1. Tae-e ra ǁgau Xoadi ge Jesuba ǂhâǂhâsaba īsa?

 ǂÂIS ǀguisa di re, mati i gere tsâsa Jesub ra ǁkhāǁkhā hîna ǃgâsa. Matikō ǃnâdeb ge ǁîb di danasa xu xoade ǃoa gere ǁnaeǁgausa. ǁÎb di ǁāǁnâs khaoǃgâb ge mî ǂguro mîdi tsî ǁōb nîs aiǃâb ge mî mîdi, ǃnâb ge Jesuba xoade ǃoa gere ǁnaeǁgau. b (Deu. 8:3; Psa. 31:5; Luk. 4:4; 23:46) Tsî Jesub ge ǃnona tsî ǃkhare kurigu ǃnâ ǃnāsa ǁaeba xoade ǃoa gere ǁnaeǁgau. Tsî ǁîde gere ǁguiǃā.—Mat. 5:17, 18, 21, 22, 27, 28; Luk. 4:16-20.

2. Tae-e Jesub ge hui kaikhâib ge o, îb xoade ǃgâise ǂan? (Tsoatsoas ai hâ ai-īsiba kō re.)

² ǁÎb di aoǁnâ sîsen-eb nî tsoatsoas aiǃâb ge Jesuba ǃnāsa ǁaeba Elobmîs xa ǁnâu tsî gere khomai. Amaseb ge oms ai Marias tsî Josefi tsîn ǁgamǀhaodi ǃnâ Elobmîs ǃoa ra ǁnaeǁgau hîna gere ǁnâu. c (Deu. 6:6, 7) Tsî da ge a ǂgom ǁkhā Jesub ge mâ Sâtsēs hoasa, sinagogeba ǃoa gere īsa ǁîb di omaris ǀkha. (Luk. 4:16) ǁNāpap ge hâ io, ob ge amabes ǃnâ ǃgâise gere ǃgâ xoadi gere khomaihe hîna. ǁAeb ǀkhab ge Jesuba ge ǁkhāǁkhāsen îb aitsama xoade khomai. ǁNās ǀkhab ge Jesuba xoade ǃgâise ǀgui ge ǂan tama hâ i. Xaweb ge xoadi tsîna ge ǀnam-i tsî ge mā-am î-i ǁîb ûiba daoǁgau. Aiǁgause ge Tempeli ǃnâ a ī xū-i xa ǂâi  re, Jesub ge ge 12 kurixas ī. ǁKhāǁkhā-aon hîna ge Moseb ǂhanuba ǃgâise ǂan în ge ‘ǁîb di gā-ai ǃereamdi xa gere buru.’—Luk. 2:46, 47, 52.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Sida tsîn ge Elobmîsa ǂan tsî a ǀnam ǁkhā ǁîsa da ga hoaǁae khomai o. Xawe da mati ǃnāsa-e a hō ǁkhā khomai da ra xūna xu? Jesub ge ǂhanuba a ǂan khoena a mîba xūna xu da ge a ǁkhāǁkhāsen ǁkhā. Nēs ge ǁkhāǁkhā-aogu, farisegu tsî Sadusegu tsîna ǃkhōǂgā hâ. ǁNā kerkhe ǂgaeǂgui-aogu ge xoade hoaǁae gere khomai. Xawe ǁîna xu ǃgâiba ge hōǁoa ī. Jesub ge 3 ǀgauga ge ǁgaugu, tae-e gu a dī ǁkhāsa î gu khomaisa xu ǃgâiba hō. ǁÎb ge ǁîga a mîba xū-i ge nî hui da, î da (1) khomai da ra xūna ǁnâuǃā, (2) ǀō-aisa gagasi xūna ôa tsî (3) Elobmîsa mā-amsa is sida ǀkharaǀkhara.

