1-2. ǂHanuoǃnâsiba mati ǁaeba xu ǁaeb ǀkha hoada ra tsâǀkhā?

 JESUB ge ǃoa taras ǂkhōs xa gere ǃhoa, ǀgoraǃgâ-aoba gere ǀkhomasa îs ǂhanu-aise hâ-ūhe. Jesub di ǁkhāǁkhāsabegu ge ǁnā ǃoa taras gere tsâ ǀgauba gere ǁnâuǃā. ǂGui khoen ge ǁnā ǁaeb ai ǃgâi tamase gere hâ-ūhe amaga. (Luk. 18:​1-5) Sada tsîn ge nētsē ǁîs gere tsâ ǀgauba ra ǁnâuǃā, hoa da ǁaeba xu ǁaeb ǀkha ǂhanuoǃnâsiba ra hōǃâ amaga.

² ǂGui khoen ge nētsē ǃhaoǃnâbe ǀgorasa ūhâ, khoexaǃnâ tama tsî a xūǃgunuxa. ǁNā-amaga da ge buru tama hâ ǃgâi tamase da ga hâ-ūhe o. (Aoǁn. 5:8) Xawe da ge ra tsûaǂgao ǃgâsa-i ga ǃgâi tamase hâ-ū da o. Sida ǃgâsan ge amaba mâǃoa tama hâ nau khoen ra dī khami. ǁÎn ge ǀoasa kurusa ūhâ tama hâ. ǂGui xūna da ge Jesub ge ǂhanuoǃnâsiba mâǃoa ǀgauba xu a ǁkhāǁkhāsen ǁkhā. ǂHanuoǃnâse ra hâ-ū da mâǃoa-aon ǀkha da ga ǃnūǃnâxa, o i ge kaise a ǂhâǂhâsa î da sida ǃgâsan ǃoagus tsîna ǃnūǃnâxa. Jehovaba mati ra tsâ ǂhanuoǃnâse da ga hâ-ūhe o, sada ǃgâsan tamas ka io ǁîba ǃoaba tama khoen xa? Jehovaba nēs xa mati ra tsâǀkhāhe?

3. Mati da a ǂan Jehovab sida ra hâ-ūhe ǀgauba ra ǃgaoǃgâsa tsî tae-i ǃaroma?

³ Jehovab ge ra tsâǀkhāhe khoen ra hâ-ū da ǀgaub xa, ǁîb ge “ǂhanu-aisiba a ǀnam.” (Psa. 37:28) Jesub ge ǂgomǃgâsiba ra māda, Jehovab “ǃhaese . . ǂhanu-aisiba” nî hā-ūsa ǂhanu ǁaeb ai. (Luk. 18:​7, 8) ǁÎb ge ǀgūǁae  ǃgomsina nî ǀariǂûi tsî mā-am tide î da ǂhanuoǃnâsiba hōǃâ.—Psa. 72:​1, 2.

4. Mâ huibab Jehovaba nētsē ra māda?

⁴ Jehovab hoa ǃgomsina nî ǀariǂûis kose da ge nî ǃâu. Xaweb ge ǁîba nēsis tsîna ra hui da, ǂhanuoǃnâse da ga hâ-ūhe o. (2Pet. 3:13) Aiǁgause ǁîb ge ra ǁkhāǁkhā da ǂhanuoǃnâse da ga hâ-ūhe, o da nî tanisen ǀgauba î da tā ǃgomsina hōǃâ. ǁÎb ge Elobmîs ǃnâ-ū ra ǁgau da, ǁîb ǀGôab ge ǂhanuoǃnâseb ge hâ-ūhe o a tanisen ǀgauba. Jehovab ge Elobmîs ǃnâ-ū ǀapemāde ra māda ǂhanuoǃnâse da ga hâ-ūhe, o da nî tanisen ǀgaub xa.

ǂHANUOǃNÂSIB ǃOAGU DU RA TANISEN ǀGAUBA ǃGAOǃGÂ RE

5. ǂHanuoǃnâsib ǃoagu da ra tanisen ǀgauba da tae-i ǃaroma nî ǃgaoǃgâ?

