GANGANXA khoe-i ase du ra mûsen? Mâ khoe-i hoa-i ge nē dîs xa nî ǂâiǃgâ. Elobmîs ge ra mî nētsēdi ǃnân ge ǂgui khoena nî “ganganoǃnâ” di. (2Tim. 3:2) ǀNîsi du ge khoen hîna hoaǁae nau khoen xa xūna dība-e tsî xūna ra mā-ena ge ǀhao-ū. ǁÎn ge ǀnîsi ra tsâ nēn ge mā-e xūn ǃgaon ge ganganxasiba ǁgau tide di. Nē ǂâiǀgauba ūhâ khoen ǂnamipe hâs ge ǃgâi tama hâ.

Jehovab ǃoaba-aon ge ra mîbahe ‘în ganganxa’. Hoa xūn ǃnâ da ge nî “ganganxa”. (Kol. 3:15; 1Tes. 5:18) Ganganxasib gagaba omkhâis ge sida ǃgao a ǃgâi. ǂGui ǃaromadi ge hâ nēs a ǃgâi ǃkhaisa ra ǁgaude.

ǀGui ǂhâǂhâsa ǃaromas hîna da hoaǁae ganganxasiba nî ǁgaubas ge nēs ge sada xa ǃgâise ra tsâ kai da. Khoe-i hîna gangan di ra mî i ge ǁî-i xa ǃgâise ra tsâ tsî gangan di go mî-e khoe-i tsîn ge kaise ǃgâise ra tsâ. Ganganxasiba tae-i ǃaroma sida tsî nau khoen tsîna ra ǃgâiaǂgao kai? Aiǁgause khoe-i ga ǁaeba ū tsî xū-e dība da o, os ge nēsa ra ǂâibasen ǁî-i ge sida nēsa anu hâ di ra tsâ. Nē khoe-i ge sida ra tsâba. Tsî nē khoe-i ra tsâba da ǃkhaisa da ga mûǂan o, os ge nēsa kaise ǃgâise sida xa ra tsâ kai da. Nēs ge Ruts ǀkhas tsîna ge ī. Boasi ge Rutsa ǀkhomxaǂgaosiba gere ǁgau. Nēs ge Rutsa kaise gere ǃgâiaǂgao kai mûsa khoe-i ǁîsa ra tsâba ǃkhaisa.—Rut. 2:10-13.

Kaise i ge a ǂhâǂhâsa Elob ǃoa-ai ganganxasiba ǁgausa. ǀNî ǁaegu ai du ge ǀnîsi ǂgui gagasi tsî sorosi ǀkhaegu hînab ge mā du tsî noxoba ra mā du gu xa ra ǂâi. (Deu. 8:17, 18; ǃNǃkh. 14:17) Elob ge mā da ǂgui ǃgâi xūn xa ǂkhari ǁaerob ǀguiba ǂâi tama i tsî da ge ǁaeba ū tsî Elob ge sida tsî sida ǀnamsaben tsîna a mā ǂgui ǀkhaegu xa nî ǂâiǃgâ. Sida Kuru-aob di ǀkhomxaǂgaosib xa ǂâiǃgâs ge nî huida i da ǁîba ǃgôaǃgâsiba ǁgau tsî nî ǂâiǂâiǃnâ da ǁîb a ǀnam da tsî ra ǃgoâǃgâ da ǃkhaisa.—1Jhn. 4:9.

Jehovab ra mā da xūn xa da ge nî ǂâiǃgâ tsî nē xūn ǃaroma nî gangan bi. (Psa. 100:4, 5) Mîhe i ge ra nau khoena gangan di mîs ge kaise ra ǃgâiaǂgao kai da di.

ǀNî hâ ǃaromas ganganxasib sida ǃgao a ǃgâis ge nēs ge ǀhōsaguside ra ǀgaiǀgai. Hoa da ge ǃgôaǃgâ-e hâ khami nî tsâ. Khoe-e du ga dī i go xū-i ǃgao gangan o, o du ge ǃgâi ǀhōsagusisa nî omkhâi. (Rom. 16:3, 4) Ganganxasiba ra ǁgau khoen ge nau khoena hoaǁae ra hui. ǁÎn ge khoen khoexaǃnâsiba ra ǁgau o nēsa ra mûǂan tsîs ge nēsa ǁîna ra ǂkhâǃnâ în ǁîn tsîna khoexaǃnâsiba nau khoena ǁgau. Nau khoena huis ge ǃgâiaǂgaoba ra ǃaroma. Nēs ge Jesub ge mî-i ǀkha a ǀgui ǁîb ge ge mî: “Mās ge ūs ǃgâ-ai a ǃgâi.”—ǃNǃkh. 20:35.

Robert Emmonsi hîna Californiab di ǀgapi ǁkhāǁkhā ǃkhaiba ra kōǃgâb ge sao ra-e ge mî: “Ganganxasiba ǁgaus ǃgao da ge nî ǁnâuǃā hoa da ǂhâ gu hâ ǃkhaisa ǀnî ǁaegu ai da ge ra mā tsî ǀnî ǁaegu ai da ge ra ǃkhōǃoa.” Ûi tsî da nî ǃgâiaǂgao ǃkhais ǃgao da ge nau khoena ǂhâ hâ sida ûigu ǃnâ. Aiǁgause ǁîn ge ǀnîsi ǂû-e mā da tsî sida ǂurusib tsîna a kōǃgâ ǁkhā. (1Kor. 12:21) Ganganxa khoen ge nau khoe-i ra dība nî xūna ra ǃgôaǃgâ. Nēs ga ra ama io, o du nau khoen ra dība du xūn ǃgao ganganxasiba ra ǁgau?

