1. Jesuba tae-e ǁîb di ǁkhāǁkhāsabega ge mîba ǀams xa? Tsî mâ ǃkhâikhomsab ge ǁîga mā?

 ǀORO tsēdi ǃau hâ Jesub nî ǁōs aiǃâ gu ge, 4 ǁkhāǁkhāsabegu ǁîb diga ge dîbi: “ǁGauǁgau-e hâ i nî,  .  ǃhūbaib di ǀunisa nî ǁgauǁgau-e?” (Mat. 24:3) Nē ǁkhāǁkhāsabegu ge ǀnîsi gere dîsen, mati gu a ǂan ǁkhāsa. Mâǁaeb ais Jerusalems tsî ǁîs tempeli tsîn nî dīkākāhesa. ǁÎb ǃereams ǃnâb ge Jesuba Jerusalems tsî ǁîs tempeli dīkākās xa ǀgui ge ǃhoa tama hâ i. Xawe nēsi da ‘ûiǃnâ hâ ǃhūbaib di ǀams’ xas tsîna. ǀAms nî hā ǁaeb xab ge Jesuba ge mî: “Xawe khoe-i xare-i ge tsēs tamas ka io iri nē xūn nî ība a ǀū. ǀHomǃgān tamas ka io ǀGôab tsîn ge ǂan tama hâ, ǁGûb ǀguib ge a ǂan.” ǁNāpaxūb ge hoa ǁkhāǁkhāsabega ge ǃkhâikhom, î gu “ǂkhaikari hâ.”—Mrk. 13:32-37.

2. Tae-i ǃaroma î ge ǂhâǂhâsa ī, ǃkharuge ǁaeb Xristeǁîn ǂhaikharise nî hâ ǀgarasa?

² ǃKharuge ǁaeb Jode Xristeǁîn ge ǂkhaikharise nî hâ ǀgaras ge ge ī. În ǁîn di ûiga sâuhe ǁkhā. Jesub ge ǁîb saosabena ge mîba, tae-en nî kōsa în ǂan mâǁaes Jerusalems tsî ǁîs tempeli ǀamsa nî hāsa. ǁÎb ge ge mî: “Jerusalems toroǂnubidi xa xāǂgāhe hâ ǃkhaisa du ga mûo, o du ge nî ǂan hîkākās âs a ǀgū ǃkhaisa.” ǁNā ǁaeb ǃnân Jesub di ǃkhâikhomsa nî ǁnâuǀnam tsî ‘ǃhomgu ǃoa nî ǃkhoeni.’ (Luk. 21:20, 21) ǁNān hîna ge ǁîb di ǃkhâikhomsa a ǁnâuǀnaman ge Romeǁîn ge Jerusalemsa a dīkākā o, o ge ûiǃkharu.

3. Tae-e da nē ǁkhāǁkhāǃâs ǃnâ nî ǃhoaǃgao?

 ³ Nētsē da ge, nē ǁgai ǃhūbaib ǀgūǁae nî ǀami ǁaeb ǃnâ ûi hâ. ǁNā-amaga da ge sida tsîna ǃgāsase ǂkhaikhari nî hâ ǀgara. Nē ǁkhāǁkhāǃâs ǃnâ da ge nî ǃhoaǃgao, mati da ǀnōsa ǀgauba nî ūhâsa nē ǃhūbaib ǃnâ ra ī xūna da ra mû hîna. Mati da aitsâma a ǃûisen ǁkhāsa. Tsî mati da ǃau hâ ǁaeba ǂhanuse a sîsenū ǁkhāsa.

