1. Jesuba ǀgūǁae tae-e nî dī?

 KAI ǀkharaǀkharan nî hâ ǁaeb ǃnâ da ge ûi hâ. ǀGūǁaeb ge Jesuba ǃhūbaib ai hâ khoen hoana nî ǀgoraǃgâ. Jesub ge tae-i ǀgoraǃgâs ǁaeb aiǃâ nî īsa ra mîba da. ǁÎb di ǁkhāǁkhāsabe gab ge “ǁgauǁgau-e” ge mā ǁîb di hās xa “ǃhūbaib di ǀunisa nî ǁgauǁgausa.” (Mat. 24:3) Nē ǂkhōs ge Mateub 24ǁî tsî 25ǁî danaǃâs ǃnâ xoahe hâ, xawe du ge ǃgûǀhao ra ǂkhōdi tsîna Markub 13ǁî danaǃâs tsî Lukab 21ǁî danaǃâs ǃnâ a hō ǁkhā.

2. Tae-e da nē ǁkhāǁkhāǃâs ǃnâ nî ǃhoaǃgao tsî nēsa mati nî hui da?

² Jesub ge ǃkhâikhom ra haisi-amsa nē ǂkhōdi ǃnâ-ū ra mā da. Nē ǂkhōdi ge gūn tsî pirin gā-ai tsî gâre oxae ǂkhamkhoedi tsî talendi tsîn xa hâ. Mâ ǂkhōs hoas ge ra hui da, î da ǁnâuǃā khoe-i ǁî-i ra tanisen ǀgaub ǃoagu nî ǀgoraǃgâhesa. Nē ǂkhōde da ra ôaǃnâ khami da ge nî kō tae-e da ǁnāpaxu ra ǁkhāǁkhāsen tsî tae-e da nî sîsenǂuisa sida ûigu ǃnâ. ǂGurose da nî ǃhoaǃgao ǂkhōs ge gūn tsî pirin tsîn xa hâ.

GŪN TSÎ PIRIN

3. Jesuba mâǁae nî ǀgoraǃgâ?

³ Gūn tsî pirin xa hâ ǂkhōs ǃnâb ge Jesuba ge mî, ǁîb khoena ǃgâiǂhôasan ra ūǃoas ǃoagu nî ǀgoraǃgâsa tsî nî kōsa matin ǁîb di ǂkhauhesa ga ra ǂkhâǃnâ ǀgausa. (Mat. 25:​31-46) “Kai ǂōǂōsib” ǁaeb ǃnâb ge ǁîba nî kō ǁîn a gūn tamas ka io pirisa Armagedons aiǃâ. (Mat. 24:21) ǃÛi-aob gūna pirina xu ra ǀgora khamib ge Jesuba ǁnān hîna  ǂkhauhesa ga ǂgomǂgomsase ra ǂkhâǃnâna, ǂkhâǃnâ tama hâna xu nî ǀgora.

4. Jesajab 11:​3, 4 tsîn ǃoagu da tae-i ǃaroma ǂgomǃgâsiba a ūhâ ǁkhā Jesub khoena ǂhanu-aise nî ǀgoraǃgâsa? (Tsoatsoas ai hâ ai-īsiba mû re.)

⁴ Elobmîs ge ra mî Jesub ga Jehovaba ǀgoraǃgâba, ob hoaǁae khoena ǂhanu-aise nî ǀgoraǃgâsa. (Khomai re Jesajab 11:​3, 4 sa.) ǁÎb ge khoen tae-e ra dīs, ǂâis tsî mîsa ra ǃgaoǃgâ. Nēs ge matin ǂkhauhesa ǃgâsaga ra hâ-ū ǀgaub tsîna ǃkhōǂgā hâ. (Mat. 12:​36, 37; 25:40) Jesub ge nî ǂan hami ǂkhauhesagu tsî ǁîgu sîsenni tsîna gere ǂkhâǃnâsa. a ǀGui ǂhâǂhâsa ǀgaub khoe-i Xristub di ǃgâsaga a ǂkhâǃnâ ǁkhā ǀgaus ge aoǁnâ sîsen-e dīsa. Jesub ge ǁîna “ǂhanu-ai” khoen ase nî ǀgoraǃgâ tsîn ge ǃhūbaib ai “ǀamosib kōse” ûis di ǃēsa nî ūhâ. (Mat. 25:46; J.ǂHa. 7:​16, 17) Nēs ge amase buruxa mādawa-amsa. Kai ǁgâiǀāb ǁaeb tsî kai ǁgâiǀāb khaoǃgân ga ǂgomǂgomsase a hâ, o i ge ǁîn ‘ǀonde ûib di ǂkhanis ǃnâ nî xoamâihe.’—J.ǂHa. 20:15.

