab ge ǂâi o? (Tsoatsoas ai hâ ai-īsiba kō re.)
7 Esegieli ge ge mû, matib Elob gagaba a ǀgaisa ǀgausa. Esegieli ge ai-īsib ǃnâ a mû i ge ǁîba ge hui îb ǂanǃgâ. ǃAnu gagab ge ǀgaisa ǀhomǃgāgu tsî kai kunis ǀnūde gon kais ǀkha gere huisa. (Ese. 1:20, 21) Esegiela tae-e ge dī? ǁÎb ge tae-i ge īsa ge xoa. “Nēsa ta ge mû, o ta ge ais âtas ai ge ǁnāǁgoe.” Esegieli ge kaise ge buru hâ i. Tsî ǃhūb ai ge ǁnāǁgoe. (Ese. 1:28) Esegieli ge ega ǁnā buruxa ai-īsib xa a ǂâi. Ob ge ǁîb ǂgomǃgâsiba ge ǀgaiǀgaihe. Jehovab ǃanu gagab huib ǀkhab ǁîb di aoǁnâ sîsen-e nî dīǀoaǀoasa.
8-9. (a) Tae-e Esegieli ǀkha ge hā Jehovab ge a mîba bi o îb “khâima”? (b) Jehovaba Esegiela mati ge ǀgaiǀgai ǁîb ǃgom ǁgaumâis ǃaroma?
8 Jehovab ge Esegiela ge mîba: “Khoenôa ǀgôatse, khâimâ, sa ǂaira ai mâ, î ta sats ǀkha ǃhoa.” ǁNā mîmās ge Esegiela ǂhâb ge hâ i ǀgaib. Tamas ka io “gagaba” ge mā îb ǃhūba xu khâi. Esegieli ge ge xoa: ‘Gaga-i ge tita ǃnâ ge ǂgâ tsî ti ǂaira ai ge mâi te.’ (Ese. 2:1, 2) Egab ge ǁîb di aoǁnâ sîsenni hoa-i ǃnâ gere daoǁgauhe “ǃKhūb di ǃommi” xa. ǁNāb ge Elob ǃanu gagaba. (Ese. 3:22; 8:1; 33:22; 37:1; 40:1) Elob gagab ge Esegiela ge ǀgaiǀgai, ǁgaumâis hînab ge a ǃkhōǃoas ǃaroma. ǁNās ge “ǃnâudanaxa tsî karosaǂgao” xa khoen, hîna ge ǁîb da hâba hâ īna aoǁnâbasa. (Ese. 3:7) Jehovab ge Esegiela ge mîba: “Tita ge ǁîn aidi ǃoa-ai karosa aisa nî dība tsi, tsî ǁîn ǃūdi ǃoa-ai sa ǃūsa nî ǃgariǃgari. Sa ǃūsa ta ge diamantǀuis khami nî dī, ǃgareǀuib ǃgâ-ai karosase; ǁîna tā ǃao tamas ka io tā ǃhuri ǁîn ra mûsen ǀgaub xa.” (Ese. 3:8, 9) Jehovab ge Esegiela nēti gere mîba khami i ge ge ī-i. ‘Tā mā-am î-i khoen di ǃnâudanxasiba satsa ǂkhabuǂâi kai. Tita ge satsa nî ǀgaiǀgai.’
9 ǁNās khaoǃgâb ge Elob gagaba Esegiela ǁîb di aoǁnâ sîsenni ǃnâ gere hui. Esegieli ge ge xoa. ‘ǃKhūb [Jehovab] ǃommi tita ai ǀgaisase ge hâ i.’ Kēbo-aoba i ge wekheba ge ū, aoǁnâb nî haisi-amsa ǀoasase ǁkhāǁkhāsen tsî ǁnâuǃāsa. Îb ǁkhoaǂgaosib ǀkha aoǁnâ ǁkhā. (Ese. 3:14, 15) ǁNāpaxūb ge Jehovaba ge mîba bi, îb Kebardǃāba ǃoa ǃgû. ǁNāpab ge ‘gagaba ǁîb ǃnâ ge ǂgâ.’ (Ese. 3:23, 24) Esegieli ge ge aiǂhomisa ī, ǁîb di aoǁnâ sîsen-e tsoatsoasa.
