1. Jehovaba ǁgûna mâ ǃereamsa ge mā?

JEHOVAB ge ǂguro khoe-aogura ǀgôana ūhâs di turab ǀkha ge kuru. Elobmîs ge ra mî: “ǀGôagu ge ǃKhūb di ǀumixūga.” (Psa. 127:3) Nēsa tae-e ra ǂâibasen? ǂÂi re ǀnîsi i ga sadu ǀgū ǀhōsa-e ǁî-i ǂgui mari-e kōǃgâ kai du o. Nēs xa du mati nî tsâ? ǁÎ-i ra ǂgomǃgâ du ǃkhaisa du ge nî ǃgôaǃgâ. Xawe du ge ǀnîsi nē mari-e du mati ǃgâise nî kōǃgâ ǃkhais xa nî ǂâiǂhansen. Jehovab sida ǀgū ǀhōsab ge ǁgûna xū-e ra mā hîna mari-i xas tsîna a kai-e. ǁÎb ge ǁîna ǁgaumâisa ge mā în ǁîn ǀgôana ǃgâise kōǃgâ, în ǁîn ǀgôana ǂkhîb tsîna ūhâ.

2. Mâ dîde da nēsi nî ǃhoaǃgao?

² Ham-e nî mîǁgui ǃgame hâ khoe-aogura ǀgôana nî hōs tsî mâǁae ra ǀgôana nî hōs tsîna? Tsî ǁgûna mati ǁîn ǀgôana nî hui în ǂkhî ûiba ūhâ? ǀNî Elobmîs daoǁgaudi xa ǂâi re hîna Xristeǁî khoe-aoguna a hui ǁkhāde în ǃgâi mîǁguiga dī.

3. (a) Ham-e nî mîǁgui ǃgame hâ khoen ǀgôana nî ūhâ ǃkhaisa? (b) Mâ Elobmîs daoǁgauden ǃgame hâ khoen ǀhōsan tsî omaris tsîna ǂâis ǃnâ nî ūhâ?

³ ǀNî ǃhaodi ǃnâ i ge ǀasase ǃgame hâ khoe-aogura ǃgameb khaoǃgâ ǀgôana nî hō ǃkhaisa ra ǂgaoǀkhāhe. ǁÎra omaris ǁanin tamas ka io ǀnî hâ khoen ge ǁîra a ǁgari ǁkhā i  ra ǃgameb khaoǃgâ ǃhaese ǀgôana hō. Jethro di ǀon hâ ǃgâsab hîna Asiab ǃnâ ra hâb ge ra mî “ǀhoahâb ǃnâ i ge ǀnî ǃgâsan hîna ǀgôana ūhâna ǀgôana ûhâ tama hâ ǃgâsana ra ǁgari în ǁîn tsîna ǀgôana hō.” Jeffrey di ǀon hâ ǃgâsab hîna ǁîb tsîna Asiab ǃnâ ra hâb ge ra mî “ǀnîn ge ǀgôana ūhâ tama hâ ǃgâsana ra mîba ǁîn ge kairan ga o khoe-e ūhâ tama nî i kōǃgâ-es ǃgao di.” Xawe mâ ǃgame hâ khoe-i hoa i ge aitsama nî mîǁgui ǀgôana i nî ūhâ ǃkhaisa. ǁÎra ge aitsama ǁnāsa nî mîǁgui ǁnās ge a ǁîra di ǃeream. (Gal. 6:5) ǀAsase ǃgame hâ khoe-aogura di omaris tamas ka io ǀhōsan ge ǁîra ǂkhîba nî ūhâsa ra ǂgao. Xawen ge ǁîna nî ǂan ǃgame hâ khoe-aogura nē mîǁguib ǀgôana ra nî ūhâ tamas ka io ūhâ tides diba nî dīsa.—1Tes. 4:11.

4-5. Mâ ǀgam xūn xan ǃgame hâ khoena nî ǃhoa tsî mâǁaeba a ǃgâi nēs xa ǃhoasa? ǁGuiǃā re.

