1. Tae-i ǃaroma da ǁkhara ǃgâsana xu a ǁkhāǁkhāsen ǁkhā?

 HOADA ge daoǁgausa ǂhâ hâ î da ǂhâǂhâsa mîǁguiga dī. Nē daoǁgaude da ge ǃgōsase ǀhaohâb ǃûi-aogu tsî gagasise ǀgaisa ǃgâsana xu ra hō. ǁÎn ga sida xa ǁkhara o da ge nî ǂâi ǁîn ǀapemādi nētsē a hui da ǁoasa. Jehovab ge ra ǂhâba î da ǁkhara ǃgâsana xu ǁkhāǁkhāsen. ǁÎn ge sida xa gaxuse ûihâ tsî ǂâuna ǁaeba ge ūhâ i în ûib xa ǁkhāǁkhāsen tsî gā-ai mîǁguiga dī.—Job. 12:12.

2. Tae-e da nē ǁkhāǁkhāǃâs ǃnâ nî ǃhoaǃgao?

² Elobmîs ǁaeb ǃnâb ge Jehovaba ǂgomǂgomsa ǁkhara ǃgâsaga gere sîsenū. Î gu ǁîb khoena ǂkhâǃnâ tsî daoǁgau. Aiǁgause Moseb, Davidi tsî Apostel Johaneb tsîn khami. ǁÎgu ge ǃkharagagu ǁaen ai ge ûihâ i tsî ǁîgu di mâsigu ge ge ǃkharagagu ī. ǁŌgu nîs aiǃâ gu ge gā-ai ǀāpemāde ǂkhamkhoena ge mā. Hoa ǃnona aogu ge Jehovaba ǁnâuǀnams di ǂhâǂhâsasib xa ge ǃhoa. Jehovab ge ǁîgu gā-ai mîde Elobmîs ǃnâ ge xoa kai, î da sida nētsē ǁnā mîde xu ǁkhāǁkhāsen. Nēsi da ga ǂkham tamas ka io kairas tsîn hoan ǃnâ da ge ǃgâiba ra ǀama ǁîgu di ǁnamade xu. (Rom. 15:4; 2Tim. 3:16) Nē ǁkhāǁkhāǃâs ǃnâ da ge ǃnona ǂgomǂgomsa-aogu di mîde khomai tsî nî kō tae-e da ǁnā mîde xu a ǁkhāǁkhāsen ǁkhāsa.

GAXU ǁAEBA DU GE NÎ MÂǀGAI

3. Mâ ǀgaub ǃnâb ge Moseba Jehovab tsî Israelǁaes tsîna sîsenba?

³ Moseb ge ǁîb ûi kurigu hoaga Jehovaba ǃgarise gere sîsenba. ǁÎb ge ge kēbo-ao, ǀgoraǃgâ-ao, Israelǁîna ǂgaeǂgui tsî ge xoa-ao i. Moseb ge ǁîb ûib ǃnâb ge ǂgui xūna ǃkharuǃnâ amaga kai ǂansa ge ūhâ i. ǁÎb ge Israelǁaesa Egipteb  ǃnân ge hâ i ǃgāsisa xu ge ǂoa-ū tsî ǂgui buruxa dī gu Jehovab dī ga ge mû. Jehovab ge ge sîsenūbi îb ǂguro koro ǂkhanidi Elobmîs ǃnâ hâdi, Psalmdi 90 tsî ǀnîsi Psalmdi 91 tsîna xoa. ǁÎb ge ǀnîsi Jobi ǂkhanis tsîna ge xoa.

4. Moseba ham-e ge ǂkhâǃnâ tsî tae-i ǃaroma?

⁴ ǁŌb nîs aiǃâb ge Moseba 120 kurixab ge ī hîna Israelǁaesa ge ǂgaiǀhao îb ǂâiǂâiǃnâ nî Jehovab ge dība nî xūn xa. ǂGui kurina ǃkharu hâsen ge ǀnî Israelǁîna Jehovab ge dī buruxa dīna ge mû tsî matib ge Egipteǁîna a ǁkhara ǀgausa. (Eks. 7:​3, 4) Mûn ge ge Jehovab ge ǀapa huriba ǀgora ǀgausa tsîn ge ǂnâsa ǃhūb ai ge ǃgû. Tsîn ge ge mû matib ge Jehovaba Faraob tsî ǁîb toro ǂnûbisa a hîkākā ǀgausa. (Eks. 14:​29-31) Tsîb ge Jehovaba ǃgaroǃhūb ǃnâ ǃûi nî tsî gere kōǃgâ nî. (Deu. 8:​3, 4) Israelǁaes ge ǀgūǁae mîmâisa ǃhūb ǃnâ ga ǂgâ hâ, ǁnā-amgab ge Moseba ǁōb nîs aiǃâ ǁîna gere ǂkhâǃnâ. a

