1-2. Tae-e Jehovab ǃoaba-aona ra ǂkhî kai? (Jakobub 1:​22-25)

 JEHOVAB tsî ǁîb di ǀnamǀnamsa ǀGôab tsîn ge ǂhâba hâ î da ǂkhîba ūha. Psalmdi 119:2 di xoa-aob ge ra mî: “ǀKhaehen ge hâ ǀnān ǁîb mîmāde ǃkhōǀgaipe tsî ǂgaob hoab ǀkha ǁîba ra ôana.” Jesub ge ge mîmâi: “ǀKhaehen ge hâ ǁnān Elob di mîsa ǁnâu tsî ra sâubasenna.”—Luk. 11:28.

² Jehovab ǃoaba-aon ge ǂkhî khoena. Tae-i ǃaroma? Sida ge ǂgui ǃaromade ūhâ. Xawe ǀgui ǂhâǂhâsa ǃaromas ge Elobmîsa da tsēs hoasa khomai tsî ǁkhā da a i hoa-e ra dītsâsa, î da ǁkhāǁkhāsen da ra xūna sîsenǂui.—Khomai re Jakobub 1:​22-25 sa.

3. Mati da ǃgâiba ra ǀama Elobmîs ǃnâ da ra khomai xūna sîsenǂuis ǃnâ-ū?

³ ǂGui ǀgaugu ge hâ ‘mîs dī-ao’ kai da ga, o da ǃgâiba ra ǀamasa. Aiǁgause da ga Elobmîs ǃnâ da ra ǁkhāǁkhāsen xūna sîsenǂui, o da ge Jehovaba ra ǂkhîǂkhî tsî ǁnās ge ra ǂkhî kai da. (Aoǁn. 12:13) Elobmîs ǃnâ hâ ǀapemāsa da ga sao, o da ge sida omaris ǁanin tsî sida ǃgâsan ǀkha da ūhâ ǀhōsagusisa ra ǀgaiǀgai. Nēs ge ǀnîsi sada ûib ǃnâ ge ama kai. Nēs ǀkha da ge Jehovab daoǁgaude ǁnâuǀnam tama khoen ra hōǃâ ǃgomsina xu ra ǂgōsen. Gao-aob Davidi ge mî, mîde da ge ra ǃkhō-am. ǁÎb ǁnae-ams ǃnâb ge ǂhanugu, daoǁgaudi tsî Jehovab di ǀgoraǃgâdi xa mî toa tsî saorase ge ǀamǀam: “Tsî ta ge ǁîde ǁnâuǀnams di mādawa-amsa ra hō.”—Psa. 19:​7-11.

4. Tae-i ǃaroma i hoaǁae supu tama Elobmîs ǃnâ da ra khomai xūna sîsenǂuisa?

 ⁴ Hoaǁae i ge supu tama hâ Elobmîs ǃnâ da ra khomai xūna sida di ûigu ǃnâ sîsenǂuisa. ǂGui xūna da ra dī xawe da ge ǁaeba nî ǁamaǂui, î da Elobmîsa khomai tsî ǁnâuǃā Jehovab tae-e da nî dīsa ra ǂhâbasa. Hā re î da ǀnî aiǁgaude kō Elobmîsa tsēs hoasa khomaisa. ǃHoaǃgaos tsîna da ge nî dī tae-i nî hui dasa, î da khomai da ra xūna ǂâiǃgâ tsî ǀgauga mû sida di ûigu ǃnâ da a sîsenū ǁkhāga.

ǁAEBA ǁAMAǂUI TSÎ ELOBMÎSA KHOMAI

5. Mâ xūna sida di ǁaeba ra ū?

⁵ Jehovab khoen ge kaise ǂgui xūna ra dī. ǃNāsa ǁaega da ge Elobmîs ǂhâǂhâsa ti ra mî xūna ra dī. Aiǁgause ǃnāsa ǁaeba da ge sîsen, aitsâma kōǃgâsen tsî sida omaridi tsîna ra kōǃgâsa. (1 Tim. 5:8) ǃNāsa Xristeǁîn ge ǀaesen hâ tamas ka io kaira omaris ǁanina ra kōǃgâ. Tsî hoa da ge sida di ǂurusiba kōǃgâsa ǂhâhâ. Nēs tsîn ge ǁaeba ra ū. Nē xūn hoan xōǀkhā da ge ǂhâǂhâsa ǁgaumâide ǀhaohâb ǃnâ ūhâ. Tsî ǂhâǂhâsa ǁgaumâis ge ǁkhā da a i hoa-e dī tsî ǃgâiǂhôasa aoǁnâsa. Nē ǃereamdi hoadi ǀkha da mati ǁaeba ǁamaǂui tsî Elobmîsa tsēs hoasa khomai, ǂâiǃgâ tsî khomai da ra xūna sada ûib ǃnâ nî sîsenū?

