1. ǂGui khoena mâ mûǂuiba sîsenni xa ūhâ?

SADU ra hâ ǂharis ǃnân khoena sîsen-e mati ra mû? ǀNî ǃhūgu ǃnân ge khoena kaise ǃgarise ra sîsen. Kaise ra sîsen khoen ge ǁaeba ūhâ tama hâ în sâ, ǁîn omaridi ǀkha ǁaeba ūhâ tamas ka io ǁîn gagasi ǂhâsiga kōǃgâ. (Aoǁn. 2:23) ǀNî hâ ǃgomsib ge ǀnî khoen ge sîsen ǂgao tama hâ tsî ǃaromana ra ôa în tā sîsen.—ǂKhm. 26:13, 14.

2-3. Jehovab tsî Jesub tsîkha tae ǃnôa aiǁgausa sîsenni xa ge mā?

² ǂGui khoen ge nē ǃhūbaib ǃnâ kaise ra sîsen tamas ka io ǀorose ra sîsen. Xawe Jehovab tsî Jesub tsîkha sîsenni xa ūhâ mûǂuiba ǃoa kō re. ǂAn da ge a Jehovab sîsensa kaise a ǀnam ǃkhaisa. Jesub ge nēsa ge ǃgāsa kai, mî rase: “Ti îb ge nēsis kōse ra sîsen, o ta ge tita ona ra sîsen.” (Jhn. 5:17) ǂÂi re sîsenni hînab ge Jehovaba a dīb xa ǀhomǃgāgu, ǀgamirodi tsî ǃhūbaib tsînab ge kuru o. ǂGui îsa xūn hînab ge Jehovaba a kurun tsîna da ge nēba ǃhūbaib ai ra mû. Psalmdi xoa-aob ge ge mî: “Matikōse gu a kai sa sîsenga, ǃKhūtse! Sats ge ǁîgu hoaga gā-aisib ǀkha ge dī; ǃhūbaib ge sa kurusaben xa ǀoa hâ.”—Psa. 104:24.

³ Jesub ge ǁîb Îba gere ǁgae. ǀGôab ge Elob ge ‘ǀhomga gere ǁāǁā’ ǁaeb ai gere hui. ǁÎb ge ‘ǂam sîsen-aose’ ge hâ i. (ǂKhm. 8:27-31) ǃHūbaib aib ge hâ i o, ob ge Jesuba kaise ǂoaǂamsa sîsen-e ge dī. Jesub ge ge mî Jehovab ge mā bi sîsenni ǂû-i khami ge ī i sa tsî ǁîb dīgu ge gere ǁgau Elob xab sî-e hâ ǃkhaisa.—Jhn. 4:34; 5:36; 14:10.

4. Jehovab tsî Jesub tsîkha xu da tae-e sâs xa a ǁkhāǁkhāsen ǁkhā?

 ⁴ Jehovab tsî Jesub tsîkha ǃgarise sîsens xa ra mā da aiǁgaude ra ǂâibasen sâ ǁoa da a di? Hî-î. Jehovab ge tsau tama hâ ǁnās ǃaromab ge xū-eb ga dī toa o, sâsa ǂhâ tama hâ. Elobmîs ge ra mî Jehovab ge ǀhommi tsî ǃhūbaib tsîna kuru toa o, ob ge “sâ tsî ge khoakhoasen” di. (Eks. 31:17) Nēs ge ra ǂâibasen Jehovab ge sîsen ǀû tsî kurub ge xūna ǃoa kō tsî ǂkhîba a hōsa. Jesub ge ǃhūbaib aib ge hâ io ǃgarise gere sîsen xaweb ge noxoba ǁaeba ǁamaǂûi tsî sâ tsî ǁîb ǀhōn ǀkha ǂûǀhaode gere ūhâ.—Mat. 14:13; Luk. 7:34.

