1-2. Mâ ǃgomsinan Jehovab di ǂgomǂgomsa ǃoaba-aona ra hōǃâ?

 ǁGAI XŪN hîna sida ûib ǃnâ ra īn ge sida ûiga ǃhae ǁaeb ǃnâ a dawa ǁkhā. Aiǁgause, ǂgomǂgomsa ǃgâsab Luis a ti ǀon hâb ge kankersab ūhâ ǃkhaisa ge ǂanǂûi. ǀAeǃkhō-aob ge ge mîbabi ǀoro ǁkhân ǀguinab ūhâsa ûib nîse. Monikas tsî ǁîs aob tsîn ge ǀguiba Jehovaba gere ǃoaba. Xawes ge ǀguitsē Monikasa ge ǁnâu, ǁîs aob hîna a ǀhaohâb ǃûi-aob ǀgamǃnâgu ûiga gere ûisa. ǃGamme tama ǃgâsas Olivia ti ǀon hâs ge, ǁîs omsa xu nî ǂoa ge īs ge ǀgaisa ǂoas tsî ǀnanus gere ǀkhī amaga. Xawes ge oaǀkhī, os ge ge mû ǀgaisa ǂoas tsî ǀnanus ge ǁîs omsa dīkākāsa. Luisi, Monikas tsî Olivias di ûigu ge ǃkhaeǁaeb ǃnâ ge dawa. Sadu tsîna nēti-i ǁgai xū-i hîna ge sadu ûiga dawa-e hōǃâ tsâ hâ?

² ǂGomǂgomsa ǃoaba-aon Jehovab din tsîn ge ǃgomsina hōǃâ tsî ra ǀaesen nau khoen khami. ǁNās ǂam-ais tsînan ge ra mâǀgai Eloba ǃhui hâ khoen xan ra mâǃoahe tamas ka io ǁgâiǀa-e amaga. Jehovab nēti-i ǃgomsin sida ǀkha nî īsa ǁkhae tama xaweb ge ra mîmâi huidab nî ǃkhaisa. (Jes. 41:10) ǁÎb ǂkhâǃnâs ǀkha da ge sida ǃgâiaǂgaoba ǃkhōǀgara tsî ǂgomǂgomsase ǁîb ǃoagu a hâ ǀgara ǁkhā, ǃgom ǁaegu ǃnâ. Nē ǁkhāǁkhāǃâs ǃnâ da ge haka ǀgaugu, Jehovab ǃgom ǁaegu ǃnâ nî hui da ga nî ǃhoaǃgao. ǃHoaǃgaos tsîna da ge nî di tae-e da ǂhâhâsa, î da Jehovab ra mā da huiba xu ǃgâiba ǀama.

 JEHOVAB GE NÎ ǁKHAUBA TSI

3. ǃGomsina da ga hōǃâ, o da tae-e dīs xa a ǃgombahe ǁkhā?

³ ǃGomsib. Kaise i ge a ǃgom ǃgāsase ǂâi tsî mîǁguiga dīsa, ǃgomsina da ga hōǃâ o. Tae-i ǃaroma? Tsûaǂgao tsî da ra ǂâiǂhansen amaga. Kā tsî da tae-e saorase nî dīsa a ǀū khami da ge a tsâǁkhā. ǃGaoǃgâ re aisi da goro ǃhoaǃgao ǃgâsara ge mati gere tsâsa ǁîra ǃgomsigu ǃnâ. Olivias ge ra mî: “ǀGaisa ǂoas tsî ǀnanus ge ti omsa dīkākā, o da ge ǀhomaxa tsî kā hâse gere tsâ.” Monikas ge aosab ge dī xū-i xa saorase ra mî: “Kaise ta ge ge tsûhâ ihoe-i ti ǂgaoba gôab ǀkha ra ǃkhā khama ta ge gere tsâ. Kaise i ge ge ǃgom i tsēs hoasa ta ra dī xūna dīsa. Nēti ī xū-i tita ǀkha nî ī ǃkhaisa ta ge ge ǂgom tama hâ i.” Jehovaba matib nî hui dasa ra mîmâi ǃgomsin xa da ga ǀhomaxase tsâ o?