6. Taena du nî dī î du Elobmîsa khomai ǁkhā? (Ai-īsiba mû re.)

⁶ Elobmîsa khomais ge “ǂhâǂhâsa xūn” di ǀgui Xristeǁîn ǃaroma. ǁNā-amaga da ge ǁkhā da a i hoa-e dī tsî nî khomai. (Fil. 1:​10, NW) ǂKhî khoeb xa i ge psalmdi xoa-aoba ge mî: “Xawen ge ǃKhūb di ǂhanub ǃnâ ǃgâiǃgâisen tsî ǁîba tsēs tsî tsuxuba ra ǂâiǃgâ.” (Psa. 1:​1, 2) ǃGāsases ge ǁnāsa ra ǁgau ǁaeba da nî ǁamaǂuisa î da Elobmîsa khomai. Mâpa a ǂhanu ǁae Elobmîsa khomaisa? Mâ khoe-i hoa-i ge khomai ǂgao i ra ǁaeba tsēs ǃnâ a ǁhûi ǁkhā. Xawe ǂhâǂhâsa as ge ǁhûi da ra ǁaeb ge nî hui da î da Elobmîsa tsēs hoasa khomai. Viktor ti ǀon hâ ǃgâsab ge ra mî: “Tita ge Elobmîsa ǁgoaga khomais xa ǃgâibahe. ǁGoaga  khâimās xa da ǃgâibahe tama xawe da ge ǁnā ǁaeb ai ǀoro xūna ūhâ ǂhanite ra na. ǁNā ǁaeb ai ta ge ǃgâise ǂkhaisa tsî ta ge khomai ta ra xūn ai ǂâisa ǂnûi ǁkhā.” Sadu tsîn ge ǀnîsi nēsa ra dī. Dîsen re, ‘tita ǃaroma mâpa a ǃgâi ǁae Elobmîsa khomaisa?’

KHOMAI DU RA XŪNA ǂÂIǃGÂ

7-8. Tae-e ra ǁkhae da Elobmîsa khomai tsî khomai da go xūna xu ǀamasa? ǁGuiǃā re.

⁷ Ama as ge ǀnî ǁaega da ge ǂgui xūna a khomai ǁkhā ūǂgā tamase. ǀNîsi du xū-e khomai tsâ hâ tsî khomai toa du gos khaoǃgâ ge ǂâi-oa tama hâ i. ǁNāsa da ge hoa da hōǃâ tsâ hâ. ǁNās ge sida Elobmîs khomais ǀkhas tsîna a īǁkhā. Aiǁgause da ge ǀnîsi a mîǁgui ǁkhā î da ǀnî danaǃâde Elobmîs ǃnâ tsēs hoasa khomai, ǁnā i ge kaise ǃgâi xū-e. Mîǁguiga da ge dī tsî nî dīǀoaǀoa. (1Kor. 9:26) Elobmîsa khomai tsoatsoas di mîǁguib ge a ǃgâi, xawe ǁnās ge tsoatsoas ǀguisa ī. ǁNās xa da ge ǃnāsa-e nî dī Elobmîs khomaisa xu da ga ǃgâiba ǀama ǂgao o.

⁸ Saora aiǁgaus xa ǂâi re. Hain ge ǁgam-e ǂhâhâ în kai. Xawe i ga kaise ǀapi ob ge ǃhūba kaise ra ǀâ tsîn ge haina nî ǁō. ǁNās ǀkha i ge ǃnāsa ǀnanuba ǃgâi tide. ǃHūb ge ǁaeba ǂhâhâ, î-i ǁgamme āǂgā în haina kai. ǁNās ǁkhās khami da ge Elobmîsa tā ǃnoesase nî khomai, î da tā ǁaeba ūhâ tama ī khomai da ra xūna ǂâiǃgâ tsî sida ûigu ǃnâ sîsenūsa.—Jak. 1:24.

9. Tae-e da a dī ǁkhā ǃnoesase khomais ǁnaetiba da ga ūhâ o?

⁹ ǃNoesase du Elobmîsa ǀnî ǁaegu ai ra khomaisa du ra hōǃâ? Tae-e du nî dī? ǂAuse khomai re. ǁKhā du a i hoa-e dītsâ, î du khomai du go xū-i xa ǂâiǃgâ. ǂHâbasa tama i ge hâ nēs nî ǃgomsa. Mîǁgui ǁkhā du ge a î du ǃnāsa ǁaeba khomai tsî ǁnās ǀkhas tsîna ǁaeba ūhâ ǂâiǃgâsa. Tamas ka io du ge ǀoro ǁaraǃāde a khomai ǁkhā î du ǃgaura ǁaeba ǂâiǃgâs ǃaroma sîsenū. “Tita ge Elobmîs khomaisa ǃnūbuse ra ūhâ ǀnîsi ǀgui ǁaraǃāsa” tib ge Viktora ra mî. “ǁGoaga ta ra khomai amaga ta  ge khomai ta go xūn xa tsēs ǃnâ a ǂâiǃgâ ǁkhā.” Mâ ǀgaub ǀguiba du ga sîsenū xawe i ge kaise a ǂhâǂhâsa, î du ǂause khomai tsî khomai du ra xūna ǂâiǃgâ.—Psa. 119:97; “ Dîsen ǁkhā da a xūn” ti hâ boksisa mû re.