5. Tae-e da gūn tsî pirin xa hâ ǂkhōsa xu ra ǁkhāǁkhāsen tsî hamna nēsa xu ra ǀama?

⁵ ǂGomǂgomsa tsî du a ǂhauǃnâsa ǁgau. Jesub ǂkhōs gūn tsî pirin xa hâs ge ǁnān ǃhūbaib ai ǀamose ûis di aiǂhanuba ūhân ǃoa hâ. ǁÎn ge ǂgomsan ūhâsa ra ǁgau Xristub ǃgâsaga aoǁnâ sîsenni ǃnâ ǂkhâǃnâs ǃnâ-ū. Tsî ǂgomǂgomsase Jesub ǁgaumâihâ gā-ai ǃāb daoǁgausa saosa. (Mat. 24:45) Xawen ge ǀhommi ǃâubasensa ūhân tsîna nē ǂkhōs gūn tsî pirin xa hâsa ǂōrisase nî ǃgaoǃgâ. Tae-i ǃaroma? Jesub ǁîn tanisen ǀgaub tsî ǃhoan ra xūn tsîna ra ǃgaoǃgâ amagan ge ǁîn tsîna ǂgomǂgomsan asa nî ǁgau. ǁNā-amagab ge Jesuba nau ǀgam ǂkhōra ge sîsenū, ǂkhauhesan ǂōrisase nî ǃgaoǃgâ ǃkhâikhomdi xa. Nē ǂkhōdi xas tsîna da ge Mateub 25ǁî danaǃâs ǃnâ ra khomai. Hā re î da nēsi ǁnâuǃāxa oxaedi tsî gâre oxaedi xa ǃhoaǃgao.

GĀ-AI OXAE ǂKHAMKHOEDI TSÎ GÂREDI

6. Goro oxaede mati ge ǁgau gā-ai di a ǃkhaisa? (Mateub 25:​6-10)

⁶ Nē oxae ǂkhamkhoedi xa hâ ǂkhōs ǃnâb ge Jesuba disi oxae khoedi xa ra ǃhoa, hîna ge ǃgamme-aoba sī gere ǃâude. (Mat. 25:​1-4) ǁÎdi hoadi ge gere mûǂui mati di ǃgamme-aoba ǃgamme ǁâudība ǃoa nî saosa. Jesub ge korode gā-ai oxae khamkhoedi ase ra ǁguiǃā tsî nau korode gâredi ase. Gā-ai oxaedi ge ge aiǂhomisa ī. ǁÎdi ge ǁkhādi as kōse ge ǂhomisa ī tsî ǃgamme-aoba ge ǃâu, ǁîb ge tsuxub ǃnâ a hā xawes tsîna. ǁîdi ge oli lamde ge hau sao î di ǃkhaeb ǃnâ mû ǁkhā. ǁÎdi ge ǀnî hâ oli-i tsîna xabadi ǃnâ ge ūhâ i, ǀnîsib ga ǃgamme-aoba a ǃonkhao o. ǁNās ǀkha di ge ge aiǂhomisa i, î-i ǁîdi lamde tā khauǀû. (Khomai re Mateub 25:​6-10 sa.) ǃGamme-aob ge hā, o di ge gā-aide ǃgamme ǁâudīb ǃnâ ǁîb ǀkha ge ǂgâ. ǁNās ǁkhās khamin ge ǂkhauhesan ǂkhaikarihâ tsî ǂgomǂgomsase Xristub di hās kōse ra hâna, ǁîn mādawa-amsa nî hō. Tsî ǃgamme-aob Jesuba ǁîb di ǀhomsi Gaosib ǃnâ nî ǁhao. (J.ǂHa. 7:​1-3) Tae-e goro gâredi ǀkha nî ī?

