1-2. (a) Dâkurib ǁaxasiba a tae? (Mû re boksis “ Dâkurib ǁaxasiba ge tae-i?” di hâsa) (b) Lukab 4:16-18 ǃnâ i a xoasa khamib ge Jesuba tae-i xa gere ǃhoa?

ǀNÎ ǃHŪGU ǃnâ i ge ǀō-aisa ǁaxasiga ra ūhâ-e gao-aob tamas ka io gao-oas ga 50 kuriga ǂgaeǂgui o. 50 Kurib ge dâkurib ǁaxasib gao-ao-i dib ase a ǂansa. Nē ǁaxasigu ge ǀgui tsēs, wekheb tamas ka io gaxuse ra ū xawe i ge ǀamsa ra hō tsîn ge khoena nēs xa ra ǀūru.

² Nēsi da ge ǃgâi dâkurib ǁaxasiba nî ǃhoaǃgao, nēs ge mâ 50 kurib hoaba ge ǃkharu ge ǁaeb Israelǁaes ǃnâ gere tsēdī-e ǁaxasib xas tsîna a ǃgâi. ǃKharu ge ǁaeb dâkurib ǁaxasib ge khoen hîna ge nē ǁaxasiba gere tsēdīna ǃnorasasiba ge mā. Tae-i ǃaroma da nēs xa nî ǁkhāǁkhāsen? Nēs ge Jehovab ge dī ǀō-aisa xū-i xa ra ǂâiǂâiǃnâ da. Tsî hâhâ nî ǃnorasasiba nî mā da tsî da ge nēsa xu nēsis tsîna a ǀama ǁkhā. Jesub tsîn ge nē ǃnorasasib xa ge ǃhoa.—Khomai re Lukab 4:16-18.

3. Levitikus 25:8-12 tawa i ra ǁgau-e khamis ge Israelǁaesa dâkurib ǁaxasiba xu mati gere ǀama?

³ Kaise i ge a supu Jesub ge ǃnorasasib xab gere ǃhoa o tae-e gere ǂâibasensa ǁnâuǃāsa, ǃkharu ge ǁae gere dī-e dâkurib ǁaxasiba da ga ǃhoaǃgao o. Jehovab ge Israelǁaesa ge mîba: “Tsî du ge ǁnā korodisiǁî kuriba nî khai tsî ǃnorasasiba ǃhūb hoaragab ǃnâ ǁîb ǃnâ ǁan hân hoana nî ǂgaiǂuiba; dâkuriseb ge ǁîba nî ība du, tsî du ge nî oa, mâ-i hoa-e ǁî-i di xūn ǃoa, tsî mâ-i hoa-e ǁî-i di ǃhaos ǃoa.” (Khomai re Levitikus 25:8-12.) ǃKharu go ǁkhāǁkhāǃâs ǃnâ da ge go mû matin ge Israelǁîna mâ wekheb hoaba ge hâ i sâtsēsa  xu gere ǀamasa. Israelǁîna mati dâkurib ǁaxasiba xu gere ǀama? ǂÂi re Israelǁî-i ga ǀnîsis ǂgui surudeba dī o tsî nēs ǃgao ǁî-i ūhâ xūn hoana ǁamaxū o nē surudeba matares ǃaroma. Dâkurib ǁaxasib tawa i ge ǁî-i ge mā xūn hoana nî mā-oa-es ge ge ī. ǁNās ǀkhab ge aoba ǁîb ‘xūna ǃoa gere oa’ tsî i ge ǁîb ǀgôana nē xūna ge ǀumi ǁkhā i. Aob hîna ge ǂgui surudeba ūhâ îb ge ǁîb tamas ka io ǁîb ǀgôa-e gere ǁamaxū ǃgā-i ase îb nē surudeba matare ǁkhā. Dâkurib ǁaxasib ǃnâ i ge nē ǃgā-e ǁî-i “omarisa ǃoa gere oa.” Khoe-i ge ǁî-i ûib hoaba ǃgāse ge hâ tama hâ i ǃâubasen i ōse. Nēs ge gere ǁgau Jehovab ǁîb khoena ra tsâba ǃkhaisa.