⁴ ǃGame hâ khoen hîna ǀgôana ra ūhâ ǂgaon ge ǀgam ǂhâǂhâsa dîra nî ǃhoaǃgao: ǂGurose, mâǁaen ǀgôana ra ūhâ ǂgao? ǀGamǁîse, matikō ǀgôanan nî ūhâ? Mâba a ǃgâi ǁae khoe-aogura nē xūn xa ǃhoasa? Tsî nē ǀgam xūn xa ǃhoasa tae-i ǃaroma a ǂhâǂhâsa?

⁵ Khoe-aogura ge ǃgame ra nîs aiǃâ ǀgôana ūhâs xa nî ǃhoa. Tae-i ǃaroma? Kaise i ge a ǂhâǂhâsa ǁîra hoara nēs xa ǀgui ǂâiǀgauba ūhâsa. Nē ǃereamsa ra nî tani hōs xas tsîna ra ge nî ǂâiǃgâ. ǀNî ǃgame hâ khoen ge kurib tamas ka io ǀgam kurikha ra ǃâu ǀgôanan nî hōs aiǃâ nēs ǁîna xu ǁgûn ase ǂgui ǁaeb tsî ǀgaib tsîna nî ū amaga. Nēs ge ra dī i ra ǁaeba ūhâ ǃgame hâ khoen ase ǂangusa tsî ra mā-am i ra ǃgâi ǀhōsagusisa omkhâi.—Efe. 5:33.

6. Nē ǁaeb hîna da ûiǃnâ hâba mati ǃgame hâ khoen ǀnîna ge tsâǀkhā?

⁶ ǀNî Xristeǁîn ge Noaxi ǃnona ǀgôagu tsî ǁîgu taradi tsîn di aiǁgausa ǁgaesa ge mîǁgui. Nē ǃnona khoe-aogun ge ǃgameb khaoǃgâ ǃhaese ǀgôana ge hō tama hâ i. (Gen. 6:18; 9:18, 19; 10:1; 2Pet. 2:5) Jesub ge sida ǁaeba “Noaxi di tsēdi” ǀkha ge ǀgopeǀnō tsî amabes ǃnâ da ge ‘ǃgom ǁaegu’ ǃnâ ûi hâ. (Mat. 24:37; 2Tim. 3:1) Nēsa ǂâis ǃnâ ūhâsen ge ǀnî ǃgame hâ khoena ǀgôana ūhâsa ge mâiǂui în ǃnāsase Jehovab ǃoabas ǃnâ dī ǁkhā.

7. Lukab 14:28, 29 tsî ǂKhoamîdi 21:5 ǃnâ hâ daoǁgaode mati ǃgame hâ khoe-e a hui ǁkhā?

 ⁷ ǀGôana ra nî ūhâ tsî matikō ǀgôana ra nî ūhâ ǃkhaisa ra nî mîǁguis aiǃâ ra ge aibe ǃgame hâ khoera ‘ǂhâba ra hâna nî ǃgôa.’ (Khomai re Lukab 14:28, 29.) ǃGame hâ khoen hîna ǀgôana ūhân ge ra ǂanǃgâ nēs kaise ǂgui mari-i ǀgui-e ǃkhōǂgā tama hâsa xawe ǂgui ǁaeb tsî ǀgaib tsîna. Nēs ge ǁaeb tsî ǀgaib tsîna ǂhâ hâ. Nēs ǃaroma i ge ǂhâǂhâsa în ǃgame hâ khoena sao ra dîde dîsen: ‘Hoama nî sîsen im sim omaris di ǂhâsiga kōǃgâ? Sim omaris di ǂhâsigu a taesam hoama ra mîǁgui? Hoam ga ra sîsen o ham-e ǀgôana nî kōǃgâ? Ham-e ǁîn di ǂâiǀgaub tsî tanisen ǀgaub tsîna nî tsâǀkhā?’ ǃGame hâ khoen ga nē dîdi xa ǂâiǃgâ o, on ge ǂKhoamîdi 21:5 tawa hâ daoǁgaude ra sao. Khomai re.

8. ǃGame hâ khoena mâ ǃgomsina nî ǃâubasen tsî ǀnamxaǃnâ aoba tae-e nî dī?