NĒTSĒ DA GE JEHOVAB GAGAB XA RA ǀGAIǀGAIHE
Esegieli ǀkha i ge ī khami tae-e nētsē a huida ǁkha, î da aoǁnâ sîsen-e dī? (10ǁÎ xoaǀgorasa khomai re)
10. Tae-i huiba da ǂhâhâ sida aoǁnâ sîsen-e dīsa? Tsî tae-i ǃaroma?
10 Tae-i huiba da ǂhâhâ, î da sida aoǁnâ sîsen-e dī? ǁNāsa ǃereams ǃaroma ǂâi-oa re, tae-i ge Esegieli ǀkha a īsa. Aoǁnâ sîsenni ǀkhab nî tsoatsoas aiǃâb ge Elob gagab xa, ǂhâb ge hâ i ǀgaiba a māhe o. Esegieli khami da ge nētsē. Aoǁnâ sîsen-e Jehovab gagab huib ǀkha ǀgui a dī ǁkhā. Tae-i ǃaroma? ǁGâuab ge sida ǃoagu toroba ra ǃkham, îb sida aoǁnâ sîsen-e mâ kai. (J.ǂHa. 12:17) ǂGui khoen ge ra ǂgom ǁGâuab kaise a ǀgaiǀgaisasa. Tsî da ǁîba a ǃkham danǁoasa. Xawe sida aoǁnâ sîsenni ǃnâ-ū da ge ǁîba ra dan. (J.ǂHa. 12:9-11) Mâ ǀgaub ǃnâ? Aoǁnâ da ga o, o da ge ra ǁgau. ǁGâuab mâǃoadi xa da ǃaoǃoahe tamasa. Mâ ǃnās hoas hîna da ra aoǁnâs aib ge ǁGâuaba ra danhe. Tae-i xa da ra ǃgāsabahe aoǁnâ ǀgara ǁkhā da a ǃkhaisa da ga ǂan o, sida khākhoen xa da ga mâǃoahe xawe? ǃGāsa i ge a Jehovab ǀgaiba ra mādasa. ǁÎb di ǃanu gagab ǃnâ-ū. Tsî da Jehovab mā-amsa ūhâ ǃkhaisa.—Mat. 5:10-12; 1Pet. 4:14.
11. Elob gagaba tae-e nî dība da? Tsî mati da ǁî-e a hōǀgara ǁkhā?
11 Tae-e da ra ǁkhāǁkhāsen, ǂâi da ga o. Matib ge Jehovaba Esegiela ǂhâb hâ ǀgaiba a mā ǀgausa îb aoǁnâ? Elob gagab ge ǂhâ da hâ ǀgaiba a māda ǁkhā. Î da mâ ǃgomsi-i hoa-i hîna da sida aoǁnâ sîsenni ǃnâ ra hō-i hoa-e dan ǁkhā. (2Kor. 4:7-9) O tae-e da a dī ǁkhā, î da Elob gagaba hōǀgara ǁkhā? ǀGore ǀgara ǁkhā da ge a ǂgomǃgâsib ǀkha, Jehovab sida ǀgorede nî ǁnâu-amsa. Jesub ge ǁîb ǁkhāǁkhāsabega ge ǁkhāǁkhā î gu: ‘ǂGan ǀgara, ôa ǀgara, ǃgubu-am ǀgara.’ ǁNāsa da ga dī, ob ge Jehovaba “ǃanu gagaba ǁnān ǂgan bi rana nî mā.”—Luk. 11:9, 13; ǃNǃkh. 1:14; 2:4.
ESEGIELI ǂGOMS GE ELOBMÎS XA GE ǀGAIǀGAIHE
12. Esegieli 2:9–3:3 ǃoagus ge nē ǂkhanisa mapa xu hā? Tsî tae-e i ge ǃkhōǂgā hâ i?
12 Elob gagab ge Esegiela aoǁnâs ǃaromab ge ǂhâhâ i, ǁkhoaǂgaosiba ge mā. Xawes ge Elobmîs tsîna Esegieli di ǂgomsa ge ǀgaiǀgai. Esegieli ge ǂkhani-e ǃkhō hâ ǃom-e ge mû. (Khomai re Esegieli 2:9–3:3 sa.) Nē ǂkhanisa mapa xu gere ǀkhī? Tae-e i ge ǃkhōǂgā hâ i? Esegiela i ge mati ǀgaiǀgai? ǀKhī da kē re. Nē ǂkhanis ge Elob tronsa xu ge hā. Jehovab ge Esegieli ge ǂguro mû hâ i, haka ǀhomǃgāgu di ǀguiba, ǀnîsi ge sîsenū tsî ǁîba ǂkhanisa ge mā. (Ese. 1:8; 10:7, 20) Nē ǂkhanis ge Elob mîde ge ūhâ i. Gaxu ǀgoraǃgâs di haisi-ams hînab Esegiela khâikhâisenxa ǃkhōsabena nî aoǁnâbasa. (Ese. 2:7) ǁNā haisi-ams ge hoa ǀgamǀkhāgu ǂkhanis digu ai ge xoasa ī, aisǀkhāb tsî ǃgâbǀkhāb ai.