5. Moseb mîdi Deuteronomium 30:​19, 20 ǃnâ hâde mâ ǂgomǃgâsiba Israelǁîna ge mā?

⁵ Moseba tae-e ge mî? (Khomai re Deuteronomium 30:​19, 20 sa.) ǁÎb ge Israelǁaesa ge ǂâiǂâiǃnâ ǃgâi hānîǁaeban nî ūhâ ǃkhaisa. Jehovab ǀkhaeb ǀkhan ge Israelǁîna, ǁîb ge mîmâiba nî ǃhūb ǃnâ ga hâhâ. ǁNā ǃhūb ge kaise ge îsa ī tsî ǃhanas ǃaroma ge ǃgâi i. Moseb ge sao rase ǁîna ge ǁguiǃāba: “ǃKhūb sadu Elob ge . . sadu ǂnubi tama kai tsî îsa ǃāde ūhâ ǃhūba nî mā du. Omdi ge sadu ǂgā tama hâ ǃgâi xūn xa nî ǀoa, tsî sadu khao tama tsaudi tsî draibeǃhanagu tsî ǀkherahaidi sadu ǃhana taman tsîna nî ūhâ.”—Deu. 6:​10, 11.

6. Jehovaba tae-i ǃaroma ge mā-am în nau ǁaede Israelǁaesa torob ǃnâ dan?

⁶ Moseb ge Israelǁîn tsîna ge ǃkhâikhom nē îsa ǃhūb ǃnân ga hâ ǀgara ǂgao, on ge Jehovab ǃkhâikhomde nî ǁnâuǀnam. Moseb ge ge mîba nî în ûiba ǁhûi Jehovaba ǃgâs ǃnâ-ū tsî ǁîb ai ǂae. Xawes ge Israelǁaesa Jehovaba ge ǁnâuǀnam tama hâ i. ǁAeb ra ī khamib ge Jehovaba ge mā-am în Asiriaǁîn tsî Babilonǁîn xa danhe tsî ǃkhōsis ǃnâ ūhe.—2Gao. 17:​6-8, 13, 14; 2Kro. 36:​15-17, 20.

7. Tae-e da Moseb mîde xu a ǁkhāǁkhāsen ǁkhā? (Ai-īsiba mû re.)

⁷ Tae-e da ra ǁkhāǁkhāsen? Jehovaba da ga ǁnâuǀnam o da ge ǀamose a ûi ǁkhā. Israelǁaes ge mîmâisa ǃhūb di ǂgâ-ams tawa mā i, khami da ge sida tsîna Jehovab di mîmâisa ǀasa ǃhūbaib di ǂgâ-ams aiǃâ mā. (Jes. 35:1; Luk. 23:43) ǁGâuab tsî ǁîb di demongu ge ǁnāpa hâ tide. (J.ǂHa. 20:​2, 3) Ama tama ǂgomdi ge hâ tide Jehovab xa ǂhumiba ra ǁkhāǁkhāde. (J.ǂHa. 17:16) Khoesi ǂhanugu ge ǁîn ǃnāga hâ khoena ǁgâiǀā tide. (J.ǂHa. 19:​19, 20) Jehovab ge mā-am tide î-i khoe-e paradais ǃnâ ǃgomsina ǃaroma. (Psa. 37:​10, 11) Hoa khoen paradais ǃnâ nî hân ge Jehovab ǂhanu-ai ǂhanuga nî ǁnâuǀnam tsî i ge ǂkhîb tsî ǀguiǃnâxasib tsîna nî hâ. Hoa khoen ge ǀnamgu tsî nî ǂgomǃgâgu. (Jes. 11:9) ǁNā ǁaeba ǃoa da ge ra mûǂûi tsî Jehovaba da ga ǁnâuǀnam, o da ge paradais ai 100 kurin ǀguina hâ tide xawe ǀamosib kōse.—Psa. 37:29; Jhn. 3:16.