5. Tae-e ǂgui ǃoaba-aon Elob dina a ǃgomba?

⁵ Elobmîs ge Elob ǃoaba-aona ra ǂkhâǃnâ în sîsen-e ǀnam. ǁÎb ǃoaba-aon ge ǃgarise nî sîsen tsî da nî ǀopesa. (ǂKhm. 15:19) ǀNîsi du ge ra sîsen sadu omarisa kōǃgâs ǃaroma. Tsî hoa Xristeǁîn ge aoǁnâs di ǁgaumâisa ūhâ. Xawe du ge noxoba ǂâusase nî sâ. ǁAen ai i a ǃgomba du ǁaeba sîsenni, aoǁnâ sîsenni tsî sâs ǃaroma dīsa? Mati da a ǂan matikō ǁaeba da nî sîsens tsî matikō ǁaeba da nî sâs tsîna?   

6. Markub 6:30-34 sa mati ra ǁgau Jesub ge ǂhanu mûǂuiba sîsenni tsî sâs xa ūhâ isa?

⁶ ǂHanu mûǂuiba sîsenni xa ūhâs ge a ǂhâǂhâsa. Gao-aob Salomob ge ge xoa: “Mâ xū-i hoa-i ge ǁî-i di ǁaeba ūhâ.” ǁÎb ge ǁaeb ǂgās dib, ǂnubis dib, ās dib, âis dib tsî ǁaeb ǂkhîba ūhâs dib tsîn xa ge ǃhoa. (Aoǁn. 3:1-8) ǀGam ǂhâǂhâsa xūn ûib ǃnân ge sîsen-i tsî sâs tsîna. Jesub ge ǂhanu mûǂuiba sîsenni tsî sâs xa ge ūhâ i. ǀGui ǃnā gu ge apostelga aoǁnâ sîsenni ‘ǂûs ǁaeb tsîna gu ge ūhâ tama hâ i-e’ xu ge oaǀkhī. Jesub ge ge mî: “ǃŪ-aisa ǃkhais ǃoa ǀguri hâǃgû î go sâro re.” (Khomai re Markub 6:30-34.) ǁÎb tsî ǁîb ǁkhāǁkhāsabegu tsîn ge ǂhâgu hâ sâsa ǁaen ai hō tama hâ i xaweb ge Jesuba ge ǂan i, hoagu sâsa ǂhâ hâ ǃkhaisa.

7. Sâtsēs xa ǁkhāǁkhāsensa mati nî huida?

⁷ Hoa da ge sâsa ǂhâ hâ tamas ka io tsēkorobe da ra dī xūna nî ǀkharaǀkhara. Nēsa da ge Elob ge ǁîb khoena a mā, mâ wekheb hoaba ge hâ i sâtsēsa xu a mû ǁkhā. Sada ge Moseb ǂhanub ǃnāga hâ tama hâ xawe da ge Moseb ǂhanub sâtsēs xa ra mî xūna xu a ǀama ǁkhā. Nēpa xu da ra ǁkhāǁkhāsen xūn ge nî huida mûsa ǂhanu mûǂuiba da sîsenni tsî sâs xa ūhâsa.

8. Eksodus 31:12-15 ǃoagus sâtsēsa ge tae-i tsē-i?

⁸ Elobmîs ge ra mî ‘ǃnaniǁî tsēs’ aib ge Eloba ǃhūbaib ai hâ xūna kurus ǀkha ge ǀû. (Gen. 2:2) Xaweb ge Jehovaba sîsensa a ǀnam tsî nēsis kōse ra sîsen. (Jhn. 5:17) Jehovab ge ǃnani “tsēde” ge sîsen tsî hûǁî “tsēs” ai ge sâ, nēs ǃaromab ge Israelǁîna ge mîba în mâ hûǁî tsēs wekheb dis hoas ai sâ. Elob ge ge mî sâtsēs ge ǁîb tsî Israelǁîn ǁaegu ǁgauǁgaus ase ge ī-i di. Sâtsēs ge ‘Jehovab ǃoa-ai ge ǃanu i.’ (Khomai re Eksodus 31:12-15.) ǁNā tsēs ai sîsen tama īs ge hoa khoena ge ǃkhōǂgā hâ i ǀgôaron, ǃgān tsî xamanin tsîn hoana. (Eks. 20:10) Nēs ge khoena gere hui în gagasi xūn ǃaroma ǃnāsa ǁaeba ūhâ.

