1-2. (a) Ûiba mati Judeab ǃnâ ge ī-i Apostel Paulub ge sîǂkhanisa Hebreǁîna xoaba o? (b) Nē sîǂkhanisa ǁîna mati ǁnā ǁaeb ai ge hui?

 JESUB ge 33 kurib ǃnâ ǁōs khaoǃgân ge Xristeǁîn, Jerusalems tsî Judeab ǃnâ gere hâna ǂgui ǃgomsina gere hōǃâ. Xristeǁî ǀhaohâb ge tsoatsoas khaoǃgân ge Xristeǁîna ǀgaisase gere ǁgâiǀāhe. (ǃNǃkh. 8:1) Xristub saosaben ge 20 kuriga ǃkharu tsî ǃâtsūǀkhāb tsî ǀâsib tsîna gere hōǃâ. (ǃNǃkh. 11:​27-30) Xristeǁîn ge 61ǁî kurib ǃnâ ǁgâiǀāhe tama hâ i, hānîǁaeb ǃnân nî ǁgâiǀāhe khami. ǁNā ǁaeb ǃnân ge sîǂkhanisa Apostel Pauluba xu ge hō, ǀgūǁae nî ī xūn ǃaroma gere aiǂhuminisa.

² Hebreǁî sîǂkhanis ge ǃgâi ǁaeb ai ge sîhe, Xristeǁîn gere hōǃâ ǂkhîb hâhâ tide amaga. Paulub ge ǁnā Xristeǁîna ǃgâi ǀapemāsa ge mā, ǁîna nî huisa în hā nî kai ǁgâiǀāba mâiǀgai. Jodeǁîn hîkākās Jesub ge mîmâis ge gere ǀgū. (Luk. 21:20) Xristeǁîn Judeab ǃnâ gere hân tsîn ge nē hîkākās mâǁae nî tsoatsoasa ge ǀū ī. Xawen ge ǁnā Xristeǁîna ǃgau hâ ǁaeba ge sîsenū ǁkhā ī în aiǂhumisen ǁîn ǂgoms tsî mâǀgais tsîna omkhâisa.—Heb. 10:25; 12:​1, 2.

3. Tae-i ǃaroman nētsē Xristeǁîna Hebreǁî sîǂkhanis ǃnâ ǃgâiǃgâibasensa ūhâ?

³ ǀGūǁae da ge Hebreǁîn gere hōǃâs xa ǃnāsa ǁgâiǀāba  nî hōǃâ. (Mat. 24:21; J.ǂHa. 16:​14, 16) Hā re î da Jehovab ge ǁnā Xristeǁîna a mā ǀapemāde ǃhoaǃgao, sida tsîna a hui ǁkhāde.

“ǀOASASIBA ǁGŪBA”

4. Mâ ǃgomsinan ge Jode Xristeǁîna gere hōǃâ? (Ai-īsiba mû re.)

⁴ Jode Xristeǁî kai gen ge kai ǀkharaǀkharana gere dī tsî nēs ge ge supu tama hâ i. Jodeǁîn ge Jehovab ǁhûisa khoen ase ge ǂansa i. ǂGui kurinas ge Jerusalemsa ge ǂhâǂhâsa ǃkhai i. Jerusalemsa gere ǂnûǁkhaeba gao-aob ge ǁnāpaxu gere ǂgaeǂgui. Tsîn ge Jehovaba gere ǃoaba ǂgao khoena ǁnāsa tempeli tawa gere dī. Hoa ǂgomǂgomsa Jodeǁîn ge Moseb di ǂhanuga gere sao, ǁîn ǂgaeǂgui-aon gere ǁkhāǁkhāna. ǁNā ǁkhāǁkhādi ge ǂûs, aorekhoe sorosa ǃgaos xa hâ ǂâiǀgaugu tsî matin nau ǃhaodi ǀkha nî hâ ǀgaus xa gere ǁkhāǁkhā. Jesub ǁōb khaoǃgâb ge Jehovaba tempeli tawa gere dīhe ǁguibade ge ūǃoa tama hâ i. ǁNā-amaga î ge Jodeǁî kai ge Xristeǁîna ge supuba tama hâ i ǁîn ǃoaba ǀgauba dawasa. (Heb. 10:​1, 4, 10) ǀGaisa ǂgomsa ge ūhâ i Xristeǁîn, Apostel Petrub khamin ge nē ǀkharaǀkharana dīs xa ge ǃgombahe ī. (ǃNǃkh. 10:​9-14; Gal. 2:​11-14) ǁÎn di ǀasa ǂgoms ǃaroman ge ǁnā Xristeǁîna Jodeǁî ǂgaeǂgui-aogu xa gere ǁgâiǀāhe.