4. Lukab 10:25-29 sa tae-e ra ǁkhāǁkhāda Elobmîsa khomais xa?

⁴ Elobmîs ǃnâ da ra khomai xūn di ǂâibasensa da ge ra ǁnâuǃā ǂgao. ǁNāsa da ga dī tama io, o i ge khomai da ra xūna sida ai ǃgâiǃgâibasensa ūhâ tide. Aiǁgause, Jesub ge “ǂanǂansa ǂhanuǂanseb” ǀkha gere ǃhoa ǀgauba mû re. (Khomai re Lukab 10:25-29 sa.) Khoeb ge dî o, tae-eb a dī ǁkhāsa îb ǀamo ûiba hō. Ob ge Jesuba ǁîba Elobmîsa ǃoa ge ǁnaeǁgau dî rase: “Mâti i Moseb ǂhanub ǃnâ xoahe hâ? Tare-ets ǁnāpa ra khomai?” Khoeb ge ǂhanu ǃereamsa ge mā, xoasa ǃoa ra ǁnaeǁgause Eloba ǀnams tsî ǀgūkhoena ǀnams. (Lev. 19:18; Deu. 6:5) Xawe mû re ǁîb ge ǁnāpaxū tae-e a mîsa: “Tari-e a ti ǀgūkhoe?” ǁÎb ge ge ǁgau, ǁîb ǁnâuǃā tama hâsa khomaib ra xūna. Tsî ǁnās xa ǃaromahe hâseb ge ge ǀū-i matib ǁnā xoade ǁîb ûib ǃnâ nî sîsenǂuisa.

5. Matis ǀgores tsî ǂause khomaisa a hui da ǁkhā?

⁵ Elobmîsa da ge ǃgâise a ǁnâuǃā ǁkhā, hoaǁae da ga khomai sī o. Nēn ge ǀnî xūna hîna a hui du ǁkhāna. ǀGore re, khomai tsoatsoa du nîs aiǃâ. Jehovab huiba da ge ǂhâhâ xoade ǁnâuǃāsa, ǁnā-amaga da ge ǁîb di gagaba ra ǂan îb hui da ǃgaoǃgâsa. ǂAuse khomai re, ǁnās ge nî hui î du khomai du ra xūna ǁnâuǃā. ǃGâi xūna du ge nî hō, ǀnîsi du ga ǃgarise khomai. Tamas ka io ǃkhōǁnâsa Elobmîs ǀkha ga ra khomai ǀhao o. Nesa du ga dī o, o du ge ǁnâuǃā, ǂâihō tsî ǃgāsa xūna sadu Elobmîs khomaisa xu a ǁkhāǁkhāsen ǁkhā. (Jos. 1:8) Khomai toa du ga o, o ǁkhawa ǀgore tsî Jehovaba gangan re ǁîb Mîs ǃaroma. Tsî khomai du go xūna sadu ûib ǃnâ sîsenǂui.

6. Aitsama dîde dîsens tsî xoaǁnâs tsîna mati a hui du ǁkhā? (Ai-īsiba mû re.)

⁶ Nēn ge 2 xūn hîna a hui ǁkhāna î du sadu ǁnâuǃāba Elobmîs ǃnâ ǃgâiǃgâi. Khomai du go xūn xa dîde dîsen re. ǀNî ǃnaeǃkhaidi xa du ga khomai o, dîsen re: ‘Ham-i xa i ra ǃhoa? Ham-e ra ǃhoa? Ham-i ǀkha ī ra ǃhoa tsî tae-i ǃaroma? Mâpa tsî mâǁae ī nē xū-e ra ī?’ Nē dîdi ge nî hui, î du ǂâi tsî khomaiǃâs di ǂhâǂhâsa ǂâide hō. Khomai du ra hîna xoaǁnâ re. Xoa du ga, o du ge ra ǁgarisen ǂâide mîdi ǃnâ tawasa. Tsî nēs ge ra hui, î du ǁnâuǃā. Xoaǁnâs tsîn ge ra hui, î du khomai du go xūna ǂâihō. Dîde, ôaǃnâs tawa du ge xūn  tsîna a xoaǁnâ ǁkhā. Tsî ǂhâǂhâsa ǃâga a kō oa ǁkhā tsî nî kō khomai du go xūna du mati a sîsenū ǁkhāsa. Tamas ka io tsâ du ra ǀgauba nî xoaǁnâ. Ēga du ge nî mû, ǁnāti ī xūna xoaǁnâs nî huisa Elobmîsa Elob sado ūba hâ haisi-ams ase mû.

