1-2. ǀHaohâb ǃûi-aogu “ǃgâi sîsenne” tae-e ǃkhōǂgā hâ?

 ǀHAOHÂB hui-aob asets ga nēsi ǃoaba, ots ge ǀnîsi ǃgarise ge sîsen îts ǂhâbasa ǀgauba ūhâ tsî ǀhaohâb ǃûi-ao kai. Nē ‘ǃgâi sîsen-ets’ ra sīǃnâ ǂgao?—1Tim. 3:1.

² ǀHaohâb ǃûi-aob sîsen-e tae-e ǃkhōǂgā hâ? ǁÎb ge ǃgâi aiǁgausa aoǁnâ sîsenni ǃnâ ǁgau, ǃgâsana gagasise ǂkhâǃnâ, ǁkhāǁkhā tsî ǁîn di ǂgomsa Jehovab ǃnâ ra ǀgaiǀgai mî tsîb ra dī xūn ǃnâ-ū. ǁNās ǃaromas ge Elobmîsa ǃgarise ra sîsen ǀhaohâb ǃûi-aoga “mādi” ase ra ǁguiǃā.—Efe. 4:8.

3. ǃGâsaba tae-e a dī ǁkhā îb ǀhaohâb ǃûi-aose ǃoaba? (1 Timoteub 3:​1-7; Titub 1:​5-9)

³ ǃGâsaba tae-e a dī ǁkhā, îb ǀhaohâb ǃûi-aob ase ǃoaba? ǀHaohâb ǃûi-aob ase ǃoabas ge sîsenne hōs ǀkha ǀgui tama hâ. ǃNāsa ǁaebats ga sîsen-e ôa, ots ge ǁnā sîsenni ǂansa nî ūhâ. ǀHaohâb ǃûi-ao kais ge ǁnāsa xu ra ǀkhara xawe ǀhaohâb ǃûi-ao kaits ga ots ge ǁkhāǁkhās tamas ka io aoǁnâs xa ǃnāsa ǂansa nî ūhâ. ǀHaohâb ǃûi-ao kai ǂgaots ga ots ge Elobmîs ǃgaoǃgaodi hîna 1 Timoteub 3:​1-7; Titub 1:​5-9 ǃnâ hâ te nî sīǃnâ. (Khomai re.) Nē ǁkhāǁkhāǃâs ǃnâ da ge saorase ǀhaohâb ǃûi-aogu nî ūhâ ǀgauga nî ǃhoaǃgao: Nēs ge ǃgâi ǀonsa ǀhaohâb ǂganaga tsî ǃauga dībasens, matib omaris danab ase aiǁgause nî ī tsî tae-i a huibi ǁkhās îb ǃgâiaǂgaob ǀkha ǀhaohâba kōǃgâ.

 ǃGÂI ǀONSA DĪBASEN

4. ‘ǂNao-osisa’ tae-e ra ǂâibasen?

⁴ ǀHaohâb ǃûi-ao kai ǂgao ra ǃgâsab ge nî ‘ǂnao-o’ tsî ǃgâi ǀonsa nî ūhâ ǀhaohâb ǃnâ, ǁîb ǃgâi tanisens ǃaroma tsî tā ǃaroma-e nî ūhâ ǁîba tsū xū-e ǂgari-amsa. ‘ǁÎb ge hoaraga ǀhûhâsib khoen xa nî ǃgôahe.’ ǂGomoǃgân ge sa Xristeǁî ǂgomsa a mîǁgaiǁgai ǁkhā xawen ge tā ǃgâi ǃaroma-e nî ūhâ sa ǂgomǂgomsasib tsî tanisensa dîsens ǃnâ mâisa. (Dan. 6:​4, 5) Dîsen re, ‘ǃgâi ǀonsa ta ǀhaohâb tsî ǀhûhâsib ǃnâs tsîna ūhâ?’

5. Matits a ǁgau ǁkhā “ǃgâin ǀguinats a ǀnam” ǃkhaisa?

⁵ ‘Naun ǃnâts ge ǃgâin’ ǀguina ra ôa tsî ǁîna ra koa ǁîn ǃgâi ǀgaugu ǃaroma. ǃGâiaǂgaos tsînats ge ra hî xūnats ga nauna dība o, khoe-i ǃâubasen tamana. (1 Tes. 2:8) Nē ǀgauba mati ǀhaohâb ǃûi-aogu ǃaroma a ǂhâǂhâsa? ǁÎgu ge ǃnāsa ǁaeba ra sîsenū ǀhaohâb, ǃgâsan tsî ǁîgu ǁgaumâidi tsîna kōǃgâsa. (1 Pet. 5:​1-3) Matikōse i ga sîsen-e ǂgui xawe gu ge ǃgâiaǂgaob ǀkha nauna ra hui.—ǃNǃkh. 20:35.