9. Jesub tsēdi ǃnân khoena mâ ǂhanu tama ǂâi ǀgauga sâtsēs xa ge ūhâ i?

⁹ Elob khoen ǃaromas ge sâtsēsa ge  ǃgâi i xawe gu ge ǀnî ǂgomdi ǂgaeǂgui-aoga Jesub ǁaeb ǃnâ sâtsēs xa aitsama ǂhanuga ge ǂnûiǂgā. ǁÎgu ge gere mî sâtsēs ai ǃhoroba ǂûs amsi ǃōras tamas ka io ǀaesen hâ khoe-e ǂgauǂgaus ǂhanu tama hâ di. (Mrk. 2:23-27; 3:2-5) Xawe nēs ge Elob di ǂâibasen tama ge hâ īsa tsî Jesub ge nēsa ǁnâu ǂgao gere khoena ge ǂanǂan.

10. Tae-e da Mateub 12:9-12 ǃnâ Jesub ge sâtsēs xa ūhâ i mûǂuiba xu a ǁkhāǁkhāsen ǁkhā?

¹⁰ Jesub tsî ǁîb di Jodeǁî saosaben tsîn ge sâtsēsa gere tsēdī Moseb di ǂhanub ǃnāgan ge hâ i amaga. * Xaweb ge Jesuba mîs tsî dīb tsîn ǀkha ge ǁgau tsū tama i hâsa ǃgâi xūna dī tsî huiba nau khoena sâtsēs ai māsa. ǁÎb ge ǃgāsase ge mî: ‘Sâtsēs ai ǃgâidīs ge mā-amhe hâ’ di. (Khomai re Mateub 12:9-12.) ǁÎb ge sâtsēs ai ǃgâiba dī tsî huis a tsū ǃkhaisa ge mû tama hâ i. Jesub gere dī xūn ge ge ǁgau ǁîb ge ǃamkuse gere ǁnâuǃāsa tae-i ǃaromab Eloba ǁîb khoena sâtsēs ai gere sâ kai ǃkhaisa. Elob khoen ge ǁnā tsēs ai ǁîn di hoaǃnâ-aixa xūna xu gere sâ amagan ge Elob ǃoabas ǃnâ ǃnāsa-e ge dī ǁkhā i. Jesub ge omaris hîna sâtsēsa gagasi xūn ǃaroma gere sîsen-ūs ǃnâ ge kaikhâi. Nēsa da ge Jesub xa a ǂan khomai da ga o: “Tsîb ge Nasarets, kaikaiheb ge ǃās tawa sī, tsî ǁnaetib âb ǃoa sâtsēs ai sinagogeb ǃnâ ǂgâ tsî ge khâi, khomaib nîse.”—Luk. 4:15-19.

11. Ham-e ǃgâi aiǁgaus sîsenni disa Jesuba ge a ǁgau?

¹¹ Joseb ge Jesuba ge hui ǃgâi ǃnaokuru-ao kais ǀkha tsî Elob sîsen-e ra mû ǀgaus tsîna ge mîba bi. (Mat. 13:55, 56) Tsî Jesub ge Joseba tsēs hoasa gere mû, ǃgariseb da sîsen hîna ǁîb di kai omarisa kōǃgâs ǃaroma. Egab ge Jesuba ǁîb di ǁkhāǁkhāsabega ge mîba “sîsenao-i ǁî-i amǃnâsa anu hâ” di. (Luk. 10:7) Nēs ǃnâ-ū da ge ra mû Jesub ge ǃgarise sîsensa ge ǂan i.

