Deuteronomium 22:25-27 ge ǁnā khoeb di ǀhapixasis xa ǀgui ge ǃhoa tama hâ i, ǁnā khoeb ra ǀhapiǂgā-am-e amaga. Nē ǂhanub ge khoes di ǀhapiosisa gere ǂkhâǃnâ. Sao ra i xa ǂâi re.

ǀGapiga hâ xoadi ge aob hîna ǃgame nî se ī khoes ǀkha ra ǁgoeb xa ra ǃhoa. Nē khoeb ge nēs ǃaroma a ǀhapixa nē khoes nî ǃgamese ī amaga. O khoes xa tae-e ra mî-e? ‘ǁÎs ge ge ǃau tama hâ i.’ ǃAus ga hâ o, on ge nau khoena ǁnâu tsî ǁîsa ga hui hâ. Xawes ge ǁîsa ge ǃau tama hâ i. Nēs ǃaromas ge nē ǁoreb ǃnâ ǁîs tsîna ge ǃâ i tsî ra ge hoara nî ǀgoraǃgâ-e.—Deu. 22:23, 24.

ǂHanub ge sao rase ǀnî hâ xū-e ge ǃhoaǃgao: “Xaweb ga aoba ǃgame-e nî se ī khoesa ǃgarob ǃnâ ǀhao-ū tsî ǀgaisab a ǃkhais ǃaroma ǁgoe-ū ob ge ǁîba nēs ǃaroma nî ǃgamhe xawes ge khoesa xū-e dīhe tide. Khoes ge ǃgamba-es nî ǁore-e dī tama hâ. Nē ǁhōb ge aoba ǁîb di ǀgūkhoeba ǃgams ǀkha a ǀgui. ǁÎb nē khoesa ǃgarob ǃnâ ǀhao-ū tsî ra ǀgaiǃkhō amaga ǃaus ga xawe i hui si nî khoe-e ǀkhaiba.”—Deu. 22:25-27.

Nēs ǃnâb ge ǂhanuba nē khoes ǀkhāba ra ū. Mati io? ǂHanub da ǂâi amaga ǁîs ge “ǃau xawe i hui si nî khoe-e ge ǀkhai isa.” Nēs ǃaromas ge ǁîsa ge ǁore tama hâ i. Xaweb ge khoeba nēs ǃnâ a ǀhapixa, ǁîb “ǀgaisab a amaga ǃgame nî se ī khoesa ge ǁgoe-ū amaga.”

Nē ǂhanub ge ǀgaiǃkhō-e go khoes di ǀhapiosis ai ǃgaoǃgaosa i xawe i ge khoeb di ǀhapixasis xas tsîna gere ǃhoa. ǂGomǃgâ da ge ra nē ‘ǂhanub nē ǁhōba ǃgâise ôaǃnâ’ tsî Elob ǁgaragu xa daoǁgau-e hâse ǂhanu mîǁguiba nî dīsa.—Deu. 13:14; 17:4; Eks. 20:14.