⁸ ǀGôa-i ge ǂgui ǁaeb tsî ǀgaib tsîna mâ ǁgû i hoa-e xu ra ǂgaoǀkhā. ǁNās ǀkhan ge ǃgame hâ khoena ǃnubu ǁaerob ǃnân ga ǀgôana hō o, o ǃgomsiba ra hōǃâ mâ ǀgôa-i hoa-e kōǃgâsa. ǀNî ǃgame hâ khoen hîna ǂgui ǂkham ǀgôana ūhân ge ra mî ǁîn ge kaise gere ǂâiǂhansen di. ǁGûs ge ǀnîsi hoaǁae tsau hâse a tsâ ǁkhā. ǁÎs ge ǁnātikōse nî tsau ǁkhāsibas ūhâ tama nî īsa Elobmîsa ôaǃnâ, ǀgore tsî aoǁnâ sîsenni ǃnâ ǂoas diba. ǁÎs ge nî ǃgombahe i Xristeǁî ǀhaodi tawa ǃgaoǃgâxase ǃgâ tsî nē ǀhaode xu ǀamasa. ǀNamxaǃnâ aob ge hoa xūna nî dī ǁîb tarasa ǂkhâǃnâsa ǁîra ǀgôana ǀhaodi tsî oms tawas tsîna kōǃgâs ǃnâ-ū. Aiǁgauseb ge ǁîb tarasa a hui ǁkhā oms ai hâ sîsenna dīs ǃnâ-ū. ǃGariseb ge nî sîsen is hoa omarisa hoaǁae hâ omaris ǃoabasa xu ǀama. Tsî Xristeǁî ǁgûb ge ǁîb omaris ǀkha hoaǁae aoǁnâ sîsenni ǃnâ nî ǁhao.

9-10. Tae-e a ǂhâǂhâsa ǁgûna ǁîn ǀgôana huis ǃgao?

⁹ Mâna a ǀnî xū hînan ǁgûna nî dīna ǁîn ǀgôana huisa în Jehovaba ǀnam. Matin ǁîn ǀgôana nē ǁgai ǃhūbaib di ǁkhōǁkhōsasiga xu a ǁkhauba ǁkhā? ǁGûn a dī ǁkhā xūna ǃoa kō re.

¹⁰ Jehovab huiba ǀgoreba re. Manoaxi tsî ǁîb taras tsîn di aiǁgausa kō re ǁîra ge ge Simmsoni di ǁgû i. Manoaxi ge ǁnâu o ǁîb tsî ǁîb taras tsîn ge ǀgôaba ra hō di ob ge Jehovaba ge ǀkhomma îb daoǁgaubi matib nē ǀgôaba nî kaikai ǀgausa.

11. ǂHanuǂhaunu-aogu 13:8 tawa i ra ǁgau-e khamin ǁgûna mati Manoaxi aiǁgausa a ǁgae ǁkhā?

 ¹¹ Nihadi tsî Almas hîna Bosniab tsî Herzegovinab tsîna xu ra hā ra ge Manoaxi aiǁgausa xu ge ǁkhāǁkhāsen. ǁÎra ge ra ǁguiǃā: “Manoaxi khamim ge Jehovaba ge ǀkhomma îb daoǁgau mi matim nî ǃgâi ǁgû i ǃkhaisa. Jehovab ge sim ǀgorede ǂgui ǀgaugu ǃnâ ge ǃeream Elobmîs xoadi, Elobmîs ai ǃgaoǃgaosa ǂkhanin, ǀhaohâb ǀhaodi tsî ǀkharib kai ǀhaodi tsîn ǃnâ-ū.”—Khomai re ǂHanuǂhaunu-aogu 13:8.