13. Jehovaba Esegiela tae-e ge mîba îb ǂkhanis ǀkha dī? Tsî tae-i ǃaroma i ge ǂkhon i?
13 Jehovab ge ǁîb kēbo-aoba ge mîba, îb nē ǂkhanisa “ǂû” tsî ‘ǁîb ǃnāba ǁîs ǀkha ǀoaǀoa.’ ǁNâuǀnamxaseb ge Esegiela hoa ǂkhanisa ge ǂû. Nē ǃâb ai-īsib diba tae-e gere ǂâibasen? Esegieli aoǁnâb nî kēbosa ǀoasase nî ǁnâuǃās ge ge ǂhâbasa i. ǁÎb nē haisi-amsa nî ǂgoms ge ge ī, îb ǁîs xa ǂkhâǃnâhe tsî aoǁnâ. ǁNāpaxū i ge buruxa xū-e ge ī. Esegieli ge ge ǂanǂui nē ǂkhanis ge ‘dani-i khami ǂkhon isa.’ (Ese. 3:3) Tae-i ǃaroma? Esegieli xa i ge Jehovaba ǂnûǁkhaebas di ǃgôasiba, ǂkhon. Tamas ka io ǃgâi xū-i hînab gere hōǃâ i khami ge ī-i. (Psa. 19:8-11) ǁÎb ge ge ganganxa i. Jehovab ge ǁîba a mā-am o, îb ǁîb kēbo-aose ǃoaba.
14. Esegiela tae-i xa ge hui-e, îb aiǂhumisa tsî ǁîb di ǁgaumâisa ūǃoa?
14 Egab ge Jehovaba Esegiela ge mîba: “Ti mîdi tita ga satsa mîbadi hoade, sa ǂgaob ǃnâ ū, îts sa ǂgaera ǀkha ǃgâ.” (Ese. 3:10) Nē mîmādi ǀkhab ge Jehovaba Esegiela ge mîba. Îb nē ǂkhanis ǃnâ ge xoasa ī mîde ǁîb ǂâis ǃnâ sâu tsî ǂâiǃgâ. Esegieli ge ǁnāsa a dī, o i ge ǁîb ǂgomsa ge ǀgai tsoatsoa. Tsî i ge ǁîb tsîna ǀgaisa haisi-ams khoenab nî aoǁnâbasa ge mā. (Ese. 3:11) Esegieli ge Jehovab di haisi-amsa ǀoasase ǁnāuǃā. Tsî a ǂgom ob ge ge ǂhumisa i, aoǁnâ tsoatsoa tsî aiǃgû ǀgarasa. ǁÎb di ǁgaumâisab nî dīǀoaǀoas kōse.—Psalmdi 19:14 ǀkha ǀgopeǀnō re.
NĒTSĒS GE ELOBMÎSA SIDA ǂGOMSA RA ǀGAIǀGAI
15. Tae-e da “ǂgaob” ǀkha nî ū, mâǀgais ǃaroma?
15 Sida aoǁnâ sîsenni ǃnâ mâǀgais ǃaroma da ge, Elobmîsa nî mā-am îs sida ǂgomsa ǀgaiǀgai ǀgara. Jehovab ra mîmaba da xūn hoana da ge “ǂgaob” ǀkha nî ū. Nētsēb ge Jehovaba Elobmîs ǃnâ-ū sida ǀkha ra ǃhoa. Tae-e da a dī ǁkhā îs Elobmîsa aiǃgû. Tsî sida ǂâidi, tsâsigu tsî xū-e da ra dība ǃaromas tsîna tsâǀkhā?