4-5. Tae-i ǃaroma i a ǂhâǂhâsa Israelǁaes di dâkurib ǁaxasib xa ǁkhāǁkhāsensa?

⁴ Mâ ǀnî hâ ǀgaub ǃnâs tsînan ge Israelǁîna dâkurib ǁaxasiba xu gere ǀama? Jehovab ge ge ǁguiǃā: “Nēs ǀguis ǂama, ǀkhope-ao-i xare-i sadu ǃnâ hâ tidega: ǃKhūb ge ǃnāǂamsase nîra ǀkhae tsi xui-ao ǁnā ǃhūb, ǃKhūb sa Elob ǀumise nîra mā tsib ǃnâ, ǀumisets nî ǁîba ūhâga.” (Deu. 15:4) Nēs ge nētsē ǃhūbaib ǃnâ ra ī xūna xu ra ǀkhara, ǃkhū hân ge ǃnāsase ra ǃkhū tsî ǀgâsan ge ǀgâs ǀguisa ra hî.

⁵ Xristeǁîn ase da ge Moseb ǂhanub ǃnāga hâ tama hâ. Nēs ge ra ǂâibasen ǃkharu ge ǁaeb di dâkurib ǁaxasib ǃnâ da ge ǁhao tama hâ di hîna ge ǃgāna ǃnora kai, surudeba matare tsî omaride ǁîn di xūna gere mā-oaba. (Rom. 7:4; 10:4; Efe. 2:15) Xawe da ge ǃaromasa ūhâ dâkurib ǁaxasib xa ǁkhāǁkhāsens disa. Tae-i ǃaroma? ǃNorasasiba da a ūhâ ǁkhā amaga tsîs nēsa Jehovab ge Israelǁaesa a dība xū-i xa ra ǂâiǂâiǃnâ da amagas tsîna.

6. Khoesiba tae-e xu ǃnorasasiba ǂhâ hâ?

⁶ Hoa da ge ǃnorasasiba ǂhâ hâ ǁoreb di ǃgā da a amaga. ǁOre-ao da a amaga da ge ra kaira, ǀaesen tsî ra ǁō. ǂGuin ge nēs a ama ǃkhaisa ra mû spils ǃnân ga kō tamas ka ion ga ǀaeǃkhō-aoba ǃoa ī o. ǁOre da ga o, o da ge ǂkhabuǂâis tsîna ra hî. Apostel Paulub ge ge mûǂan “ǁoreb di  ǂhanu-i” ǁîb soros ǃnâ hâ i xab ge ǃkhō-e hâ i ǃkhaisa. Tsîb ge ge ǀaro: “Ti tsūǀkhāxa khoeta! Tari-e nî xore te nē ǁōb di sorosa xu?”—Rom. 7:23, 24.

7. Jesajaba tae-e ǃnorasasib xa ge mî?

⁷ Elob ge ǀgau-e ge dī i da ǁoreba xu ǃnora kaihe ǁkhā. Jesub ge nē ǃnorasasiba ra īǁkhā kai. ǃKharu ge ǁaeb ǃnâb ge kēbo-aob Jesajaba ge mîmâi kai ǃnorasasib nî hâ ǃkhaisa nē ǃnorasasib ge dâkurib ǁaxasib xas tsîna nî kai i. Nē dâkurib ǁaxasib ge ǃnāsana nî īǁkhā kai Israelǁîn dâkurib ǁaxasib tawa i gere īs xa. ǁÎb ge ge xoa: “Gagab ǃKhūb, ǃKhūb dib ge tita ai hâ, ǃKhūb ge tita ǂkhauǀkhā amaga, ǃgâi ǂhôa-e ta nî tsamtsiǃnâna ūhābaga. ǁÎb ge tita ge sî, khôaǂkhūǂkhūhesa ǂgaoga ūhâna ta nî ǃgae-aibase, ǃkhōsana ta nî ǃnorasasiba ǂgaiǂuibase.” (Jes. 61:1) Nē kēbosa ham-e ǃoa ra ǁnaeǁgau?

