1. Mâ ǁkhaeǂgao ra xū-eb ge Jehovaba Abrahamma ǁkhāǁkhā?

 ABRAHAMMI ge nē ǁgamǀhaosa tātsē ge ǀuru tama hâ i. ǀHomǃgāb ǃnâ-ūb ge Eloba Abrahamma ge mîba ǁîb Sodoms tsî Xomoras tsîna nî hîkākāsa. Nē ǂgomǂgomsa-aob ge nēs xa ge tsūbahe i. ǁÎb ge ge dî: “Ots kha amase ǂhanu-ain tsîna ǁnān hîa a ǂkhaban ǀkha nî hîkākā? . . . Ob kha hoaraga ǃhūbaib di ǀGoraǃgâ-aoba ǂhanuse ǁnâi dī tide?” Jehovab ge ǃnūǃnâxase ǁîb di ǀnamǀnamsa ǀhōsaba xu-e ge ǁkhāǁkhā. Sida hoada ge ǁnā xū-e xu ǃgâiba hō tsî a ǁkhaeǂgaohe ǁkhā. Elob ge tātsēs tsîna ǂhanu-ai khoena hîkākā tide.—Gen. 18:​23-33.

2. Mati da a ǂan Jehovab ga khoena ǀgoraǃgâ, ob hoaǁae ǂhanu xu-e ra dīsa tsî ǀkhomxaǂgaosiba ra ǁgausa?

² Mati da a ǂan Jehovab ga khoena ǀgoraǃgâ, ob hoaǁae ǂhanu xū-e ra dīsa? ǂAn da ge a Jehovab khoen ‘ǂgaoga ra kō’ ǃkhaisa. (1Sam. 16:7) ǁÎb ge ‘hoa khoen ǂgaoga’ a ǂan. (1Gao. 8:39; 1Kro. 28:9) ǁNāb ge kaise îsa amaba. Sida ge tātsē Jehovab ra ǀgoraǃgâ ǀgauba ǁnâuǃā tide. ǁNâuǃāxaseb ge Apostel Pauluba saora-e Jehova Elob xa ge mî: “ǁÎb ga ǀgoraǃgâ, xawe tari-e ǁnāsa a ôaǃnâ ǁkhā?”—Rom. 11:33.

3-4. Mâ dîde da ǁaeba xu ǁaeb ǀkha a ūhâ ǁkhā tsî tae-e da nē ǁkhāǁkhāǃâs ǃnâ nî ǃhoaǃgao? (Johaneb 5:​28, 29)

³ ǂAn da a Jehovab hoaǁae ra dī xūn a ǂhanu xawe da ge sida tsîna, ǁaeba xu ǁaeb ǀkha Abrahammi ge ūhâ i dîde  a ūhâ ǁkhā. ǂÂi ǁkhā da ge a: ‘Sodoms tsî Xomoras ǃnâ ge Jehovab xa hîkākāhe khoena ǁkhawa nî ûi? Īǁkhā-e ǀnîn “ǂhanuoǃnân nî ǁōba xu khâisa”?’—ǃNǃkh. 24:15.

⁴ Hā re î da kō tae-e da khâis xa ra ǁnâuǃāsa. ǂKhari ǁaeba ǃkharuhâse i ge ǁnâuǃā da ra ǀgauba ge ǀkharaǀkharahe, “ǀamo ûib ǃoa nî khâi” tsî “ǀgoraǃgâs ǃoa nî khâin” xa. a (Khomai re Johaneb 5:​28, 29 sa.) Nē ǁnâuǃā ǀgaub ge ǀkharaǀkharana ge hau. Nē ǀkharaǀkharan ge nē ǁkhāǁkhāǃâs tsî saoras ǃnâ nî ǃhoaǃgaohe. Jehovab di ǂhanu-ai ǀgoraǃgâs xa da ge ǂgurose ǀūda an xa nî ǃhoaǃgao tsî ǁnāpaxu ǂan da an xa.