12. Joseb tsî Marias tsîna mâ aiǁgausa ǁîra ǀgôana ge mā?

¹² Sadu aiǁgaus ǃnâ-ū ǁkhāǁkhā re. Mî du ra xūn ge ǂhâǂhâsa xawe dī du ra xūn ge kai sîsenǂuiba sadu ǀgôa-i ai a ūhâ ǁkhā. ǂGomǃgâ da ge ra Joseb tsî Marias tsîn ge ǂoaǂamsa aiǁgausa ǁîra ǀgôana a mā ǃkhaisa Jesub tsîna ǃkhōǂgā hâse. Joseb ge ǃgarise gere sîsen ǁîb omarisa kōǃgâs ǃgao. Tsîb ge ǁîna gere ǂkhâǃnâ în Jehovaba ǃoabasa ǀnam. (Deu. 4:9, 10) Joseb ge ǂhanub xa ge ǂgaoǀkhāhe tama hâ i îb ǁîb omaris ǀkha Jerusalemsa ǃoa “kurikorobe” ī Pasxaba sī tsēdīs ǃgao xaweb ge ǁîba nēsa gere dī. (Luk. 2:41, 42) ǀNî ǁgûgu ge ǀnîsi gere ǂâi ǁîb omaris hoasa Jerusalemsa ǃoa ī ūs kaise nî ǃgom i, ǂgui ǁaeba nî ū tsî ǂgui mari-e nî ǂgan di. Joseb ge gagasi xūna gere ǃgôaǃgâ tsîb ge ǁîb ǀgôana ge ǁkhāǁkhā în ǁîn tsîna nē xūna ǃgôaǃgâ. Marias tsîn ge Elobmîsa ǃamkuse ge ǂan i. ǁÎs mîdi tsî dīgu ǃnâ-ūs ge ǁîs ǀgôana gere ǁkhāǁkhā în Elobmîsa ǀnam.

13. ǀNî khoe-aogura mati Joseb tsî Marias tsîn di aiǁgausa ge ǁgae?

¹³ Nihadi tsî Almas hîna da go ǀgapise goro ǃhoaǃgao ra ge Joseb tsî Marias tsîn di aiǁgausa gere ǁgae ǂgao. Nēsa mati ǁîra ge hui îra ǁîra ǀgôaba Elobab nî ǀnam tsî ǃoaba ǀgaub ǃnâ kaikai? ǁÎra ge ra mî, “sim ûiǀgaub ǃnâ-ūm ge sim ǀgôaba ge ǁgau matikōse i a ǃgâisa Jehovab ǁgaragu ǃoagu ûisa.” Nihadi ge ra ǀaro “sadu ǀgôa-i nî ǃgâi khoe-i ǃkhaisa du ga ǂgao o, o du ge sadu tsîna ǃgâi ǀgaub ǃnâ nî tanisen.”

14. ǁGûna tae-i ǃaroma ǁîn ǀgôan di ǀhōsana nî ǂan?

¹⁴ Sadu ǀgôana hui re în ǃgâi ǀhōsana ǁhûi. ǀGôa-i di ǁgûs tsî ǁgûb tsîn ge hoara nî ǂan ǁî-i ǀgôa-i ham-i ǀkha ra hâs tsî tae-en da dīs tsîna. Nēs ge ra ǂâibasen ǁgûn ge nî ǂan ǁî-i ǀgôa-i ham-i ǀkha internets ǃnâ-ū ra ǃhoas tsî ǁîn ǁâǁawagu ais tsîna. ǀGôa-i ra hâ-ū khoen ge ǁî-i di ǂâiǀgaub tsî tanisen ǀgaub tsîna a tsâǀkhā ǁkhā.—1Kor. 15:33.

15. ǁGûna tae-e Jessib aiǁgausa xu a ǁkhāǁkhāsen ǁkhā?

