1-2. Tae-i ǃaromab ge Jehovaba ǁnā ǀgaub ǃnâ kuru da î da ǂkhî nauna da ga mā o?

 JEHOVAB ge khoenab ge kuru, o māsa xu ra hā ǃgâiaǂgaob ǀkha ǁîna ge kuru. (ǃNǃkh. 20:35) Nēsa ra ǂâibasen khoe-i ga ǀkhae xū-e mā da o da ǂkhî tama ti? ǂAn da ge hoa da ra ǂkhîsa ǀkhae xū-e da ga hō o. Xawe da ge ǃnāsase ra ǂkhî nauna da ga mā o. Kaise i ge a ǃgâi Jehovab ge nēti ī ǀgaub ǃnâ a kuru dasa. Tae-i ǃaroma?

² Jehovab ge nēti ī ǀgaub ǃnâ a kuru da amaga da ge sida ǂkhîba a ǀaro ǁkhā. Sida ǃgâiaǂgaob ai da ge a ǀaro ǁkhā, ǀgauga da ga ôa o nauna da nî mā ǀgausa tsî ǁnāsa dī ǀgara o. ǃGâi tama i hâ Jehovab ge nēti ī ǀgaub ǃnâ a kuru da o?—Psa. 139:14.

3. Tae-i ǃaromab Jehovaba ‘ǂkhîb di Elob’ ase a ǂansa?

³ Nau khoena ra mā khoen a ǂkhî tis Elobmîsa ra mîba da amaga da ge supuse a ǁnâuǃā ǁkhā, tae-i ǃaromab Jehovaba ‘ǂkhîb di Elo’ ǃkhaisa. (1Tim. 1:11) ǁÎb ge ge ǂguro i nauna ge māba tsî khoe-i tsîn ge Jehovab xa ǃnāsase a māǁoa. Jehovab ǃaroma da ge “ǁîb ǃnâ ûi, gon tsî hā xui-ao.” (ǃNǃkh. 17:28) Amase “mâ ǃgâi tsî dīǀoaǀoasa mās hoas” ge Jehovaba xu ra hā.—Jak. 1:17.

4. Tae-e nî hui da î da ǃnāsa ǂkhîba hō?

⁴ Hoa da ge ǀnîsi māsa xu ra hā ǃgâiba ra hōǃâ ǂgao. Nēsa da ge Jehovab māsenxasiba ǁgaes ǃnâ-ū a dī ǁkhā. (Efe. 5:1) Nēsa da ra ǃhaoǃgao khami hā re î da ǃgaoǃgâ tae-e da a dī ǁkhāsa, mā da ra khoen ga ǃgôaǃgâ da tama ī khami da  ga tsâ o? Nēs ge nî hui da î da mā ǀgara tsî māsa xu ra hā ǃgâib ai ǀaro.

JEHOVAB MĀXASIBA ǁGAE

5. Mâ ǀnî xūnab Jehovaba ra mā da?

⁵ Mâ ǀnî ǀgauga Jehovab māxasiba ra ǁgau? ǀNî aiǁgaude ǃgaoǃgâ re, Jehovab ge ǂhâ da hâ xūna ra mā da. ǀNî ǁaeb ge sida di ûiga supu-supu tide xaweb ge ǃnāsa ǁaeba ǂhâ da hâ xūna nî mā da. Aiǁgause, Jehovab ge ra īǁkhā kai î da saran, ǂû-i tsî hâǃkhais tsîna ūhâ. (Psa. 4:8; Mat. 6:​31-33; 1Tim. 6:​6-8) Jehovab ge nē xūna mā da tama hâ, ǁgui-aisaseb ra tsâ amaga ǀgui. Tae-i ǃaromab Jehovaba nēsa ra dība da?