5. Tae-en ga Xristeǁîna ǂanbasen hâ?

⁵ Judeab ǃnâ ge hâ i Xristeǁîn ge ǀgam ǃnâgu groep ra khoen xa gere mâǃoahe. Jodeǁî ǂgoms ǂgaeǂgui-aogu ge ǁîn ge Jodeǁî ǂgomsa ǁnāxu khami gere tsâ. ǀNîn ǀhaohâb ǃnâ ge hâ īn ge gere mî Xristeǁîn aiǃgû tsî Moseb ǂhanuba nî saosa, ǀnîsin ge ǁgâiǀāba xu gere ǂgōsen ǂgao amaga. (Gal. 6:12) Tae-e Xristeǁîna ga hui hâ în ǂgomǂgomsase Jehovab ǃoagu hâ?

6. Pauluba ǃgâsana tae-e ge ǂkhâǃnâ dīsa? (Hebreǁîn 5:14–6:1)

 ⁶ ǁÎb sîǂkhanis Hebreǁîna ǃoab ge xoas ǃnâb ge Pauluba ǃgâsana ge ǂkhâǃnâ în Elobmîsa khomai tsî ǂâiǃgâ. (Khomai re Hebreǁîn 5:14–6:1 sa.) Hebreǁî xoade sîsenū tsîb ge Pauluba ge ǁguiǃā Xristeǁîn ge Jehovaba gere ǃoaba ǀgaub ge ǃgâi isa, Jodeǁîn ge Jehovaba gere ǃoaba ǀgauba xu. a Paulub ge Xristeǁîna ge ǂkhâǃnâ în Elobmîsa ǂan tsî ǃgâise ǁnâuǃā, în ǂhanu tama ǁkhāǁkhāde xu ǂgōsen.

7. Mâ ǃgomsina da nētsē ra hōǃâ?

⁷ Hebre Xristeǁîn khami da ge sida tsîna nētsē ama tama ǂhôan tsî ǂâi ǀgaugu, Jehovab daoǁgaudi ǃoagu hâna ra hōǃâ. ǀNî khoen ge ra mî, Jehovab ǃoaba-aon ǂhanu tamasa Elobmîs ǃnâ hâ ǁgaragu ǁgoe-ugub xa hâ gan ra ǁnâuǀnam amaga. Khoen ǂâiǀgaub ge Jehovab ǂâiǀgauba ra mâǃoa. (ǂKhm. 17:15) ǁNā-amaga î ge a ǂhâǂhâsa î da ǃgâi tama ǂâiǀgauba mûǂan tsî ǂgōsen.—Heb. 13:9.