10. Aiǁgau-e mā re mati du ǀgauga a ôa ǁkhāsa î du ǁkhāǁkhāsen du ra xūna sîsenǂui. (1 Tesalonikaǁîn 5:​17, 18)

¹⁰ Mâ ǁae-i ǀgui-i ai du ga sadu Elobmîsa khomai tsî matikō gaxūse du ga khomai xawe ǀgauga ôa re î du khomai du ra xūna sadu ûib ǃnâ sîsenǂui. Elobmîsa du ra khomai ǁaeb ǃnâ dîsen re, “mati ta nē ta go khomai xūna nēsi tamas ka io ǀgūǁae a sîsenū ǁkhā?” Aiǁgaus ase sadu Elobmîs khomais ǃnâ du ge ǀnîsi 1 Tesalonikaǁîn 5:17, 18 sa ra (Khomai.) ǁNā ǀgam ǁaraǃāra khomai toa tsî du ge a dîsen ǁkhā, ǂgaoba xu ta ra ǀgore tsî matikō ǃnāde ta ra ǀgore? ǃGôaǃgâ du ra xūn xas tsîna du ge a ǂâi ǁkhā. ǀNîsi du ge ra mîǁgui Jehovaba du ǃnona xūna nî gangansa. ǃNubu ǁaeroba du ga Elobmîsa xu du go ǁkhāǁkhāsen xūna ǂâiǃgâ, o i ge nî hui du mîs ǁnâu-ao tsî dī-ao kaisa. Mâ tsēs hoasa du ga Elobmîs ǃnâ du ra khomai xūna dī, o du ge ǁaeb ra ī khami nî Jehovab di ǃgâi ǃoaba-ao kai. Tae-e du nî dī, ǂgui xūn ai du nî sîsensa du ga a mûǂan o?

SĪǃNÂ ǁKHĀ DU A MÎǁGUI GA DĪ

11. Tae-i ǃaroma du ǀnî ǁaegu ai a ǂguibahe ǁkhā ǀkharaǀkharana dīsa? Aiǁgau-e mā re.

¹¹ Elobmîsa du ga khomai, o du ge ǀnî ǁaegu ai ra ǂkhabuǂâi ǂgui xūn ai du nî sîsensa du ra mûǂan amaga. Aiǁgause mûnan-ai re ǀnîsi du ge ǀguitsē sadu Elobmîs khomais ǃnâ khoeǀgoras xa ra khomai. (Jak. 2:​1-8) ǀNîsi du ge ra mû khoena du ra hâ-ū ǀgauba du nî ǃgâiǃgâisa tsî ra mîǁgui ǁnā ǀkharaǀkharana dīsa. ǁNās ge kaise a ǃgâi. ǁNāpaxu du ge saora tsē ǂhâǂhâsasib ǃhoa du ra ǀgauba kōǃgâs dib xa ra khomai. (Jak. 3:​1-12) Tsî du ge ra mûǂan ǀnî ǁaegu ai i sadu di ǃhoa ǀgauba ǃgâi tamasa tsî du nau khoena ra ǂkhabuǂâi kai xūna ra ǃhoasa. ǁNā-amaga du ge ra mîǁgui î du ǂkhâǃnâ ra xūna nau khoen ǀkha ǃhoa. Saora tsēs Elobmîs khomais ge ra ǃkhâikhom du ǃhūbaib ǃnâ ǀhōsana ūhâs xa. (Jak. 4:​4-12) Nēsisa du ge ra ǃgaoǃgâ tae-e du khomai, kō tsî ra ǃgâsa. Saora tsēs ai du ge ǀnîsi kaise nî ǃgombahe nē ǀkharaǀkharan hoana dīsa.

12. Tae-i ǃaroma du tā nî ǂkhabuǂâi sadu Elobmîs khomais ǃnâ du ga dī du nî ǀkharaǀkharana mû o? (ǀGamirosa mû re.)

¹² ǂGui ǀkharaǀkharana du nî dīsa du ga mûǂan o tā ǂkhabuǂâi re. Nēs ge ra ǁgau ǃgâi ǂgaoba du ūhâ ǃkhaisa. ǃGamǃgamsenxa tsî ǂhauǃnâ khoe-i ge  Elobmîsa khomai tsî ra mû taena i a ǃgâiǃgâi ǁkhāsa. a ǂÂis ǃnâ ūhâ re aiǃgû tsî da ge “ǀasa khoesiba” nî ana. (Kol. 3:10) Tae-e nî hui du aiǃgû tsî Elobmîs dī-ao kaisa?

