1. Tae-e sadu ǂâis ǃnâ ra hā Jehovab xa du ga ǂâi o?

 JEHOVAB ǀgauga mûnan-ai tsâ î du hâ? ǁÎb ǀkha du ga ǀgores ǃnâ ǃhoa, o i tae-e sadu ǂâis ǃnâ ra hā? Jehovab mûhe ǁoa xawes ge Elobmîsa ǁîba ǃkharagaǃnâgu ǀgaugu ǃnâ ra ǁguiǃā. Jehova “Elob ge sore tsî a” ǁkhau-ū khō tsî “hîkākā ra ǀaese” ǂansa. (Psa. 84:11; Heb. 12:29) Elobmîs xoa-aob ge Jehovaba safir ǀui-i, ǂkhai ra ǃnâb tsî ǀapiǃhanab [rainbow] ase ge ǁguiǃā. (Ese. 1:​26-28) Jehovab ra ǁguiǃāhe ǀgaus ge sida ra buru kai tamas ka io anu tama da hâ khami a tsâ kai ǁkhā.

2. Tae-i ǃaroman ǀnîna a ǃgombahe Jehovab ǀgū hāsa?

² Jehovaba da mû tama amaga î ge a ǃgom ǁkhā, ǁîb a ǀnam dasa ǂgomsa. ǀNîn ge ra ǂâi, Jehovab tātsē ǁîna ǀnam tide ǃkhaisa, ǁîn ûigu ǃnân ge hōǃâ hâ-i xūn xa ǃaromahe hâse. ǀNîsin ge ǁîn dadasab xa ge ǀnamhe tama hâ i. Jehovab ge nēti ī tsâsiga ra ǁnâuǃā tsî matin sida ra tsâǀkhāsa. Sida huis ǃaromab ge ǁîb di îsa ǀgauga Elobmîs ǃnâ xoa hâ.

3. Tae-i ǃaroma da Jehovab ǀnammi xa ǃnāsase nî ǁkhāǁkhāsen?

³ Jehovab ge a ǀnam, Elobmîs tsîn ge “Elob a ǀnam” ti ra mî. (1Jhn. 4:8) Dīb ra xūn hoan ge ǀnammi ai a ǃgaoǃgaosa. Elob di ǀnammi ge kai tsî a ǀgaisa tsîb ge ǁîba ǀnam khoen ǀguina ǁnā ǀnamma ǁgau tama, xawe ǁnān ǁîba ǀnam taman tsîna. (Mat. 5:​44, 45) Nē ǁkhāǁkhāǃâs ǃnâ da ge Jehovab tsî ǁîb ǀnammi xa nî ǃhoaǃgao. ǃNāsase da Jehovab xa ra ǁkhāǁkhāsen khami da ge ǁîba nî ǀnam.

JEHOVAB GE KAISE ǀNAM DA

4. Jehovab ǀnamxaǃnâsiba mati ra tsâ kai du? (Ai-īsib tsîna mû re.)

⁴ Jehovab ge “tsâbaǁhaos tsî ǀkhomxasib xa ǀoa hâ.” (Jak. 5:11) Elobmîs ǃnâb ge ǀnamxaǃnâ ǁgûs ǀkha ra ǀgopeǀnōsen.  (Jes. 66:​12, 13) Mûnan-ai re ǀnamxaǃnâ ǁgûs ǁîs ǀgôaro-e ra kōǃgâ ǀgausa. ǀNamxaǃnâses ge ǀgôaro-e ra tani tsî tsaura ǀgaub ǃnâ ǁî-i ǀkha ra ǃhoa. Ā tamas ka io i ra tsû ǁaeb ais ge ra kō, ǁî-i go ǂhâ i hâ xū-e hōsa. ǂÂiǂhansen da ga, o da ge Jehovab di ǀnammi ai ra ǂgomǃgâ. Psalmdi xoa-aob ge ge xoa: “Ti ǂhani ra ǂâidi di ǃnāǂamsasib ǃnâ di ge sa ǁkhaeǂgaode ǃnākhoesib âtaba ge khoakhoa.”—Psa. 94:19.