6. Mâ ǀnî ǀgaugu ǃnâts “ǃhaokhoeǃkhōǃoaxasiba” a ǁgau ǁkhā? (Heb. 13:​2, 16; ai-īsiba mû re.)

⁶ ‘ǃHaokhoeǃkhōǃoaxasibats’ ge ra ǁgau naunats ga ǃgâi xūna dība o, sa ǀgū ǀhōsan ǃauga hân tsîna. (1 Pet. 4:9) ǀNî ǁnaeǁgaus ge ǃhaokhoeǃkhōǃoaxa-aoba saorase ra ǁguiǃā: “ǁÎb oms dao-ams tsî ǁîb ǂgaob ge mâ ǃhaokhoe-i hoa-i ǃaroma nî ǁkhowa-amsa.” Dîsen re, ‘ǃhaokhoeǃkhōǃoaxasiba ta ra ǁgau, ti ǀhaohâba ra sari khoe-i ǃoagu?’ (Khomai re Hebreǁîn 13:​2, 16 sa.) ǃHaokhoeǃkhōǃoaxa-aob ge ǃgâin ǀguina sari-aon ǃoagu ra ǁgau. Aiǁgause, ǀgâsa khoen, sari hâ ǃhoa-aob tsî naun ǃgarise sîsen tsî ǃgâsana ra ǂkhâǃnân, ǃnārimâra mûǂam-aob tsî ǁîb taras khami.—Gen. 18:​2-8; ǂKhm. 3:27; Luk. 14:​13, 14; ǃNǃkh. 16:15; Rom. 12:13.

7. Matib ǀhaohâb ǃûi-aoba “mariǃgunuxa” tamab hâsa ra ǁgau?

⁷ “Tā nî mariǃgunuxa.” Mari-i tsî ǃhūbaib xūn tsîn ge tā sa ûib ǃnâ nî ǂhâǂhâsa. Nēsits ga ǃkhū tamas ka io ǀgâsa xawets ge ǂgurose Gaosiba sa ûib ǃnâ nî mâi.  (Mat. 6:33) Sa ǁaeb, ǀgaib tsî nau xūn tsînats ge ra sîsenū îts Jehovaba ǃoaba, sa omaris tsî ǀhaohâb tsînats ge ra kōǃgâ. (Mat. 6:24; 1 Jhn. 2:​15-17) Dîsen re: ‘Tita mari-e mati ra mû? ǂKhî i ta a ū ta hâ xūn ǀkha? ǃNāsase ta mari-i tsî ǃhūbaib xūn tsîna ra ūhâ ǂgao?’—1 Tim. 6:​6, 17-19.

8. Mâ ǀgauga ra ǁgau sats “ǃnomsa” tsî a “ǁkhaesenxasa”?

⁸ “ǃNomsa” tsîts ga “ǁkhaesenxa” ots ge ǃgâi mîǁguiga a dī ǁkhā. Aiǁgause nēs ge kaise ǂû, ā tsî ana ǀgaub tsî dīts ra xūn hoana ǃoa ra ǁnaeǁgau. Sats ge nē ǃhūbaib khoen ra dī xūn hîna Jehovaba ǃoaba tamana ǁgae tama. (Luk. 21:34; Jak. 4:4) ǃNomsasets ge ra hâ nau khoen ga ǃgâi tama ǀgaub ai sats ǀkha hâ xawe. Sats ge ‘ǀgaisa ā-ao tide’ tamas ka ion ge khoena kai ā-aots ase tā nî ǂan tsi. Dîsen re, ‘ûi ta ra ǀgauba ra ǁgau, ǃnomsa tsî ta ǁkhaesenxasa?’

9. “Gā-ai ǂgaoba ūhâ” tsî ‘ǃgâise aiǂhumisas’ tsîna tae-e ǃkhōǂgā hâ?