6. Tae-e da Mateub 6:​25,26 sa xu ra ǁkhāǁkhāsen?

⁶ Jehovab ge ǂhâ da hâ xūna ra mā da ǀnamdab a amaga. Mateub 6:​25, 26 ǃnâ hâ mîde ǃgaoǃgâ. (Khomai re.) Jesub ge kurusa xu aiǁgaude ra sîsenū. Jesub ge anidi di aiǁgaude sîsenū tsî ge mî: “ǁÎn ge tsoro, ǃgao tsî ǃhorosâuǃnâ-ommi ǃnâ sâubasen tama hâ.” Xawe ǃgaoǃgâ re tae-eb ge saorase a mîsa: “Xawen ge Elob xa ra ǂûmāhe.” ǁNāpaxub ge Jesuba ge dî: “Sado kha nē ǀhomaniron xa ǃnāsase ǂhâǂhâsa tama hâ?” Jesuba nēba tae-e gere ǁkhāǁkhā da? Jehovab ǃoaba-aon ge xamanin xa a ǀō-aisa. Jehovab ga xamanin di ǂhâsiga kōǃgâ, o da ge ǂgomǃgâsiba nî ūhâ ǁîb ǂhâ da hâ xūna nî mā dasa. ǀNamxaǃnâ ǁgû-i ǁî-i omarisa ra kōǃgâ khamib ge Jehovab tsîna sida ǀnamdab a amaga ra kōǃgâ.—Psa. 145:16; Mat. 6:32.

7. Mâpa ǀgui ǀgau Jehovab di māsenxasiba da a ǁgae ǁkhāba? (Ai-īsiba mû re.)

⁷ Jehovab khami da ge sida tsîna khoena da a ǀnam amaga nî mā. Aiǁgause du ǂû-i tsî saran ǂhâsiba ūhâ ǃgâsa-e a ǂan? Jehovab ge sado a sîsenū ǁkhā î du ǁî-e ǂhâ-i hâ xū-i ǀkha hui. Jehovab di ǃoaba-aon ge a ǂansa tsūkēǃgâb ǃnâ hâ khoenan ra huisa. Aiǁgause, Koronas ǁaeb ǃnân ge ǃgâsana ǂûn, saran tsî nau ǂhâǂhâsa xūn tsîna ǂhâsib ǃnâ ge hâ i khoen ǀkha ge ǀgoragu. ǂGuin tsîn ge mari-e māsenxa mādi ǃnâ-ū ǃhūbaib ǂhawase ra dīhe sîsengu ǃaroma gere mā. ǁNās ge gere hui în ǃhūbaib ǂhawase hâ ǃgâsan, ǂhâsib ǃnâ hâna hui-e. ǁNā ǃgâsan ge Hebreǁîn 13:16 ǃnâ hâ mîdi gere sao-ai: “ǃGâidīs tsî ūts hâ xūna naun ǀkha ǀgoragusa tā ǀuru, nēti ī ǁguibadi ǃnâb Eloba ǃgâiǃgâibasensa ūhâ xuige.”

8. Mâ ǀgaugu ǃnâ da Jehovab di ǀgaiba xu ǃgâiba ra ǀama? (Filipeǁîn 2:13)

 ⁸ Jehovab ge ǀgaiba ra mā. Jehovab ge a ǂkhî, toa tama ǀgaiba ǁîb ǂgomǂgomsa ǃoaba-aon ǀkha ǀgoragusa. (Khomai re Filipeǁîn 2:13 sa.) ǃÂitsâba xu ǂgōsens tamas ka io ǃgom mâsi-e mâǀgais ǃaroma du ǀgore tsâ hâ? ǀNîsi du ge ǃnāsa ǀgaiba gere ǀgoreba î du ǁnā tsēs ǃnâ du nî dī xū-e dītoa. Sadu ǀgores ge ǃereamhe o du ge ǀnîsi Apostel Paulub ge mî mîde a ǃkhō-am ǁkhā: “Tita ge hoa xūna a ǁkhā, ǁnāb tita ra ǀgaiba māb ǃnâ-u.”—Fil. 4:13.

9. Mati da Jehovab ǁîb ǀgaiba ra sîsenū ǀgauba a ǁgae ǁkhā? (Ai-īsiba mû re.)

⁹ Jehovab khami da ge toa tama ǀgaiba ūhâ tama tsî da ge nauna ǀgaiba a mā ǁoa ǁîb ra dī khami. Xawe da ge ǁîba a ǁgae ǁkhā sida ǀgaiba sîsenū tsî nauna huis ǃnâ. Aiǁgause da ge kaira ǃgâsana hui tamas ka io ǀaesen hâna ǁîn omde ǃanuba tsî xūna ǁamaba ǁkhā. Sida mâsib ga mā-am o da ge māsenxase sala ǃanu tsî khôa hâ xūna a kuru hui ǁkhā. Sida ǀgaiba da ga nēti ī xūn ǃnâ sîsenū, o da ge ǂgui ǃgâi xūna sida ǃgâsana a dība ǁkhā.