5. Jehovab di hâhâ ra ǀnamma tae-e ra ǂâibasen?

⁵ Jehovab ge a ǂgomǂgomsa. (Psa. 103:8) Tsū xū-e da ga dī, ob ge ǁîba sida ǀnam ǀû tama hâ. Israelǁaes ge Jehovaba ǃnās hoasa gere tsûtsû xawen ge dīn gere xūn ǃaroma gere ǃhausen, on ge ǁîb di hâhâ ra ǀnamma gere hōǃâ. Aiǁgauseb ge ǀgui ǁae ge mî: ‘Sats ge ti mûǁae a ǃgomǀgausa, tsî a ǃgôaǃgôasa tsî ta ge ǀnam tsi.’ (Jes. 43:​4, 5) Elob di ǀnammi ge dawa tama. Hoaǁae da ge ǁnā ǀnammi ai ǂgomǃgâ ǁkhā. Kaise da ga dīsā xaweb ge Jehovaba tātsē ǁnāxuǃnâ da tide. ǃHōbasen tsî da ga ǁîb ǃoa oa, o da ge nî mû ǀnam dab a ǃkhaisa. ǁÎb ge ra mîmâi ‘ǃnāǂamsaseb nî ǀûba’ dasa. (Jes. 55:7) Elobmîs ge saorase Jehovab di ǀûbasa ra ǁguiǃā, “î gu khoakhoahes di ǁaega hā ǃkhūb di aisa xu.”—ǃNǃkh. 3:19.

6. Saxariab 2:8 sa tae-e Jehovab xa ra ǁkhāǁkhā da?

⁶ Khomai re Saxariab 2:8 sa. Jehovab ge ǁîb mûs di ǂganagab ǀkha ra ǀgopeǀnō da. Mûs ge kaise ǀō-aisa ǃâb soros diba, ǁnā-amaga î ge khoe-i hîna sado ra tsûtsû-i ǃoagu Jehovaba ra mî, ‘khoe-i sado ra tsûtsû i ge ǀō-aisa xū-e ra tsûtsû.’ Jehovab ge ǀnam dab a amaga, sida tsâsiga ǃkhaese ra ǁnâuǃā tsîb ge ra mûǂûi sida sâusa. ǁÎb ge kaise ra tsûaǂgao, sida ga ǂâiǂhansen o. ǁNās xa ǃaromahe hâse da ge ǂgomǃgâsiba ūhâ, “sa ǂhunuma mûrats ga ǃûi hâs ǁkhās khami ǃûi te re.”—Psa. 17:8.

7. Tae-i ǃaroma da sida ǂgomǃgâsiba Jehovab ǀnammi ǃnâ nî ǀgaiǀgai?

⁷ Jehovab ge ra ǂhâba î da ǁîb ǀnam da ǃkhais di ǂgomǃgâsiba ūhâ. ǃKharuge ǁaeb ǃnâ da gere hōǃâ xūn ǃaroma da ǂâiǂhansen ǁkhāsab ge a ǂan. Tamas ka io da  ge mâsiga nēsi ra ǃkhāruǃnâ hîna sida di ǂgomǃgâsiba Jehovab ǀnammi ǃnâ da ūhâ-e a ǃâitsâ ǁkhā-e. Tae-e sida di ǂgomǃgâsiba nî ǀgaiǀgai? Jehovab ǁîb di ǀnamma Jesub, ǂkhauhesan tsî hoada ǃoa ra ǁgâiǂûi ǀgauba ǁkhāǁkhāsens ge nî huida.

JEHOVABA MATI ǁÎB ǀNAMMA RA ǁGÂIǂÛI?

8. Jesuba tae-i ǃaroma dadasab xab a ǀnamhe ǂgomǃgâsiba ge ūhâ i?

⁸ ǂGui kurina i ge Jehovab tsî ǁîb ǀnamǀnamsa ǀgôab tsîna ǀguiba ge hâ i. ǁNā ǂgui kurigu ǃnâ kha ge kai ǀnamma ge omkhâiba gu. Mateub 17:5 ǃnâ da ra khomai khamib ge Jehovaba ǃgāsase Jesubab ǀnamsa ge mî. Jehovab ge ǀnîsi ga mî hâ, ‘nēb ge ǃgâiǃgâibasensa ta ūǃnâ hâba.’ Xaweb ge ge ǂhâba hâ i, i da ǂan matikōseb Jesuba ǀnamsa tsî ǁîba ti “ǀnamǀnamsa ǀgôab” ti ge ǂgâi. Jehovab ge Jesub ai ge ǂnīsa i ǃgōsase ǁîb ûibab ge māsenxase gere mā ǃkhâis ǃaroma. (Efe. 1:7) Jesub ge ǁÎb dadasab a ǀnambi ǃkhâisa ǃgāsase ge ǂan i. Jehovab di ǀnammi ge Jesuba kaise ge amaba i tsîb ge ǁîb di ǂganagab ǃnâ ǁnāsa gere hōǃâ. ǂGomǃgâsib ǀkhab ge ǃnākōrobe ǁîb ǁGûb a ǀnambi ǃkhâisa gere mî.—Jhn. 3:35; 10:17; 17:24.