⁹ Sats ga “gā-ai ǂgaoba ūhâ,” ots ge ǂōrisase Elobmîs ai ǃgaoǃgaosa daoǁgaude a sao ǁkhā. Sats ge ǃgamse nē Elobmîs daoǁgaudi xa ra ǂâi tsîs ge ǁnāsa gā-aisib tsî ǁnâuǃāb tsîna ūhâ. Tsîts ge ǃkhaese mîǁguiga dī tama hîna ǀoro ǂansa ūhâ ga. (ǂKhm. 18:13) ǀAmǂoas asets ge ǃgâi mîǁguiga nî dī, Jehovab di ǂâi ǀgauga ra ǁgauga. Sats ga ‘ǃgâise aiǂhumisa’ ots ge ǁaeb ais tsîna ra hâ. Sats ge ǂgomǃgâhe tsî daoǁgaude ra sao khoe-i ases tsîna a ǂansa. ǃHoaǃgao da go ǃgâi ǀgaugats ga ūhâ, os ge nēsa nî hui tsi îts ǃgâi ǀonsa ūhâ. Hā re î da nēsi ǀhaohâb ǃûi-aogu nî ūhâ ǀgauga ǃhoaǃgao, î gu ǃgâi aiǁgause omaris danagu ase ī.

OMARIS DANAB ASE ǃGÂI AIǁGAUSE Ī

10. Oms danaba mati ǁîb ‘omarisa ǃgâise’ nî kōǃgâ?

¹⁰ ǃGame-aots ga tsîts ga ǀhaohâb ǃûi-aob ase ǁgaumâihe ǂgao, os ge sa omaris tsîna ǃgâi aiǁgause nau khoen aiǃâ nî ī. ǁNās ǀkhab ge ǁîb “ommi ǂûba” nî ǂgaeǂgui hō. Nēs ge ra ǂâibasen sa omarisats ǀnamxaǃnâ ǀgaub ǃnâ kōǃgâ tsî ǁîna ǃgâi mîǁguiga nî dībasa. ǁNās tsîn ge ra ǂâibasen sa omaris ǀkha omaris ǃoabasa dī, aoǁnâ sîsenni ǃnâ ǁhao tsîts ǀhaodi tsîna nî hâǃnâsa. Nēsa tae-i ǃaroma a ǂhâǂhâsa? Apostel Paulub ge ge dî: “Khoe-i ga ǁî-i ommi ǂûba ǂgaeǂguisa ǀūo, mati i kha nî Elob ǀhaohâba ǂhansenba?”—1 Tim. 3:5.

11-12. Tae-i ǃaroma i ǃgâsab omaris tanisen ǀgauba a ǂhâǂhâsa ǁîb ga ǀhaohâb ǃûi-aob ase ǁgaumâihe ǂgao o? (Ai-īsiba mû re.)

¹¹ ǁGûb asets ge ‘ǀgôan xa ǃgôahe tsî nî ǁnâuǀnamhe.’ ǁÎnats ge ǀnamxaǃnâ ǀgaub ǃnâ nî ǁkhāǁkhā. ǂHâbats ge ra în ǁîna nau ǀgôan khami ǀhuru tsî âi. Xawets ge ǁîn tsîna nî ǁkhāǁkhā în ǁnâuǀnam tsi, nau khoena ǃgôasiba ǁgau tsî ǃgâi ǀgaub ǃnâ tanisen. Sats ge ǁgūtsâ tsî ǀgôana nî ǁkhāǁkhā în Jehovab ǀkha ǀgū ǀhōsagusisa omkhâi, Elobmîs ǂgaoǀkhādi ǃoagu ûi tsî ǁāǁnâs mîǁguiba dī.

¹² ‘ǁÎ-i ǀgôan ge nî ǂgomsabe tsî tā ǁnâuǀnamoǃnâ tsî ǁgauoǃnâ ûiba nî ūhâ.’ ǂGomsabe ǀgôa-i ga omaris ǃnâ ǀhapixa dī i go ǁore-i ǃaroma, ob ǁGûba nēs xa mati nî tsâǀkhāhe? ǁGaumâisa ǀgôa-i ǁāǁnâsa-i tamas ka io ǁāǁnâsa ra ǁgūba-i ga kai ǁoreba dī, o gu ǀhaohâb ǃûi-aoga nî mîǁgui nē ǃgâsab noxopa aiǃgû tsî ǀhaohâb ǃûi-aob tamas ka io hui-aob ase nî ǃoabasa. ǁGûb ga ǁnā ǀgôa-e ǁkhāǁkhā tsî ǁnama tama io, ob ge ǁnā ǁGûba  a ǀhaohâb ǃûi-ao kai ǁoa.—Oktoberi 15, 1996 ǃKhē xu ǂgō-ommi 21ǁî ǂhaweb ai, 6-7ǁî xoaǀgora ra mû re.