8. Jesajab kēbos hîna ǃnorasasib xa hâsa ham-e ǃoa ra ǁnaeǁgau?

⁸ Nē ǂhâǂhâsa kēbos hîna ǃnorasasib xa hâs ge Jesub ge ǁîb aoǁnâ sîsenni ǀkha tsoatsoa o, o ge dīǀoaǀoahe tsoatsoa. Jesub ge Nasarets ǃnâ hâ sinagogegu tawab ge sī o, o Jesajab di kēbode ǁnāpa ge ǀhao hâ i Jodeǁîna ǃoa gere khomai. Jesub ge ge mî: “Gagab ǃKhūb dib ge tita ai hâ, titab ge ǂkhau amaga, ǀgâsana ta nî ǃgâiǂhôasa aoǁnâbase. Tsîb ge ge sî te khôaǂkhūsa ǂgaoba ūhâna ta nî ǂuruǂuruse, tsî ǃkhōsana ta nî ǃnoraǃnorasisa aoǁnâbase, ǂgī hâna ta nî mû kaise, tsî ǁgâiǀāhe hâna ta nî orese, tsî ǃkhōǃoa-anusa kurib ǃKhūb diba ta nî aoǁnâse.” (Luk. 4:16-19) Jesuba mati ǁnā kēbosa ge dīǀoaǀoa?

9. Jesub ǁaeb ǃnâ ge ûi hâ i khoena tae-e xu gere ǃnora kaihe ǂgao?

⁹ Jesub di ǁaeb ǃnân ge khoena Jesajab ge kēbo ǃnorasasib tsî Jesub ge khomai ǃnorasasib tsîna gere hōǃâ. Nēsa da ge ǂgom ǁkhā Jesub ge mî xui-ao: “Nētsēs ge nē xoasa sadu ǂgaedi ǃnâ go ǀoaǀoahe.” (Luk. 4:21) ǂGuin hîna ge Jesub ge khomai kēbosa a ǁnâun ge ǀnîsi Romeǁî ǂhanub di ǂgaeǂguisa xu gere ǃnora kaihe ǂgao. ǁÎn ge ǀnîsi ǀgam khoekha hîna ge sao ra-e a mîkha khami gere tsâ: ‘Tsî da ge sida ǃâu hâ, ǁîb a ǁnāb, Israelǁîna nîra oreba ǃkhaisa.’ (Luk. 24:13, 21) Xawe sida ge a ǂan Jesub ge ǁîb saosabena ge ǂkhâǃnâ tama hâ i în Romeǁîn di ǃgâi tama ǂgaeǂguis ǃoa-ai hâ. Xaweb ge  ǁîna ge mîba în “Kaesara ǁnâi mā Kaesari di-e.” (Mat. 22:21) Jesuba mati khoena ǃnorasasiba ǁnā ǁaeb ai gere mā?

10. Jesuba khoena tae-e xu gere ǃnora kai?

¹⁰ Elob ǀgôab ge khoena ǀgam xūna xu ǃnorasasiba ge mā. ǂGurose Jesub ge khoena ǂgomdi ǂgaeǂgui-aogu khoena ra ǁkhāǁkhā ama tama ǁkhāǁkhāde xu ge ǃnora kai. ǂGui Jodeǁîn ge ǁnā ǁaeb ai gere ǁgari-e în khoesi ǁnaetigu tsî ama tama ǁkhāǁkhādi ǃnâs tsîna ǂgom. (Mat. 5:31-37; 15:1-11) Khoen hîna gere mîn nau khoenan ge ra hui în Eloba ǃoaba din ge ǁîna aitsama Eloba ǃgâi ǀgaub ǃnâ ge ǃoaba tama hâ i, nēs ǃgaon ge ge ǂgī hâ i. Mesiab tsî ǁîb gere ǁkhāǁkhā amab tsînan ge ūǃoa tama hâ i amagan ge Eloba ge ǂan tama hâ i tsîn ge ǂgī hâse ge hâhâ tsîn ge ǁîn ǁoren tsîna ge ǀûbahe tama hâ i. (Jhn. 9:1, 14-16, 35-41) Jesub ge amaba gere ǁkhāǁkhā tsî ǃgâi aiǁgausa a mā ǃkhais ǃgaob ge ǃgamǃgamsenxa khoena ge ǁgau matin ama tama ǁkhāǁkhāde xu nî ǃnora kaihesa.—Mrk. 1:22; 2:23–3:5.