8. Tae-e nî hui da î da Xristeǁîn ase aiǃgû tsî gagasise ǀgai?

⁸ Paulub ge Hebre Xristeǁîna ge mîba în ǁîn Xristeǁî ǀgauba ǃgâiǃgâi tsî da ge sida tsîna ǁkhā xū-e nî dī. Nēs ge ra ǂâibasen Elobmîsa da ge ǃgâise nî ôaǃnâ î da Jehovab ǂâiǀgauba ǃgâise ǂan. ǁĀǁnâhe da gas khaoǃgâs tsîna da ge nēsa nî dī ǀgara. Matikōse da ga gaxuse amab ǃnâ hâ xawe da ge hoa da Elobmîsa tsēkorobe ôaǃnâ tsî nî khomai. (Psa. 1:2) Tsēkorobe Elobmîsa ôaǃnâs ge sida ǂgomsa nî ǀgaiǀgai. Paulub ge ge mî Hebre Xristeǁîn ge nē ǀgauba nî ūhâ.—Heb. 11:​1, 6.

‘ǂGOMSA ŪHÂ ÎB SADA ÛIBA SÂUHE’

9. Xristeǁîna tae-i ǃaroma ǀgaisa ǂgomsa ge ǂhâ hâ i?

⁹ Hebre Xristeǁîn ge ǀgaisa ǂgomsa ge ǂhâhâ i, în ûiǃkharu ǁkhā ǁgâiǀāb ga Judeab ǃnâ hā o. (Heb. 10:​37-39) Jesub ge ǁîb sao-aona ge ǃkhâikom, Jerusalems ga toroǂnubidi xa xāǂgāhe on ǁîsa xu nî ǂoasa. ǁÎb ǀapemās ge hoa Xristeǁîna ǃoa ge hâ i, nēsin ga Jerusalems ǃnâ hâ tamas ka io Jerusalems ǃauga hâ xawe. (Luk. 21:​20-24) Toroǂnubis gere ǁnāǂam nî, on ge khoena mīrga ūhâ ǃāsa ǃoa gere ī în ǁkhaubahe. ǁNā-amaga î ge ǃkhomga ǃoa īsa ǃgâi tama ǀapemās khami gere mûsen tsîn ge ǁnās ǀkha ǀgaisa ǂgomsa ge ǂhâhâ ī în Jesuba ǁnâuǀnam.

10. ǀGaisa ǂgomsa Xristeǁîna tae-e ga dī kai hâ? (Hebreǁîn 13:17)

¹⁰ Hebre Xristeǁîn ge ǂgomǃgâsiba ge ǂhâhâ ī, Jesub gere sîsenū ǃgâsaga ǁnâuǀnamsa. ǂGaeǂguira ǃgâsagu ge daoǁgausa ge mā matin ǁnā ǃāsa xu nî ǂoas tsî matin ǁnāsa nî dīsa. (Khomai re Hebreǁîn 13:17 sa.) Apostel Paulub ge ǁîb ǃgâsana ge mîba în ǂgaeǂguira ǃgâsaga “ǁnâuǀnam.” ǁÎb ge ge ǂâibasen tama hâ i ǀhaohâb ǃûi-aogan nî ǁnâuǀnamsa, ǁnāsan nî dī amaga ǀguis ose xawe ǁîgan ra ǂgomǃgâ amaga. ǁNā-amagan ge Hebre Xristeǁîna ga  ǁkhāǁkhāsen hâ în ǀhaohâb ǃûi-aoga ǂgomǃgâ tsî ǁîgu daoǁgaude sao-ai, ǁgâiǀāb nî hās aiǃâ. Xristeǁî-i ga ǀhaohâb ǃûi-aoga ǃnomsa i a ǁaeb ǃnâ ǁnâuǀnam, o î ge nî supu ǃgom ǁaegu ǃnâ ǁîga ǁnâuǀnamsa.

11. Tae-i ǃaroma î ǀgaisa ǂgomsa Xristeǁîn ǃaroma nētsē ǂhâǂhâsa?

¹¹ Nētsē da ge sida tsîna ǂgomsa ǂhâhâ, Paulub sîǂkhanisa ge ǃkhōǃoan khami. Nē xūn di ǀams nî hāsa ǂgom tama khoen ǁaegu da ge ra hâ. ǁÎn ge nē xūna da ra ǂgom amaga ra ǃhō da. (2Pet. 3:​3, 4) ǁNās xōǀkhās ge Elobmîsa kai ǁgâiǀāb nî ī ǀgaub xa ra mîba da, xawe î ge noxopa ǂgui xūna hâ ǀū da a na. ǀGaisa ǂgomsa da ge ǂhâhâ nē xūn di ǀams ǂhanu ǁaeb ai nî hāsa tsîb Jehovaba nî kōǃgâ dasa.—Hab. 2:3.

