1. Tae-i ǃaromas Jesub di ǁōb ǂâiǂâisensa ǂhâǂhâsa tsē kurib ǃnâ? (Lukab 22:​19, 20)

 JEHOVAB khoen ǃaroma î ge Jesub ǁōb ǂâiǂâisensa, kaise ǂhâǂhâsa tsē kurib ǃnâ. Jesub ge ǁîb ǁkhāǁkhāsabena ge mîba în nē tsēsa tsēdī. (Khomai re Lukab 22:​19, 20 sa.) Jesub ǁōb ǂâiǂâisensa ǃoa da ge ra mûǂûi, ǃkharagagu ǃaroma di ǃgao. Hā re î da ǁnā ǃaromade ǃhoaǃgao.

2. Tae-i ǃaroma da Jesub di ǁōb ǂâiǂâisensa ǃoa ra mûǂui?

² Jesub ǁōb ǂâiǂâisens ge ra huida, î da ǂâiǃgâ matis xoremarib ǁguibasa ǂhâǂhâsa ǃkhaisa. Tsî ǀkhaegu hîna ǁnās xa ra ǃaromahe gu tsîna. ǁNā tsēs ge ǀgaugu xa ra hōhōǃnâ da, Jesuba da ǁîb ǁguibas ǃaroma ǃgôaǃgâsiba a ǁgau ǁkhāga. (2Kor. 5:​14, 15) ǁNā tsēs ge ǃēsa ra mā da, î da sida ǃgâsan ǀkha “ǂgaoǂgaoǃnâgu” tsî ǂkhâǃnâgu. (Rom. 1:12) Mâ kurib hoaba î ge amab ǃnâ ǃkhai tsî hâbē hâ ǃgâsana nētsēsa ra hâǃnâ. Jesub di ǁōb ǂâiǂâisens tawan hārase ra ǁkhoreǁharehe ǃkhais ǃaroman ge ǀnîna ge ǂkhâǃnâhe în Jehovaba ǃoa oaǀkhī. ǂGui khoen ge ǁnā tsēs ain ra mû tsî ǁnâu xūn xa ra ǂkhâǃnâhe în Elobmîsa ǁkhāǁkhāsen tsoatsoa. Nē xūn hoan ge ra ǃaroma îs Jesub ǁōb ǂâiǂâisensa sida ǃaroma kaise ǀō-aisa.

3. Jesub di ǁōb ǂâiǂâisensa ǃhūbaib ǂhawase hâ ǃgâsana mati ra ǀguiǃnâxa kai? (Ai-īsib tsîna mû re.)

³ Jesub di ǁōb ǂâiǂâisensa ǃoas tsîna da ge ra mûǂui, ǃhūbaib ǂhawase da ǁnā tsēs ai sida ǃgâsan ǀkha a ǀguiǃnâxasa da a ǂan amaga. Jehovab ǃoaba-aon ge ǃhūbaib  ǂhawase Jesub di ǁōb ǂâiǂâisens ǃaroma ra ǀhao, sores ǂgâs khaoǃgâ. Xoremarib ai a ǃgaoǃgaosa ǃhaosa ǃgâ tsî da ge ǀgam am ra ǁnae tsî pereb tsî xûi-i tsîna ra mā ǃkharu. Haga ǀgoredi khaoǃgân ge khoena ǂgaoba xu “amen” ti ra mî. ǃHūbaib ǂhawase i ge hoa ǀhaohâga ǁkhā xū-e ra dī. Mûnanai re Jehovab tsî Jesub tsîkha ga mû o, mati da ǀguiǃnâxase ǀhao tsî koasa ra māsa.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Nē ǁkhāǁkhāǃâs ǃnâ da ge saora dîde nî ǃhoaǃgao: Mati da sida ǂgaoga nî aiǂhumi Jesub di ǁōb ǂâiǂâisens ǃgao? Mati da nauna nî hui în ǃgâiba ǀama? Mati da amab ǃnâ ǃkhai hâna a ǂkhâǃnâ ǁkhā? Nē dîdi ǃereamdi ge nî huida î da nē ǂhâǂhâsa tsēs ǃaroma aiǂhumisa.

MATI DA SIDA ǂGAOGA JESUB DI ǁŌB ǂÂIǂÂISENS ǃAROMA AIǂHUMI ǁKHĀ?