4. Tae-i ǃaromada ǃgâiǃgâibasensa nî ūhâ mûsa matin nēsi ǃhūbaib ǃnâ ra ī xūna Elobmîs kēbode ra dīǀoaǀoa ǀgausa?

⁴ ǃGâi ǃaroman ge hâ, tae-i ǃaromada ǃgâiǃgâibasensa ūhâsa. Tsî mûsa mati i nēsi ǃhūbaib ǃnâ ra ī xūna Elobmîs kēbode ra dīǀoaǀoasa. Jesub ge ī nî xūn xa ge mîba da, hui nî na î da ǂan mâǁaeb ǁGâuab ǃhūbaib di ǀamsa nî ǀgūsa. (Mat. 24:3-14) Apostel Petrub ge ra ǂkhâǃnâ da, î da Elobmîs kēbodi dīǀoaǀoahes ai ǃgaoǃgâ. Îs sida ǂgomsa ǀgaisase hâ ǀgara ǁkhā. (2Pet. 1:19-21) ǀUniga ǂkhanis Elobmîs dis ge nē mîdi ǀkha ra tsoatsoa: “Nēs ge ǂhaiǂhais Jesub Xristub ge Elob xa māhesa, taren ǃhae ǁaeb ǃnâ ī ǃkhaisab nî ǃgān âba ǂanǂanse.” (J.ǂHa. 1:1) ǁNā-amaga da ge sida kai ǃgâiǃgâibasensa ūhâ, ǃhūbaib ai nēsi ra ī xūn ǃnâ. Tsî ǂansa matin Elobmîs kēbode nî dīǀoaǀoa ǀgausa. Tsî da ge a turaxa nē xūna nau khoen ǀkha ǁgamǀhaosa.

5. Tae-e xu da nî ǂgōsen? Xawe da tae-e tā nî dī? (Ai-īsiga mû re.)

⁵ Elobmîs kēbode da ga ǃhoaǃgao o. O da ge tā ǀū da a xūna nî ǃhoa, ī nî xūn xa. Tae-i ǃaroma? ǀHaohâb ǃnâ ǀgorasa nî ǃaroma xū-e da mî ǂgao tama hâ amaga. Aiǁgause da ga ǁnâu o, ǃhūbaib ǂgaeǂgui-aogu ra ǃhoa hîna mati gu ǂkhababa sîsenǂam tsî ǂkhîb tsî ǃnorasasib tsîna nî hau ǀgaub tsîna. ǁNā kēbos hîna 1 Tesalonikaǁîn 5:3 ǃnâ ra hō-es tae-e ra dīǀoaǀoas xa ǃhoas, xa da ge ǀasa ǁnâuǃā ǀgauba nî ūhâ. Sada ǁgamǀhaode da ga Jehovab ǀapeǂhumis xoahâ ǂkhanidi ai ga ǃgaoǃgao o. O da ge ǀhaohâba ra hui în “ǀgui ǂâis tsî ǂâibasens ǃnâ ǀhû hâse hâ.”—1Kor. 1:10; 4:6.

6. Tae-e da ra ǁkhāǁkhāsen 2 Petrub 3:11-13 ǃnâ?

⁶ Khomai re 2 Petrub 3:11-13 sa. Apostel Petrub ge ra hui da, î da ǃaroman xa ǂai mati io da Elobmîs kēbode nî ôaǃnâsa. ǁÎb ge ra hōhōǃnâ da, î da “ǂâis ǃnâ ūhâ Elob hās di tsēsa.” Tae-i ǃaroma? ǂAn ǂgao da ra amagas ōse, “tsēs tamas ka io iri” hînab Jehovaba Armagedonsa nî ǀkhī-ūba. Xawe da ge ǁaeb hîna ǃgau hâba ra sîsenū ǂgao, “ǃanu tanisens tsî eloǃaoǃgâxasib” ǃnâ ûisa. (Mat. 24:36; Luk. 12:40) ǀNî mîdi ǃnâ ǂhanu ǀgaub ǃnâ da ge ra tanisen ǂgao. Tsî dī da ra xū-i hoa-e Jehovaba da ǃgam ǀnamma ūba hâ amaga ra dī. ǁNā ǂâisa ǃkhōǀgaras ǃaroma da ge nî ǃûisen.

