Khomai-aon dîdi
Jesub ge ǃui ǂûsa ǂnûiǂgā, o gu ge 70 ǁkhāǁkhāsabega mâpa ha i ǁîb ge ǂgurose sîǂui hâ i ga î gu sī aoǁnâ? ǁÎga ǁîba ge ǁnāxuǃgâ?
Jesub ǃui ǂûs tawa gu ge 70 ǁkhāǁkhāsabega ǀkhai īs ge ǂâibasen tama ǁîgu ge ūǃoahe tamas ka io gu ge ǁîba ǁnāxūǃgâsa. ǁNāti ī xū-e ǂâis ge ǂhâbasa tama. Jesub ge ǁîb apostelgu ǀkha ǀgui, ǁnā ǃnās ai gere ǀhao ǂgao.
Jesub ge 12 gu tsî 70 apostelgu tsîn hoana gere ūǃoa. Jesub ge ǁîb ǂgui ǁkhāǁkhāsabega xu 12 khoega ge ǁhûi tsî ǁîb apostelgu ti ge ǂgai. (Luk. 6:12-16) Jesub ge Galileab ǃnâ ge hâ ī “disiǀgamǀa ǁkhāǁkhāsabegu âba ǂgaiǀhao tsî. . . ǁîga ge sîǂui, Elob Gaosiba aoǁnâ tsî gu ǀaesen hâna nî ǂuruǂuruse.” (Luk. 9:1-6) Egab ge Judeab ǃnâ Jesuba ‘hûdisiǀgamǀaga ǁhûiǂui tsî ǁîga ǀgamǀgamse ǁîb aiǃâ ge sîǂui.’ (Luk. 9:51; 10:1) ǁNā-amagab ge Jesuba ǃkharagagu ǃādi ǃnâ ǁîb xa gere aoǁnâ ǁkhāǁkhāsebega ge ūhâ i.
Jesub sao-ao kai ge Jodeǁîn ge noxopa kurib hoaba Pasxaba ǀguiba ǁîn omaridi ǀkha gere tsēdī. (Eks. 12:6-11, 17-20) ǃNupuse ǁîb ǁōb aiǃâ î ge Jesub tsî ǁîb apostelgu tsîna Jerusalemsa ǃoa ge ī. Xaweb ge ǁîb ǁkhāǁkhāsabegu hoagu Judeab, Galileab tsî Pereab ǃnâ ge hâ î ga ǂgai tama hâ î gu Pasxaba ǁîb ǀkha tsēdī. ǃGāsa î ge a Jesub ge ǁîb apostelgu ǀkha ǀgui nētsēsa gere tsēdī ǂgao. ǁÎgab ge ge mîba: “Tsâ ta nîs aiǃâ ta ge kaise goro ǁkhore, nē Pasxaǃuiǂûsa sago ǀkha ǂûǀhaosa!”—Luk. 22:15.
ǁÎb ge ǃgâi ǃaromasa ge ūhâ i. Jesub ge ǀgūǁae “Elob di ǁKhao, ǃhūbaib di ǁorena” ra ūbēb ase nî ǁō. (Jhn. 1:29) ǁÎb ge Jerusalems ǃnâ nî ǁō, Elob ǃoa i ge ǁguibate gere dībahe ǃās ǃnâ. Pasxaǁkhaob ge Israelǁîna gere hōhōǃnâ Jehovab ge ǁîna Egipteba xu ore ǃkhaisa. Xaweb ge Jesuba ǁnās xa ǃnāsa-e nî dī, ǁîb ge hoa khoena ǁōb tsî ǁoreba xu nî ǃnora kai. (1Kor. 5:7, 8) Jesub ge dī xū-i ge gere īǁkhā kai, î-i Jesub di 12 apostelga Xristeǁî ǀhaohâb ǃgaoǃgao. (Efe. 2:20-22) ǃAnu ǃās Jerusalems ge “disiǀgamǀa ǃgaoǃgaoǀuidi ai ge omsa i, ǁîdi ai di disiǀgamǀa apostelgu ǁKhaob digu di ǀonde a xoasade.” (J.ǂHa. 21:10-14) ǁNā-amaga î ge ǂgomǂgomsa apostelga ǂhâǂhâsa ǃâba ge ūhâ i Elob di ǂâisa dīǀoaǀoasa. Nēs ǀkha da ge ra ǁnâuǃā tae-i ǃaromab ge Jesuba ǁîgu ǀkha ǀuniga Pasxab tsî ǁnās khaoǃgâ gere sao ǃui ǂûsa ǁîgu ǀkha ǀguiba gere ǂûǂgaosa.
Hudisi (70) gu tsî ǀnî ǁkhāǁkhāsabegu tsîn ge ǁnā ǃui ǂûs tawa ge hâ tama hâ i. Xawe î ge hoa ǁkhāǁkhāsabegu ǂgomǂgomsa ga ǃgâiba nî ǀama. Hoa ǁkhāǁkhāsabegu ǂhauhesa Xristeǁî kai ge gu ge nî ǁnā ǃgaeǀhaos di ǃâ kai, Jesub ge ǁnā ǃuia ǁîb ǁkhāǁkhāsabega mîbasa.—Luk. 22:29, 30.