5. (a) Tae-i ǃaroma da xoremarib ǂhâǂhâsasiba nî ǂâiǃgâ? (Psalmdi 49:​7, 8) (b) Jesuba tae-i ǃaroma ge ǁō? ti ǀon hâ vidioba xu du tae-e ra ǁkhāǁkhāsen?

⁵ ǀGui ǂhâǂhâsa ǀgaub sida ǂgaoga Jesub di ǁōb ǂâiǂâisens ǃaroma aiǂhumis ge, Jesu Xristub xoremari ǁguibas xa ǂâiǃgâsa. Aitsama da ge tātsē ǁōb tsî ǁōreba xu ga ǃnora kaisen ǁoa hâ. (Khomai re Psalmdi 49:​7, 8 sa; Jesuba tae-i ǃaroma ge ǁō? ti ǀon hâ vidioba kō re.) a ǁNā-amagab ge Jehovaba xū-e ge dī îb Jesuba ǁîb ûiba mā tsî sida ûiba sâu. Jehovab tsî Jesub tsîkha hoakha ge kai ǁguibasa ge dī. (Rom. 6:23) Jehovab tsî Jesub tsîn ge dī ǁguibas xa da ǃnāsase ra ǂâiǃgâ khami da ge ǃnāsase xoremariba nî ǃgôaǃgâ. ǀNî ǃgom xūn ge Jehovab tsî Jesub tsîn ge māsenxase a dīna da ge nî ǃhoaǃgao, Xawe ǂgurose xoremariba taena ge ǃkhōǂgā hâ i?

6. Xoremariba tae-e ǃkhōǂgā hâ?

⁶ Xū-e ǁama-oas ǃaroma ra matare-e maris ge xoremarib ase ǂansa. ǂGuro khoeb Adammi ge ǀoasa kurusa ge ūhâ i xaweb ge ǁoreb ge o ǀamo ûiba ge ǂoaǃnâ. ǁÎb ǃaromas ǀguis ose xawe ǁîb ǀgôan hoan ǃaromas tsîna. Adammi ge ǂoaǃnâ xū-e ǁama-oas ǃaromab ge Jesuba ǁîb ǀoasa ûiba ge mā. ǃHūbaib aib ge hâ i, ob ge Jesuba ‘ǁore-i xare-e ge dī tama hâ i tsî ams âba xu i ge gāxaǃnâsi-i xare-e ge ǂoaxa tama hâ i.’ (1Pet. 2:22) ǁŌb ge o i ge Jesub ûib tsîna Adammi ûib khami ge ǀoasa i. ǁÎb ge tātsē ge ǁore tama hâ i, ǁîb ûiba ǁguibas ǃnâ-ūb ge Jesuba Adammi ge ǂoaǃnâ ûiba ge matare-oa.—1Kor. 15:45; 1Tim. 2:6.

7. ǃHūbaib aib ge Jesuba mâ ǃâitsâna gere ǃkharuǃnâ?

⁷ Jesub ge ǀoasase ǁîb ǀhomsi ǁGûba gere ǁnâuǀnam, ǂgui ǃgomsinab ge ǃhūbaib ai gere hōǃâ xawe. Jesub ge ǀoasa kurusa ge ūhâ i xawe ra ge ǁîb ǁgûra ǀoasa kurusa ge ūhâ tama hâ i, xaweb ge ǁîra noxopa gere ǁnâuǀnam. (Luk. 2:51) ǂKham ǀgôab aseb ge Jesuba ǁnâuǀnamxa tamas ka io ǂgomǂgomsase hâ ǀgaras ǁgâib tsîna gere hōǃâ. Kai khâib gere ob ge ǁGâuaba, Jesuba gere ǃâitsâ îb ǁore tsî Elob ǃoa ǂgomǂgomsase hâ ǀû. (Mat. 4:​1-11) ǁGâuab ge ǁkhāb an hoana gere dītsâ, îb Jesuba ǁōre kai tsî tā xoremariba matare.

8. Mâ ǀkhara ǃâitsân ǃnâb ge Jesuba mâǀgai?

⁸ ǃHūbaib aib gere dī aoǁnâ sîsenni ǃnâb ge Jesuba ǂgui ǃâitsâga gere hōǃâ. ǁÎb khākhoen ge ǁgâiǀābi tsî gere ǃgambi  ǂgao. (Luk. 4:​28, 29; 13:31) ǁÎb saosaben ǂkhabusasigu tsînab ge gere tani. (Mrk. 9:​33, 34) ǁÎb ûib gere ǀgoraǃgâhe ǁaeb ǃnâb ge tsûtsûhe tsî gere ǃhōhe. ǁNāpaxub ge ǃgam-ao-i khami ǃgâuhe tsî kaise tsûtsûsa tsî taoxa ǀgaub ai ge ǁō. (Heb. 12:​1-3) ǀUniga ǃâitsâbab ge ǀguri ge mâǃkharu, Jehovab xa ǁkhaubahe tamase. b—Mat. 27:46.