10. Mati da sida ra mî mîdi ǀkha nau khoe-e a ǀgaiǀgai ǁkhā?

¹⁰ ǂÂis ǃnâ ūhâ re sadu ra mî xū-i ge nau khoena a ǂkhâǃnâ ǁkhā. Sadu xa khoahesa xu ǃgâiba a ǀama ǁkhā khoe-i xa du ǂâi ǁkhā? ǁKhaeǂgaosa ǂhâ hâ khoe-e du a ǂan? Ti i nî īs ga o ǁnā khoe-e ǂanǂan re ǁî-e du ra tsâbasa. ǁÎnats ge sari, bel, karkisa xoaba, e-mailsa sîba tamas ka io smsa xoaba ǁkhā. Tā mî du nî xūn xa ǂâiǂhansen. ǂGaoba xu hâ ǀoro mîdi ge ǀnîsi sadu ǃgâsa i ǂhâhâ xū-e i-î ǂgomǂgomsase hâ ǀgara tsî ǁnā mâsib xa ǃgâise tsâ.—ǂKhm. 12:25; Efe. 4:29.

11. Jehovaba mati ǁîb gā-aisiba ra sîsenū?

¹¹ Jehovab ge gā-aisiba ra mā. ǁKhāǁkhāsabeb Jakobub ge ge xoa: “Xawe sadu di ǀgui-i ga gā-aisiba ǂhâbao, a i Elob hîa māǂgaoxase tsî ǀkhomxaǃnâse hoana ra māb ǃoa ǀgore, o i ge nî ǃkhōǃoa.” (Jak. 1:5) Nēs ge ra ǁgau Jehovab ge ǁîb gā-aisiba ǁîba ǃoa ǀgui ūbasen tama. ǁÎb ge māsenxase naun ǀkha ra ǀgoragu. Jakobub tsîn ge ge mî Jehovab ga gā-aisiba mā ob ge “māǂgaoxase tsî ǀkhomxaǃnâse” ra mā. ǁÎb ge ǂgao tama ǁgaise da nî tsâsa, ǁîb daoǁgausa da ga ǂgan o. Jehovab ge ra ǂhâba î da ǂgan.—ǂKhm. 2:​1-6.

12. Mâ ǃēde da ūhâ î da naun ǀkha sida gā-aisiba ǀgoragu?

¹² Mati da nēsa nî dī? Mati da Jehovaba ǁgae tsî sida gā-aisiba a ǀgoragu ǁkhā?  (Psa. 32:8) Jehovab di khoen ge ǂgui ǃēde ūhâ în ǁkhāǁkhāsen an ra xūna naun ǀkha ǀgoragu. Aiǁgause da ge ǃnāsa ǁaeba ǀasase aoǁnâ sîsen-e dī tsoatsoa hâ ǃgâsana ra ǁkhāǁkhā. ǀHaohâb ǃûi-aogu ge ǃnūǃnâxase ǀhaohâb hui-aogu tsî ǁāǁnâsa ǃgâsagu tsîna ra hui î gu ǁkhāǁkhāsen mati gu ǁîgu ǁgaumâide ǀhaohâb ǃnâ nî dīsa. Oms tsî dī-unus sîsenni ǃnâ ǂansa ūhâ ǃgâsan ge nauna ra hui în Jehovab ǃoabas ǃnâ ra sîsen-ūhe omna om.

13. Mati da Jehovab gā-aisiba ra ǀgoragu ǀgauba a ǁgae ǁkhā?

¹³ Jehovaba ǁgae re nauna du ga ǁkhāǁkhā o. Jehovab ge ǁîb gā-aisiba ū-oa tamase nau khoen ǀkha ra ǀgoragu. ǁNās ǁkhās khami da ge sida ǂans tsî gā-aisib tsîna ǁkhāǁkhā da ra khoen ǀkha māsenxase ra ǀgoragu. Tā da ge sida gā-aisiba nî ǃkhō-oa naun sida di ǃkhaisa nî ūsa da ra ǃao amaga. ǀNî ǁaega da ge ra ǂâi sida tsîn ge ǁkhāǁkhāhe tama hâ i tsî da nauna ǁkhāǁkhā tide ti. ǁNāti ī ǂâiǀgaub ge Jehovab di ǃoaba-aon ǁaegu hō-e ǁoa. Xawe da ge ǂan da a xūn hoana nau khoen ǀkha ra ǀgoragu tsî ǁkhā da an hoana dī tsî ra ǁkhāǁkhā nî. (1Tes. 2:8) ǂHâba da ge ra “în ǁîna ǃaruǀî nauna ǁkhāǁkhā.” (2Tim. 2:​1, 2) Hoa da ga naun ǀkha sida gā-aisiba ǀgoragu, o da ge hoa da gā-ai tsî nî ǂkhî.