7. Mati da ra ǁgau ǃûisen da rasa? (Lukab 21:34)

⁷ Jesub ge ǁîb ǁkhāǁkhāsabena ge mîba în tā ǃhūbaib ǃnâ ra ī xūn ai ǀgui ǂâisa ǂnûi. Xawe ǁîn tsîna aitsama ǃûisen. ǁNās ge ge ǃgāsa kaihe Lukab 21:34 ǃnâ a xoasa ǃkhâikhoms ǃnâ. (Khomai re.) Jesub mîra ǃgaoǃgâ re: “ǃÛisen” tamas ka io kōǃgâsen di hâra. Khoe-i hîna ra ǃûisen î ge ǂkhaikarise ra hâ, xūn hîna ǁî-i di ǀhōsagusisa Jehovab ǀkha a ǁgaiǁgai ǁkhā i ǃoagu. Tsî xū-e ra dī în ǁîna xu ǂgōsen. ǁNā ǀgaub ai î ge ǁî-e Elob  ǀnammi ǃnâ ra hâhâ.—ǂKhm. 22:3; Jud. 20, 21.

8. Apostel Pauluba tae-e Xristeǁîna ge mîba?

⁸ Apostel Paulub ge Xristeǁîna ge mîba, în ǃûisen. Aiǁgauseb ge ǁîba Efesers ǃnâ hâ Xristeǁîna ge mîba: “ǁNā-amaga ǂōrisase kōbasen mâ ǀgaus aits ra ûi ǃkhaisa. Tā gâre khoe-i khami ûi, xawe gā-ai-i khami.” (Efe. 5:15, 16) ǁGâuab ge hoaǁae ra dītsâ, sida Jehovab ǀkha ūhâ ǀhōsagusisa dīkākāsa. ǁNās ǃaromas ge Elobmîsa ra ǀāpemā, î da ‘ǃKhūb ra tare-e ǂgaoǀkhā da ǃkhaisa ǁnâuǃā.’ Nēs ge nî hui da, hoa ǁnāǂamdi hîna ǁGâuaba xu ra hāde ǁkhaubasens ǀkha.—Efe. 5:17.

9. Mati da Jehovab ǂâisa ra ǁnâuǃā?

⁹ Elobmîs ge Jehovab ǀkha da ūhâ ǀhōsagusisa a ǁgaiǁgai ǁkhā xūn hoan xa mîba da tama hâ. ǀNî ǁaega da ge mîǁguiga nî dī xūn hîna Elobmîs xoadi ǃnâ ǃhoaǃgaohe tama hân xa. ǂHanu mîǁguiga dīs ǃaroma î ge a ǂhâbasa Jehovab ra ‘ǂgaoǀkhā xūna ǁnâuǃāsa.’ Nēsa da ge a dī ǁkhā, hoaǁae Elobmîsa ǁkhāǁkhāsen tsî ǂâiǃgâs ǃnâ-ū. Jehovab di ǂâisa da ǃnāsase ra ǁkhāǁkhāsen khami î ge nî hui da “Xristub di ǂâisa” ūhâ. Tsî ‘gā-ai khoe-i khami’ ûisa. Xūna da mati nî dī ǀgauba mîba da tama ǁgaragu ga ǀkhai xawe. (1Kor. 2:14-16) ǀNî ǁaega î ge a supuba da mûǂansa tae-e xu da nî ǂgōsensa. Xawe nau ǁaegu ai î ge supu tama hâ.