⁵ ǂHanuoǃnâsib ge ǂâiǂhânsendi tsî tsûb tsîna a tsâ kai da ǁkhā. (Aoǁn. 7:7) Jehovab ǂgomǂgomsa ǃgān tsîn ge ǁkhā tsûba gere hōǃâ aiǁgause, Jobi tsî Habakuki khami. (Job. 6:​2, 3; Hab. 1:​1-3) Tsū tama i ge hâ nēti tsâsa xawe da ge nēs ǃoagu da ra tanisen ǀgauba nî ǂanbasen, î da tā tsū xū-e dī.

6. Absalommi aiǁgausa xu da tae-e a ǁkhāǁkhāsen ǁkhā? (Ai-īsiba mû re.)

⁶ Khoe-i ga sida tsî sida ǀnamsabe-e tsūdī, o da ge ǀnîsi ǁnā khoe-e ǁkhā ǀgaub ǃnâ ra ǁkhara ǂgao. Xawe ǁnāsa dīs ge ǂgui ǃgomsiga a ǃaroma ǁkhā. Aiǁgause Davidi ôab Absalomma ǃgaoǃgâ re. ǁÎb ge kaise ge ǁaixa ǁîb ǃgâs Tamars ge ǁîb ǃgâb Amnonni xa ǀgaiǃkhōhe o. Moseb ǂhanub ǃoagub ge Amnonna ǁōb ǁkharaba nî hō, nēb ge dī xū-i ǃaroma. (Lev. 20:17) ǁNâuǃāxa i ge a Absalommi ge ǁaixa ǃkhaisa xawe i ge ge ǂhanu tama hâ i îb ǁîba Amnonna ǃgam.—2Sam. 13:​20-23, 28, 29.

7. Jehovab ǂgomǂgomsa ǃoaba-aob ge ǂhanuoǃnâsiba mû, ob ge tae-e dī?

⁷ Mû da ga tsū xūna ra dī khoen ǁkharahe tama hâsa, o da ge a ǂâi tsoatsoa ǁkhā ǃgâi xūna dīs mādawa-am-e ūhâ tama ti. ǀGui ǂgomǂgomsa ǃoaba-aob Jehovab dib ge ge mû, ǃgâi khoen eloxoresa khoen xa ra tsūdīhesa tsîn eloxoresana ǁkhoaxa ûiba ūhâsa. ǁÎb ge ge mî: ‘Eloxoresa khoen ge . . hoaǁae sâsase ra hâ’ tsî ǃkhūsib ǃnâ ra ǀarosen. (Psa. 73:12) ǁÎb ge kaise ǂhanuoǃnâsib xa  ge tsûtsûhe tsî gere ǂâi hui tama i hâsa Jehovaba ǃoabasa. ǁÎb ge ge mî: “Nēsa ǁnâuǃās xa ta gere ǂâi os ge nēsa kaise ǃgom ǁgui-ais ase ge ība te i.” (Psa. 73:​14, 16) ǃNāsaseb ge ge mî: “Ti ǂâira ge ge ǃnôa ǁgā, ti dāǃharodi ge ge dāsa ǁgā.” (Psa. 73:2) ǁKhā xū-i ge Alberto ti ǀon hâ ǃgâsab ǀkha ge ī.

8. ǂHanuoǃnâsiba mati ǀgui ǃgâsaba ge tsâǀkhā?

⁸ Albertob ge ǂhanuoǃnâse ge ǂgā-amhe ǀhaohâb mari-eb ge ǃnarisa. Nēs xa ǃaromahe hâseb ge ǁîb di aiǂhanub ǀhaohâb ǃûi-aob ase ǃoabas diba ge ǂoaǃnâ. ǂGui ǃgâsan ge ǀhaohâb ǃnâ nēsa ǁnâu, on ge ǁîba ǃgôasiba ge ǁgau ǀû. ǁÎb ge ra mî: “Kaise ǁaixa tsî ta ge ge tsûaǂgao hâ i.” ǁNātikōse tsûaǂgao tsîb ge ǀhaode xu ge hâbē tsîb ge 5 kurin ǀgaiba aoǁnâ sîsenni tsîna ge dī tama hâ i. Nē aiǁgaus ge ra ǁgau tae-i nî īsa sida di ǁaiba da ga ǃkhō-oa tama io ǂhanuoǃnâse da ra hâ-ū ǁaeb ai.