ǀŪDA AN

5. Tae-e da ǃkharuge ǁaeb ǃnâ khoen hîna ge Jehovab xa Sodoms tsî Xomoras ǃnâ hīkākāhen xa mî?

⁵ ǃKharuge ǁaeb ǃnân ge sida ǂkhanina saora dîsa gere ǃhoaǃgao. Tae-e ǁnān Jehovab ǂhanuoǃnâse ra ǀgoraǃgân ǀkha ra ī? Mî da ge ge khoen hîna ge Jehovab xa hîkākāhena aiǁgause, Sodoms tsî Xomoras di khoen khami tātsē khâisa hō tidesa. Xawe da ge ǂōrisase nēs xa ǃgamse ôaǃnâ tsî ǀgore toas khaoǃgâ i ge saora dîsa ge hā. Amabes ǃnâ da ti a mî ǁkhā?

6. Mâ aiǁgauna hâ Jehovab ge ǂhanuoǃnâ khoena ǀgoraǃgâsa tsî tae-e da ǀū?

⁶ Saora dîn xa ǂâiǃgâ re, ǂgui Elobmîs ǃnaeǃkhaidi ge hâ Jehovab ǀgoraǃgâdi xa ra ǃhoade ǂhanuoǃnâ khoen ǃoagu. Aiǁgauseb ge Jehovaba kai ǁgammi dâus tawa hoa khoena ge hîkākā xawe Noaxi tsî ǁîb omaris tsîn ǀguina ge sâu. Israelǁîn tsînab ge ge sîsenū îb hû ǃhaodi khoena hîkākā, mîmâisa ǃhūb ǃnâ gere hâna. Tsîb ge ǀgui ǀhomǃgāba ge sîsenū 185 000 Asariab soldaga ǀgui ǃoes ǃnâ ǃgamsa. (Gen. 7:23; Deu. 7:​1-3; Jes. 37:​36, 37) Nē ǃnaeǃkhaidi ǃnâs Elobmîsa ǃgāsase ra mîba da, nē khoen ǀamosib kōse nî ǁōsa tamas ka iob nē khoena khâisa mā tidesa? Hî-i, ti mî tama hâ. Tae-i ǃaroma da ti a mî ǁkhā?

7. Tae-e da a kai ǁgammi dâus tsî Kanaannǃhūb ǃnâ ge hîkākāhe khoen xa a ǂan? ( ai hâ ai-īsiba mû re.)

⁷ Nē go ǃhoaǃgaohe aiǁgaun ǃnâ da ge a ǀū Jehovab ge mati nē khoena a ǀgoraǃgâsa. Tsî da ge a ǀū ǃēsan ge ūhâ isa Jehovab xa ǁkhāǁkhāsen tsî ǃhōbasensa. Elobmîs ga Noaxi di tsēs ǃnâ ge hâ i kai ǁgammi dâus xa ǃhoa, o i ge ra mî Noaxi ge ‘ǂhanu-aisib di aoǁnâ-ao’ isa. (2Pet. 2:5) Elobmîs ge mî tama hâ nē arkab ra om hînab ge mâ ǀguiǀguibe khoe-i hoa-i ǃhūbaib ai hâ-e gere aoǁnâbasa, nē ǁgammi dâus xa nî tsâǀkhāhena. ǁKhā ǀgaub ǃnâs tsîna da ge a ǀū hoa eloxoresa khoen, Kanaannǃhūb ǃnâ gere hân ge ǃēsa ūhâ isa în Jehovab xa ǁkhāǁkhāsen tsî ǁîn ǀgauga dawa.

8. Tae-e da a ǂan Sodoms tsî Xomoras di khoen xa?

⁸ Jehovab ge Sodoms tsî Xomoras tsîna a hîkākā o ge ǁō khoen ǀkha tae-e nî ī? ǂHanu-ai Khoeb Lot ti ǀon hâb ge nē khoen ǁaegu gere hâ. Xawe ǂan i da a Loti ge ǁîn hoana aoǁnâbasa? Hî-i, ǁîn ge ge eloxoresa i xawen ge ǀū-i tae-i a ǂhanus tsî tae-i ǂhanu tamasa? ǂÂihō re Elobmîs ge ra mî, ǂgui aogu ǁnā ǃās ǃnâ hâgu ge Loti di sari-aoga gere ǀgaiǃkhō ǂgao. Elobmîs ge ra mî ǁnā ǂgui khoegu ge “kaigu tsî ǂkhamgu hoagu” tsîna ge ǃkhōǂgā hâ i. (Gen. 19:4; 2Pet. 2:7) Amabes ǃnâ da a mî ǁkhā, ǀkhomxaǂgaosib  Elob Jehovab ge mîmâisa ǁnā khoen ǀgui-i xare-i tsîn khâisa hō tidesa? Hî-i, ǁnāti da ge a mî ǁoa. Jehovab ge Abrahamma ge mîba, disi ǂhanu-ai khoen tsîn ǁnā ǃās ǃnâ ǀkhaisa. (Gen. 18:32) Hoa khoen ge ge ǂhanuoǃnâ i tsîb ge Jehovaba ge ǂhanu i ǁîna hîkākāsa. Mî ǁkhā i da a ǀgui-i xare-i tsîn “ǂhanuoǃnân di khâis” ǃnâ khâi tidesa? Hî-i ǁnāsa da ge a mî ǁoa.