11. Mâba ge ǀgamǁî ǀgau i hînab ge Jesuba ǃnorasasiba a mā ba?

¹¹ ǀGamǁîseb ge Jesuba ge īǁkhā kai îb khoesiba ǃgāsisa xu ǃnora kaihe ǁkhā. Jesub xoremarib ǁguibas xa īǁkhā kaihe hâseb ge Eloba ǁnān hîna nē xoremaris ǃnâ ǂgom tsî nēsan ra ūǃoasa ra ǁgaun di ǁorena a ǀûba ǁkhā. (Heb. 10:12-18) Jesub ge ge mî: “ǀGôab ga ǁnâi ǃnoraǃnora duo, o du ge a amase ǃnorasa.” (Jhn. 8:36) Nē ǃnorasasib ge Israelǁîn ge dâkurib ǁaxasib tawa gere hō ǃnorasasib xa ge kai i. Aiǁgause khoe-i hîna ge dâkurib ǁaxasib tawa gere ǃnora kaihe i ge ǁkhawa ǃgāsisa ǃoa ge oa ǁkhā i tsî ega ǁōs tsîna gere hî.

12. Hamna ǂgurose Jesub ge mā ǃnorasasiba xu gere ǀama?

¹² 33ǁÎ kurib pinkstertsēs aib ge Jehovaba apostelgu tsî ǀnî hâ ǂgomǂgomsa aogu tsî taradi tsîna ǃanu gagab ǀkha ge ǂkhau. ǁÎb ge ǁîna ǁîb ǀgôan ase ge ūǃoa în hānîǁaeb ǃnâ khâisa hō tsî Jesub ǀkha sī ǀhommi ǃnâ ǂgaeǂgui. (Rom. 8:2, 15-17) ǁÎn ge ge ǂguro i Jesub ge Nasarets di sinagogegu ǃnâ gere ǃhoa ǃnorasasiba xu ǀamasa. Nē aogu tsî taradi tsîn ge ama tama ǁkhāǁkhān tsî Elobmîs ai ǃgaoǃgaosa tama ǁnaetigu Jodeǁî ǂgomdi ǂgaeǂgui-aogu dina xu ge ǃnora kaihe. Elob ge ge mî ǁîn ge ǁoreb hîna ǁōba ra ǃaromaba xus tsîna  ge ǃnora kaihe di. Dâkurib ǁaxasib hîna ge 33ǁî kuri Xristub saosabena ǂkhauhes ǀkha a tsoatsoab ge Jesub ǀoadisi ǂgaeǂguis ǀams ai nî ǀam. Tae-i ǃgâi xūna nēsis tsî Jesub ǀoadisi ǂgaeǂguis ǀams ǁaegu nî ī?

13-14. ǂKhauhesa Xristeǁîn ǂam-ai i ham-i tsîna Jesub ge ǂanǂan ǃnorasasiba nî hō?

¹³ Nētsēn ge ǂgui khoen hîna ǃgâi ǂgaoga ūhâna hoa ǃhaode xu ra “ǀnî gūn” di ǃâ kai. (Jhn. 10:16) ǁÎn ge Elob xa ǁhûihe tama hâ în Jesub ǀkha ǀhommi ǃnâ sī ǂgaeǂgui. Xawe Elobmîs ge ra mî ǁîn ge ǃhūbaib ai ǀamosib kōse hâs di ǃâubasensa ūhâ. Sado nē ǃâubasensa ūhâ?

¹⁴ Nēsis tsîna da ge ǀnai ǂkhauhesan ūhâ ǃâubasensa xu a ǀama ǁkhā. Jesub xoremarib ǁguibas ǃnâ da ra ǂgom amaga da ge Jehovaba a ǂgan ǁkhā îb sida ǁorena ǀûba. Nēs ge nî ǃaroma i da Jehovab xa ūǃoa-e tsî ǃgâi ǂâisa ūhâ. (Efe. 1:7; J.ǂHa. 7:14, 15) ǂÂi re ǀkhaegu hîna du ūhâgu xa ama tama ǁkhāǁkhāde xu du ge ǃnora kaihe amaga. Jesub ge ge mî: “Tsî du ge amaba nî ǁnâuǃā, tsîb ge amaba sado nî ǃnoraǃnora.” (Jhn. 8:32) Kaise da ge ra ǃgâiaǂgao nē ǃnôa ǃnorasasiba da ūhâ amaga.