12. Tae-e nî hui da î da kai ǁgâiǀāba ûiǃkharu?

¹² Sida di ǂgomsa da ge nî ǀgaiǀgai, Jehovab “ǂgomǂgomsa tsî ǁnâuǃāxa” ǃgāba ra sîsenūsa î gu daoǁgau da. (Mat. 24:45) Kai ǁgâiǀāb tsoatsoas ǃnâ da ge ǀnîsi sida ûiga nî sâu daoǁgaude nî ǃkhōǃoa, Hebre Xristeǁîn ge Romeǁî toroǂnubis ge Jerusalemsa xāǂgā o a hō ti khami. Kaise î ge a ǂhâǂhâsa î da Jehovab ǀapeǂhumis ǃnâ ra ǂgaeǂgui ǃgâsaga ǂgomǃgâ. ǁÎgu daoǁgausa ǂgomǃgâsib ǀkha kai ǁgâiǀāb ǃnâ saosa da ge ǃâubasen tama, nēsi da ga ǁîgu daoǁgaude saos xa ǃgombahe o.

13. Tae-i ǃaroma î ge Hebreǁîn 13:5 ǃnâ māsa daoǁgausa ǂhâǂhâsa i?

¹³ Hebre Xristeǁîn ge daoǁgausan ǃâu hâ ǁaeba ǀguiǃgupu ûib tsî “mari ǀnamxasib” tsîna ǃkham ǃoasa ge ǂhâhâ i. (Khomai re Hebreǁîn 13:5 sa.) ǀNîn ge ǃâs tsî ǀgâsib tsîna gere hōǃâ. (Heb. 10:​32-34) Māsenxasen ge ǃgom ǁaega gere mâǀgai xawen ge ǀnîna ǀnîsi ǃnāsa mari-e hōǂgās tsî tsūǃgâb tamas ka io ǃâtsūǀkhāba xu ǁkhaubasens ai ǁîn ǂâisa gere ǂnûi. Xawe mari-i ge ǁîna ga ǁkhauba tama hâ, Jerusalems gere hîkākāhe ǁaeb ǃnâ. (Jak. 5:3) Mari-e ǀnam khoen ge kaise nî ǃgombahe ǁîn oman tsî ūn hâ xūna ǁnāxu tsî ǃkhoebēsa.

14. ǀHaoǀhao da hâ xūn xa da ga ǂâi, os ǀgaisa ǂgomsa mati sida mîǁguiga nî tsâǀkhā?

¹⁴ ǀGaisa ǂgomsa da ga ūhâ Jehovab ǀgūǁae eloxoresa ǃhūbaiba nî hîkākāsa, o da ge ǂgui xūn tsî ǃnāsa mari-e ūhâs sida ûib ǃnâ ǂhâǂhâsa ti ǂâi tide. Kai ǁgâiǀāb ǃnâ i ge mari-e xū-e ǂâibasen tide. Elobmîs ge ra mî: “ǁÎn ge ǀhaiǀurib âna ǃgangu ai ǀapob khami nî aoxū. . . ǁîn di ǀhaiǀurib tsî ǃhuniǀurib tsîkha ge ǃKhūb ǁaib di tsēs ai ǁîna hui ǁkhā tide.” (Ese. 7:19) ǂGui mari-e ǀhaoǀhaos xa da ge ǁkhā da a i hoa-e nî dī î da sida ûiga ǀguiǃupu kai tsî Jehovaba ǃoabas ǀkha nî hui mîǁguiga dī. ǁNās ge ǂhâbasa tama surudeba kurus tamas ka io ǀhaoǀhao da hâ xūn ai sida ǁaeba ǂhôas tsîna ǃkhōǂgā hâ. ǂAnbasen da ge nî î-i ǀhaoǀhao da hâ xūna tā sida ûib ǃnâ ǂhâǂhâsase ī. (Mat. 6:​19, 24) Nē da ûiǃnâ hâ ǃhūbaib ǀams ra ǀgū khami da ge nî ǁhûi Jehovab ǃnâ da ra ǂgomǃgâ, tamas ka io da ū da hâ xūn ǃnâ ra ǂgomǃgâsa.