7. Tae-e gâre oxae ǂkhamkhoedi ǀkha ge ī tsî tae-i ǃaroma?

⁷ Gā-ai oxaedi ge ge aiǂhomisa ī xawe  di ge gârede ge aiǂhomisa tama hâ i ǃgamme-aob ge hā o. ǁÎdi ge xabagu ǃnâ oli-e ge hau tama hâ i tsî i ge ǁnās ǀkha lamde ge ǀari. ǃGamme-aob ǀgūǁae nî hāsa di ge ǁnâu, o di ge ge ī-î di oli-e sī ǁama. Xawe di ge ǁîde ǃgamme-aob ge hā ǁaeb ǃnâ ge oaǀkhī tama hâ i tsî i ge “ǂhomisen hâde ǁîb ǀkha ge ǂgâ ǃgameǁâus ǃoa, tsîs ge daosa ge ǂganamhe.” (Mat. 25:10) Gâredi ge oaǀkhī o di ge gere ǂgâ ǂgao ob ge ǃgamme-aoba ge mî: “Amse da a ǀū so.” (Mat. 25:​11, 12) Nē gâredi ge ge aiǂhomisa tama hâ i, î di ǃgamme-aoba ǁkhādi as kōse ǃâu. ǂKhauhesana tae-e nēsa xu a ǁkhāǁkhāsen ǁkhā?

8-9. ǂKhauhesana tae-e oxae tarakhoedi ǂkhōsa xu a ǁkhāǁkhāsen ǁkhā? (Ai-īsiba mû re.)

⁸ Aiǂhomisa tsî ǂkhaikarihâ. Jesub ge ge ǂâibasen tama hâ i ǀgam ǃgubi ra di ǂkhauhesan nî hâsa, aiǂhomisas tsî aiǂhomisa tamas tsîna nē ǃhūbaib di ǀams ǃaroma. ǁÎb gere mîs ge tae-i nî hāsa ǂkhauhesan ga ǂgomǂgomsase ǀams kōse hâ tama io. Tsîn ǁîna aiǂhomisen taman ga io ǁîn mādawa-amsa hō tidesa. (Jhn. 14:​3, 4) Nēs ge kaise a ǁkhōǁkhōsa. Nēsi da ga ǀhommi tamas ka io ǃhūbaib di ǃâubasensa ūhâ xawe da ge nē oxaedi aiǁgausa nî ǃgaoǃgâ. Hoa da ge ǂkhaikarihâ tsî nî aiǂhomisen ǀams kōse mâǀgaisa.—Mat. 24:13.

⁹ Nē ǂkhamkhoedi ǂkhōs khaoǃgâb ge Jesuba ge ǁgau matikōse i a ǂhâǂhâsasa î da aiǂhomisa tsî ǂkhaikarise hâ. Jesub ge ǁnās khaoǃgâs tsîna talendi xa hâ ǂkhōs xa ge ǃhoa. ǁNā ǂkhōs ge ra ǁgau î da ǃgarise sîsen tsî tā ǀopesa.