13. Mâpa a ǃgâi ǀgau ǁkhāǁkhāsen du go xūna sîsenǂuisa? (Ai-īsiba mû re.)

¹³ Khomai du ra xūn hoana ǀguiǃnās ams ai sîsenǂuis xa dītsâ re, i ǀgui tamas ka io ǀgam xūna sîsenǂui. (ǂKhm. 11:2) Saora xū-e dītsâ re: Sîsen ai du nî xūna xoamâi tsî ǀguiǀguibes ǃnâ ǁîn ai sîsen re. Tsî nauna ǀkhara ǁaeb ai. Mâpa du nî tsoatsoa?

14. Mâ mîǁgui gu ǀkha du a tsoatsoa ǁkhā?

¹⁴ ǀNîsi du ge a mîǁgui ǁkhā supu mîǁguiga sīǃnâsa. Tamas ka io du ge a mîǁgui ǁkhā î du, ǂhâǂhâsa xū-i ǀkharaǀkhara ǂgao du ra i ǀkha tsoatsoa. Sadu mîǁguiba du ga ǁhûis khaoǃgâ du ge Watch Tower Publications Index tamas ka io Ôaǃnâs ǀkha ra hui ǂkhanib Jehovab ǃoaba-aon dikha tsîna ôaǃnâ ǁkhā. Sadu mîǁguib xa ǀgore tsî Jehovaba ǂgan re îb hui du sīǃnâ du nî xū-e dīs “turab tsî ǁkhāsib” tsîna māhe. (Fil. 2:​13, NW) ǁNāpaxu ǁkhāǁkhāsen du go xūna sîsenǂui re. ǂGuro mîǁguiba du ga sīǃnâ o du ge nî ǂkhâǃnâ-e saora mîǁguib ai sîsensa. Sadu Xristeǁî tanisen ǀgauba du ga ǃgâiǃgâi, o du ge nî ǂkhâǃnâhe aiǃgû tsî ǀkharaǀkharana dīsa. Tsî i ge ǀnîsi nî supu nau ǀkharaǀkharana dīsa.

AS ELOBMÎSA SADU ‘ǃNÂ SÎSEN’

15. Jehovab di khoena mati nau khoen Elobmîsa ra khomaina xu ra ǀkhara? (1 Tesalonikaǁîn 2:13)

¹⁵ ǀNî khoen ge ra mî ǁîn Elobmîsa  ǂguiǃnāde ra khomai ti. Xawen amabes ǃnâ Elobmîs ra ǁkhāǁkhā xūn ǃnâ ra ǂgom? Elobmîs ra ǁkhāǁkhā xūn ǃoagu ûi tsîn ǁîn ûiga ra ǀkharaǀkhara? Hî-î. ǃNāsa khoen ge Elobmîs ǀapemāde sao tama hâ. Xawe Jehovab di khoen ge Elobmîs xa ǀkhara ti ra tsâ. ǂGuro Xristeǁîn khami da ge Elobmîsa, “khoe-i di mîs ase tama, xawe ama mîs Elob dis ase” ra ǃkhōǃoa. ǁKhā da a i hoa-e da ge dītsâ tsî Elobmîs daoǁgaude sida di ûigu ǃnâ ra sao-ai.—Khomai re 1 Tesalonikaǁîn 2:13 sa.

16. Tae-e a hui da ǁkhā î da Mîs dī-ao kai?

¹⁶ Hoaǁae i ge supu tama Elobmîsa khomai tsî khomai da ra xūna sîsenǂuisa. ǀNî ǁaegu ai da ge Elobmîsa khomais ǁaeba hōs xa a ǃgombahe ǁkhā. Tsî ǀnî ǁaegu ai da ge ǃnoesase a khomai ǁkhā tsî ǂâiǃgâs ǁae-e ūhâ tama. Tamas ka io da ge dī ǁkhā da a ǀkharaǀkharan hoan xa ra ǂguibahe. Mâ ǃgomsi-i ǀgui-e du ga ūhâ xawe da ge a sīǃnâ ǁkhā. Jehovab huib ǀkha da ge nēsa a dan ǁkhā. A da aiǃgû tsî ǁîb huiba ūǃoa tsî tā ǁnâu-aos ǀguisa ī xawe mîs dī-ao kai. Elobmîsa da ǃnāsase khomai tsî sida di ûigu ǃnâ ra sîsenǂui khami da ge ǃgâiaǂgaoba nî ūhâ.—Jak. 1:25.