Tita ge 1934 ge ǃnae tsî ti ǁgûra ge Switserlanda xu Timmins ǀkha ge doe, mainsa ge ūhâ i ǃās Ontariosa ǃoa Kanadab ǃnâ. Ti mamas ge 1939 ǃKhē-xu ǂgo-omma ge khomai tsoatsoa tsî Jehovab ǃoaba-aon ǀhaodi tsîna gere hâǃnâ. ǁÎs ge tita tsî ti ǃnani ǃgâsan tsîna ge ūsao. ǁÎs ge ǃkhae ǁaeb ǃnâ ge Jehovab di ǃoaba-ao kai.

Ti dadab ge ge ǂkhî tama hâ i ti mamas dī mîǁguib xa, xawes ge ǁîsa amaba ge ǀnam i tsî ge mâǀgai. ǁÎs ge nēsa 1940 kurib tsoatsoas ǃnâ ge dī Jehovab ǃoaba-aon sîsenni ge ǂkhāsa i hîna Kanadab ǃnâ. ǁÎs ge ti dadaba ǃgâi ǀgaub tsî ǃgôasib ǃnâ gere hâ-ū, ǁgai xūnab gere mîsi xawe. ǁÎs ǃgâi aiǁgaus ge tita tsî ti ǃgân tsîna ge hui î da Jehovaba ǃoabasa ǁhûi. Kaise da ge ge ǂkhî i ti dadab ge dawa tsî sida omarisa ǃgâise gere hâ-ūsa.

Tita ge 1950 Theocracy’s Increase ǀkharib kai ǀhaosa ge hâǃnâ Amerikab ǃnâ. Kaise ta ge ge ǂkhâǃnâ-e ǃnāsase Jehovab ǃoabas ǃnâ dīsa, ǃhūbaib ǂhawaseba xu ra hā ǃgâsana ǀhao-ū tsî ta ge Gilead skola ǂgâ hâ ǃgâsan ra dîǃnâhe ǀgausa ǁnâu o. ǁNās khaoǃgâ i ge ǀoasa ǁaeba aoǁnâs turaba ge ǀgai. Oms ai ta ge oasi o ta ge ǁnaetisa aimâba-aose ge xoaǂgāsen. Kanadab ǁnâub beros ge xoa-oa tsî ge ǀapemāde î ta aibe ǁāǁnâhe. Tsî ta ge Oktoberi 1, 1950 ǃnâ ge ǁāǁnâhe. ǀGui ǁkhâba ǃkharu tsî ta ge ge ǁnaetisa aimâba-ao kai tsî ti ǂguro ǁgaumâisa Kapuskasings ǃnâ ge ǃkhōǃoa. ǁNā ǃās ge ti omaris gere hâ ǃāsa xu kaise ge ǃnū i.

ǁNâub beros ge 1951 Jehovab ǃoaba-aon Frans gowaba ra ǃhoana ge ǂgan īn Quebeki  ǀkhariba ǃoa doe. Aoǁnâ-aon kai ǂhâsib ge ǁnāpa ge hâ i. Frans gowab tsî ǀapaǃao gowab tsîna ta ge ge ǂan i, ǁnā-amaga ta ge ǁnā ǁgaumâisa ge ǃkhōǃoa tsî Rouynsa ǃoa ge ǁgaumâihe. ǁNāpa ta ge khoe-e ge ǂan tama hâ i. Aisi ta kō mî khami ta ge mîbahe ta ge omsa ǃoa ǀgui ge ī xawen ge hoa xūna ǃgâise ge ǀamǂoa. Marseli tsî tita tsîn ge ge ǃgâi ǀhōsagu kai, saora haka kuriga ta ge ǁkhoaxase Quebeki ǃnâ ge ǃoaba. ǁNās khaoǃgâ ta ge ge ǀō-aisa aimâba-ao kai.

Quebeki ǃnâ ta hâ hîna ta ge 26ǁî klas Gileadi disa ǃoa ge ǁkhauǂûi-e Suid Lansing Amerikab ǃnâ. Februari 12, 1956 ta ge ge toa tsî ta ge Ghana, West Afrikaba ǃoa ge ǁgaumâihe. b Ī ta nîs aiǃâ ta ge ǁkhapa Kanadaba ǃoa ge oa, ti ǃnari-ū ǂkhanin Ghanaba ǃoa-oas din nî ǃgâis kōse.