8. Paradais mîmâis xa ǂâisa mati ǀgui sîsabeba ge hui? (Judab 20, 21)

⁸ Elob mîmâis ǀamo ûib dis xa da ga ǂâiǃgâ, o i ge nî hui da î da ǁnâuǀnam bi  ǃgomsina da ga hōǃâ xawe. (Khomai re Judab 20, 21 sa.) ǁNā mîmâis ge nî hui da î da sida ǂkhabusasiga ǃkhamǃoa. ǀGui ǃgâsab Afrikab ǃnâ ǂgui kuriga sîsabese ra ǃoabab ge ra ǁguiǃā, ǁîb tsîn ge ǁaeba xu ǁaeb ǀkha ǃâitsâhesa îb Jehovaba ǃgâiba tama xūna dī. ǁÎb ge ra mî: “Mûǂan ta ge ge paradais ǃhūbaib ai ta ǀamose ûiǁkhā tidesa Jehovaba ta ga ǁnâuǀnam tama io. ǁNās ge ge huite î ta ǃgomsina ǃkhamǃoa. Jehovaba ta ge ge ǀkhoma ǀgores ǃnâ-ū îb huite. Jehovab huib ǀkha ta ge ǁnā ǁgai xu-e ge dī ǀû.”

ǃGÂIǃGÂ DU GE NÎ

9. Mâ ǃgomsigab ge Davida ǁîb ûib ǃnâ hōǃâ?

⁹ Davidi ge ge ǃgâi gao-ao i. ǁÎb ge ǁnae-amde ǀkhō, xoa-ao, ǀgaisa ǃkham-ao tsî ge kēbo-ao i. ǁÎb ge ǂgui ǃgomsiga gere hōǃâ. ǂGui kurigab ge gao-aob Saula xu gere ǃkhoenî ǁîb gere ǃgambi ǂgao amaga. ǁÎb ge Gao-ao kai toas khaoǃgâs tsînab ge ǁîb ûiba gere ǃkhoeba, Absalommi ǁîb ôab gere ǃgambi ǂgao amaga îb ǁîb soas ǃnâ gao kai. Nē ǃgomsin tsî ǁîb gere dī dīsan ǂam-aib ge Davida ǂgomǂgomsase Jehovab ǃoa-ai ge hâ ǁōb nîs kōse. “Ti ǂgaob ǃoa hâ khoeb” tib ge Jehovaba ǁîb xa ge mî. Amase da ge Davidi gā-ai ǀapemāsa nî ǃgâ.—ǃNǃkh. 13:22; 1Gao. 15:5.

10. Tae-i ǃaromab ge Davida ǁîb ôab Salomoba ǁnama Gao-ao kaib nîs aiǃâ?

¹⁰ ǃGaoǃgâ re Gao-aob Davidi ge tae-e ǁîb ôab Salomob hîna sao rase Israeli Gao-aob ase nî ǂgaeǂguiba a ǀapemāsa. Jehovab ge Salomoba ge ǁhûi, îb khoen Eloba nî ǃoaba ǃnâ Tempela om. (1Kro. 22:5) Nē sîsenni ge ge kai i tsîb ge Jehovab huiba ge ǂhâ hâ i îb Israelǁaesa ǂgaeǂgui. Davida tae-e ǁîba ge mîba? Hā re î da mû.

11. 1 Gao-aogu 2:​2, 3 ǃoagub ge Davida mā ǀapemāsa Salomob a mā? Tsî tae-e ge hā Salomob ge nē ǀapemāsa ǁnâuǀam o? (Ai-īsiba mû re.)