9. Tae-e da Salomob xa ǂan?

⁹ Elobmîs ǃnâ di ge ǃnaeǃkhaide hâ ǂhanu-ai khoen hîna ge ǂhanuoǃnâ kain dide. Gao-aob Salomob ge a ǀgui aiǁgau. ǁÎb ge Jehovab a hamsa ge ǂan i tsî matib Jehovaba nî ǃoabasa. Jehovab ge kaise ge ǀkhaebi xaweb ge Salomoba ega ama tama eloga ge ǃoaba tsoatsoa. Nē i ge kaise Jehovaba ge ǁaixa kai tsîs ge hoa Israelǁaesa 100 kurigu xa ǃnāsase ǁîb di ǁoren ǃaroma ǃgoma gere hōǃâ. Ama as ge xoadi ra mîsa Salomob ge ǁōb ge o, “ǁîb îb Davidi di ǃās ǃnâ ge ǁkhōhe.” (1Gao. 11:​5-9, 43; 2Gao. 23:13) Elobmîs ǁnā mîde ra sîsenūsa ra ǂâibasen Jehovab Salomoba khâisa nî māsa? Hî-i, Elobmîs ge ǁnāti mî tama hâ. ǀNî khoen ge a ǂâi ǁkhā, Salomob khâisa nî māhesa Elobmîs ta mî amaga: “ǁŌ ra-i, ǁoreb di ǀgaiba xu ra ǃnoraǃnorahe xui-ao.” (Rom. 6:7) Nēs ge a ama xawe i ge ǂâibasen tama hâ hoan hîna ge ǁōn khâisa nî hōsa. Khâis ge sida ǀnamxaǃnâ Eloba xu hâ ǀkhaeba. Tsîb ge ǁnā ǀkhaeba khoena ra mā ǂhâbab ra na în ǁîba ǀamosib kōse ǃoaba. (Job. 14:​13, 14; Jhn. 6:44) Salomoba ǁnā ǀkhaeba nî hō? Jehovab ge ǃereamsa a ǂan, sida ge a ǀū. ǂAn da as ge Jehovab ge ǂhanu xu-e nî dī.

ǂAN DA A-I

10. Jehovaba mati ra tsâ khoena hîkākās xa? (Esegieli 33:11) (Ai-īsiba mû re.)

¹⁰ Khomai re Esegieli 33:11 sa. Jehovab ge ra mîba da matib ra tsâsa khoena ǀgoraǃgâs tawa i ga hā o. Apostel Petrub ge Esegeli di mîde ge ǃkhō-am, Jehovab ge “khoe-i nî kāǁō ǃkhaisa ǂgao tama hâ” tib ge mî o. (2Pet. 3:9) Nē mîdi ge ra ǁkhaeǂgaoda. ǂAn da ge a Jehovab ge khoe-e hîkākā tide ǃgâi ǃaroma-i ose. ǁÎb ge ǀkhomxaǂgaosib xa ǀoahâ tsîb ge ǁîba ǀkhomxaǂgaosiba nî ǁgau.