12. Mâ xoade Elobmîs ǃgarise sîsens xa tae-e ra mîsa ra ǁgau?

¹² Apostel Paulub tsîn ge ǃgarise sîsensa ge ǂan i. ǁÎb di ǂam sîsenni ge nau khoena Jesub xa mîbas tsî Jesub xa ǁkhāǁkhās tsîn xa ge hâ i. Xaweb ge Pauluba kōǃgâsens amsis tsîna gere sîsen. Tesalonikaǁîn ge ge ǂan i ǁîb “ǃoab tsî ǀhupuǀhupusens” tsîn ǀkha ‘tsēs tsî tsuxub tsîra gere sîsensa,’ îb tā khoe-i xare-e “ǃgomma mā.” (2Tes. 3:8; ǃNǃkh. 20:34, 35) Paulub ge ǁîb sîsenni xa xoa o, ob ge ǀnîsi ǁîb tentkurusa ǃoa gere ǁnaeǁgau. Korintes ǃnâb ge hâ io, ob ge Akwilab tsî Prisilas tsîra ǀkha gere hâ tsî “ǁîra ǀkha . . . gere sîsen, tentomkuru-aora ge i amaga.” Paulub “tsēs tsî tsuxub” tsîna gere sîsen ǃkhais ge ǂâibasen tama hâ ǁîb ge sâ tama hâ i di. ǁÎb ge tentomkurusa xu gere sâ sâtsēs ai. Nēs ge aiǂhanuba gere mā bi Jodeǁîn hîna ge sâtsēs ai ǁîn tsîna sîsen tama hâ îna aoǁnâbasa.—ǃNǃkh. 13:14-16, 42-44; 16:13; 18:1-4.

13. Tae-e da Paulub aiǁgausa xu a ǁkhāǁkhāsen ǁkhā?

¹³ Apostel Paulub ge ǃgâi aiǁgausa ge mā da. Kōǃgâsens ǃaromab gere sîsen xaweb ge ǁaeba gere dī “ǃgâiǂhôas Elob disa nî ǃoabaga.” (Rom. 15:16; 2Kor. 11:23) Tsîb ge nauna gere ǂkhâǃnâ hoaǁae aoǁnâsa. Akwilab tsî Prisilas tsîra ge Paulub ǀkha ǀguiba tentomkurus ǃnâ gere sîsen xawe ǂhâǂhâsa as ge ǁîra ge ge ‘ǀhaoǃoaba-ao i Xristub Jesub ǃnâ.’ (Rom. 12:11; 16:3) Paulub ge Korinteǁîna ge ǂkhâǃnâ în “ǃaruǀîǀgui ǀaro ǃKhūb di sîsenni ǃnâ.” (1Kor. 15:58; 2Kor. 9:8) Jehovab ge apostel Pauluba ge ǂkhâǃnâ îb xoa: “Sîsen ǂgao tama khoe-i ǁkhāti ǂû tide ǃkhaisa.”—2Tes. 3:10.

14. Jesub mîdi hîna Johaneb 14:12 ǃnâ mâde tae-e ra ǂâibasen?

¹⁴ Nē ǀuni tsēdi ǃnâ kaise a ǂhâǂhâsa sîsenni ge aoǁnâ tsî ǁkhāǁkhāsabe dīs sîsen-e. Jesub tsîn ge ge mî ǁîb ǁkhāǁkhāsaben kai sîsenga ǁîb xa nî dī di. (Khomai re Johaneb 14:12.) ǁÎb ge ge ǂâibasen tama hâ i ǁîb khami da buruxa dīga nî dī di. Xaweb ge gere ǂâibasen ǁîb saosaben ǃnāsa ǃhūgu ǃnâ ǂgui khoena nî aoǁnâba tsî nē sîsen-e gaxuse ǁîb xa nî dīsa.