‘MÂǁAPOSASIBA DU GE ǂHÂ HÂ’

15. Tae-i ǃaroma i ge Hebre Xristeǁîna ǃgōsase mâǀgaisa ǂhâ hâ i?

¹⁵ Hebre Xristeǁîn Judeab ǃnâ ge  hâ în ge ǁîn ǃoabas ǃnâ ga mâǀgai hâ ǃgom ǁaegu ge ǃgôaxa i amaga. (Heb. 10:36) Hebre Xristeǁîn ge ǀgaisase gere ǁgâiǀāhe xawen ge ǀnîna nēsa ge hōǃâ tama hâ i. ǁNā-amagab ge Pauluba ge hōhōǃnâ nî, în aiǂhumisen ǃnāsa ǁgâiǀāb ǃaroma. Aiǂhumisa tsîn ge ǂgomǂgomsase nî hâ ǁōb kōse Jesub khami. (Heb. 12:4) ǂGui Jodeǁîn ge kaise ǁaixa tsî gere ǃkham ǂgao ǂgui khoen gere Xristeǁî kai amaga. ǀOro kurin aiǃâ i ge khoena Pauluba gere ǁnāǂam ǂgao Jerusalems ǃnâb gere aoǁnâ amaga. Hakadisis (40) xa ǃnāsa Jodeǁîn ge “ǀhao tsî ǀhûpe ge nū, Pauluban ǃgam tama hîan xū-i xare-e ǂû tamas ka io ā tide ǃkhaisa.” (ǃNǃkh. 22:22; 23:​12-14) ǃHuihe tsîn gere ǁgâiǀāhe xawen ge Xristeǁîna aiǃgû tsî ǀhoade hâǃnâ, ǃgâiǂhôasa aoǁnâ tsî ǁîn ǂgomsa ǀgaisase gere ūhâ ǀgara.

16. Mati i Hebreǁîna ǃoa hâ sîǂkhanisa hui da ǁkhā î da ǂhanu mûǂuiba ǁgâiǀāb xa ūhâ? (Hebreǁîn 12:7)

¹⁶ Tae-e Hebre Xristeǁîna ga hui hâ în ǁgâiǀāba mâǀgai? Paulub ge Xristeǁîna gere hui ǂgao în ǂhanu mûǂuiba ǁîn ra ǃkharuǃnâ xūn xa ūhâ. ǁNā-amagab ge ge ǁguiǃā Elob ǃâitsâba mā-am ǁkhāsa, Xristeǁî-i ǁnāsa xu nî ǁkhāǁkhāsen amaga. (Khomai re Hebreǁîn 12:7 sa.) ǁNāti i ǁkhāǁkhās ge a hui ǁkhā în Xristeǁîna ǃgâi ǀgauga omkhâi. ǁNāti i ǃâitsâna xu ra hā sîsenǂuib ai ǁîn ǂâisa ǂnûis ǃnâ-ūn ge Hebre Xristeǁîna ga supubahe hâ mâǀgaisa.—Heb. 12:11.