Tita ge ǁnā ǂkhanina 7 ǁkhâka Torontos ǃnâ ge ǃâu. ǁNā ǁaeb ǃnâ ta ge Crippsi omaris khoen ǀkha ǀgui oms ǃnâ gere hâ tsî ta ge ǁîn ǀgôas Sheila ti ǀon hâs ǀkha ge ǂangu tsoatsoa. Sîm ge ge ǀnamgu. ǃGammeba ta nî ǂgans aiǃâ i ge ti ǃnari ǂkhanina ge ǂgâxa. Sheilas tsî tita tsîn ge ǁnās xa ge ǀgore tsîm ge ge mîǁgui î ta ti ǁgaumâisa ǃoa ī. Xawem ge ge mîǁgui îm sîǂkhanide xoaba gu tsî kō, īǁkhā i asa ǀnîsim hānîǁaeb ǃnâ nî ǃgammesa. ǁNā mîǁguib ge ge supu tama hâ i xawem ge ega ge mûǂan nēs ge ǂhanu isa.

ǁKhâb khaoǃgâ ta ge Accra Ghanas ǃnâ trains, ǂgaus tsî ǁnāpaxu kai anis ǀkha ge sī. ǁNāpa ta ge ǀkharib mûǂam-aose ge ǁgaumâihe. Ghanab tsî ǁîb ǂnamipe hâ ǃhūga ta ge gere sari, Ivory Coasti tsî Togolandi tsîna (nēsi Togo ti ǂansa). ǃNāsa ǁaeba ta ge ǁnâub beros autos ǀkha ǀguri gere ǃnarimâ. ǃGâsana saris xa ta ge kaise a ǃgâibahe.

Wekheb ǀams ai ta ge ǂkharis kai ǀhaos tawa ǃâna ge ūhâ i. ǀKharib kai ǀhaodi nî dī ǃnâhe saal-e da ge ge ūhâ tama hâ  i. ǁNā-amagan ge ǃgâsana ǂāgu ǀkha gere om tsî palm haiga ǀgapiga gere ǁgui în ǃgâ-aona soresa xu ǁkhaubahe. ǂÛ-e ra ǃkhais tawa i ge ǃkhaiǃkhaiǃnâhe nî xū-e ge ǀkhai i amagan ge ǃgâsana xamanina ǀgūse gere ūhâ. Tsî ǁnā ǁaeb ai gere ǂā în ǀkharib kai ǀhaosa hâǃnâ ǃgû sī hâ khoena ǂûmahe ǁkhā.

ǀNî ǀkhenxa xūn ge ǁnā ǀkharib kai ǀhaodi ai gere i. Sîsabe ǃgâsab Herb Jenningsi  c ǃhoasa ra mā hînas ge gomasa ǂûn ra dīhe ǃkhaiba xu ge ǃkhoe. ǃHoa-aob mâ ǃkhais tsî khoen ǁaegus ge gomasa ge ǃkhoe. Herbi ge ge ǃhoa ǀû tsîs ge gomasa kā hâ khami gere mûsen. Xawe gu ge ǀgaisa haka ǃgâsaga gomasa ge ǃkhō tsî ǂûn ra dīhe ǃkhaiba ǃoa ge i ū, ǃgâ-aon ra ǁabuǃom hîna.

Wekheb ǁaegub ǃnâ ta ge The New World Society in Action ti hâ muvisa ǀgūse hâ faramdi ǃnâ gere ǁgau. ǁNāsa dīs ǃaroma ta ge ǃuri lapiba ǀgam paalkha ǁaegu gere mâi tamas ka io ǀgam haira ǁaegu tsî ǁnā muvisa gere ǁgau. ǃGaroǃās khoen ge ǁnāsa ge ǀnam i. ǂGuin ǃaromas ge nēsa ge ǂguro muvi ī ǁîn ûib ǃnâ. ǁĀǁnâhe ra khoenan gere mû on ge ǃgarise gere ǁapuǃom. ǁNā muvide gere kō khoen ge ge mûǂan Jehovab khoen a ǀguiǃnâxa ǃkhaisa ǃhūbaib ǂhawase.