¹⁵ ǁGûna tae-e a dī ǁkhā computerdi tsî ǁâǁawagu tsîna sîsen-ūsan ga ǀū io? Jessib hîna Philippines ǃnâ ra hâ ǁgûb ge ra mî: “Sim ge ǂkharirose texnoloxib xa ge ǂan i. Xawes ge ǁnāsa ge ǂkhā mi tama hâ i sim ǀgôana texnoloxib ūhâ ǁkhōǁkhōsasigu xa ǁkhāǁkhāsa.” Jessib ge ǁîb ǀgôana ge ǂkhā tama hâ i în tā texnoloxiba sîsen-ū ǁîb nēsa a sîsen-ū ǁoa amaga ǀgui. ǁÎb ge ra ǁguiǃā: “Ti ǀgôana ta ge ge ǂkhâǃnâ în ǁîn ǁâǁawaga sîsen-ū ǀasa gowaba ǁkhāǁkhāsen, ǀhaodi ǃgao aiǂhomisen tsî Elobmîsa tsēs hoasa khomais tsîna.” ǁGû du ga io, o du ge khomai tamas ka io sadu ǀgôan ǀkha ǃhoa, ǀnōsa ǀgaub hînan ǁîn ǀhōsan ǀkha ǁâǁawagu ǃnâ-ū nî xoabagus tamas ka io ai-īsiga nî ǀgoragusa jw.orgs ai ra hō-e ǃâb “ǂkhamkhoen” di hâb tawa? ǁÎn ǀkha du  ge Ham-e ra ǂgaeǂgui—sado tamas ka io ǁâǁawaba? tsî Internetsa gā-aiba re di hâ vidioga kō? * Nē xūn ge kaise a ǂhâǂhâsa sadu ǀgôana matin texnoloxib tamas ka io ǁâǁawaga ǃgâi ǀgaub ǃnâ nî sîsen-ū ǀgausa ǁkhāǁkhās ǃgao.—ǂKhm. 13:20.

16. ǂGui ǁgûna tae-e ge dī tsî tae-i ǀamǂoas ǀkha?

¹⁶ ǂGui ǁgûn ge ra dītsâ în ǁîn ǀgôana ǃgâi aiǁgausa Eloba ǃoabas ǃnâ ra mān ǀkha hâ. Aiǁgause N’Dénib tsî Bomines hîna Côte d’Ivoireb ǃnâ ra hâra ge ǀnî ǁaegu ai ǃnarimâra mûǂam-aoba gere ǁkhau îb ǁîn oms tawa sī hâ. N’Dénib ge ra mî: “Nēs ge kaise ǃgâi sîsenǂuiba sim ǀgôab ai ge ūhâ i. ǁÎb ge aimâba-ao sîsenni ǀkha ge tsoatsoa tsî nēsi a mâǁkhae ra ǃnarimâra mûǂam-aob.” Sadu tsîna ǁnâti i ǃgâi ǀhōsana sadu ǀgôana a ôaba ǁkhā?

17-18. Mâǁaen ǁgûna ǁîn ǀgôana nî ǁkhāǁkhā tsoatsoa?

¹⁷ ǀGôana noxoban a ǂkhariro hîna ǁkhāǁkhā tsoatoa re. ǁGûn ga ǁîn ǀgôana noxoban a ǂkhariro hîna ǁkhāǁkhā tsoatsoa o, o i ge nēsa kaise a ǃgâi. (ǂKhm. 22:6) Timoteub xa ǂâi re hîna ge kaib ge o apostel Paulub ǀkha gere ǃnarimâba. Timoteub ǁgûs Eunikes tsî ǁîb di aumas Lois tsîn ge ǁîba ‘ǀgôasisa xu’ ge ǁkhāǁkhā.—2Tim. 1:5; 3:15.

¹⁸ ǀNî hâ khoe-aogura hîna Côte d’Ivoireb ǃnâ ra hâra Jean-Claudib tsî Peace hâra ge ǁîra ǃnani ǀgôan hoana Jehovaba ǀnam tsîn nî ǃoaba ǀgaub ǃnâ ge kaikai. Tae-e ǁîra ge hui? ǁÎra ge Eunikes tsî Lois tsîn di aiǁgausa ge sao. ǁÎra ge ra mî, “sim ǀgôanam ge Elobmîsa ‘ǀgôasisa xu’ ge ǁkhāǁkhāǀāǀā nēsam ge ǁîn ge ǃnaehe toasa xu ge dītsoatsoa.”—Deu. 6:6, 7.