17. Pauluba tae-e ǁgâiǀāb xa ge ǁkhāǁkhāsen?

¹⁷ Paulub ge Hebre Xristeǁîna ge ǀkhoma în ǁkhoaǂgao tsî tā ǀûsen ǃgomsinan ga hōǃâ xawe. Apostel Paulub ge ǃgâi ǀapemāsa mâǃkharus ǃaroma ge mā ǁkhā i. ǁÎb ge Xristeǁî kaib nîs aiǃâ  Xristeǁîna gere ǁgâiǀā, ǁnā-amagab ge ge ǂan i matikō ǁgâisen nî ǃâitsâhesa. Xristeǁî kaib ges khaoǃgâb ge ǂgui ǀgaugu ǃnâ ǁgâiǀāba ge hōǃâ. (2Kor. 11:​23-25) ǁNā-amagab ge Pauluba ge ǂan î ǁîn tae-e ǂhâ hâsa în mâǀgai. ǁNā Xristeǁînab ge ge hōhōǃnâ, ǃgomsina mâǀgais ǃaroman ǁîn ai ǂgomaiǂnûi tidesa xawen Jehovab ai nî ǂgomaiǂnûisa. Paulub ge ǁkhoaǂgaose ge mî: “ǃKhūb ge a ti Hui-ao tsî ta ge ǃao tide.”—Heb. 13:6.

18. Tae-e da hānî ǁgâiǀāb xa nî ǂan î da mâǀgai?

¹⁸ ǀNî ǃgâsan sida din ge nēsi ra ǁgâiǀāhe. ǀGui ǀgaub ǁîna da ǀnamma a ǁgau ǁkhāb ge, ǁîna ǀgorebas, ǂhân hâ xū-e mās tsî hui nîsa. (Heb. 10:33) Elobmîs ge ǃgāsase ra mî: Xristub Jesub “ǃnâ ra ûi ǂgao khoe-i hoa-i ge ǃgomma nî tsâ.” (2Tim. 3:12) ǁNā-amaga da ge hoa da nî aiǂhumisen hānîǁae nî ī ǃgom xūn ǃaroma. Hā re î da aiǃgû tsî ǀoasase ǂgomaiǂnûi ǂgomǃgâsiba ūhâse ǁîb nî hui dasa, î da ǃgomsin ǃnâ mâǀgai mâ ǃgomsi-i ǀgui-e da ga hōǃâ xawe. ǀGūǁaeb ge ǁîb ǃoaba-aon hoana sâba nî mā.—2Tes. 1:​7, 8.

19. Tae-e da a dī ǁkhā, î da kai ǁgâiǀāb ǃaroma aiǂhumisen? (Ai-īsiba mû re.)

¹⁹ ǃGāsase î ge Hebre Xristeǁîna ǃoa hâ sîǂkhanisa ǁnā Xristeǁîna ge hui, hōǃân nî ǁgâiǀāb ǃaroma. Paulub ge ǃgâsana ge ǀkhoma în Elobmîsa ǂōrisase ǁkhāǁkhāsen, ôaǃnâ tsî ǃgâise ǁnâuǃā. Nēsa dīs ge nî hui nî în ama tama ǁkhāǁkhāde mûǂan tsî ǁîna xu ǂgōsen. Nēs nî hui nî amaga îs ǁîn ǂgomsa tā ǂhapu. ǁÎnab ge ge ǂkhâǃnâ în ǁîn ǂgomsa ǀgaiǀgai, în Jesub tsî ǂgaeǂguira ǃgâsagu daoǁgausa ǃgâise sao. Tsîb ge Xristeǁîna ge hui în ǁîn mâǀgaisa omkhâi tsî ǃgâi mûǂûiba ǁîn ǃgomsin ǃoagu ūhâ, ǁîna ǃēsa ra māse în ǁîn ǀnamxaǃnâ ǁGûb xa ǁkhāǁkhāhe. Sida tsîn ge nē ǀapemāsa Elobmîsa xu nî sîsenū. ǁNāsa da ga dī, o da ge ǂgomǂgomsase nî mâǀgai ǀams kōse.—Heb. 3:14.