TALENDI

10. Nē ǂgomǂgomsa ǃgākha tae-e ge ǁgau? (Mateub 25:​19-23)

¹⁰ Talendi xa hâ ǂkhōs ǃnâb ge Jesuba ǀgam ǂgomǂgomsa ǃgākha xa ra ǃhoa tsî ǀguib hîna ge ǂgomǂgomsa tama hâ īb  xa. (Mat. 25:​14-18) ǂGomǂgomsa ge ī ǃgākha ge ǃgarise sîsen tsî ǀhonkhoesab ge mākha maris ai ge sîsenǀaro. ǀHonkhoeb ge īb nîs aiǃâ ǁîkha mari-e ge mā ǂgomǂgomsa ǃgākha ge ǃgarise gere sîsen tsî mari-e gā-aise ge sîsenū. ǀAmǂoasa ge tae-i? ǀHonkhoeb ge oaǀkhī okha ge māhe kha ge maris ai ǀgam ǃnāra xa ǃnāsase ge ǀaro ai. Ob ge ǀhonkhoeba ǁîkha koa tsî ge mî: “Hā î tita ǀkha ǃgâiaǂgao!” (Khomai re Mateub 25:​19-23 sa.) Tae-e ǃnonaǁî ǃgāb ǀkha ge ī, ǁîba tae-e ge dī ǀhonkhoeb xab ge māhe maris ǀkha?

11. Tae-e “ǁgai tsî ǀopesa” ǃgāb ǀkha ge ī tsî tae-i ǃaroma?

¹¹ ǃNonaǁî ǃgāb ge ge “ǁgai tsî ǀopesa” ī tsîb ge ǁîba ǀgui talendsa ge hō. ǀHonkhoeb ge gere ǃâubasen ǁîb nēsa gā-aise nî sîsenusa. Xaweb ge ǁîba nē marisa ǃhūb ǃnāga sī ge sâu. ǀHonkhoeb ge oaǀkhī ob ge nē ǃgāba ǀgui talends ǀguisa ge ūhâ i. Nē ǃgāb ge ǃgâi tanisen ǀgauba ge ūhâ tama hâ i. Nē talends aib ge ǀaro tama hâ īs xab ǀûbaba nî ǂgans xab ge ǀhonkhoeb ǃoa ge mî: “ǀHonkhoetsē ǂan ta ge a sats kaise a ǃgari” khoesa. Nē ǃgāb ge ǁîb ǀhonkhoeb xa ge ūǃoahe tama hâ i. ǁNās ǂam-aib ge ǀhonkhoeba talendsa ǁîba xu ū tsî ǁîba omsa xu ge ǃhae.—Mat. 25:​24, 26-30.

12. Nē ǀgam ǂgomǂgomsa ǃgākha ham-e nētsē ra ǂnûǁkhaeba?

¹² Nē ǀgam ǂgomǂgomsa ǃgākha ge ǂkhauhesa Xristeǁîna ra ǂnûǁkhaeba. Tsî ǀhonkhoeb Jesub ge ǁîna ra ǁkhau, “hā i tita ǀkha ǃgâiaǂgao!” ǁÎn mādawa-amsan ge ra ǃkhōǃoa, ǁnās ge ǀhommi khâisa. Nēs ge ǂguro khâis ase a ǂansa. (Mat. 25:​21, 23; J.ǂHa. 20:5) ǁGai tsî ǀopesa ǃgāb ge ǃkhâikhoms ase ǂkhauhesana a ība. Mâ ǀgaub ǃnâ?

13-14. ǂKhauhesana tae-e talendi xa hâ ǂkhōsa xu a ǁkhāǁkhāsen ǁkhā? (Ai-īsiba mû re.)

¹³ Tā ǀopesa xawe ǃgarise sîsen. Talendi xa hâ ǂkhōs tsî oxae khamkhoedi xa hâ ǂkhōs ǃnâb ge Jesuba ge aimûǀgaru  tama hâ i ǂkhauhesan nî ǀopesasa. Xaweb ge gere ǁguiǃā tae-i nî hāsa ǁîn di ôasasiban ga ǂoaǃnâ o. ǁÎn ge ‘ǂgaihe tsî ǃkhōǂuibasenhe’ tide tsîn ge ǀhomsi Gaosib ǃnâ ǂgâsa mā-amhe tide.—2Pet. 1:10.