15. Mâ dîde da nî dîsen tsî tae-i ǃaroma?

¹⁵ Sîsen-e du ga ūhâ o, o sao ra dîde dîsen re: ‘ǃGarise ra sîsen khoe-i ase ta ti sîsenni tawa a ǂansa? Ti sîsen-e ta ǁaeb ai ra dī tsî ti ǁkhāsib hoab ǀkha?’ Î di du ga ǃeream ǁkhā o, o du ge sadu sîsen mā-aob ǂgomǃgâsiba ūhâ. Tsîn ge sadu sîsenni tawa hâ khoena māsenxase ǃgâiǂhôasa ǃoa a ǃgâ ǁkhā. Sao ra dîde sadu aoǁnâ tsî ǁkhāǁkhā sîsenni xa dîsen re: ‘ǃGarise ra sîsen khoe-i ase ta aoǁnâ sîsenni ǃnâ a ǂansa? ǃGâise ta ti ǂguro saridi ǃaroma ra aiǂhomisen? ǃGâiǃgâibasensa ūhâ khoena ǃoa ta ǁkhawa ra oa? Tsî ta hoaǁae  ǃkharaga ǃâgu aoǁnâ sîsen-i digu ǃnâ ra ǁhao?’ Î di du ga mî o, o du ge sadu sîsenni ǃnâ ǂkhîba nî hō.

16. Jesub tsî ǁîb apostelgu tsîna sâsa mati gere mû tsî nēsa mati nētsēs khoen ūhâ mûǂuiba xu ra ǀkhara?

¹⁶ Jesub ge ge ǂan i ǁîb tsî ǁîb apostelgu tsîn sâsa ǂhâ hâ ǃkhaisa. Xawe ǂgui khoen ǃkharu ge ǁaeb ǃnâ ge ûi hâ în tsî nētsēs din tsîn ge Jesub di ǂkhōs ǃnâ hâ ǃkhū hâ khoeb ǀkha a ǀgopeǀnōhe ǁkhā. Nē khoeb ge ge mîbasen: “ǁNâi sâ, î ǂû, î ā, î ǃgâiaǂgao.” (Luk. 12:19; 2Tim. 3:4) ǁÎb ge ge ǂâi hâ i ûib ǃnâ ǂhâǂhâsa xūn ge sâs tsî ǃgâi ǁaeba ūhâsa. Xawe gu ge Jesub tsî ǁîb apostelgu tsîna ǁîgu ǂkhîba hoan ǂam-ai ǂhâǂhâsa xū-i ase ge mû tama hâ i.

17. Sîsenni khaoǃgâ da ūhâ ǁaeba da mati ra sîsen-ū?

¹⁷ Nētsē da ge ra dītsâ Jesub di aiǁgausa saosa tsî sîsenni khaoǃgâ da ūhâ ǁaeba sâs ǃaroma ǀgui sîsen-ū tama hâ xawe aoǁnâ sîsenni tsî ǀhaode ǁhaoǃnâs ǃaromas tsîna. Kaise i ge sada amsi a ǂhâǂhâsa ǁkhāǁkhāsabedī tsî ǀhaode ǁhaoǃnâsa, nēs ǃaroma da ge hoaǁae ǁaeba ra ǁamaǂui gagasi xūn ǃnâ ǁhaos ǃaroma. (Heb. 10:24, 25) Sâǁaeb ai da ga hâ xawe da ge sada gagasi xūn ǀkha ra aiǃgû ǂgao, nēs ge ǀhaode ǁhaoǃnâs tsî khoen ǀkha da ga ǃhoa ǁkhā ǁae-i hoa-i ai aoǁnâba nîsa.—2Tim. 4:2.

18. Sada Gao-aob Xristub Jesuba tae-e da nî dīsa ra ǂhâba?

¹⁸ Kaise da ge ra gangan sada Gao-aob Xristub Jesub a ǁnâuǃāxa ǃkhaisa tsî dī da nîs xa ǃnāsa-e sada xu ǃâubasen tama hâsa. (Heb. 4:15) ǁÎb ge ǂhâ da hâ sâsa da nî hō ǃkhaisa ra ǂgao. ǁÎb ge kōǃgâsens amsi da nî sîsens tsî khoakhoa da ra sîsenni ǁkhāǁkhāsabedīs di-i ǃnâ da nî ǁhaos tsîna ra ǂgao. Sao ra ǁkhāǁkhāǃâs ǃnâ da ge Jesub ge tae-e ǃnoraǃnora das amsi dīsa nî ǃhoaǃgao.