11. Hamna khâisa hō tide tsî ǁnāsa da mati a ǂan?

¹¹ Tae-e da a ǂan khâisa hō tide khoen xa? Elobmîs ge ǀoro aiǁgaun xa ra ǃhoa. b Jesub ge Judab Iskariob ge khâisa hō tide ti ge mî. (Mrk. 14:21; Jhn. 17:12) Judab ge ge ǂan i dīb ta xū-i Jehovab tsî ǁÎb ǀgôab ǃoagu hâsa xaweb ge aiǃgû tsî ǁnā-e ge dī. (Mû re Markub 3:29 sa.) ǁKhā ǀgaub aib ge Jesuba ge mî, ǀnî ǂgomdi ǂgaeǂgui-aogu hîna gere mâǃoabi gu nî ǁōsa khâis di ǃâubasens ose. (Mat. 23:33; Jhn. 19:11) Apostel Paulub ge ge ǃkhâikhom ǃhōbasen hâ ǁnāǁgôahâ Xristeǁîn tsîn khâisa hō tidesa.—Heb. 6:​4-8; 10:29.

12. Tae-e da Jehovab di ǀkhomxaǂgaosib xa a ǂan? Aiǁgaude mā re.

¹² Tae-e da Jehovab di ǀkhomxaǂgaosib xa a ǂan? Matib ge ǁîba ǁgau ‘ǂgao tamab hâsa în khoena hîkākāhe’? Matib ge ǀkhomxaǂgaosiba ǁgau ǀnîn hîna ge ǀgaisa ǁorena dīn ǃoagu? Gao-aob Davidi ge ǀgaisa ǁorena ge dī, ǁîb ge ǀai tsî ge ǃgam. Xaweb ge Davida ge ǃhōbasen tsîb ge Jehovaba ǀkhomxaǂgaose  ge ǀûbabi. (2Sam. 12:​1-13) Gao-aob Manaseb ge ǂgui ǁgai xūna ge dī ǁîb di ûi kurigu ǃnâ. ǁNā ǁgai xūnab ge dī xaweb ge Jehovaba ǀkhomxaǂgaosiba ge ǁgau bi. Tsî Manaseba ge ǀûba nē ǁgai xūn ǃaroma, ǁîb ge ǃhōbasen xui-ao. (2Kro. 33:​9-16) Nē aiǁgau ra ge ra ǂâiǂâiǃnâ da Jehovab ǀkhomxaǂgaosiba ra ǁgausa, mûb ga o ǃaromas hâsa ǁnāsa dīsa. ǁÎb ge nē khoega khâisa nî mā mûǂan gu ge xui-ao ǀgaisa ǁoreba gu ge dīsa tsî gu ge ǁnā ǁoren ǃaroma a ǃhōbasensa.

13. (a) Tae-i ǃaromab ge Jehovaba ǀkhomxaǂgaosiba ǁgau Nineveǁîn ǃoagu? (b) Tae-eb ge Jesuba ega Nineveǁîn xa mî?

¹³ Jehovab di ǀkhomxaǂgaosib xas tsîna da ge a ǂan Nineves di khoen ǃoagu. Elob ge Jonaba ge mîba: “Tita ge ǁîs khoen di ǂkhabadība a ǂan xuige.” Xawen ge ǁîn di ǁorena xu a ǃhōbasen, ob ge Jehovaba ǁîna ge ǀûba. ǁÎb ge Jonab xa ǃnāǂamsase ge ǀkhomxa-i. Jonab ge kaise ge ǁaixa hâ i tsîb ge Eloba ǁîba ge ǂâiǂâiǃnâ, Nineves khoen ge ‘ǃgâin tsî tsūn ǁaegu ǀgora ǁoa-i’ ǃkhâisa. (Jon. 1:​1, 2; 3:10; 4:​9-11) Egab ge Jesuba ǁnā aiǁgausa sîsenū tsî Jehovab di ǂhanu-aisib tsî ǀkhomxaǂgaosib xa ge ǁkhāǁkhā. Jesub ge ge mî, ǃhōbasen hâ Nineveǁîn ‘ǀgoraǃgâtsēs ai . . . nî khâimâsa.’—Mat. 12:41.

14. “ǀGoraǃgâs” di khâisa tae-e ra ǂâibasen Nineveǁîn ǃaroma?