4. Jehovaba tae-e Filipeǁîn 4:​6, 7 ǃnâ ra mîmâi?

⁴ Jehovaba mati nî huida. Elobmîs ra mî “ǂkhîbab” nî mā da ǃkhaisab ge ra mîmâi. (Khomâi re Fillipeǁîn 4:​6, 7 sa.) Nē ǂkhîb ge ǁîb ǀkha da ūhâ ǀgū ǀhōsagusisa xu ra hā ǃnomsasiba ǃoa ra ǁnaeǁgau. Nē ǂkhîb “ǁnâuǃāb hoaba ǃnāhâb” ge kaise a buruburuxa. Aiǁgause du ge ǀnîsi ra buru, ǀgore toa du hâs khaoǃgâ du ǃnomsase ra tsâ ǀgaub xa. ǁNā tsâsiba du ge ra hōǃâ ǁîb “ǂkhîb” Eloba xu ra hāba ra mā du amaga.

5. Elob di ǂkhîba mati sida ǂâidi tsî ǂgaogu tsîna ra sâu?

⁵ Fillipeǁîn 4:7 tsîn ge ra mî, Eloba xu ra hā ǂkhîb ge nî “sâu” du tamas ka io sadu “ǂgaogu tsî ǂâide” nî ǁkhauba. “Sâu” ti hâ mîs ge soldagu hîna ge ǃāsa gere ǁkhauba ga ǃoa gere ǁnaeǁgau. ǁNā ǁanǂgāsaben ge ǃnorasase gere ǁom, soldagu ǃāsa ra ǁkhaubasan ge ǂan i amaga. ǁNās ǁkhās khami i ge Eloba xu ra hā ǂkhîba sida ǂgaogu tsî ǂâide ra sâu. Tsî da ge ǃnomsase ra tsâ ǃnorasa da asa da a ǂan amaga. (Psa. 4:8) Hanas ǀkha î ge î-i khami i ge sida di mâsiba ǁnā ǁaeb ai dawa tama xawe da ge ǃnomsasiba ra hōǃâ. (1Sam. 1:​16-18) ǃNomsase da ga tsâ o i ge a supu ǃgāsase ǂâi tsî gā-ai mîǁguiga dīsa.

6. Tae-e da a dī ǁkhā, î da Elob di ǂkhîba xu ǃgâiba ǀama? (Ai-īsib tsîna mû re.)

⁶ Tae-e da nî dī? ǂÂiǂhânsen da ga ǁaeb ai da ge Jehovaba nî ǂgan îb huida. Mâ ǀgaub ǃnâ? Elob di ǂkhîba du nî hōs kōse ǀgore re. (Luk. 11:9; 1Tes. 5:17) Luisi ais ai da goro ǃhoaǃgaob ge ra ǁguiǃā, mati ra ge ǁîb tsî ǁîb taras Annas tsî ra ǀoro ǁkhân ǀguinab nî ûisa ra ge ǁnâu  ǃkhaisa tani ǁkhā isa. ǁÎb ge sao rase ra mî: “Nēti-i mâsib ǃnâ ǂurusib tsî nau xūn xa mîǁguiga dīs ge kaise a ǃgom ǁkhā dib ge ra mî. ǃNomsa sem ge nē ǃgom mâsib ǃnâ ge hâ ǁkhā, ǀgorem gere amaga.” Luisi tsî ǁîb taras tsîn ge ra mî, ǀgaisase ra ge hoaǁae gere ǀgoresa. Jehovaba ra ge gere ǂgan îb ǃnomsa ǂgaob, ǂâis tsî gā-aisib tsîna mā ra ǃgâi mîǁguiga dīs ǃaroma. ǁÎb huiba ra ge ge hōǃâ. ǃGomsina du ga hōǃâ o ǀgores ǃnâ hâhâ, ǁnāsa du ga dī o du ge Jehovab di ǂkhîb sadu ǂgaogu tsî ǂâide ra sâuba nî hōǃâ.—Rom. 12:12.

JEHOVAB GE NÎ MÂǁAPO KAITSI

7. Mati da a tsâ ǁkhā ǀgaisa ǃgomsiba da ga hōǃâ o?

⁷ ǃGomsin. ǃGomsina da ga hōǃâ, o da ge hoaǁae da ra ǂâi tsî dī khami dī tide. ǂGaus ǂoab xa ra ǂkhāmâhe khami i ge sida tsâsiga nē mâsiba xu naub ǀkha a dawa ǁkhā. Anas aisi da goro ǃhoaǃgaos ge ra mî, Luisi ǁōb khaoǃgâs ge ǂgui ǃkharagagu tsâsiga gere hōǃâ. ǁÎs ge ge mî: “ǀNî ǁaegu ais ǀkhaiǃnâse tsâ, ǀhomsen tsî gere ǁaixasa, ǁîb ge ǀkhai-i ǃkhais ǃaroma.” ǀNî ǁaegu ais ge Anasa ǀguritsâsen tsî gere ǀara, Luisi ge ǃgâise gere kōǃgâ mîǁguigas ge nēsi gere dī amaga. ǀNî ǁaegu ais ge hurib ǃnâ hâ ǂoas xas ra ǂkhāmâhe khami gere tsâ. Jehovaba mati ra hui da nēti-i tsâsin ra hāǂam da o?