JESUB GE ǂHANUOǃNÂSIBA MÂǃKHARU ǀGAUBA ǁGAE RE

9. Jesuba mâ ǂhanuoǃnâsiba gere ǃkharuǃnâ? (Ai-īsiba mû re.)

⁹ Jesub ge ǀoasa aiǁgausa ge māda tae-e da nî dīsa ǂhanuoǃnâse da ga hâ-ūhe  o. ǁÎb ge ǂgui khoen xa ǂhanuoǃnâse ge hâ-ūhe ǁîb omaris khoen tsîna ǃkhōǂgā hâse. ǁÎb ǀaokhoen ge ǃkhaub hâ ti gere ǀhapiǂgā-ambi. ǂGomdi ǂgaeǂgui-aogu ge gere mî, ǁîb ǀgaiba demonga xu gere hō ti. Romes soldagu ge ǁîba ǂnau tsûtsû tsî ǀams ai ge ǃgam. (Mrk. 3:​21, 22; 14:55; 15:​16-20, 35-37) Nētikō ǂhanuoǃnâsibab gere ǃkharuǃnâ xaweb ge Jesuba ge dī ǃoa tama hâ i. ǁÎb aiǁgausa xu da tae-e ra ǁkhāǁkhāsen?

10. Jesuba ǂhanuoǃnâsib ǃnâ mati ge mâǃkharu? (1 Petrub 2:​21-23)

¹⁰ Khomai re 1 Petrub 2:​21-23 sa. a Jesub ge ǃgâi aiǁgausa ge ǁnāxupa da, ǂhanuoǃnâsiba da ga ǃkharuǃnâ o da nî saoba. ǁÎb ge mâǁaeb ǃhoa tsî nî ǃnōsa ge ǂan i. (Mat. 26:​62-64) ǀHapiǂgā-amheb gere ǁaeb aib ge ǁîba xū-e ge mî tama hâ i. (Mat. 11:19) ǃHoab gere ǁaeb aib ge ǁîb mâǃoa-aona mîǁgaiǁgai tamas ka io ge ǃaoǃao tama hâ i. Jesub ge hoaǁae aitsama ǃkhō-oasensa gere dītsâ, Jehovab “ǂhanu-ai ǀGoraǃgâ-aob” aib gere ǂgomǃgâ amaga. Jesub ge ge ǂan i Jehovab ra mûsa matib ǂhanuoǃnâse ra hâ-ūhe ǀgausa. ǁÎb ge ǂgomǃgâsiba ge ūhâ i Jehovab ǂhanu ǁaeb ai ǂhanuoǃnâsiba nî ǃgâiǃgâisa.

11. Mâ ǀgaugu ǃnâ da ǃhoa da ra ǀgauga nî ǃgaoǃgâ? (Ai-īsiga mû re.)

¹¹ ǂHanuoǃnâse da ga hâ-ūhe, o da ge Jesuba a ǁgae ǁkhā ǃkhō-oasens ǃnâ. ǀNî ǂhanuoǃnâsigu ge a ǂkhariro tsî a kō ǃkharuhe ǁkhā. ǀNî ǁaegu ais ge ǃnōs tsîna a ǃgâi, îb mâsiba tā ǁgao. (Aoǁn. 3:7; Jak. 1:​19, 20) Nau ǁaegu ai da ge ǀnîsi  xū-e nî mî mû da ga o, khoe-i ǃgâi tamase ra hâ-ūhesa. Tamas ka io amaba da ga ǁkhauba ǁaeb ai. (ǃNǃkh. 6:​1, 2) ǃHoa da ga ǁaeb ai da ge ǃnomsa tsî ǃgôasib ǀkha ǁnāsa nî dī.—1Pet. 3:15. b