9. Mati da Jesub ǁguibas xa ra tsâ? (1 Petrub 1:8)

⁹ Ama as ge, Jesub ge ǂgui xūna ge ǃkharuǃnâ ib xoremariba matare. Jesub ge māsenxase a dī ǁguiba di hoa di xa da ga ǂâiǃgâ, o i ge sida ǀnammi ǁîba da ūba hâba ra ǀgai.—Khomai re 1 Petrub 1:8 sa.

10. Jehovaba tae-e xoremarib ǃaroma ge mā?

¹⁰ Jehovaba māsenxase tae-e ge ǁguiba, îb Jesuba xoremariba matare? Jehovab tsî Jesub tsîn ge kai ǀnamma ūba gu hâ, ǀgôab tsî dadasab ǁaegu a hâ ǁkhāba. (ǂKhm. 8:30) ǂÂi re matikōseb ge Jehovaba tsâǀkhāhe hâ isa, Jesub ge ǃhūbaib ai gere hōǃâ ǃgomsinab gere mû o. Kaiseb ge gere tsûaǂgao.

11. Aiǁgau-e mā re matib ge Jehovaba gere tsâsa, Jesub ge ǃgamhe o.

¹¹ ǀGôa-e ǁōb ǃnâ ǂoaǃnâ hâ ǁgû-i ge ǃgâise a ǂan, ǀgôa-e ǂoaǃnâs ra hau ǃoab tsâsiba. ǀGaisa ǂgomsa da ge khâis ǃnâ ūhâ, xawes ge ǁnāsa khoe-i ga ǁō, o da ra hōǃâ tsûba ūbē tama. Nē aiǁgaus ge ra huida î da ǁnâuǃā Jehovab ge mati gere tsâ ǃkhaisa, ǁîb ǀnamǀnamsa ǀgôab ge 33ǁî kuri tsâ tsî a ǁōsab ge mû o. c—Mat. 3:17.

12. Tae-e da Jesub di ǁōb ǂâiǂâisens aiǃâ hâ wekhegu ǃnâ a dī ǁkhā?

¹² Jesub di ǁōb ǂâiǂâisensa du ǃâuhâ ǁaeb ǃnâ, Elobmîsa aitsama ôaǃnâ tamas ka io omaris ǃoabas ǃnâ ǃnāsase xoremarib xa ǁkhāǁkhāsen re. Ôaǃnâs ǀkha ra hui ǂkhanib Jehovab ǃoaba-aon dib (sadu gowab ǃnâ i ga hōhe ǁkhā o) tamas ka io nau ǁkhāǁkhāsen ǂkhanina sîsenū re xoremariba ôaǃnâ ǃgao. d Elobmîs khomai ǃâdi ǀapeǁguib hîna sida Xristeǁî ûib tsî aoǁnâ sîsenni—sîsen ǂkhanib ǃnâ hâba khomai re. Jesub di ǁōb ǂâiǂâisens tsēs ai tā ǀuru re ǀō-aisa ǁgoas ǃoabasa kēsa.  Sida ǂgaoga da ga Jesub di ǁōb ǂâiǂâisens ǃaroma aiǂhumi, o da ge nauna a hui ǁkhā în nēsa xu ǃgâiba ǀama.—Esr. 7:10.

NAUNA HUI ÎN ǃGÂIBA ǀAMA

13. Tae-e da ǂgurose nî dī, î da nauna hui în Jesub di ǁōb ǂâiǂâisensa xu ǃgâiba ǀama?

¹³ Mati da nauna a hûi ǁkhā în Jesub di ǁōb ǂâiǂâisensa xu ǃgâiba ǀama? ǂGurose da nî dīs ge ǁîna ǁkhauǂuisa. Aoǁnâ sîsenni ǃnâ da ra ǀhao-ū khoen tsî ǁkhau ǂgao da ra khoen di ǀonde da ge nî xoamai. ǁNās ge sida omaris, sîsenū da ra khoen, skol ǀhōsan tsî ǂan da a khoen tsîna ǃkhōǂgā hâ. ǁGâisa ǁkhauǂui ǂkhiniga da ga ūhâ tama i xawe da ge internets linkna a sîba nî ǁkhā. Buru da ge nî matikō khoen ǁkhauǂui da ran Jesub di ǁōb ǂâiǂâisensa nî hâǃnâ ǁkhā ǃkhaisa.—Aoǁn. 11:6.