ǀGam kurina ta Afrikab ǃnâ hâs khaoǃgâ ta ge ge ǂkhî i, 1958 ge hâ i ǃhūbaib ǂhawase ǀkharib kai ǀhaosa Amerikab ǃnâ hâǃnâsa. Kaise ta ge gere ǃgâiaǂgao Sheilas ǀkha ǀhaosa ǁîs ge Quebeka xu ge ǀkhī, ǁnāpas ge aimâba-aose gere ǃoaba. Sîǂkhanidem ge noxopa gere xoaba gu xawem ge nēsisa ǁkhapa ǀguiba ge hâ i, ǁîsa ta ge ge ǂgan īs ǃgammete tsîs ge ǁnāsa ge ǃkhōǃoa. ǃGâsab Knorra d ǃoa ta ge ge xoa tsî ge dî Sheilas Gilead skola tita ǀkha hâǃnâ ǁkhāsa tsî Afrikab ǃnâ tita ǀkha sī ǃoaba. ǁNā ǂgansab ge ge ǃkhōǃoa. ǀAms ais ge Sheilasa Ghanab ǃnâ ge ǀkhī. Accras ǃnâm ge Oktoberi 3, 1959 i ǃnâ ge ǃgamme. Hōǃâm ge ge Jehovab ge ǀkhaemisa, ǁîbam ge ǂgurose sîm ûib ǃnâ gere mâi amaga.

Kameroona ǃoam ge 1961 ge sîhe. ǃGâsagu  ge ge ǂgante î ta ǀasa ǁnâub berosa tsoatsoas ǀkha hui. ǁNās ǀkha da ge kaise ge ǁaxa i. Kamroonni ǃnâ da ge sîsene gere mûǂam amaga ta ge ǂgui xūna ge ūhâ i ǁkhāǁkhāsen ta nîna. ǁNāpaxu i ge 1965 Sheilasa ge ǀgamǀkhā. Kaise i ge ge ǃgom i ǁgûn ase mûnan-aisensa. Xawem nē ǀasa ǁgaumâisa ǃoa ra mûǂui tsî Kanadaba ǃoa-aosa ra ǀapeǁgui ǁaeb ǃnâ î ge kaise tsûaǂgaoxa xū-e ge ī.

ǀGôaro i ge ǃnae tama i hâ hîna ge ǁō. ǀAedī-aob ge ge mîba mî, aore ǀgôarobam gere ǃâubasen ǃkhaisa. ǁNās ge 50 kuriga ǃkharu tsî ge ī xawem ge ǁnāsa tātsē ǀuru tide. Ī ge xū-i ge kaise gere tsûaǂgao kaimi xawem ge ǃhaoǃhūb ǃnâm ge ūhâ i ǁgâumâis kaisem ge ǀnam īs ǃnâ ge hâ ǀgara.

Kameroonni ǃnâ î ge ǃgâsana hoaǁae gere ǁgâiǀāhe, ǂgīǂgōsi xūn ǃnân ge ǃâ-e ūhâ ǂgao tama hâ i amaga. Presidenti ǁhûis ǁaeb ǃnâs ge nēsa ǃnāsase ge ǃgom i. ǃÂubasen tama da hâ xū-i ge Meib 13, 1970 ge ī Jehovab ǃoaba-aon sîsenni ge ge ǂkhāhe. ǂHanub ge sida ǀasa ǁnâub berosa ge ū, goro ǁkhâgu airosi ǀnai da doeǂgâhâs khaoǃgâ. Wekheb ǃnâ î ge hoa sîsaben, Sheila hâm tsîna ǃkhōǂgā hâse ǁnā ǃāsa xu ge ǃkhaeǂûihe. Kaise î ge ge ǃgom i ǃgâsana ǁnāxusa, ǁîna da ge kaise gere tsâba. Tsî gere ǂâiǂhansen tae-i ǁîn ǀkha nî īsa.