¹⁴ Jesub ge oxae ǂkhamkhoedi tsî talende a sîsenū ǂkhōs ge ǃgāsase ra ǁgau, ǂkhauhesa Xristeǁîn aiǂhomisa tsî ǂkhaikari nî hâsa tsî ǁnās ǂamais tsîna tā nî ǀopesasa. Jesuba ǀnî hâ xū i tsîna ǃkhâikhoms ase ǂkhauhesana ge mîba? Îo. ǁÎb ge mî xū i ge Mateub 24:40, 41 ǃnâs tsîna ra hōhe.

HAM-E NÎ ‘USAO-E’?

15-16. Mateub 24:​40, 41 sa mati ra ǁgau ǂkhauhesan ǂkhaikari nî hâsa?

¹⁵ ǃNona ǂkhōdi xab nî ǃhoas aiǃâb ge Jesuba ǀuniga ǀgoraǃgâsa gere ǁguiǃā, ǂkhauhesan xa hîna ra ǁgausa haman nî ūǃoahesa. ǁÎb ge ǀgam khoekha ǃhanab ǃnâ ra sîsenkha tsî ǀgam khoera ǁkhamis dawa ra sîsen ra xas tsîna ge ǃhoa. Nē khoekha ge ǀgui sîsen-e ra dī tsî ra ge khoera ǀgui sîsen-e ra dī. Xaweb ge Jesuba ge mî ǀnîn nî ‘ūhe tsîn nauna nî ǁnāxuhesa.’ (Khomai re Mateub 24:​40, 41 sa.) ǁNās ǀkhab ge saosabena ge mîba: “ǁNā-amaga ǂkhaikari hâ, mâ tsēs aib ǀhonkhoeb âdo nî hāsa du a ǀū xuige.” (Mat. 24:42) Jesub ge oxae khamkhoedi ǂkhōs khaoǃgâ ǁkhā mîde ge mî. (Mat. 25:13) Nē mîde a ama? Nēs ge ama a khami gere mûsen. ǂGomǂgomsa ǂkhauhesan ǀguin ge nî ‘ūsao-e’ tsî Jesub xa ǁîb di ǀhomsi Gaosib ǃnâ nî ūǃoahe.—Jhn. 14:3.

¹⁶ ǂKhaikarise du hâsa ǁgau. ǂKhauhesa i ǂkhaikarise hâ tama hâ i ge ‘ǃkhōǂuibasen-e’ han ǀkha ūsao-e tide. (Mat. 24:31) Xūn hoan ǀams ain ge Elob khoen hoana mâpa ǀguin ga ǁîn di ǃâubasensa ūhâ. Xawe Jesub di ǃkhâikhomsa nî ǃgaoǃgâ tsî ǂgomǂgomsase hâ tsî ǂkhaikarisiba nî ǁgau.

17. Tae-i ǃaroma da ǂâiǂhansen tide Jehovab ga sida ǁaeb ǃnâ ǂkhauhesana a ǁhûi o?

¹⁷ Jehovaba da ge kaise ǃgâise ge ǂan tsî da ge ǁnās ǀkha ǁîb ra dī xūn hoana ra ǂgomǃgâ. Jehovab sida ǁaeb ǃnâ ǂkhauhesana ra ǁhûis xa da ge ǂâiǂhansen tama hâ. b Jesub ge tae-e draibeǃhanab ǃnâ ge 11 īrga sîsen ǃgāgu xa mî-e da ge ra ǂâi-oa. (Mat. 20:​1-16) ǃHanab ǃnâ ge ǁgoaga a sîsen tsoatsoan tsî tsēs ǁaegub ǃnâ a sîsen tsoatsoan tsîn ge ǀams ai ǀguitiko marisa ge a matare-e. ǁNās ǁkhās khamin ge ǂkhauhesan sida ǁaeb ǃnâ ra ǁhûiǂûi-en tsîna ǂgomǂgomsasen ga hâ, o ǁîn di ǀhomsi mādawa-amsa nî hō.

ǃKHÂIKHOMTE ǃGAOǃGÂ

18-19. Tae-e da go nē ǂkhōde xu ǁkhāǁkhāsen?