¹¹ Davida tae-e ge mî? (Khomai re 1 Gao-aogu 2:​2, 3 sa.) Davidi ge ǁîb ôaba ge mîba, Jehovabab ga ǁnâuǀnam ob nî ǃgâi Gao-ao kai tsîb ǁîb xa nî ǀkhaehesa. Tsî ǂgui kurinab ge Jehovaba Salomoba ǂgui ǃgâi xūna ge mā tsî ǃkharagagu ǀgaugu ai gere hui. (1Kro. 29:​23-25) ǁÎb ge îxa tempela om, Elobmîs ǂkhanide xoa tsî ǁîb mîdi ge ǀnî Elobmîs ǂkhanidi ǃnâs tsîna ra hō-e. ǁÎb ge gā-aisib tsî ǃkhusis tsîna ūhâse ge ǂansa-i. (1Gao. 4:34) Xawe Davidi ge mî khami Salomob ga Jehovaba ǁnâuǀnam ǀgaras kōseb nî ǃgâiǃgâsa. Xaweb ge Salomoba kaib ta khami ǀnî Eloga ge ǃoaba tsoatsoa. Jehovab ge ǁnā i xa ge ǃgâibahe tama hâ i tsî Salomoba gā-aisiba ge mā ǀû, khoena ǂhanu-aise tsî ǃgâise  ǂgaeǂguis ǃaromab ge ǂhâhâ îba.—1Gao. 11:​9, 10; 12:4.

12. Tae-e da Davidi mîde xu a ǁkhāǁkhāsen ǁkhā?

¹² Tae-e da ra ǁkhāǁkhāsen? Jehovaba da ga ǁnâuǀnam ob ge ǀkhaeda tsî nî hui da. (Psa. 1:​1-3) Ama as ge Jehovab sida mîmâiba tama hâsa, ǃkhū tsî da nî ǂanǂansasa Salomob khami. (ǂKhm. 2:​6, 7; Jak. 1:5) Jehovab ǀapemās ge nî hui da mîǁguiga da ga dī o sîsenni, skoli, mari-i tsî ǁkhoaxa ǁaeba da ga ūhâ ǁaeb ai. ǁÎb ǀapemāde da ga sao, o da ge ǁîb ǀkha da ūhâ ǀhōsagusisa ra ǁkhauba tsî da ge ǀamo ûib tsîna nî hō. (ǂKhm. 2:​10, 11) ǃGâi ǀhōsana da ge ūhâ tsî sida omaris tsîn ge ǂkhîba a ūhâ ǁkhā.

13. Tae-e Karmensa ge hui îs ǁîs ûiba ǃgâiǃgâi?

¹³ Karmen ti ǀon hâ ǃgâsas Mosambiki ǃnâ ra hâs ge gere ǂâi, ǀgapi ǁkhāǁkhāsens ǁîs ûiba nî supu kai ti. ǁÎs ge ǀgapi ǁkhāǁkhāsen ǃkhais tawa xoaǂgāsen tsî omdi ra tekenhe ǀgausa ge ǁkhāǁkhāsen. ǁÎs ge ra mî: “Kaise ta ge ǁkhāǁkhāsen ta gere xūna ge ǀnam i. Xawe i ge ti ǁaeb tsî ǀgaib tsîna gere ū. Skoli ai ta ge ǁgoasa xu karab kōse gere hâ. ǀHaode ǃoa īs ge ge ǃgomba te ī tsî i ge Jehovab ǀkha ta ūhâ ǀhōsagusis tsîna ge ǂkhabu. Mûǂan ta ge ge ǀgam ǀhōnkhoe kha ta ra sîsenba ǂgaosa.” (Mat. 6:24) ǁÎs mâsib xas ge ǀgore tsî ôaǃnâde sida ǂkhanidi ǃnâ ge dī. ǀAros ge ra: “ǃGâi ǀapemāde ta ge ǀhaohâb ǃûi-aogu tsî ti mamasa xu hō toas khaoǃgâ ta ge ge mîǁgui, î ta ǀgapi ǁkhāǁkhāsa ǀû tsî Jehovaba ǀoasase ǃoaba. Nēs ge ge hui te î ta ǃgâi mîǁguiga ti ûib ǃnâ dī tsî ta ge ra tsâ nēs ge ǂhanu mîǁgui īsa. Kaise ta ge ǂkhî ǁnā mîǁguiba ta ge dīsa.”