Saora ǃnani ǁkhâna da ge Fransi ǁnâub beros tawa ge hâ i. ǁNāpa da ge ǁkhā da a ī hoa-e gere dī tsî Kameroonni ǃnâ hâ ǃgâsan ǂhâsiga gere kōǃgâ. ǁNā kurib ǃnâm ge Nigeriab ǁnâub berosa ǃoa ge ǁgaumâihe tsî Kameroonni ǃnâ hâ sîsen-e gere kōǃgâ. Nigeriab ǃnâ hâ ǃgâsan ge ǃgâise ge ǃkhōǃoa da tsî da ge ǁnāpa ǀoro kurina gere ǃoaba.

Kaise ǃgom mîǁguibam ge 1973 ge dī. Sheilas ge kaise ǁkhōǁkhōsa ǂurusib ǃgomsiga gere hōǃâ. Amerikab ǃnâm ǀkharib kai ǀhaos tawa hâ hînas ge ā tsî ge mîbate: “Aiǃgû tsî ta ge nēm ra dī xū-e a dī ǁoa. Kaise tsau tsî ta ge ǃnāsa ǁaeba ǀaesen hâ.” ǁÎs ge tita ǀkha Afrikab Westes ǃnâ 14 xa ǃnāsa kuriga ǃoaba hâ. Kaise ta ge ǁîs ǂgomǂgomsa ǃoabas ǃaroma ge ǂnîsa ī xawe î ge ge ǂhâbasa i îm ǀnî ǀkharaǀkharana dī. Nēs xa ǃhoaǃgao tsî gaxusem ǀgore toa hâs khoaǃgâm ge ge mîǁgui îm Kanadaba ǃoa doe-oa îs ǁîs ǂurusiba ǃgâise kōǃgâ. Sîsabe ǁgaumâis tsî ǀoasa ǃoabas tsîna ǁnāxus ge kaise ge ǃgom i. ǁNāb ge kaise tsûaǂgaoxa mîǁguib hînam ge dība.

Kanadab ǃnâm ge oasīs khoaǃgâ ta ge sîsene ge hō, gaxu ǁaeba ta ge ǂan i ǀhōsab autodi ra kuruhe ǃkhaisa ge Torontos ǃnâ ūhâ ība. ǀHupiǂûihe ra omsa matare tsîm ge ǀnai sîsenūhe hâ xūna gere ǁama, îm tā sîm ûiba suruteb ǀkha tsoatsoa. Sîm ûibam ge ǀguiǃgupuse gere ūhâ ǂgao, ǀoasa ǁaeba ra dīhe sîsen-e ǃoam ǀnîsi nî oa amaga. Kaisem ge ge buru, ǁnāsam ge ǃâubasenam geres xa ǃkhae ǁaeb ǃnâ dī o.

 Norval, Ontarios ǃnâ gere dī-ūnuhe ǀasa sali tawa ta ge Satertaxtsēde gere hui. ǁAeroba ǃkharu tsî ta ge kai ǀhaodi ǃoaba ǃkhaib mûǂam-aose ge ǁgâumâihe. Sheilas di ǀaeb mâsib ge gere ǃgâi tsîm ge ge ǂâi ǁnā ǀasa ǁgaumâisam a dīhō ǁkhā ti. ǁNā-amagam ge kai ǀhaodi ǃoaba ǃkhaib oms ǃnâ Junib, 1974 ge doeǂgâ. Kaisem ge ge ǂkhî i ǀoasa ǁaeba ǃoabas ǃaroma.

Ganganxase î ge Sheilas ǂurusiba gere ǃgâi. ǀGam kuriga ǃkharu tsîm ge ǃnarimâs sîseni di ǁgaumâisa ge ǃkhōǃoa. ǁNā ǀkharib ge Manitobas ǃnâ ge hâ i Kanadab ǀkharib kaise ǃkhaise ǂansaba. ǁKhāǁkhāsenam ge ge mâpam ra ǃoabas ǂhâǂhâsa tamasa xawe a ǂhâǂhâsas ge aiǃgû tsî Jehovaba ǃoabasa mâpa ǀguim ga hâ xawe.