12. Mati da Jehovab ‘ǂhanu-ai ǀGoraǃgâ-aoba’ a ǂgomǃgâ ǁkhā?

¹² Jesuba ǁgae tsî da ge ‘Elob ǂhanu-ai ǀGoraǃgâ-aoba’ a ǂgomǃgâ ǁkhā. Nau khoen ga ǀgoraǃgâ da tsî ǃgâi tamase hâ-ū da xawe da ge a ǂgomǃgâ ǁkhā Jehovab amaba a ǂansa. Tsî nē ǂgomǃgâsib ge nî hui da î da mâǃkharu ǂhanuoǃnâse da ga hâ ūhe xawe. ǂAn da a xui-ao Jehovab ǀgūǁae nē mâsiba nî ǀkharaǀkharasa. Jehovab ai da ga ǂgomǃgâ, o da ge ǁîb ai nî ǃâu îb nē hoa ǃgomsiga ǀariǂui. Tsî da ge ǁaixa hâse hâ ǀgara tsî nauna ǃhui tide. Nau khoe-i ǀkha ǁaixa hâse hâ ǀgaras ge ǁgarida ǁkhā ǁgai xū-e dīsa. Sada ǃgâiaǂgaob tsî Jehovab ǀkha da ūhâ ǀhōsagusis tsîna a ǁgaiǁgai ǁkhā.—Psa. 37:8.

13. Tae-e a huida ǁkhā ǃnūǃnâxase ǂhanuoǃnâsiba mâǀgais ǀkha?

¹³ Ama as ge Jesub aiǁgausa da ǀoasase saoho tidesa. ǀNî ǁaen ai da ge ǃhausen da nî xūna mî tsî a dī ǁkhā. (Jak. 3:2) ǀNî ǂhanuoǃnâsigu ge sorosi tsûb tsî ǂâiǂhânsendi tsîna a ǃaroma ǁkhā. ǁNāsats ga hōǃâ o ǂâis ǃnâ ūhâ Jehovab ge ǂan sats ra ǃkharuǃnâ xūna. Jesub tsîn ge a ǂan matits ra tsâsa ǁîb ge ǁnā ǃgomsiga ǃkharuǃnâ amaga. (Heb. 4:​15, 16) Jesub aiǁgaus ǂam-aib ge Jehovaba Elobmîs ǀapemādi, huida ǁkhā de ge māda. ǁGaise da ga hâ-ūhe ǁaeb ai hā re î da ǀgam ǁaraǃāra Romeǁîn ǂkhanisa xu ǂâiǃâ hui da nî ra.

“AB . . ǁAIXASIBA ǁNĀSA DĪ”

14. Elob “ǁaixasiba” tae-e ra ǂâibasen? (Romeǁîn 12:19)

¹⁴ Khomai re Romeǁîn 12:19 sa. Paulub ge Xristeǁîna gere ǂkhâǃnâ în ǁaiba Eloba mā. ǁAixasiba da ga Eloba mā o da ge ra mā-am îb ǁîb ǁaeb ai ǂhanu-aisiba hā-ū. Johaneb ti ǀon hâ ǃgâsab ǃgâi tamase ge hâ-ūheb ge ra mî: “Ti ǁaiba ta ge gere ǃkhō-oa î ta tā ǂhanu tama xū-e dī nēs ge ge supu tama hâ i. Romeǁîn 12:19 ge ge hui te î ta Jehovab ai ǃâu ǀgara.”

15. Tae-i ǃaroma i a ǃgâi Jehovab ai ǃâusa îb aitsama ǃgomsina ǂhanuǂhanu?

¹⁵ ǃGâiba da ge ra ǀama Jehovab ai da ga ǃâu o îb mâsiba ǃgâiǃgâi. ǁNāsa da ga dī o da ge ǂâiǂhânsensa xu ra hā ǃgomsina xu ra ǁkhaubasen, ǃgomsiga aitsama sîsenǂams xa ra ǃaromahe gā. Jehovab ge ra huida ǂgao. ǁÎb ge ra mî ‘ǂhanuoǃnâsiba tida xuba î ta tita ǂhanuǂhanu.’ Jehovab di mîmâis “tita ge nî mādawa-am” ti hâsa da ga ūǃoa, o da ge ra ǁgau ǂgomǃgâ da rasa ǁîb ǂhanu ǁaeb ai nē mâsiba nî ǃgâiǃgâisa. ǁNās ge aisi ta go ǃhoaǃgao Johaneba ge hui. ǁÎb ge ra mî: “Jehovab ai ta ga ǃâu îb ti ǃgomsiga ǃgâiǃgâi os ge ǀamǂoasa kaise a ǃgâi, aitsama nēsa sîsenǂams xa.”