10. Mâ ǁkhōǁkhōsa xūna xu da nî ǂgōsen?

¹⁰ ǀNî ǁkhōǁkhōsa xūn hîna da nî ǂgōsen xun ge aiǁǀgause, ǁâǁâsens, kaise āb, kaise ǂû ǃnās, nauna tsûtsû ǁkhā xūna mîs, ǂkhābadība ūhâ xūna kōs. Tsî ǀōǀkhā khoen xūna kōs tsîna ǃkhōǂgā hâ. (Psa. 101:3) Sida di mâǃoa-aob ǁGâuab ge hoaǁae ǃēde ra ôa, Jehovab ǀkha da ūhâ ǀhōsagusisa ǁgaiǁgaisa. (1Pet. 5:8) ǂKhaikarise da ga hâ tama io, ob ge ǁGâuaba sida di ǂâidi tsî ǂgaogu tsîn ǃnâ. Surigub, ǂhauǃnâoǃnâsib, xūǃgunuxasib, ǃhuigub, ǀgapiǂâixasib tsî ǁhangub ǃkhomde a ǃhana ǁkhā. (Gal. 5:19-21) ǀNîsi du ge ǂgurose nî ǂâi, nē tsâsigu ǁkhōǁkhōsa tama hâ di. Xawe da ga ǁkhā da a-i hoa-e dī tsî ǃkhaese nē māsiga xu ǂgōsen tama ga io. O gu ge aiǃgû tsî ǃgāxa hai-i khami nî kai tsî ǁgai xū-e nî ǃaroma.—Jak. 1:14, 15.

11. Mâ-e ǀgui ǁkhōǁkhōsa xū-i hîna da ǃkhaese a mûǃā ǁoa-e ǂgōsen xu da nî-e? Tsî tae-i ǃaroma?

¹¹ ǀGui ǁkhōǁkhōsa xū-i hîna da ǃkhaese a mûǃā ǁoa-î ge ǁgai ǀhōsana. Nē mâsib xa ǂâi re. Jehovaba ǃoaba tama hâ khoe-i ǀkha du ge ra sîsen. ǁNā-amaga du ge khoexaǃnâsiba ǁgau tsî a hui ǀnamxa. Tsî du ge ǁî-i ǀkha ǀnî ǁaegu ai ra ǂûǀhao. ǃNubu ǁaerob khaoǃgâ du ge ǁnāsa hoaǁae ra dī tsoatsoa. ǀNî ǁaegu ai î ge nē khoe-e ǃgâi tama xūn xa ra ǃhoa tsî du ge tsoatsoas ǃnâ ge ǃgâibahe tama hâ i. Xawe du ge ǁaeb ǀkha ǁnā ǃhoa ǀgauba ra ǁnaedi tsoatsoa. Tsî ǁî-i xa tsūbahe tama ra ī. ǁNāpaxū î ge ǀgui tsē sadu sîsenǁare-ao-e sîsenni khaoǃgâ ra ǁkhau du, î du ǁî-i ǀkha sī ā. Tsî du ge nē ǁkhauǂuisa ra ūǃoa. Ēga du ge ǁî-i khami ra ǂâi tsoatsoa. Gaxuǁaeba î ge ū tide, ǁî-i ra dī xūna dī tsoatsoasa. Ama as ge hoa khoen ǃoagu da ge ǃgâisib tsî ǃgôaǃgâsib tsîna ra ǁgau ǂgao. Xawe da ge ǂâis ǃnâ nî ūhâ, hâ ǀhao ū da ra khoen khami da ge ēga ra tanisen tsoatsoa. (1Kor. 15:33) ǃÛisen tsî da ga Jesub ge mî khami ga ra dī, o da ge ǂhâbasa tama hâ ǀhōsana xu nî ǂgōsen. Hîna Jehovab di ǂhanugu ǃoagu ûi tama  hâna. (2Kor. 6:15) O da ge ǁkhōǁkhōsa i a ǀgausa mû tsî ǁî-e xu nî ǂgōsen.

12. ǀAmsan ǃâu hâ hînan Jesub ǁkhāǁkhāsabena tae-e nî dī ge īsa?