¹⁴ Tae-e i ra ǂâibasen Nineves khoen nî “ǀgoraǃgâs” di khâisa hō ti i ga mîhe o? Jesub ge ge mî hānîǁaeb ǃnâ i “ǂkhabana ǀgoraǃgâs ǃoa khâi” ti. (Jhn. 5:29) ǁÎb di ǀoadisi (1 000) kurigu di ǂgaeǂguis ǁaeba ǃoab ge gere ǁnaeǁgau, “ǂhanu-ain tsî ǂhanuoǃnân” ga khâisa hō o. (ǃNǃkh. 24:15) ǂHanuoǃnân ge “ǀgoraǃgâs” di khâisa nî hō. Nēs ge ra ǂâibasen nē khoen ga khâisa hō toa, o kha Jehovab tsî Jesub tsîkha ǁîn tanisen ǀgauba ǃgaoǃgâ tsî nî kōsa matin ǀasa ǁkhāǁkhāte ra ǁnâuǀnam ǀgausa. Nineveǁî-i khâisa ra hō i ga ra mîmâi o, Jehovaba i ǃoaba tidesa ob ge ǁîba mā-am tide î-i nē khoe-e ûi ǀgara. (Jes. 65:20) Xawe ǁnān Jehovaban ǂgomǂgomsase nî ǃoaba ti ra mîmâin ge ǀamo ûib di ǃâubasensa nî ūhâ.—Dan. 12:2.

15. (a) Tae-i ǃaroma da nî ǂgōsen mîsa Sodoms tsî Xomoras ǃnâ ge hîkākāhe khoen khâisa hō tide di? (b) Mati da Judab 7 ǃnâ xoamâisa mîde a ǁnâuǃā ǁkhā? (Mû re boksisa “ Judaba tae-e gere ǂâibasen?”)

 ¹⁵ Sodoms tsî Xomoras di khoen xab ge ǃhoa ob ge Jesuba ge mî, “ǀgoraǃgâtsēs” ai i ǁîna nî supubasa ǁnān ǁîb di ǁkhāǁkhāna ūǃoa tama han xa. (Mat. 10:​14, 15; 11:​23, 24; Luk. 10:12) Tae-eb gere ǂâibasen? ǀNîsi da ge a ǂâi ǁkhā, Jesub ge nē ǃās ai aiǁgau-e gere māsa xawes ge ǁnāsa ti ge ǂâibasen tama hâ i Nineveǁîn xab gere ǃhoa o.  c ǂÂis ǃnâ ūhâ re Jesub ge mî o Nineveǁîn nî “ǀgoraǃgâtsēs” ai khâisa māhe o, ob ge mîb ta xu-e gere ǂâibasen. Nē ǀgam ǃnaeǃkhaira ǃnâb ge ǁkhā “ǀgoraǃgâtsēs” xa gere ǃhoa. Nineveǁîn khamin ge Sodoms tsî Xomoras di khoena ǁgai xūna gere dī. Xawe i ge Nineveǁîna ǃēsa ge ūhâ i in ǃhōbasen. ǂÂihō re Jesub ge mî xu-e “ǀgoraǃgâs” di khâis xa, ‘ǂkhabana gere dīna’ ī ge ǃkhōǂgāhâ. (Jhn. 5:29) ǁNās ǀkha da ge a mî ǁkhā ǃâubasens ge ǀnîsi hâ Sodoms tsî Xomoras khoen ǃaroma. Īǁkhā-e ǀnîn an khâisa nî māhesa tsî da sida ǃēsa nî ūhâsa î da ǁîna Jehovab tsî Jesub xa ǁkhāǁkhā.

16. Tae-e da a ǂan Jehovab di mîǁguis xa ham-eb nî khâisa māsa? (Jeremiab 17:10)

¹⁶ Khomai re Jeremiab 17:10 sa. Nē xoas ǃnâ da ge ra khomai ǂan da a xū-e Jehovab ra ǀgoraǃgâ ǀgaub xa: Jehovab ge hoaǁae ‘ǂâide ra ôaǃnâ tsî ǂgaoga ra ǃâitsâ.’ Hānîǁaeb di khâis tawa i ga hā, ob ge Jehovaba “mâ-i hoa-e ǁî-i di daogu ǃoa nî” ǀgoraǃgâ. Jehovab ge ǂhâbasa i ga o ǀgaisase nî ǀgoraǃgâ xawe ǂhabâsa i ga os tsîna nî ǀkhomxaǂgao. ǁNā-amaga da ge a mîǁoa khoe-i khâisa hō tidesa hoa xūna da ga ǀū o.