14. Davidi tsî Moseb tsîkha haisi-amsa tae-e ge ǃkhōǂgā hâ i?

¹⁴ Moseb tsî Davidi tsîn ge Jehovaba ge ǀnam i. Tsî ge ǂan i ǂhâǂhâsa i asa ǁîba ǁnâuǀnamsa. Hoakha ge nau khoena ge ǂkhâǃnâ în ǁîkha aiǁgaude ǁgae tsî ǂgomǂgomsase Jehovab ǃoagu hâ. Hoakha ge khoena ge ǃkhâikhom Jehovab ǃoa-ain ga ǂgomǂgomsa tama i, on ǁîb ǀhō kai ǁkhā tide tsîn ǁîb xa ǁkhawa ǀkhaehe tidesa. ǁÎkha di ǀapemāde da ge nētsē a sîsenū ǁkhā. ǂGui kurigu khaoǃgâb ge ǀnî hâ ǃoaba-aob Jehovab dib tsîna ge ǁguiǃā, matikōse i a ǂhâǂhâsasa î da ǂgomǂgomsase Jehovab ǃoa-ai hâ.

 KAI ǃGÂIAǂGAOBA DU GE NÎ HŌ

15. Tae-eb ge Apostel Johaneba ǁîb ûib ǃnâ hōǃâ?

¹⁵ Johaneb ge Jesub di ǀgū ǀhōsa tsî ge Apostel i. (Mat. 10:2; Jhn. 19:26) Johaneb ge ǃnāsa ǁaeba Jesuba aoǁnâ sîsenni ǃnâ gere ǁhao tsî ge mû Jesub gere dī buruxa dīna. ǁÎb ge ǂgomǂgomsase Jesub ǃoa-ai ge hâ ǃgom ǁaegu ǃnâ. Mûb ge ge Jesub ge ǃgamhe ǀgausa tsîb ge Jesuba khâisab ge hō toas khaoǃgâs tsîna ge mû. Xristeǁî ǀhaohâb ra kai ǀgausab ge ge mû. Johanneb ge gaxuse ûi tsî ge mû, “ǀhommi ǃnaka hâ kurusaben hoan” ra aoǁnâbahesa.—Kol. 1:23.

16. Ham-e Johaneb di sîǂkhanide xu ǃgâiba ge ǀama?

¹⁶ ǁÎb ûib nî ǀams aiǃâb ge Johaneba kai aiǂhanuba ge ūhâ i tsî Elob xa ǃgomǂgāǃnâhe hâ mîde ge xoa. ǁÎb ge “ǂhaiǂhais Jesub Xristub ge Elob” xa māhes xa ge xoa. (J.ǂHa. 1:1) Johaneb ge ǁîb ǀonsa tani hâ Elobmîs ǂkhanisa ge xoa. Tsîb ge ǃnona sîǂkhanide ge xoa, nētsē da 1 Johaneb, 2 Johaneb tsî 3 Johaneb ti ǂande. ǁÎb di ǃnonaǁî sîǂkhanisab ge ǂgomǂgomsa Xristeǁîb Kajub ti ǀon hâb ǃoa ge xoa, ǁîb ge ǀgôa-i khami ǀnam îba. (3Jhn. 1) ǁNā ǁaeb ain ge ǂguina ge hâ i Johaneb ge gagasi ǀgôan khami ǀnamhâ îna. Nē ǂgomǂgomsa ǁkhara-aob ge xoa mîdi ge Jesub ǁkhāǁkhāsabena ra ǂkhâǃnâ nētsēs kōse.

17. 3 Johaneb 4 ǃoagu i tae-e kai ǂkhîba ra mā?

¹⁷ Johaneba tae-e ge xoa? (Khomai re 3 Johaneb 4 sa.) ǁÎb di ǃnonaǁî ǂkhanis ǃnâb ge Johanneba ge mî, amabes ǃnâb ra ǂkhîsa mûb ga o ǁîb ǃgâsan Eloba ra ǁnâuǀnam ǃkhaisa. ǁNā ǁaeb ai i ge khoena ge hâ i ǂhûmi xūna gere ǁkhāǁkhāna tsî ǀgorasa ǀhaohâgu ǃnâ gere ǃaromana. Xawen ge nauna “amab daob” ǃnâ ge ǃgû ǀgara. ǁÎn ge Jehovaba ǁnâuǀnam tsî “ǁîb mîmādi” ǃoagu gere ûi. (2Jhn. 4, 6) Nē ǂgomǂgomsa ǃoaba-aon ge Johaneb tsî Jehovab tsîkha kaise gere ǂkhî kai.—ǂKhm. 27:11.