ǀNî kurikam ǃnarimâ sîsenni ǃnâ hâs khaoǃgâm ge 1978 Kanadab betelsa ǃoa ge sîhe. ǃNupu ǁae-e ta ǁnāpa hâ hîna ta ge tsûtsûsa xawe ǂhâǂhâsa xū-e ge ǁkhāǁkhāsen. ǁGâumâihe ta ge ge î ta īri tsî ǃnonadisi haigu xa gaxu ǃhoasa Frans gowab ǃnâ Montreals ǃnâ ge hâ i ǀō-aisa ǀhaos tawa mā. Tsûaǂgaoxase î ge ǃgâ-aona ge ǃgomba i ti ǃhoas ǃnâ gaxuse ǃgâiǃgâibasensa ūhâsa. Tsîb ge ǀhaohâga ra kōǃgâ departements ǃgâsaba ǁnamasa ge māte. ǁNāpaxu ta ge nēsi ra mûǂan ǃgâi ǃhoa-ao tama ta hâsa. ǁNā ǁnamasa ta ge kaise ǃgâise ge ǃkhōǃoa tama hâ i. Sikham ǃhoaǀhaos ge ǃgâise ge ǀam tama hâ i, kaise ta ge ge ǁaixa hâ i. ǂÂi ta ge gere ǁîb tsū xūn ǀguina ra ôa tsî ti dītsâte mû tamasa. Dīsā tsî ta ge ǁnamasa ra mā khoe-i xa ta ra tsâ ǀgaub i ge kō.

Tsērode ǃkharu tsî i ge ǁnâub kometes ǃgâsaba ī ge xū-i xa tita ǀkha ge ǃhoa. ǂAnǃgâ ta ge ge ǁnamasa ta ge ǃgâi tamase ūǃoa tama hâ isa tsî ta ge ǃhausen ta ra ǃkhaisa ge mîba bi. ǁNās khaoǃgâ ta ge ǁnamasa ge māte ǃgâsab ǀkha ge ǃhoa. Tsîb ge ǃgâi ǀgaub ǃnâ ti ǀûbaba ge ǃkhōǃoa. Ī ge xū i ge ge ǁkhāǁkhāte matikōse i a ǂhâǂhâsasa î ta ǃgamǃgamsen xa, ǁnāsa ta ge tātsē ǀuru tide. (ǂKhm. 16:18) Jehovaba ǃoa ta ge nēs ǃaroma ǂguiǃnāde ge ǀgore tsî ta ge ge mîǁgui tātsē ta ǁnamasa ǃgâi tama ǀgaub ǃnâ ūǃoa tidesa.

Kanadab ǁnâub beros tawa ta ge nēsisa 40 xa ǃnāsa kuriga hâ 1985 xu. Aiǂhanuba ta ge ge ūhâ ī î ta ǁnâub kometes ǁanib ase ǃoaba. Ti taras Sheilas ge Februarib 2021 ge ǁō. ǁÎsa ta ge kaise ǁkhore hâ tsî ta ge ǁnās ǂam-ai ti ǂurusib ǃgomsigu tsîna ūhâ. Xawe ta ge Jehovab ǃoabas ǃnâ ǂgui xūna ra dī tsî a ǂkhî, “ǁaeb ra ǃkharu ǀgauba ta ge hōǃâ tama.” (Aoǁn. 5:​20, NW) ǂGui ǃgom xūna ta ge ti ûib ǃnâ hōǃâ xawe ta ge ǃnāsa ǃgâi xūn, ǃnāsa ǃgâiaǂgoaba ra mātena ge hōǃâ. Jehovaba ti ûib ǃnâ ǂgurose mâi tsî 70 kuriga Jehovaba ǀoasase ǃoabas ge kai mādawa-amsa. ǀGore ta ge ra î-i sida ǃgâsana aiǃgû tsî ǁîn tsîna Jehovaba ǂgurose ǁîn ûib ǃnâ mâi. Tita ge ra ǂgom ǁîn tsîn nî ǃgâiaǂgao ǃkhaisa tsîn mādawa-amsa nî hōsa. Nēti i ǃgâi ûib ge Jehovaba da ga ǃoaba, o ǀgui a īǁkhā.