7. Mâ ǀgauba da ǂhâhâ Elobmîsa da ga khomai o? Tsî tae-i ǃaroma? (Mateub 24:15)

⁷ Jesub ge ǂhâǂhâsa ǀgauba ge ǁgau, Elobmîsa da ga ǁnâuǃā ǂgao o. O da nî ūhâba, ǁnās ge xūn ǁaegu ǀgorasa ūhâsa. (Khomai re Mateub 24:15 sa.) Xūn ǁaegu ǀgorasa ūhâsa a tae? ǁNāb ge ǀgaub hîna ra huiba, î da ǂan ǀgui xū-i mati nau-e xu ra ǀkharasa. Tsî mati i nau-i ǀkha ǀguiti īsa tsî matikōse i ǂanhe tama hâsa. ǁNās xōǀkha Jesub ge mî khami, da ge ǀgoraǃgâ ǀgauba ǂhâhâ. Î da mû Elobmîs kēbodi mati ra dīǀoaǀoahe ǀgauba. ǁNā ǀgauba da ge ǂhâhâ, î da Elobmîs ǃnâ da ra khomai xūna xu ǀoasase ǃgâiba hō.

8. Mati da xūn ǁaegu ra ǀgorase a khomai ǁkhā?

⁸ Jehovab ge ǁîb ǃoaba-aona xūna ǀgora ǁkhās di ǀgauba mā hâ. ǁÎba ǃoa ǀgore tsî ǂan re îb hui du nē ǀgauba omkhâisa. (ǂKhm. 2:6) Mati du sadu ǀgoredi ǀkha ǀguiǃnâxase a sîsen ǁkhā? ǂŌrisase kō re tae-e du ra khomaisa tsî mati i nau xūn ǀkha ra ǃgûǀhaosa. Sida ǂkhanina sîsenū re aiǁgause, Ôaǃnâs ǀkha ra hui ǂkhanib Jehovab ǃoaba-aon dib. Nē ǂkhanin ge ni hui, î du ǁnâuǃā Elobmîs di khomaiǃâs di ǂâibasensa. Tsî du ǁîsa mati sadu ûib ǃnâ a sîsenǂui ǁkhāsa. (Heb. 5:14) ǁNāti du ra khomai hîna î ge xoade du ra ǁnâuǃā ǀgauba nî kai.

9. Mâ ǂhâǂhâsa amaba gu ge Sadusega gere kōǃkharu?

⁹ Sadusegu ge Hebreǁîn di xoadi ǂguro 5 ǂkhanide kaise ǃgâise ge ǂan i. Xawe gu  ge ǁnā ǂkhanidi ǃnâ hâ ǂhâǂhâsa xūna ge ūǃoa tama hâ i. Aiǁgause, kō re Jesub ge mati Sadusegu ge ǁîba khâis xa a dî o, o a ǃeream ǀgauba. ǁÎb ge ge dîgu: “Xawe ǁō hân di khâis xa go kha ǁnâi khomai tama hâ Moseb di ǂkhanis ǃnâ, ǁnā xoaǃâs hîa khau ra ǁkhūhais ǂama ra ǃgûsa, mâtib Eloba ǁîba ge mîbasa? ‘Tita ge Abrahammi, Isaki tsî Jakob di Elota.’” (Mrk. 12:18, 26) Sadusegu ge ǂgui ǃnāde ǁnā ǃnaeǃkhais xa ge khomai hâ i. Xawe Jesub dîs ge ge ǁgau ǁîgu ǂhâǂhâsa gagasi amaba ra kō ǃkharusa, ǁnās ge kâis di amaba.—Mrk. 12:27; Luk. 20:38. d

10. Taena da nî ǃgaoǃgâ khomai da ra hîna?

¹⁰ Sida tae-e ǁnāpaxu ra ǁkhāǁkhāsen? Supu xūn ǀguina da ge ǁnâuǃā ǂgao tama hâ. Xawe da ge îsa amaba tsî daoǁgaudi tsîna ra mûǃā ǂgao. Khomai da ga, o da ge ǁāraǃās tamas ka io Elobmîs ǃnaeǃkhais ra ǁkhāǁkhāda xūna ra kō ǂgao.