15. Tae-i ǃnorasasib tsî ǀkhaegu tsîna da hānîǁaeb ǃnâ nî ǃâubasen?

¹⁵ Kai ǃnorasasiba da ge hānîǁaeb ǃnâ nî ǃâubasen. ǀGūǁaeb ge Jesuba ama tama  ǂgomdi tsî ǁgauoǃnâ ǂhanugu tsîna nî hîkākā. Elob ge “kai ǂnūbis” khoen hîna ǁîba ra ǃoabana nî ǁkhauba tsîb ge ǁîna ǃhūbaib ai paradais ǃnâ ûis ǀkhaeba nî mā. (J.ǂHa. 7:9, 14) ǂGui khoen ge khâisa nî māhe tsî Adammi ge ǃaroma ǁoreba xus tsîna ǃnorasasiba nî hō.—ǃNǃkh. 24:15.

16. Mâ ǂoaǂamsa ǃnorasasibab khoesiba hānîǁaeb ǃnâ nî hō?

¹⁶ Jesub ǀoadisi ǂgaeǂguis ǁaeb ǃnâ i ge ǁîb tsî ǁîb ǀkha ra ǂgaeǂgui ǂkhauhesan tsîna khoesiba khâisa nî mā, ǀoasa sorosi tsî gagasi ǂurusib ǀkha. Nē ǁaeb ǃnorasasib dib ge dâkurib ǁaxasib hîna ge Israeli ǃnâ hâ îb khami nî ī. Nēs ge ra ǂâibasen hoa khoen hîna Jehovaba ǂgomǂgomsase ra ǃoaban ge ǀoasa kurusa nî ūhâ tsî ǁore tide di.

17. Jesajab 65:21-23 sa Elob khoen ǀkha i tae-e nî īsa ra mî? (Tsoatsoa ai hâ ai-īsiba mû re.)

¹⁷ Jesajab 65:21-23 ge ǃhūbaib mati hānîǁaeb ǃnâ nî īsa ra ǁguiǃā. (Khomai re Jesajab 65:21-23.) ǁNā ûib ǃnâ da ge ǀope tsî xū-e dī tamase hâ tide. Elobmîs ge ra ǁgau Elob khoen ǁnā ǁaeb ai dīǀoaǀoasa sîsen-e nî dī ǃkhaisa. Xristub ǀoadisi ǂgaeǂguis ǀams ain ge “kurusabena ǁauǁausib di ǃgaesa xu nî ǃnoraǃnorahe, Elob ôan ǂkhaisib di ǃnorasis ǃoa.”—Rom. 8:21.

18. Tae-i ǃaroma da nî ǂgom ǃgâi ûiba da hānîǁaeb ǃnâ nî ūhâ ǃkhaisa?

¹⁸ Jehovab ge Israelǁîna a mā-am în sîsens ǁaeb tsî sâs ǁaeb tsîna ūhâ khamib ge ǁkhā xū-e nî dī ǁîb khoen ǀkha Xristub di loadisi kurib ǂgaeǂguis ǁaeb ǃnâ. ǂGui ǁaeb ge nî hâ i gagasi xūn ǃnâ ǁhaos tiba. Eloba ǃoabas ǃgao i ge ǂkhîba a ǂhâǂhâsa tsî ǀasa ǃhūbaib ǃnâ da ge ǁaeba nî ūhâ nēs ǃgao. Hoa khoen hîna ǂgomǂgomsase ra hân ge nî ǃgâiaǂgao Xristub ǀoadisi ǂgaeǂguis kurib ǁaeb ǃnâ dīǀoaǀoasa sîsen-e da nî ūhâ tsî hoa khoen Eloba nî ǃoaba amaga.