‘HOARAGA ǃHUBAIB DI ǀGORAǃGÂ-AOB’ GE ‘ǂHANU XŪ-E NÎ DI’

17. Tae-e ǁō ge khoen ǀkha nî ī?

¹⁷ Adammi tsî Evas tsîn ge Jehovaba ǁnâuǀnamoǃnâ o i ge biliundi khoena ge ǁō. “ǀUni khākhoeb” ǁōb ge ǂgui khoena ge ǃgam. (1Kor. 15:26) Tae-e ǁnā ǂgui  khoen ǀkha nî ī? ǀOro ǃgôab ǂhauhesan (144 000) Xristub di sao-aon ge khâisa nî hō tsî ǁō tidese ǀhommi ǃnâ sī nî hâ. (J.ǂHa. 14:1) ǂGui ǃgôab ǂgomǂgomsa-aogu tsî taradi Jehovaba ge ǀnam īn ge ‘ǂhanu-ain di khâisa’ nî hō, ǁîn ge ǀamosib kōse nî ûi ǃhūbaib ai. Tsî ǂhanu-aise nî hâ Xristub di ǀoadisi kurigu di ǂgaeǂguis ǃnāga tsî ǀuniga ǃâitsâs ǃnâs tsîna. (Dan. 12:13; Heb. 12:1) ǁNā ǁaeb ai i ge “ǂhanuoǃnân” hîna Jehovaba noxoba ǃoaba tsâ taman tsî ‘ǁgai xūna’ gere dīn tsîna nî dawasen tsî ǂgomǂgomsase Jehova Eloba nî ǃoaba. (Luk. 23:​42, 43) Xawen ge ǀnî khoena kaise ge ǁgai i tsî ǁnātikōse Jehovab tsî ǁîb ǂâisa ge mâǃoa, îb Jehovaba mîǁgui ǁînab tātsē khâisa mā tidesa.—Luk. 12:​4, 5.

18-19. (a) Tae-i ǃaroma da ǂgomǃgâsiba ūhâ ǁkhā Jehovab ǁōhâ khoena nî ǀgoraǃgâ ǀgaub ǃnâ? (Jesajab 55:​8, 9) (b) Tae-e da saora ǁkhāǁkhāǃâs ǃnâ nî ǃhoaǃgao?

¹⁸ ǂGomǃgâ ǁkhā î da a Jehovab ga khoena ǀgoraǃgâ, ob hoaǁae ǂhanu mîǁguiga nî dīsa? Îo, Abrahammi tsîn ge ti ge ǁnâuǃā. Jehovab ge hoaǁae a ǂhanu-ai, gā-ai, ǀkhomxaǂgao tsî ‘hoa ǃhūbaiba ra ǀgoraǃgâ.’ ǁÎb ge ǁîb ǀGôaba ge ǁkhāǁkhā tsî ge mā-am îb hoa khoena ǀgoraǃgâ. (Jhn. 5:22) Jehovab tsî Jesub tsîkha ge hoa xūna a ǂan khoen ǂgaob ǃnâ hâna. (Mat. 9:4) ǁÎkha ge khoena kha ga ǀgoraǃgâ, o hoaǁae “ǂhanu xū-e nî dī.”

¹⁹ ǁNās ǀkha da ge hoaǁae Jehovab tsî ǁîb ra dī mîǁguigu ǃnâ nî ǂgomǃgâ. Mûǂan da ge ra sida ge a ǀgoraǃgâ ǁoa xaweb ge ǁîba a ǀgoraǃgâ ǁkhā. (Khomai re Jesajab 55:​8, 9 sa.) ǁNā-amaga da ge Jehovab tsî ǁîb ǀGôab tsîkha ra ǂgomǃgâ ǀgoraǃgâs tawa i ga hā o. Tsî da ge a ǂan sida Gao-aob Jesub hoaǁae ǁîb ǁGûb di ǂhanu-aisib tsî ǀkhomxaǂgaosib tsîna nî ǁgaesa. (Jes. 11:​3, 4) Tae-e da a mî ǁkhā Jehovab tsî Jesub khoena nî ǀgoraǃgâ ǀgaub xa kai ǁgâiǀāb ǁaeb ai? Tae-e da ǂan? Tsî tae-e da ǂan tama? Saora ǁkhāǁkhāǃâs ge ǁnā dîde nî ǃeream.