8. Jesajab 33:6 ǃoagub Jehovaba tae-e ra ǁapoǁapo?

⁸ Jehovaba mati ra huida? ǁApoǁapo dab nîsab ge ra mîmâi. (Khomai re Jesajab 33:6 sa.) ǀGaisa ǂoabas ga ǂgausa hōǃâ os ge ǃaoǃaosase a aomâhe ǁkhā. ǂGausa ǁaposase ǃkhōmâis ǃaroma i ge ǂgaus ǃnaka ǀō-aisa xū-e hâ ǂgausa ǁgammi ǃnaka ǁaposase ra ǃkhōmâi-e. Nēs ge ǂgausa ra hui is tā kaise ǀgapisen tsîn ge khoen ǂgaus ai hâna ǁnās ǀkha a ǃnorasa. Xawe nēs ge ǂgaus aisa ǃoa ra ī ǁaeb ai ǀgui a sîsen ǁkhā. ǁNās ǁkhās khamib ge Jehovaba a ǁapoǁapo da ǁkhā ǂgomǂgomsase da ga ǃgom ǁaegu ǃnâ aisa ǃoa i ǀgara o..

9. Ôaǃnâs xūna mati a huida ǁkhā, î da ǀnōsa mûǂûiba ūhâ ǀgara? (Ai-īsib tsîna mû re.)

⁹ Tae-e da dī ǁkhās. Sadu ǃgomsin ga ǀgaisa ǂoas khami a i ǁaeb ai, ǀgore ǀgara, ǀhaode hâǃnâ tsî aoǁnâ re. ǀNai du goro dīs xa du ge ǀorose nî dī. ǂÂis ǃnâ ūhâ re Jehovab ge a ǁnâuǃāxa tsî ǃâubasen tama, ǁkhā du as xa du ǃnāsase nî dīsa. (ǀGōpeǀno re Lukab 21:​1-4 sa.) ǁNās xōǀkhās tsîna du ǁaeba ǁamaǂui tsî Elobmîsa aitsama ôaǃnâ tsî ǂâiǃgâ re. Tae-i ǃaroma? ǁÎb ǀapeǂhumis ǃnâub ge  Jehovaba gagasi xūna mā da hâ, hui da ǁkhā ana î da sida ǃgomsina ǃgomǁaegu ǃnâ tani. ǂHâ du hâ xūna hōs ǃaroma du ge saora xūna a sîsenū ǁkhā sadu gowab ǃnâ, JW Library app, Watch Tower Publications Index tsî Ôaǃnâs ǀkha ra hui ǂkhanib Jehovab ǃoaba-aon dib. Monikas aisi da goro ǃhoaǃgaos ge ra mî, ǁîs tsâsigu ga ǂoas khami khâi tsoatsoa os ge ǀapemāde nē ôaǃnâs xūn ǃnâ ra ôa. Aiǁgauses ge ǀnî ǁaegu ai “ǁaib” ti hâ mîsa ra ôaǃnâ. ǀNî ǁaegu ais ge, “ǀapexūhe” tamas ka io “ǂgomǂgomsasib” ti hâ mîsa ra ôaǃnâ. ǃGâises nî tsâs kōse ra ge gere khomai. “Oaǃnâsa ta ga dī tsoatsoa o ta ge ǀnî ǁaegu ai ra ǂâiǂhansen xawe ta ga khomai ǀgara o ta ge Jehovab xa ta ra ǁnamǂgahe khami ra tsâ. Khomai ta ra khami ta ge ge mûǂan Jehovab ge ti ǃkharagagu tsâsiga ǁnâuǃā tsî gere huitesa,” tis ge ra mî. Nēti-i huib Jehovaba xu hâb ge sadu tsîna a hui ǁkhā î du ǃnomasase tsâ.—Psa. 119:​143, 144.

JEHOVAB GE NÎ ǂKHÂǃNÂTSI

10. ǁKhōǁkhōsa mâsib khaoǃgâ da mati a tsâ ǁkhā?