9. Nē xoas ǃnâ mâ mîde Jehovab ǂhauhesana a ǀnamsa ra ǁgau? ǁGuiǃā re. (Romeǁîn 5:5)

⁹ Jehovab ge ǂkhauhesa ǃgâsanab a ǀnamsa ǃkhaisa ra mî. (Khomai re Romeǁîn 5:5 sa.) “ǁHōǂûihe” ti hâ mîsa ǃgaoǃgâ re. ǀGui Elobmîs ge ǀaus ǁgammi ra ǂoa khami ī ti ge ǁguiǃā. Nē aiǁgaus ge amabes ǃnâ ra ǁgau matikōseb Jehovaba ǂkhauhesana a ǀnamsa. ǂKhauhesan tsîn ge a ǂan ǁîn “Elob ǁGûb xa ǀnamhe” ǃkhaisa. (Jud. 1) Apostel Johanneb ge saorase matin ra tsâ ǃkhâisa ge xoa: “Mû re tarebe ǀnamab ǁGûba sada ra mā ǃkhâisa Elob ôan ti da nî ǂgaihese.” (1 Jhn. 3:1) Jehovaba ǂkhauhesan ǀguina a ǀnam? Hâ-â Jehovab ge hoadab a ǀnam ǃkhâisa ge ǁgau.

10. Tae-e ra ǁgau Jehovab ǀnam dusa?

¹⁰ Jehovaba mâ ǀgaub ǃnâ kaiseb ǀnamda ǃkhâisa ge ǁgau? ǁNās ge xoremarib ǃnâ-ūsa. Nēs ǃnâ-ūb ge Jehovaba ge ǁgau, ǃnāsaseb a ǀnam da ǃkhâisa. (Jhn. 3:16; Rom. 5:8) Jehovab ge ǁîb di ǀnamǀnamsa ǀgôaba ge mā tsî ge mā-am, îb hoa khoen ǃaroma ǁō i-i sida di ǁorena ǀûbahe î da ǁîb ǀhōsa kai. (1Jhn. 4:10) Jehovab tsî Jesub tsîn ge dība da xū-i xa da ǃnāsase ra ǂâiǃgâ khami da ge nî ǁnâuǃā matikōse i ǁîkha mâ ǀguiǀguibe khoe-i hoa-e a ǀnamsa. (Gal. 2:20) Xoremarib ge Jehovab di ǀnammi ra ǂgaoǀkhā amaga ge dīhe tama hâ i xaweb ge ǀnammi ai a ǃgaoǃgaosa ǀkhae. Jehovab ge ǁîb di ǀnamma ge ǁgau da Jesub hîna kaise ǀō-aisaba ǁguibas ǃnâ-ū. Jehovab ge ge mā-am, îb ǁîb ôaba ǃgomma tsâ tsî ǁō sida ǃaroma.

11. Tae-e da Jeremiab 31:3 sa xu ra ǁkhāǁkhāsen?

¹¹ Mû ta go khamib ge Jehovaba ǁîb tsâsiga ǃhō-oa tama xaweb ge ra mîba da matikōseb a ǀnam dasa. (Khomai re Jeremiab 31:3 sa.) Jehovab ge ǁîb ǃoa ge ǂgae da, ǀnamdab a amaga. (ǀGopeǀnō re Deuteronomium 7:​7, 8 sa.) Khoe-i tamas ka io ǀkhara xū-i ge ǁnā ǀnamma xu a ǀgora da ǁoa. (Rom. 8:​38, 39) ǁNā ǀnamma mati ra tsâ kai tsi? Psalmdi 23 sa khomai tsî mû re matib Jehovab ǀnammi tsî tsâbaǁhaosiba Davida tsâǀkhāsa tsî mati i sada tsîna a tsâǀkhā ǁkhāsa.

JEHOVAB ǀNAMMA MATI RA TSÂKAI TSI?

12. Psalmdi 23 sa du mati nî ǃkhōǀhao?

¹² Khomai re Psalmdi 23:​1-6 sa. Psalmdi 23 ǃnâb ge Davida gere ǁgâiǂûisen  ǂgomǃgâsibab Jehovab ǀnammi ǃnâ ūhâsa tsîb Jehovaba ǁîba ra tsâbasa. Jehovab tsî ǁîb ǁaegu hâ ǀhōsagusisab ge gere ǁguiǃā tsîb ge ǁîb ǃûi-aob ti gere ǂgâibi. Davidi ge ǃnorasase gere tsâ tsî ge mā-am, îb Jehovaba daoǁgaubi tsîb ge ǁîb ai hoase gere ǂgomaiǂnûi. Davidi ge ge ǂan i Jehovab ǁîb ûib ǃnâ tsēs hoasa ǀnamma nî ǁgaubi ǃkhaisa. Tae-i ǃaromab ge ǁnātikō ǂgomǃgâsiba ūhâ i?