16. Tae-e da a dī ǁkhā, î da Elobmîsa ǃgâise ǁnâuǃā?
16 ǂÛ-e da ga ǂû, ǁgae tsî hāra os ge sida sorosa ra ǀgai. ǁNās ǁkhās khami i ge Elobmîsa da ga ǁkhāǁkhāsen. Tsî ga ǂâiǃgâ o, o sida ǂgomsa nî ǀgai. ǂKhanis ǃnâ hâ xūna da ge ǂâis ǃnâ nî ūhâ. Jehovab ge ǂhâba hâ î da ǁîb mîs ǀkha ‘sida ǃnāba ǀoaǀoa.’ ǁNās ge ǁîb mîsa ǃgâise ǁnâuǃāsa. Nēsa da ge ǀgores, khomais tsî ǂâiǃgâs ǃnâ-ū a dī ǁkhā. ǂGurose da ge ra ǀgore î da sida ǂgaoga aiǂhomi. Tsî Elob di ǂaiǀgauga hō. Tsî da ge ǁnāpaxū Elobmîs ǃâ-e ra khomai. Sao rase da ge stop tsî ǃgamse khomai da go xū-i xa ra ǂâiǃgâ. ǀAmǂoasa nî tae? ǃNāsase da ra ǂâiǃgâ khami da ge Elobmîsa nî ǁnâuǃā. Tsî i ge sida ǂgomsa nî ǀgaiǀgai.
17. Tae-i ǃaroma i a ǂhâǂhâsa, Elobmîs ǃnâ da ra khomai xūn xa ǂâiǃgâsa?
17 Tae-i ǃaroma i a ǂhâǂhâsa Elobmîsa khomai tsî ǂâiǃgâsa? ǁNās ge nēsi ǂhâ da hâ ǀgaiba ra māda. Î da Gaosib di haisi-amsa aoǁnâ. Tsî hānîǁaeb ǀgaisa ǀgoraǃgâs di haisi-amsa aoǁnâ. Jehovab di mâǂoa ra ǀgaugu xa da ga ǂâiǃgâ. O i ge ǁîb ǀkha da ūhâ ǀhōsagusisa kai tsî nî ǀgai. Tsî da ge ǂkhon xū-i tamas ka io kaise ǃgâi xū-e nî hō. Nē i ge ǂgānagaba xu hâ ǂkhîb tsî ǂâuxasib tsîna.—Psa. 119:103.
MÂǀGAISA DA GE RA ǂKHÂǃNÂHE
18. Aoǁnâba da ra khoena tae-e nî ǂanǃgâ? Tsî tae-i ǃaroma?
18 Esegieli ge ge kēbo-ao-i, xawe sida ose. Xawe da ge aiǃgû tsî haisi-ams hînab, Jehovaba ǁîb Mîs ǃnâ xoa-mâi hâsa ra aoǁnâ. Aoǁnâ sîsenni ǁîb ǂâis ǃoagu nî dīǀoaǀoahes kōse. ǀGoraǃgâs ǁaeb ga hā, on ge aoǁnâba da gere khoena ǃaroma-e ūhâ tide mîsa. ǁÎn ge ǃkhâikhomsa hō tama hâ ti. Tamas ka iob ge Eloba ǁîn ǀkha ǁae tama hâ isa. (Ese. 3:19; 18:23) Xawen ge nî mûǂan, nē haisi-ams hîna da ra aoǁnâs Eloba xu hâsa.
19. Tae-e ǀgaiba nî māda, î da sida aoǁnâ sîsen-e dīǀoaǀoa?
19 Tae-e ǀgaiba nî māda, î da sida aoǁnâ sîsen-e dīǀoaǀoa? ǃNona xūn hîna ge Esegiela a ǀgaiǀgain ge a huida ǁkhā. Aoǁnâ ǀgara da ge ra Jehovab xa da sîhe hâsa da a ǂan. Tsî da ǁîb ǃanu gagab tsî Elobmîs tsîn xa ra ǀgaiǀgaihe amaga. Jehovab huib ǀkha da ge ra ǂkhâǃnâhe sida aoǁnâ sîsen-e dī. Tsî ‘ǀams kōse’ mâǀgaisa.—Mat. 24:13.
65ǁÎ ǁNAETSANAS Aiǃgû re!
a Nē ǁkhāǁkhāǃâs ǃnâ da ge ǃnona xūn. Hîna ge Kēbo-aob Esegiela a huina nî ǃhoaǃgao. Îb ǁîb di ǁgaumâis aoǁnâ sîsenni disa dīǀoaǀoa. Jehovab ge mati ǁîb di kēbo-aoba a hui ǀgausa da ra ǃhoaǃgao. Khami da ge sida di ǁkhoaǂgaosiba nî ǀgaiǀgai. Tsî Jehovab ge sida nî hui, î da sida di aoǁnâ sîsen-e dī.