¹⁰ ǃGomsin. Kaise ǁgai xū-i ga sida ǀkha i, o da ge ǀnî tsēdi ai sorosise ǂkhabu tsî gagasise ǁgaise a tsâ ǁkhā. ǃKhaese gere ǃhoe aob hîna ge tsûb tsî nēsi ra ǀīb khami du ge a tsâ ǁkhā. ǂGuro da ge supuse gere dī xūn tamas ka io ǂkhî kai da gere xūna dīs ge nēsi a ǃgom ǁkhā. Eliab khami i ge ǀnîsi kaise a ǃgom khâimâsa tsî da ge ǁom ǂgaos ǀguisa nî hî. (1Gao. 19:​5-7) Jehovaba tae-e ra mîmâi dīb nîsa ǂkhabu da ga o?

11. Mâ ǀkhara ǀgaugu ǃnâb Jehovaba ra huida? (Psalmdi 94:18)

¹¹ Jehovaba mati nî huida? ǂKhâǃnâ dab nîsab ge ra mîmâi. (Khomai re Psalm 94:18 sa.) Tsû hâ ǃhoe-aob ǃkhâǃnâsa ǂhâhâ khami da ge sida tsîna huiba ǂhâhâ î da Jehovab di ǃoabas ǃnâ hâ ǀgara. ǁNā mâsib ǃnâb ge Jehovaba saorase ra ǁapoǁapo: “Tita ǃKhūta sa Elota, amǀkhāb ǃommi âtsa nî ǃkhō xui-ao; Tita ge sats ǃoa ra mî ta ‘Tā ǃao, tita ge nî hui tsi,’” ti. (Jes. 41:13) Gao-aob Davidi ge nē huiba ge hōǃâ. ǃGomsinab gere hōǃâ tsî khākhoen xa gere mâǃoahe, ob ge Jehovaba ǃoa ge mî: ‘sa huib ge ge ǀgaiǀgai te.’ (Psa. 18:35) Jehovaba mati ǂkhâǃnâsa ra mā?

12. ǂKhabuǂâi da ga ǁaeb aib Jehovaba ham-e a sîsenū ǁkhā, î-i huida?

 ¹² Jehovab ge ǃnāsa ǁaeba nauna ra ǂkhâǃnâ în hui da. Aiǁgause, Davidi ge ǀgui ǁaeb ai ǂkhabusase tsâ, ob ge ǁîb ǀhōb Jonatanna saribi tsî ǂkhâǃnâbi tsî ge ǀgaiǀgaibi. (1Sam. 23:​16, 17) ǁNās ǁkhās khamib ge Jehovaba Elisaba ge ǁhûi îb huiba Eliaba mā. (1Gao. 19:​16, 21; 2Gao. 2:2) Nētsēb ge Jehovaba omaris khoe-i, ǀhōsa-i tamas ka io ǀhaohâb ǃûi-ao-e a sîsenū ǁkhā î-i sida ǂkhâǃnâ. Xawe ǀnî ǁaegu ai da ge tsûtsûhe da ga o nauna xu ra ǂgae-oasen. ǀGuri ǀgui da ge ra hâ ǂgao tsî ǁnāb ge ǁnaetisa tsâsiba. Tae-e da a dī ǁkhā î da Jehovab di ǂkhâǃnâsa ǃkhōǃoa?

13. Tae-e da a dī ǁkhā Jehovab ǂkhâǃnâsa xu da ga ǃgâiba ǀama ǂgao o? (Ai-īsib tsîna mû re.)

¹³ Tae-e da dī ǁkhās. Dītsâ re î tā ǀguriǀgurisen. ǀGuriǀgurisen da ga o da ge ǃnāsa ǁaeba sida tsî ūda hâ ǃgomsib xa ǀgui a ǂâi ǁkhā. Nēti-i ǂâi ǀgaub ge sida mîǁguiga a tsâǀkhā ǁkhā tsî da ge ǃgâi mîǁguiga dī tide. (ǂKhm. 18:1) Ama as ge ǀnî ǁaegu ai da ge ǀguri ra hâ ǂgao, ǃgōsase ǁgai xū-i ga sida ûib ǃnâ ī o. Xawe da ga gaxu ǁaeba a ǀguriǀgurisen o da ge Jehovab ra sîsenū ǂgao khoen huiba a ǂkhābe ǁkhā. ǁNā-amaga kaise i ga ǃgom xawe sadu omaris, ǀhōsan tsî ǀhaohâb ǃûi-aogu huiba ūǃoa re. Jehovab sado ra ǂkhâǃnâ ǀgaub ase ǁîna mû re.—ǂKhm. 17:17; Jes. 32:​1, 2.