¹⁸ Tae-e da go nēsi ǃhoaǃgao? Pirin tsî gūn xa hâ ǂkhōs ge go ǁgau, ǁnān ǀamosib kōse ǃhūbaib ai nî ûin nî dītsâsa în ǂgomǂgomsase tsî ǂhauǃnâse Jehovab ǃoagu hâ, nēsis tsî hānî kai ǁgâiǀāb ǃnâs tsîna. ǁNā hānîǁaeb ǃnâb ge Jesuba ǂgomǂgomsana ǁîn “ǀamo ǁkharaba” ǃoa nî ǃgû khoen ase nî ǀgoraǃgâ.—Mat. 25:46.

¹⁹ ǂKhauhesana ra ǃkhâikhom ǀgam ǂkhōdi tsîna da ge go ôaǃnâ. Jesub ge a mî ǂkhōs gā-ai tsî gâre oxae ǂkhamkhoedi xa hâs ǃnâ di ge korode gā-ai  di asa ge ǁgau. ǁÎdi ge aiǂhomisa tsî ǂkhaikarise ge hâ i tsî ǃgamme-aoba ge ǃâu ǀgara mâǁae ǀguib ga hā xawes tsîna. Xawe gâre di ge ge ǂhomisa tama hâ i. ǁNās ǀkhab ge ǃgamme-aoba ǁîde ǃgamme ǁâudīb ǃnâ di nî ǂgâsa ge mā-am tama hâ i. ǁNās ǀkha da ge sada tsîna aiǂhomisase nî hâ matikō gaxuse i ga nē ǃhūbaib di ǀamsa ga ra ū xawe. Talendi xa hâ ǂkhōs Jesub ge ǃhoaǃgaos ǃnâs tsîna da ge ǂgomǂgomsa ǃgākha ǃgarise sîsen tsî ǀopesa tama kha xa go ǁkhāǁkhāsen. ǁÎkha ge ǀhonkhoeba kaise ǃgarise ge sîsenba tsî ǁîb xa ge ūǃoahe. Xawe ǀopesa ǃgāb ge ge ūǃoahe tama hâ i. Tae-e da nēsa xu ra ǁkhāǁkhāsen? Jehovab ǃoabas ǃnâ da ge ǀams kose ǁkhā da ana nî dī. ǀAms ai da ge ǂkhauhesan mati ǂkhaikari nî hâsa goro ǃhoaǃgao, în Jesub xa ūsao-e tsî ǁîn di ǀhomsi mādawa-amsa hō. ǁÎn ge kaise ra mûǂui matin Jesub xa nî ‘ǀhaoǀhaohesa’ ǀhomma ǃoa. Armagedons khaoǃgân ge ǁîna Jesub taras ase ǃgamme ǁâudīb ǃnâ ǃâ-e nî ūhâ.—2Tes. 2:1; J.ǂHa. 19:9.

20. Jehovaba tae-e ǁnān hîna ǁîb ǃkhâikhomte ra ǁnâuǀnamna nî dība?

²⁰ Jesub ge ǀgūǁae nî ǀgoraǃgâ xawe da ge tā ǁnās xa nî ǃao. ǂGomǂgomsase da ga hâ ǀgara ob ge sida ǀnamxaǃnâ ǀhomsi ǁGûba “kai ǀgaib” hîna nî hui dab î da “hoan ǃnâ . . . ǃnorasase ǃkharu tsî khoen hoan aiǃâ” ǂhaiba nî mā da. (2Kor. 4:7; Luk. 21:36) ǀHommi tsî ǃhūbaib di ǃâubasensa da ga ūhâ tsî da ga Jesub ge ǂkhōdi ǃnâ-ū a mā ǃkhâikhomte ǃgaoǃgâ, ob ge sida di ǁGûba kaise nî ǂkhî. Jehovab a ǀkhomxaǂgao amaga di ge sida ǀonde ‘ûib ǂkhanis’ ǃnâ nî hō-e.—Dan. 12:1; J.ǂHa. 3:5.