19. Sadu ǀgôana Elobmîsa ǁkhāǁkhāǀāǀāsa tae-e ra ǂâibasen?

¹⁹ Sadu ǀgôana Elobmîsa “ǁkhāǁkhā-ǀā- ǀāsa” tae-e ra ǂâibasen? “ǁKhāǁkhāǀāǀās” ge “hoaǁae ra ǁguiǃgâse ǁkhāǁkhā” di ra ǂâibasen. Nēsa dīs ǃgaon ge ǁgûna hoaǁae ǁîn ǂkham ǀgôan ǀkha nî hâ. ǀNî ǁaegu ain ge ǁgûna a ǂkhabuǂâi ǁkhā ǁîn ǀgôanan ǀgui xū-i ǀgui-e ra ǁguiǃgâba amaga. ǁGûn  ge nē ǃēsa nî ū în ǁîn ǀgôana hui în Elobmîsa ǁnâuǃā tsî Elobmîs ra mî xūna ûiǂui.

20. Psalmdi 127:4 ǀgôana kaikais ǃnâ a sîsen-ūhe ǁkhā ǀgausa ǁguiǃā re.

²⁰ Sadu ǀgôana ǃgâise ǂan re. Psalmdi 127 ge ǀgôana ǂāgu ǀkha ra ǀgopeǀnō. (Khomai re Psalmdi 127:4.) ǂĀgu ǃkharagaǃnâgu xūna xu kuru-e tsî mâ i hoa-e ǁî-i kaisiba ūhâ khami i ge mâ ǀgôa-i hoa-e ǃkharagagu ǀgauga ūhâ. ǁNās ǀkhan ge ǁgûna nî ǂan matin mâ ǀgôa-i hoa-e nî ǁkhāǁkhāsa. Khoe-aogura hîna nētsē ra hō-e Israeli ǃnâ hâ ra ge mati ra ge ǀgam ǀgôara ǃgâise a kaikai î ra Jehovaba ǃoaba ǀgausa ra mî, “Mâ ǀgôa-i hoa-em ge ǀguri hâse Elobmîs ǁkhāǁkhāsa gere mâ.” Mâ omaris danab hoab ge nēsa dīsa nî mîǁgui nēsan ga dī ǁkhā o.

21. ǁGûna mâ huiba Jehovaba xu nî ǃâubasen?

²¹ ǁGûn ge ǀnî ǁaegu ai a ǃgombahe ǀgôana ǁkhāǁkhāsa xawe ǀgôan ge a ǀkhae hînan ge Jehovaba xu a hōna. Jehovab ge hoaǁae a hui nî ǁkhā. ǁÎb ge māsenxase ǁgûn di ǀgorede ra ǁnâu-am. Nē ǀgoredeb ge Elobmîs, Elobmîs ai ǃgaoǃgaosa ǂkhanin, tsî ǀhaohâb ǃnâ hâ ǁgûn di aiǁgaudi tsî ǀapemādi tsîn ǃnâ-ū ra ǃeream.

22. Mâna a ǂoaǂamsa xū hînan ǁgûna ǁîn ǀgôana a mā ǁkhāna?

²² ǀNî khoen ge ra mî 20 kuriga i ge ra ū ǀgôana kaikaisa di xawe ǁgûn ge ǁgûsisa ǀû tama hâ. ǀNî ǂoaǂamsa xūn hînan ǁgûna ǁîn ǀgôana a mā ǁkhān ge ǀnammi, ǁaeb tsî Elobmîs ai ǃgaoǃgaosa ǁkhāǁkhās tsîna. Mâ ǀgôa-i hoa-i ge ǁkhāǁkhāsa ǃkharagaǃnâgu ǀgaugu ǃnâ nî ūǃoa. ǂGuin ge Jehovaba a ǀnam ǁgûn xa ge kaikaihe tsîn ge Joanna Maes khami ra tsâ hîna Asiab ǃnâ ra hâsa: “Ti ǁgûra ge māte ǁkhāǁkhāsa ǃoa ta ra kō-oa o, o ta ge ǁîra ra gangan ǁkhāǁkhāte ra ge ǃkhaisa i ta Jehovaba ǀnam. ǁÎra ge ûib ǀguiba ge mā te tama hâ i xawe ǂâibasensa ūhâ ûiba ge mā te.” (ǂKhm. 23:24, 25) ǂGui ǃgâsan ge ǁîn tsîna nē ǀgaub ǃnâ ra tsâ.