KHOEN GA SIDA MĀXASIBA ǃGÔAǃGÂ TAMA IOS

14. Tae-en ǃnāsa khoena ra dī sida ga ǁîna xū-e a dība o?

¹⁴ Nauna da ga mā tamas ka io xū-e dības ǃgōsase sida ǃgâsana, on ge ǃnāsa ǁaeba ra gangan da. ǁÎn ge gangans karkirosa a sîba da ǁkhā ǁîn ra tsâ ǀgauba ǁgâiǂuis ǃaroma. (Kol. 3:15) ǁÎn ga gangan da o da ge sida tsîna a ǂkhî.

15. Tae-e da ǂâis ǃnâ nî ūhâ nau khoen ga ǃgôaǃgâsiba ǁgau tama io?

¹⁵ ǀNî ǁaegan ge khoena ganganxa tama dība nî da ra xūn ǃaroma. ǀNî ǁaegu ai da ge sida ǁaeb, ǀgaib tsî ū da hâ xūn tsîna a sîsenū ǁkhā nauna huisa. Xawen ge ǀnî ǁaega hui nî da go ǀgaub xa ǁae tama. ǁNās ga ī o da mati nî ǂgōsen î da tā sida ǃgâiaǂgaoba ǂoaǃnâ tamas ka io ǁaixa? Dana xoas xa ǂâi re ǃNaeǃkhaidi 20:35 sa. Sida khoena ra dība o da ra hōǃâ ǃgâiaǂgaob ge khoen ǃgôaǃgâsib ai ǃgaoǃgaosa tama hâ. Noxoba da ge ǃgâiaǂgaob ǀkha a mā ǁkhā naun ga ǃgôaǃgâsiba ǁgau tama i xawe. Tae-e a hui da ǁkhā? ǀNî ǀgauga ǃgaoǃgâ re.

16. Tae-e nî hui da î da ǃgâiaǂgaob ǀkha hoaǁae mā?

¹⁶ ǂÂis ǃnâ ūhâ re nau khoena da ga mā, o da ge Jehovaba ra ǁgae. ǃGâi xūna da ge khoena a dība ǁkhā ǁîn ga ǃgôaǃgâ tama ī xawe. (Mat. 5:​43-48) Jehovab ge ra mîmâi xū-e ‘hō-oasa ǃâubasen’ tamase da ga mā, o da “kai mādawa-amsa” nî hōsa. (Luk. 6:35) Tā ǁgaise tsâ re khoen ga hoaǁae gangan du tama io. ǂÂis ǃnâ ūhâ re Jehovab ge nî mādawa-am du ǃgâi xūn hîna du ǁîna ra dīban ǃaroma ‘ǃgâiaǂgaoxa mā-ao’ du a amaga.—ǂKhm. 19:17; 2Kor. 9:7.

17. Mâsa a ǂhâǂhâsa ǃaroma nauna da ra mābasa? (Lukab 14:​12-14)

¹⁷ ǀGui xū-i Jehovab di māsenxasiba da a ǁgae ǁkhā i ge Jesub ge Lukab 14: 12-14 ǃnâ a mî xū-e sîsenūsa. (Khomai re.) Tsū tama i ge hâ ǃhaokhoeǃkhōǃoaxasiba nî mādawa-am da khoen ǀguina ǁkhausa. Nauna xu da xū-e nî hō-oa amaga ǀgui da ra māsa da ga mûǂan o da tae-e nî dī? Ti i nî īs ga o Jesub ge mî xū-e dītsâ re. Xū-e mā-oa du ǁoa khoe-e ǃhaokhoeǃkhōǃoaxasiba ǁgau re. O da ge nî ǂkhî Jehovaba  da ra ǁgae amaga. ǁNāti ī ǂâiǀgauba ūhâs ge nî hui da nau khoen ga ganganxa ǂâiǀgauba ūhâ tama ī xawe.