14. Khoe-e aitsama ǁkhauǂuis ūhâ ǀgaiba ǁguiǃā re.

¹⁴ Khoe-e du ga aitsâma ǁkhauǂui, os ge ǁnāsa ra supu ǁî-e Jesub di ǁōb ǂâiǂâisensa hâǃnâsa. ǀGui ǃgâsas ge kaise ge buru, ǁîs aob Jehovaba ǃoaba tamab ge mîbasi o Jesub di ǁōb ǂâiǂâisensab nî hâǃnâsa. Tae-i ǃaromas ge buru? ǃKharuge ǁaeb ǃnâs ge ǂgui ǃnāde ge ǁkhaubi xaweb ge ī tama ge hâ i, tae-e nē ǃnās ai ge ǀkhara i? “ǁGâisa ǁkhauǂuiba ta ge ge māhe” tib ge ge mî. ǁNā ǃās ǀhaohâb ǃûi-aob ge ge ǁkhauǂuibi tsîb ge ǁnāsa xu ǂgui kurina Jesub ǁōb ǂâiǂâisensa ra hâǃnâ.

15. Tae-e da ǂâis ǃnâ ra ūhâ ǂgao khoena da ga Jesub di ǁōb ǂâiǂâisensa ǃoa ǁkhau o?

¹⁵ ǂÂis ǃnâ da ge nî ūhâ ǁkhau da ra khoen ǀnîsi dîde nî ūhâsa, ǃgōsase ǂguro ǃnāsan ga sida ǀhaode hâǃnâ o. ǁÎn dîde ǃoa da ge ra mûǂui, ǁnā amaga da ge nî aiǂhumisen ǁîn dîde ǃereamsa. (Kol. 4:6) Aiǁgause ǀnîn ge ǀnîsi ra dîsen: ‘Tae-e ǁnā ǁāxasib tawa nî ī?’ ‘Matikō gaxuse i nî hâ?’ ‘Mâ sarana ta nî ana?’ ‘Hâǃnâs ǃaroma i mari-e ra matare-e?’ ‘Marina aohe i ra?’ Jesub di ǁōb ǂâiǂâisensa ǃoa da ga khoe-e ǁkhau, o da ge nî dî, “dî-e du  ūhâ?” ǁNāpaxu dîsa ǃeream. Jesub di ǁōb xa ǂâiǂâisen re tsî Tae-e gaosib ǀhû-omi tawa ra ī? ti ǀon hâ vidio kha da ge a sîsenū ǁkhā ǁîna huisa ǀhaodi mati ra dīhesa. Tsî da ge ǀAmosib kōse ǃgâiaǂgao re ti ǀon hâ ǂkhinis di 28ǁî ǁkhāǁkhāǃâsa sîsenū tsî ǁîn ǀkha xūna nî ǀgoragu.

16. Jesub di ǁōb ǂâiǂâisensa ra hâǃnâna mâ dîde a ūhâ ǁkhā?

¹⁶ Jesub di ǁōb ǂâiǂâisens khoaǃgân ge ǀasase ǃgâiǃgâibasensa ūhâna dîna a ūhâ ǁkhā. ǀNîsin ge ra ǂhâ, tae-i ǃaroma i ge ǀoro khoen tamas ka io ǀgui khoe-i tsîna xûi-e xu ā tsî pere-e ǂû tama hâ isa. ǀNîsin ge ra ǂhâ matikō ǃnāde da Jesub di ǁōb ǂâiǂâisensa ra tsēdīsa. Tsîn ge ǀnîsi nî ǂan ǂgao, Jehovab ǃoaba-aon ǀhaodi ǁkhā ǀgaub ǃnâ ra dīhesa. ǃNāsa dîdi Jesub di ǁōb ǂâiǂâisens ǃhoas ǃnâ ra ǃeream-e xawe î ge ǂguro ǃnāsa ra ǀkhīna ǃnāsa ǃgāsasiba nî ǂhâba. “Why Do Jehovah’s Witnesses Observe the Lord’s Supper Differently From the Way Other Religions Do?” ti hâ khomâiǃâs jw.orgs ai hâs ge huida ǁkhā, ǀnî dîde ǃereamsa. ǁKhā da a-i hoa-e da ge ra dītsâ Jesub di ǁōb ǂâiǂâisens aiǃâs, Jesub di ǁōb ǂâiǂâisens ǁaeb tsî ǁnās khaoǃgâs tsîna “ǀamo ûib ǃaroma ǂgaimâisana” huisa în ǃgâiba ǀama.—ǃNǃkh. 13:48.