11. Mati du 2 Timoteub 3:16, 17 sa a sîsenū ǁkhā î du ǀō-aisa gagasi xūna Elobmîs ǃnâ hō?

¹¹ Mati du gagasi xūna a hōǁkhā Elobmîsa du ra khomai hîna? Mû re 2 Timoteub 3:16, 17 ra mî xū-e. (Khomai re.) Nēs ge ra ǁgau “hoaraga Xoas . . . ge a sîsenūhe ǁkhā,” (1)ǁkhāǁkhās, (2) ǂgōǀaus, (3) ǀkharaǀkharas tsî (4) ǂhanu-aisiba dīs ǃaroma. ǁNā 4 xūna xu du ge ǃgâiba a hōǁkhā, hoaǁae du sîsenū tama hâ Elobmîs ǂkhanide khomaisa xus tsîna. Khomai du ra ǃnaeǃkhaide ôaǃnâ tsî kō re tae-e i Jehovab tsî ǁîb di ǂâibasens. Tamas ka io Elobmîs tsoatsoadi xa ra ǁkhāǁkhāsa. Kō re, matis ǂgōǀausa ra huisa ǁāraǃāde ǃgaoǃgâs ǃnâ-ū. Î du ǁgai ǁnaediga mûǃā tsî ǁîna xu ǂgōsen. Tamas ka io ǁgai ǂūba xū, î du Jehovab ǃoagu ǂgomǂgomsase hâ. Ôaǃnâ re, matis xoaǀgorasa a sîsenūhe ǁkhāsa xūna ǀkharaǀkharas ǃnâ tamas ka io ǂhanu tama ǂâi ǀgauba ǂhanu kaisa. ǀNîsi i ge khoe-e aoǁnâ sîsenni ǃnâ a mî-e tsî ôa re xoadi hîna ǂhanu-aisiba dīs ǀkha a hui du ǁkhāte. Î du Jehovab ǂâi ǀgauba ūhâ ǁkhā. Nē 4 xūna du ga ǂâis ǃnâ ga ūhâ, o du ge ǀō-aisa gagasi xūna nî hō. Hîna a hui du ǁkhāna î du sadu Elobmîs khomaisa xu ǃnāsa ǃgâiba hō.

12. Jesuba tae-i ǃaroma Farisega, “khomai tama go ge hâ i” di ge dî?

¹² Jesub ge dîs tsîna ge dī, “Khomai tama go ge hâ i?” Farisegu ge ǂhanu tama ǂâi ǀgauba xoas xa, ūhâ îsa ǁgaus ǃaroma. (Mat. 12:1-7)  e ǁNā ǃnās ai gu ge farisega  ge mî Jesub ǁkhāǁkhāsabegu Sabats ǂhanuba ǁnâuǀnam tama hâ di Jesub ge ǁîga ǃereams ǃaroma aiǁgaura xoade xu ge sîsenū Tsî ǁāraǃāsa Hoseab ǂkhanisa xu ge mî Îb ǁgau Farisegu ge ǁnâuǃā tama hâ īsa tae i ǃaroma i ge Sabats ǂhanuba hâ īsa Tsî gu ge ǀkhomxaǂgaosiba ǁgau tama hâ i ǃkhaisa Nē khoega tae i ǃaroma ǁîgu Elobmîs khomais xa ge ǀkharaǀkharahe tama hâ i ǁÎgu ge ǀgoraǃnâxa tsî ǀgapiǂâixa gagab ǀkha gere khomai amaga ǁÎgu di ǂūb ge gere ǁkhae îgu khomai gu ra xūna tā ǁnâuǃā—Mat. 23:23; Jhn. 5:39, 40.

13. Mâ ǀgaub ǀkha da Elobmîsa nî khomai? Tsî tae-i ǃaroma?

¹³ Jesub mîde xu da ge ra ǁkhāǁkhāsen, ǂhâbasa ī asa Elobmîsa da ǂhanu ǂâi ǀgaub ǀkha nî khomaisa. Farisegu khami da ge tā nî ī. Xawe da ge ǃgamǃgamsenxa tsî māsenxase nî ǁkhāǁkhāsen ǂgao. Tsî da ge ‘tsamtsiǃnâsib ǃnâ Elobmîsa’ nî ǃkhōǃoa. (Jak. 1:21) Tsamtsiǃnâxa da ga, o da ge nî mā-am îs Elobmîsa ǀkharaǀkhara da. ǀGoraǃnâxa tamas ka io ǀgapiǂâixa gagaba xu da ga ǂgōsen. O ǀgui î ge Elobmîs ǁkhāǁkhādi hîna ǀkhomxaǂgaosib, tsâbaǁhaoxasib tsî ǀnammi xa hâde a ǀkharaǀkhara da ǁkhā.