ǀNî hâ ǃaromas ganganxasiba da nî omkhâis ge nēs ge ra huida i da ǃgâi xūn ai ǂâisa ǂnûi ǁgai xūn ais ose. ǀNî hâ mîdi ǃnâs ge sida ǂkhûsa ǃanuǃanu xū-i ase ra sîsen. Nēs ge ra dī i da ǀnî xūn sida ǂnamipe hân ai sida ǂâide ǂnûi tsî nauna ǂhābē. Tsî da ge ǃgâi xūn ais tsîna sida ǂâide ra ǂnûi tsî ǃgomsina ǃgaoǃgâ tama hâ. Ganganxasiba du ga ūhâ o, o du ge ǃgâi xūn ǀguina ǃnāsase nî mû tsîs ge nēsa nî dī i du noxoba ganganxa. Ganganxa mûǂuiba da ga ûib ǃnâ ūhâ o, os ge nēsa nî hui da i da apostel Paulub ge ǂkhâǃnâ da xū-e dī: “ǃGâiaǂgao re ǃKhūb ǃnâ mâ ǁaeb hoab ai.”—Fil. 4:4.

Ganganxa da ga o, o da ge ǃgâi tama ǂâiǀgauga xu nî ǂgōsen. Kaise i ge a ǃgom ganganxasets ra tsâ hîna ǁkhā ǁaeb ai suri, ǂkhîoǃnâ tsî ǁaixa hâse tsâsa. Ganganxa khoen ge ǃnāsa ǁaeba mariǃgunuxa tama hâ. ǁÎn ge ūn hâ xūna ra ǃgôaǃgâ tsî ǃnāsa xūna ǂhâba tama hâ.—Fil. 4:12.

Xristeǁîn ase da ge ra mûǂan Satanni ra ǂgao ǃkhaisa i da nē ǀuni tsēdi ǃnâ da ra hōǃâ ǃgomsin xa ǂkhîoǃnâ tsî ǂkhabuǂâi. ǁÎb ge ra ǂgao i da ǃgâi tama tanisen ǀgauba ūhâ tsî mâ xū-i hoa-i xa ǂkhîoǃnâ. ǁNāti ī tanisen ǀgauba du ga ūhâ o, o i ge kaise nî ǃgom khoena sado ǃgâsa ǃgâiǂhôasa du ga aoǁnâ ǁaeb ai. Ganganxasib tsî Elob gagab ǂûgu tsîn ge ra ǃgûǀhao. Aiǁgause da ge ra ǃgâiaǂgao Elob ge mā da ǃgâi xūna da ga ra mû o tsî ǁîb hānîǁaeb xa mîmâi hâ xūn ǃnâ da ra ǂgomsa ǁgau o.—Gal. 5:22, 23.

Jehovab ǃoaba-aon ase da ge nē khomai ǃâs ǃnâ go ganganxasib xa a mî-e xūn a ama ǃkhaisa ra ǂgom. Xawe da ge noxoba ra mûǂan ganganxasiba ǁgaus tsî ǃgâi mûǂuiba ūhâs supu tama hâsa. Xawe du ge tā nēs xa nî ǂkhabuǂâi kaihe. Ganganxasiba du ge omkhâi tsî a ūhâ ǀgara ǁkhā. Mati du nēsa a dī ǁkhā? ǁAeba mâ tsēs hoasa ū tsî ǀnî xūn sadu ûib ǃnâ du ra ǃgôaǃgân xa ǂâi re. Nēsa du ga ǃnāsase dī o, o du ge ganganxasiba hoaǁae nî ǁgau. Nēs ge kaise nî ǃgâiaǂgao kai du ǁnān hîna ǃhūbaib di ǃgomsigu ai ra ǂgomaiǂnûin xa. Elob tsî nau khoen tsîn ra dī xūn hîna ra ǂkhâǃnâ du tsî ra ǃgâiaǂgao kai dun xa ǂâi re. Nē xūna du ge ǀnîsi xoaǁnâ ǁkhās tsîna i. Mâ tsēs hoasa du ge ǁnā tsē du ra ǃgôaǃgâ ǀgam tamas ka io ǃnona xūna a xoa ǁkhā.

Ôaǃnâ-aon ge ra mî “hoaǁae da ga nau khoena gangan di mî o, os ge nēsa sida ǂkhûs ra sîsen ǀgauba ra dawa tsîs ge nēsa ra supu kai i da sida ûigu xa ǃgâise tsâ.” Ganganxa khoe-i ge kaise ra ǃgâiaǂgao. ǃGâi xūn hîna du ge ǃkhōǃoan xa ǂâi, ǃgâi xūn hîna ge sadu ǀkha a īn ǃnâ ǃgâiǃgâibasensa ūhâ tsî hoaǁae ganganxa re. ǃGâi xūn hîna du ūhâna ǁause ū tama i tsî ‘ǃKhuba gangan re ǁîb a ǃgâi xuige.’ Îo ‘hoa xūn ǃnâ ǁîba gangan re.’—1Kro. 16:34; 1Tes. 5:18.