JEHOVAB GE NÎ ǁKHAEǂGAOTSI

14. Taena a ǃao kai da ǁkhā?

¹⁴ ǃGomsin. ǃAo da ra ǁaegu tsîn ge hā ǁkhā. Elobmîs ǃnân ge ǂgomǂgomsa ǃoaba-aon Elob dina ǂâiǂhansen tsî gere ǃao, ǁîn khākhoen tsî naun xan gere ǁgâiǀāhe amaga. (Psa. 18:4; 55:​1, 5) ǁNās ǁkhās khami da ge ǀnîsi a mâǃoahe ǁkhā, skoli, sîsenni, omaris ǁanin tamas ka io ǂhanub xa. ǁŌ da nîsa da ge ǀnîsi ra ǃao, ǀaesen da hâ amaga. ǁNāti ī ǁaeb ǃnâ da ge hui-e ūhâ tama ǀgôaro-i khami a tsâ ǁkhā. Jehovaba mati nēti ī ǁaeb ǃnâ ra huida?

15. Psalmdi 94:19 ǃoagub Jehovaba tae-e nî dība da?

¹⁵ Jehovaba mati ra huida? ǁÎb ge ǁkhaeǂgao tsî ra ǃnomǃnom da. (Khomai re Psalmdi 94:19 sa.) ǀGaisa ǃgurub xa a ǁomǁoa ǀgôaros xas ge nē Psalmsa ra ǂâi kai da. Dadasab ǀkhī tsî ra ūkhâisi  ǀgauba da ge ra mûnan-ai. Tsîs ge ǁîb ǁôagu ǃnâ ra ǁom. Nē ǃgurub toa tama xawes ge kaise ǃnorasase ǁîs dadasab ǁôagu ǃnâ ra tsâ. ǃGomsina da ga tsâ xawe da ge sida ǀhomsi ǁGûb, ǁîb ǁôagu ǃnâ ǃkhō da tsî ǃnomsase ra tsâ kai da khami tsâ ǁkhā. Mati da ǁnāti ī ǁkhaeǂgaosa Jehovaba xu a hō ǁkhā?

16. Tae-e da nî dī, î da Jehovab ǁkhaeǂgaosa xu ǃgâiba ǀama? (Ai-īsib tsîna mû re.)

¹⁶ Tae-e da nî dī? ǃNāsa ǁaeba Jehovab ǀkha ǀgores tsî Elobmîsa khomais ǃnâ-ū ǃhoa re. (Psa. 77:​1, 12-14) Nēti ī ǁnaetiba du ga ūhâ, o du ge ǂgurose sadu ǀhomsi ǁGûba ǃoa nî ī, ǂâiǂhansen du ga o. Sadu ǃaob tsî ǂâiǂhasens tsîna Jehovab ǀkha ǀgoragu re. ǁNāpaxu ǁîba ǃgâ re Elobmîsa khomais ǃnâ-ū. ǁNāsa du ga dī o du ge nî mû, ǁkhaeǂgao dub ra ǀgausa. (Psa. 119:28) ǀNî ǃâgu Elobmîs diga khomais ge nî ǁkhaeǂgao du. Aiǁgause du ge ǁkhaeǂgaosa Jobi, Psalmdi tsî ǂKhoamîdi ǂkhinide khomais ǃnâ-ū a hō ǁkhā. Jesub mîdi Mateub 6ǁî danaǃâs ǃnâ xoasa di ǃnâs tsîna. Jehovaba ǃoa ǀgore tsî du ga ǁîb Xoasa khomai, o du ge ǁîb ǁkhaeǂgaosa nî hōǃâ.

17. Tae-i ǂgomǃgâsiba da a ūhâ ǁkhā?

¹⁷ ǂGomǃgâsiba da ge ūhâ ǁkhā, Jehovab hoaǁae ǃgomǁaegu ǃnâ nî hâba dasa. Tsî da ge tātsē ǀguri hâ tide. (Psa. 23:4; 94:14) Jehovab ge ra mîmâi sâu, ǁapoǁapo, ǂkhâǃnâ tsîb nî ǁkhaeǂgao da ǃkhaisa. Jehovab xas ge Jesajab 26:3 sa ra mî: “Sats ai ra ǂgomaiǂnûina ǂkhîb ǃnâ ǃkhōǀgara, satsan ra ǂgomǃgâ xuige.” ǁNā-amaga Jehovab ǃnâ ǂgom ǀgara, its ǁîb ra mā huiba xu ǃgâiba ǀama. Nēsa du ga dī, o du ge ǀgaiba hō tsî ǃgomǁaegu ǃnâ mâǀgai ǁkhā.