AMAB ǃNÂ ǃKHAI TSÎ HÂBĒ HÂNA HUI

17. ǀHaohâb ǃûi-aoga amaba xu hâbē tsî ǃkhai hâna mati a hui ǁkhā? (Esegieli 34:​12, 16)

¹⁷ Jesub di ǁōb ǂâiǂâisens ǁaeb ǃnâ gu ǀhaohâb ǃûi-aoga mati ǃkhai hâna hui ǁkhā? ǁÎna du ǀnam ǃkhaisa ǁgau re. (Khomai re Esegieli 34:​12, 16 sa.) Jesub di ǁōb ǂâiǂâisens aiǃâ dītsâ, î du ǁkhā du as kōse ǂgui khoena ǁkhau. ǁÎna mîba, tsâba nî du ra ǃkhaisa tsî ǁkhā du a ǀgaugu ǃnâ du ra hui nî ǂgaosa. ǁÎna ǁkhau în Jesub di ǁōb ǂâiǂâisens ǁaxasiba hâǃnâ. ǁNāpan ga sī o, hārase ǁkhoreǁhare nî re. Jesub di ǁōb ǂâiǂâisens khaoǃgâ ǁîna sari tamas ka io bel tsî gagasi huiba mā re. ǁÎn ge Jehovab ǃoa oaǀkhīs ǂhâsiba ūhâ.—1Pet. 2:25.

18. Mati da hoada ǃkhai hâna hui ǁkhā? (Romeǁîn 12:10)

 ¹⁸ ǀHaohâb ǃnâ hân hoan ge amaba xu hâbē tsî ǃkhai hân Jesub di ǁōb ǂâiǂâisensa ra hâǃnâ na a hui ǁkhā. Mâ ǀgaub ǃnâ? ǁÎna ǀnammi tsî ǃgôasib ǃnâ hâ-ūs ǀkha. (Khomai re Romeǁîn 12:10 sa.) ǀNîsi i ge ǁîna ge ǃgomba i ǀhaode ǃoa oaǀkhīsa. ǀNîsin ge gere ǃao ǃgâisen ǃkhōǃoahe tidesa. e ǁNā-amaga tā ǁîna nî tao kai dîn tsî mîna mî. (1Tes. 5:11) Nē ǃgâsan ge Jehovaba sida ǀkha ǀguiba ra ǃoaba. Kaise da ge ra ǃgâiaǂgao ǁîn ǀkha ǁkhapa ǀguiba ǃoaba ǀhaosa.—Psa. 119:176; ǃNǃkh. 20:35.

19. Jesub ǁōb xa ǂâiǃgâsa xu da mâ ǀkhaega ra hō?

¹⁹ Kaise da ge ra ǃgôaǃgâ Jesub ge mîba da o, î da ǁîb ǁōb ǂâibasensa mâ kurib hoaba hâǃnâ. ǁNâuǃā dag e ra tae-i ǃaromas nēsa ǂhâǂhâsasa. Nēsa da ga dī, o i ge sida tsî nau khoen tsîna ǂgui ǀgaugu ǃnâ ǃgâiba ra hō. (Jes. 48:​17, 18) Jehovab tsî Jesub tsîna da ūba hâ ǀnammi ge ra ǀgai. ǁÎkha ge dība da xūna da ra ǃgôaǃgâ ǃkhaisa da ge ra ǁgau. Sida ǃgâsan ǀkha da ūhâ ǀhōsagusisa da ge ra ǀgaiǀgai. Tsî da ge naun tsîna ra hui în ǁkhāǁkhāsen, matin xoremarib xa ra īǁkhā kaihe ǀkhaeba xu ǃgâiba ǀama ǁkhāsa. A da ǁkhā da a-i hoa-e dī tsî Jesub di ǁōb ǂâiǂâisensa aiǂhumisenba. ǁNā tsēs kurib ǃnâ kaise ǂhâǂhâsa amaga.