ǀHAOHÂBA KŌǃGÂ

13. Matits ‘tsamtsîǃnâxasiba’ ǁgau ǁkhā ‘ǂnīsase tsâsens’ ose?

¹³ ǃGâsagu hîna ǃgâi xristeǁî ǀgauga ūhâ gu ge kai huib ase ǀhaohâb ǃnâ ī. ‘Tsamtsiǃnâ-aogu’ ge ǂkhîba ǀhaohâb ǃnâ ra aiǃgû kai. Tsamtsiǃnâ khoe-i ge nauna ǂōrisase ǃgâ tsî ǁîn ra tsâ ǀgaub tsîna ra ǁnâuǃā. Aiǁgause, ǀhaohâb ǃûi-aogu ga Elobmîs ai ǃgaoǃgaosa mîǁguiga dī, ots ǁnā daoǁgaute nî sao? ‘ǂNīsase tsâsens’ ge ra ǂâibasen, sa ǀgaugats nau khoen di gu ǂam-ai ǁgariǁnâ tamasa. ǂHâǂhâsa i ge a nau khoen di ǀapemāde ǃgôaǃgâ tsî ǃgâsa. (Gen. 13:​8, 9; ǂKhm. 15:22) Sats ge “ǃkhamxa” tamas ka io ‘ǃhaese ǁaixa tide.’ Nēs ge ra ǂâibasen sats khoena ǃgôasiba ǁgau tsî ǂkhāba tamasa xawe ǁîn ǃoagu a ǃgâisa. ǂKhîxaǃnâ khoe-i ge ǃgarise sîsen tsî ǃgom ǁaegu ǃnâ ǂkhîba ra kuru. (Jak. 3:​17, 18) Sa ǃgâi mîdi ge mâǃoa-aon tsîna nî ǃnomsa kai ǁkhā.—ǂHǂh. 8:​1-3; ǂKhm. 20:3; 25:15; Mat. 5:​23, 24.

14. “ǂGoms ǃnâ kaise ǀasa” tsî ‘ǂgomǂgomsase hâs’ tsîna tae-e ra ǂâibasen?

¹⁴ ǃGâsab hîna ǀhaohâb ǃûi-aob ase nî ǁgaumâiheb ge “ǂgoms ǃnâ kaise ǀasa tide.” ǂGui kurinats ga ǁāǁnâhe tama ī xawets ge ǁaeba ǂhâhâ sa ǀhōsagusisa Jehovab ǀkha ǀgaiǀgaisa. Îts ǁkhāǁkhāsen matits Elobmîsa a sîsenū ǁkhāsa ǃgâi mîǁguiga dīs ǃaroma. Jesub khamits ge ǃgamǃgamsenxa tsî māsenxase Jehovaba nî ǃoaba. Sats ge ǃnūǃnâxa tsî nî ǃâu Jehovab ǃnāsa ǁgaumâide ǀhaohâb ǃnâ nî mā tsisa. (Mat. 20:23; Fil. 2:​5-8) ǁGauts ge nî ‘ǂgomǂgomsasets’ Jehovab ǁgaragu ǃoagu ra ûisa tsîts ǁîb ǀapeǂhumisa ra mā daoǁgaude ra saosa.—1 Tim. 4:15.

15. ǂHâbasa-e ǀhaohâb ǃûi-aob ǃgâi ǃhoade nî māsa? ǁGuiǃā re.

 ¹⁵ Xoadi ge ǃgāsase ra mî, mûǂam-aogu “ǁkhāǁkhās ǂansa nî ūhâ” ǃkhaisa. Nēsa ra ǂâibasen ǃgâi ǃhoadets nî māsa? Hî-î. Hoa ǀhaohâb ǃûi-aogu ge ǃgâi ǃhoade mā tama. Xawe gu ga aoǁnâ tsî ǃgâsana gagasise ǂkhâǃnâs ǃaroma sari o gu ge ǁnāsa ǃgâi ǀgaub ǃnâ nî dī Elobmîsa ra sîsenūse. (1 Tim. 3:2; ǀgopeǀnō re 1 Korinteǁîn 12:​28, 29 tsî Efeseǁîn 4:11 sa.) ǃHoa-ao tamats ga ī xawes tsînats ge nî aiǃgû ǁnāsa dīsa, îts ǃgâi ǁgauǃnâ-ao kai. Matits a ǃgâi ǁgauǃnâ-ao kai ǁkhā?