“ǂKHABABA ǃGÂIB ǀKHA DAN”

16-17. ǀGoresa mati a hui da ǁkhā î da “ǃgâib ǀkha ǂkhababa dan”? (Romeǁîn 12:21)

¹⁶ Khomai re Romeǁîn 12:21 sa. Paulub tsîn ge Xristeǁîna gere ǂkhâǃnâ în “ǃgâib ǀkha ǂkhababa dan.” Jesub ge ǃhommi aoǁnâs dawa ge mî: “Sadu khākhoena ǀnam î ǀgoreba ǃgôaǃgon du rana.” (Mat. 5:44) Nēsab ge ǁîba ge dī. Hoada ge īǁkhā i ga o Jesub ge Romeǁî soldagu xa ǃgamhe, ob gere hōǃâ tsûb xa  ǂâi ǁkha. Jesub ge ǁgaise hâ ūhe tsî ǀgaisa tsûb tsîna ge hōǃâ. ǁÎb ge ǃkharuǃnâ tsûba da ge tātsē a ǁnâuǃā ǁoa.

¹⁷ Jesub ge hoaǁae ǀnamxaǃnâ tsî ǂgomǂgomsase Jehovab ǃoa-ai ge hâ, kai ǃgommab gere hōǃâ xawe. ǁNā soldagu nî ǁkharahesa ǂgans xab ge ge ǀgore Jehovaba ǃoa, “ti îtse ǁîna ǀûba re, tare-en ra dīsan a ǀū xuige!” (Luk. 23:34) Jehovaba da ga ǂgan îb ǁgaise ra hā-ū da khoena hui, os ge ǁnāsa ra hui da î da ǃnomsase hâ tsî tā ǁnātikōse ǁaixa.

18. ǀGoresa mati Albertob tsî Johaneb tsîkha ge hui îkha ǂhanuoǃnâsiba mâǃkharu?

¹⁸ ǂGuro da go ǃhaoǃgao ǀgam ǃgâsakha ge ǀgores xa ge huihe i kha ǂhanuoǃnâsiba mâǃkharu ǁkhā. Albertob ge ra mî: “ǂHanuoǃnâse ge hâ-ūte ǃgâsaga da ge ge ǀgoreba. Jehovaba ta ge ge ǂgan îb huite i ta nē ǂhanuoǃnâsiba mâǃkharu ǁkhā.” Albertob ge nēsi ǃgâiaǂgaob ǀkha Jehovaba ra ǃoaba. Johaneb ge ra mî: “ǃGâsab hîna ge tsûtsûte ba ta ge ǂgui ǃnāde ge ǀgoreba. Nē ǀgoredi ge ge hui te î ta ǁîba ǀûba, tā ǀgoraǃgâ tsî ǃnomsase hâ.”

19. Tae-e da nē eloxoresa ǃhūbaib di ǀams kōse nî dī ǀgara? (1 Petrub 3:​8, 9)

¹⁹ ǀŪ da ge a matiko ǂhanuoǃnâsiba da nî hōǃâsa nē eloxoresa ǃhūbaib nî ǀams aiǃgâ. Tae-i ǀgui-e da ga ǃkharuǃnâ xawe da ge Jehovaba ǃoa ǀgoresa tā nî ǀûsen. Aiǃgû tsî da ge Jesub ge ǂhanuoǃnâsiba mâǃoa ǀgauba nî ǁgae tsî Elobmîs lapemādi tsîna nî sîsen-ū. ǁNāti da ga dī o da ge ǂgomǃgâ ǁkhā Jehovab nî ǀkhae dasa. Khomai re 1 Petrub 3:​8, 9 sa.