14. Mati da a mû ǁkhā mā-am da rasa îs Elobmîsa ǀkharaǀkhara da? (Ai-īsiga mû re.)

¹⁴ Nau khoena da ra hâ-ū ǀgaub ge a ǁgau ǁkhā, Elobmîsa da ra mā-amsa îs sida ǀkharaǀkhara. Farisegu ge Elobmîsa ge mā-am tama hâ i, îs ǁîgu ǀgauba ǀkharaǀkhara. Amaga gu ge ‘ǀhapiona gere ǀgoraǃgâ.’ (Mat. 12:7) ǁKhā ǀgaub ǃnâ i ge mati da nau khoena ra mû tsî ra hâ-ū ǀgauba ra ǁgau. Elobmîsa da ra mā-amsa îs sida ǀkharaǀkhara. Aiǁgause, ǁnaeti î da hâ ǃgâib hîna da naun ǃnâ ra mûba mîsa? Tamas ka io da ǃhaese ǁîn ǃnūbusigu xa ra ǃhoa? ǀKhomxaǂgaoxa  tsî da ǃhaese ra ǁaixa? Tamas ka io da ǀgoraǃgâxa tsî ǁîn ǀkha ǁaixa hâse ra hâ? Nē dîde da ra ǃeream ǀgaub ge a ǁgau ǁkhā, khomai da ra xūna da ra mā-amsa. Î-i sida ǂâi ǀgaugu, tsâsigu tsî dīgu tsîna ǀkharaǀkhara.—1Tim. 4:12, 15; Heb. 4:12.

15. Jesuba mati Xoadi xa gere tsâ?

¹⁵ Jesub ge Xoade ge ǀnam ī. Tsî ǁîb tsâsigu ge Psalmdi 40:8 ǃnâ ra hō-e mîdi ǃnâ ra ǁgâiǂuihe: “Sa ǂâisa ta nî dīse ti Elotse, sa ǂhanub ge ti ǂgaob ai hâ.” Jesub ge xoade ǀnam i amagab ge ge ǃgâiaǂgaoxa ī. Tsî Jehovaba ge ǃoaba ǀgara. Sida tsîn ge ǃgâiaǂgaob, ǂkhîb tsî ǃgâiba a hōǁkhā Elobmîsa da ga khomai. Tsî ǁîsa ǀnamsa ga ǁkhāǁkhāsen tsî sida ǂgaob ǃnâ gara ǂgā o.—Psa. 1:1-3.

16. Tae-e du nî dī, î du ǃgâiba Elobmîsa khomaisa xu hō? (Boksisa mû re, “ Jesub mîdi ge khomai du ra xū-e ǁnâuǃās ǀkha a hui ǁkhā.”)

¹⁶ Jesub mîdi tsî aiǁgaus ǀkha ǀguiǃnâxase hâs ǃaroma, da ge Elobmîsa da ra khomai ǀgauba nî ǀāǀā. Elobmîs ǃnâ da ra khomai xūna ǁnâuǃāsa da ge a ǃgâiǃgâi ǁkhā. ǀGores, ǁaeb ǀkha khomais, dîde dîs tsî xoaǁnâs ǃnâ-ū. ǀGoras di ǁkhāsiba da ge a sîsenū ǁkhā, î da khomai da ra xūna ǃamkuse ôaǃnâ. Sida ǂkhanin hîna Elobmîs ai ǃgaoǃgaosan huib ǀkha. Xoade da ra sîsenū ǀgauba da ge a ǃgâiǃgâi ǁkhā ǀō-aisa gagasi xūna, ǃgamse ǃnaeǃkhaidi hîna da ǃgâise ǂan tama hâde ôaǃnâs ǃnâ-ū. Elobmîsa da ge a mā-am ǁkhā îs ǀkharaǀkharada. Î da khomai da ra khami ǂhanu ǂâi ǀgauba ūhâ ǀgara. Nē ǀgauga da ga sîsenū, o da ge sida Elobmîs khomaisa xu ǃnāsa ǃgâiba nî hō. Tsî Jehovaba ǃoa nî ǀgū.—Psa. 119:17, 18; Jak. 4:8.