¹² Jesub ge ge ǂhâba hâ i, în ǁîb di ǁkhāǁkhāsabena gagasi xūn ǀkha ǁaeǁaesen. ǀAms nî hāsan ǃâu hâ hîna. Jesub ge dīn nî sîsen-e ge mā nî. ǁÎb ge ge mîmā nî, în ǃgâiǂhôasa ‘hoaraga khoen Jerusalems, Judeab, Samariab tsî hoaraga ǃhūbaib ǃnâ hâna mîba.’ (ǃNǃkh. 1:6-8) ǁNa-ī ge kai sîsenni Jesub di saosaben ge ǃkhōǃoa-e. ǁKhān a-i hoa-e dī tsîn ge nauna gere aoǁnâba ǁîn di ǁaeba ǃgâise sîsenūs ǃnâ-ū.

13. Tae-i ǃaroma da sida di ǁaeba ǂhanuse nî sîsenū? (Koloseǁîn 4:5)

¹³ Khomai re Koloseǁîn 4:5 sa. ǃÛisen ǂgao da ga, o î ge a ǂhâbasa mati da sida ǁaeba ra sîsenū ǀgaub xa da nî ǂâisa. “ǁAeb tsî mâsib ra ī nî xū-e ǁapoǁapo amaga.” Tsî ǁnās ge mâ khoe-i hoa-e a tsâǀkhā ǁkhā. (Aoǁn. 9:11) ǃÂubasen tama da hâ hîna da ge a ǁō ǁkhā.

14-15. Mati da sida ǁaeba ǂhanuse a sîsenū ǁkhā? (Hebreǁîn 6:11, 12) (Ai-īsiba mû re.)

¹⁴ Sada ǁaeba da ge ǃgâise a sîsenū  ǁkhā, Jehovab ǂâisa dīs ǃnâ-ū. Tsî sida ǀhōsagusisa ǁîb ǀkha nî ǀgaiǀgai. (Jhn. 14:21) ǁNā-amaga “mâhō, ǁnobeǁoasase i, î du ǃaruǀîǀgui ǃKhūb di sîsenni ǃnâ ǀaro.” (1Kor. 15:58) Sida ûib tamas ka io ǃhūbaib ǀams ka hā o, o da ge ǃhausen-e ūhâ tide.—Mat. 24:13; Rom. 14:8.

¹⁵ Nētsēb ge Jesuba aiǃgû tsî ǁîb di ǁkhāǁkhāsabena ra daoǁgau. Elob Gaosib xan nētsē ǃhūbaib ǂhawase ra aoǁnâ hîna. ǁÎb mîmâisab ge ge dīǀoaǀoa. Jehovab ǀapeǂhumis ǃnâ-ūb ge Jesuba ra ǁkhāǁkhāda mati da nî aoǁnâsa. Tsîb ge ǃgâiǂhôasa da nî aoǁnâ-ū xūn tsîna ra māda. (Mat. 28:18-20) Jesub sida xu ǃâubasen hâ xūna da ge ra dī, nau khoena aoǁnâba tsî ǁkhāǁkhās ǃnâ-ū. Tsî da ge ǂkhaikharise ra hâ ǀgara ǂgao, Jehovab ǀamsa nē ǁgai ǃhūbaib ai nî hausa da ǃâuhâ hîna. Hebreǁîn 6:11, 12 ǃnâ hâ ǀapemāde sîsenūs ǃnâ-ū da ge, sida ǃâubasens ai ra ǃâu ǀgara “ǀunis kōse.”—Khomai re.

16. Tae-e da nî mîǁgui dīsa?

¹⁶ Jehovab ge mîǁgui hâ, mâǁaeb ǁGâuab di ǂgaeǂguisa nî dīkākāsa. ǁNā tsēs ga hā, ob ge Jehovaba ǁîb mîs ǃnâ hâ kēbode nî dīǀoaǀoa. ǀNî ǁaeb ai da ge ǀnîsi a ǂâi ǁkhā, ǃhūbaib ǀams ǀgū ǁaeb ai hā tidesa. Jehovab tsēs ge “ǃonkhao tide.” (Hab. 2:3) ǁNā-amaga da ge mîǁgui tsî ‘ǃKhūb Jehovab ai nî kō.’ “Elob hîa nî huiǂui” dab ai nî ǃâu.—Mix. 7:7.