16. Matits a ǃgâi ǁgauǃnâ-ao kai ǁkhā? (Ai-īsiba mû re.)

¹⁶ “ǃGâiǂhôas ǃnâ ǀgaisase tsî ǁaposase nî ǂgom.” ǃGâi ǁgauǃnâ-ao kai ǂgaots ga, ots ge nî kōǃgâ î-i sa ǃgâsanats ra mā ǀapemāde Elobmîs ǀkha ǃgûǀhao. Nēsa dīs ǃaromats ge Elobmîs tsî ǁîs ai ǃgaoǃgaosa ǂkhanina nî ôaǃnâ. (ǂKhm. 15:28; 16:23) Ôaǃnâtets ra dī khami ǃgaoǃgao re, matits Elobmîs ai ǃgaoǃgaosa ǂkhanina a sîsenū ǁkhā ǀgauba. ǃGarise dītsâ în khoena Jehovaba ǀnam tsî ǃnāsase ǁîna ǂkhâǃnâ re în ǁkhāǁkhāsenan go xūna ûiǂui. ǃGâi ǁgauǃnâ-ao kai ǁkhāts ge a ǃnāsa ǂansa ūhâ ǀhaohâb ǃûi-aogu aits ga huiba ǂgan o. (1 Tim. 5:17) ǀHaohâb ǃûi-aogu ge ǃgâsana nî “ǂkhâǃnâ” xawe ǀnî ǁaegu ai ǁîna nî “ǂgōǀau.” Nēsa gu ga dī, o gu ge ǀhaohâb ǃui-aoga khoexaǃnâ ǀgaub ǃnâ nî dī. Tsaura, ǀnamxaǃnâ tsîts ga sa ǁkhāǁkhāsa Elobmîs ai ǃgaoǃgao, ots ge ǃgâi ǁgauǃnâ-aob Jesuba ra ǁgae.—Mat. 11:​28-30; 2 Tim. 2:24.

AIǃGÛ I ǃEREAMXASIBA ǁGŪBA

17. (a) Tae-e ǀhaohâb hui-aoga a hui ǁkhā î gu aiǃgû ǁgaumâide ǁgūbasa? (b) ǀHaohâb ǃui-aoga tae-e ǂâis ǃnâ nî ūhâ ǃgâsaba gu ga ǀhaohâb ǃûi-aob ase ǁgaumâi ǂgao o? (“ ǃGâi mûǂuiba ūhâ ǃgâsaba go ga ǀhaohâb ǃûi-aob ase ǁgaumâi” ti hâ boksisa mû re.)

¹⁷ ǀNî ǀhaohâb hui-aogu ge ra tsâ ǁîgu  tātsē ǀhaohâb ǃûi-aob ase ǁgaumâihe tidesa. ǁÎgu ge ra tsâ ǀnî hâ ǂgui ǀgauga gu nî omkhâisa i gu ǁnā ǁgaumâisa hō. Xawe ǂâis ǃnâ ūhâ re Jehovab tamas ka io ǁîb ǀapeǂhumis ge ǃâubasen tama hâ îts nē ǀgauga ǀoasase ǁgauǂui. (1Pet. 2:21) Jehovab ǃanu gagab ge nî huitsi nē ǀgauga omkhâis ǀkha. (Fil. 2:13) Sîsenǂam ǂgaots ra ǀgaubats ūhâ? Jehovab ǃoa ǀgore. ǁNāts ra omkhâi ǂgao ǀgaub xa ôaǃnâsa dī tsî ǀhaohâb ǃûi-aogu di ǀguib ai huiba ǂgan ǁnāsa sîsenǂuis ǃaroma.

18. Hoa ǀhaohâb hui-aoga tae-e ra ǂkhâǃnâhe?

¹⁸ Hā re î da hoa da aiǃgû tsî nē ǁkhāǁkhāǃâs ǃnâ go ro ǃhoaǃgoahe ǀgauga omkhâi, ǀhoâhâb ǃûi-aogu tsîna ǃkhōǂgā hâse. (Fil. 3:16) ǀHaohâb hui-aob asets ra ǃoaba? Aiǃgû tsî ǀgauga ôa ǁnā mîǁguiba sīǃnâsa. Jehovaba ǂgan îb huitsi ǁîba ǃoaba ǀgara tsî ǀhaohâb ǃnâ ǃnāsa-e dīsa. (Jes. 64:8) Jehovab ge dīts ran hoan ǃnâ nî ǀkhae tsi îts ǀhaohâb ǃûi-aob ase ǁgaumâihesa sīǃnâ.