18. Tae-e da Johaneb mîde xu a ǁkhāǁkhāsen ǁkhā?

¹⁸ Tae-e da ra ǁkhāǁkhāsen? ǂGomǂgomsase da ga Jehovaba ǃoaba, o da ge ǂkhîba nî ūhâ tsî nau khoen tsîna nî ǂkhî kai. (1Jhn. 5:3) Aiǁgause, kaise da ge a ǂkhî ǂan da a amaga Jehovaba da ra ǂkhîǂkhîsa. Jehovab ge kaise ra ǃgâiaǂgao mûb ga o, ǁgai xūna xu da ra hâbe tsî da ǁîb mîsa ra ǁnâuǀnam ǃkhaisa. (ǂKhm. 23:15) ǀHomǃgāgu tsîn ge ǀhommi ǃnâ ra ǃgâiaǂgao.  (Luk. 15:10) Sida tsîn ge kaise ra ǃgâiaǂgao mûda ga o sida ǃgâsan Jehovaba ǃoa ǂgomǂgomsase ra hâ ǃkhaisa, ǁîn ga ǃâitsâhe tsî ǃgôaǃgonhe o în ǁgai xuna dī. (2Tes. 1:4) Tsî ǁGâuab di ǃhūbaib ga hîkākāhe o da ge kaise nî ǃgâiaǂgao, Jehovab ǃoagu da ge ǂgomǂgomsase hâ ǃkhais ǃaroma.

19. ǃGâsas Raxelsa tae-e ra mî amaba nau khoena ǁkhāǁkhās xa? (Ai-īsiba mû re.)

¹⁹ ǃGōsase da ge ra ǃgâiaǂgao amaba da ga nau khoen ǀkha ǀgoragu o. Raxels, Dominikan Republiki ǃnâ ra hâs ge ra tsâ, kai aiǂhanub asa nauna Jehova Elob xa ǁkhāǁkhāsa. ǁÎs ge ǀnî khoena hui hâ în Jehovaba ǃoaba tsoatsoa. ǁÎs ge ra mî: “Kaises ge ra ǃgâiaǂgao ǁnān ǁîs xa ǁkhāǁkhāhe hânas ga mû o, matin Jehovaba ǀnam ǃkhaisa tsîn mati ǁîb ǃnâ ra ǂgomǃgâ ǃkhaisa tsî ǁîn ûiga Elobmîs ǃoagu ra dawa ǀgausa. ǁNā ǃgâiaǂgaob ge kaise a kai dī da ra ǁguibadi xa tis ge ra mî.”

ǃGÂIBA ǀAMA ǂGOMǂGOMSA-AOGU DI ǀUNIGA MÎDE XU

20. Mâ ǀgaugu ǃnâ da sida Moseb, Davidi tsî Johaneb khami ī?

²⁰ Moseb, Davidi tsî Johanneb tsîgu ge ǂgui kuriga ǃkharuhâse ge ûihâ i. Tsî ǁîgu ge ûiǃnâ hâ i mâsigu ge sida nētsē ra ûiǀgauba xu kaise ra ǀkhara. Sida tsîn ge ǁîgu khami ī ǂgui ǃkharagaǃnâgu ǀgaugu ǃnâ. ǁÎgu ge ama Eloba gere ǃoaba sida khami. ǁÎgu khamis tsîna da ge sida Jehovaba ǃoa ra ǀgore, ǁîb ai ǂgomaiǂnûi tsî ǁîb ǃoa ra kō daoǁgaudi ǃaroma. Tsî ǁîgu khami da ge sida tsîna ra ǂgom, Jehovab ǁnān ǁîba ra ǁnâuǀnamna ra ǀkhae ǃkhaisa.

21. Jehovaba mati nî ǀkhae da Moseb, Davidi tsî Johaneb di ǀapemāde da ga sao-ai tsî ǁîba ǁnâuǀnam o?

²¹ Hā re î da ǁnā ǁkhara-aogu di ǀapemāsa sao tsî Jehovab di mîmāde ǁnâuǀnam. O da ge nî ǃgâiǃgâ dī da ra xūn hoan ǃnâ tsî ǀamosib kōse nî ûi. (Deu. 30:20) Tsî da ge nî ǃgâiaǂgao sida ǀhomsi ǁGûba da ra ǂkhîǂkhî amaga. Hîna ǂâi da ras ǃgâ-ai nî mādawa-amda ba.—Efe. 3:20.