18. Tae-e hui da ǁkhā î da nauna kō ǃkharuba?

¹⁸ Tā naun xa ǁgaise ǂâi. (1Kor. 13:7) Naun ga gangansiba ǁgau tama ī o da ge a dîsen ǁkhā: ‘Ama ganganoǃnân a tamas ka ion go ǀuru ganganan ra ǃkhaisa mîsa?’ ǀNîsi di ge ǃkharagagu ǃaromade hâ ǁîn ganganxasiba ǁgau tamasa. ǀNîn ge ǃgam ǃgôasiba a ūhâ ǁkhā xawe ǃgomse a ǁgâiǂûisen ǁkhā. ǀNîsin ge ra tao huiba ǃkhōǃoasa ǃgōsasen ge ǁîna nauna ǀnîsi ǃkharuge ǁaeb ǃnâ gere hui amaga. Mâ i ga mâsi xaweb ge sida di ǀnamma nî hui da î da sida di ǃgâsana kō ǃkharuba tsî ǃgâiaǂgaoba mās ǃnâ hō.—Efe. 4:2.

19-20. Tae-i tsîna hui da ǁkhā î da nauna māsa xu hâ ǃgâiaǂgaoba hōǃâ? (Ai-īsiba mû re.)

¹⁹ ǃNūǃnâxa. Ganganxasib xab ge gā-ai gao-aob Salomoba ge xoa: “Sa pere-e ǁgam-i ai aoǂui, ots ge ǂgui tsēdi khaoǃgâ ǁî-e nî hō.” (Aoǁn. 11:1) Nē mîdi ge ra ǁgau ǀnî khoen gaxu ǁae-i ǃkharu hâs khaoǃgâ ǀgui ǁîn di ganganxasiba a ǁgâiǂûi ǁkhā ǃkhaisa. Nēs ge ǀgui ǃgâsas ǀkha ge ī.

²⁰ ǂGui kurina ǃkharu tsîs ge ǃnarimâra mûǂam-aob tarasa ǀasase ǁāǁnâsa ǃgâsasa ǂkhanirosa ge xoaba ǁîsa ra ǂkhâǃnâsa îs ǂgomǂgomsase hâ ǀgara. ǁKhaisa kurin khaoǃgâs ge ǃgâsasa sîǂkhanisa ǃeream tsî ge mî: “Nēs xa du ge a ǀū xawe ta ge goro ǂhâba î du ǂan matikōse du ge ǃkharu gere kurigu ǃnâ a hui tesa.” Aiǃgû tsîs ge ge xoa: “Sadu sîǂkhanis ge kaise ge ǀnamxaǃnâ i xawe xoas ge kaise ti ǂgaoba ge tsâǀkhā ǁnāsa tā ge tātsē ǀuru tide.” a Hōǃâs gere ǃgomsin xa xoa tsîs ge ǃgâsasa ge mî: “ǀNî ǁaegu ai ta ge hoa xūna xu gere ǀûsen ǂgao tsî Jehovaba gere ǃoaba ǀû ǂgao. Xawe ta ge hoaǁae ǁnā xoasa gere ǂâihō tsîs ge ǁnāsa ǀgaiba gere  māte î da ǂgomǂgomsase hâ tsî ge huite î ta tā ǀûsen.” ǀAro tsîs ge ra mî, “ǁnā 8 kurigu ǃnâ i ge sadu ge xoa sîǂkhanisa ge ǂkhâǃnâte.” Mûnan-ai re matikōses ge ǃnarimâra mûǂam-aob tarasa ǂkhî isa ǁnā sîǂkhanisa ǃkhōǃoasa “ǂgui tsēdi khaoǃgâ.” Sida tsîn ge ǀnîsi gaxu ǁae-i ǃkharu hâs khaoǃgâ ǀgui ganganxasiba a ǃkhōǃoa ǁkhā.

21. Tae-i ǃaroma du aiǃgû tsî Jehovab di māsenxasiba ra ǁgae?

²¹ Jehovab ge ǀō-aisa ǁkhāsib ǀkha ge kuru da. Naun xa māhes xa da ǃgâibahe xawe da ge ǃnāsa ǃgâiaǂgaoba ra hō nauna da ga mā o. ǃGâise da ge ra tsâ sida ǃgâsana da ga hui o tsî da ge ra ǂkhî ǁîn ga ganganxasiba ǁgâiǂûisen o. Khoe-i ga ǃgôaǃgâ tamas ka io ǃgôaǃgâ tama ī xawe da ge nî ǂkhî ǂhanu xū-e da ra dī amaga. Tā da ge nî ǀuru “ǃKhūb ge ǁnās xa ǃnāsana a mādawa tsi ǁkhā.” (2Kro. 25:9) Jehovab ra mās xa da ge ǃnāsase a mā ǁoa. ǃNāsa ǃgâiaǂgaob ge hâ Jehovab xa aitsama mādawa-amhesa. Hā re î da aiǃgû tsî sida ǀHomsi ǁGûb māxasiba ǁgae.