13. Tae-i ǃaromab ge Davida Jehovab ra kōǃgâbi ǃkhais ǂgomǃgâsiba ūhâ i?

¹³ “xū-i xare-e tôasi tide.” Davidi ge kōǃgâheb da ǃkhaisa gere hōǃâ, Jehovab ge hoaǁae ǂhâb hâ xūna gere mābi amaga. Davidi ge ge ǂan i Jehovab ǁîb ǀhōsa tsî ǁîb mā-amsa ūhâ ǃkhâisa. ǁNā-amagab ge ǂgomǃgâsiba ge ūhâ i tae-i ǀgui-i ga hānîǁaeb ǃnâ ī xaweb Jehovaba aiǃgû tsî ǁîb ǂhâsiga nî kōǃgâsa. Davidi ge ǂgomǃgâsiba ge ūhâ i Jehovab a ǀnambi ǃkhaisa tsîb nî kōǃgâbisa. ǁNās ge ge huibi îb tā ǂâiǂhansen xawe ǂkhî tsî ūb hân ǀkha ǂâu.—Psa. 16:11.

14. Jehovaba mati ǀnamxaǃnâse kōǃgâ da ǁkhā?

¹⁴ Jehovab ge ǀnamxaǃnâse ra kōǃgâ da, ǃgōsase ǁgai xūn ga sada ûib ǃnâ i o. Claire, a ti ǀon hâ khoes, Betels tawa 20 kurin xa ǃnāsase ra ǃoabas ge ra mî: ǀūs ge ge ī matis ǁîs omaris khoena nî kōǃgâsa, nē ǃgomsiba xun ge nau ǃgomsiga hōǃâ o. ǁÎs dadab ge stroke-e ge hō, ǁîs ǂkham ǃgâsas ge ge ǂnuiǂûihe. Tsîn ge mari ǃgomsiba hōǃâ tsî ǁîn oms tsîna ge ǂoaǃnâ. Jehovaba mati ǀnamxaǃnâse ǁîna ge kōǃgâ? Claires ge ra mî: “Jehovab ge ti omarisa  ge kōǃgâ, în tsēs hoasa ǂhân hâ xūna ūhâ. ǂGuiǃnādeb ge Jehovaba ǂhâ da hâs xa ǃnāse gere mā da. ǃNāsa ǁaeba ta ge ra ǂâi-oa Jehovab ge huite ǀgauba tsî ta ge tātsē ǁîb ǀnamma ǀuru tide. ǂÂiǃgâ ta gere xūn ge ge huite î ta Jehovaba ǂkhîsase ǃoaba ǀgara, ǀkhara ǃgomsina ta ge ti ûib ǃnâ gere hōǃâ o.”

15. Davida tae-i ǃaroma khoakhoahe hâse gere tsâ? (Ai-īsib tsîna mû re.)

¹⁵ “Ti ǀomsab ge ǁÎba ra khoakhoa.” ǀNî ǁaen aib ge Davida gere ǂâiǂhansen, ǃgomsin tsî ǃâitsân hōǃâb geren xa. (Psa. 18:​4-6) Xawe i ge Jehovab di ǀnamxaǃnâ kōǃgâsa gere khoakhoabi. Jehovab ge ǁîb tsauhâ ǀhōsaba ǀgâxa ǃkhaidi ǃnâ “ǁgoe kai tsî ǃnōsa ǁgamgu ǃoa ra ǂgaeǂgui.” ǁNās xa ǃaromahe hâseb ge Davida ǁîb di ǀgaiba hō-oa tsî Jehovaba ǃgâiaǂgaob ǀkha ge ǃoaba ǀgara.—Psa. 18:​28-32.

16. Jehovab ǀnamma mati ge khoakhoa du?

¹⁶ ǁNās ǁkhās khami, “hâhâ ra ǀnammi ǃKhūb dib ǃaromas ge hîǀhuruhe tama da hâsa” ǃgomsina da ga sida ûib ǃnâ hōǃâ o. (ǃG.am. 3:22; Kol. 1:11) Raxels aiǁgausa ǃgaoǃgâ re, kaises ge gere ǂâiǂhansen ǁîs aob ge Jehovab tsî ǁîs tsîna Koronas ǁaeb ǃnâ ǁnaxu o. Jehovaba tae-e ge dībasi? ǁÎs ge ra mî: “Jehovab ge ge mûǂam, î ta ǀnamhe hâ khama tsâ. ǀHōsanab ge māte, sarite, ǂûna sī-ūbate, sîǂkhinidi tsî ǂkhâǃnâ ra xoade ra sîbatena. ǁÎn ge âi-ute tsî hoaǁae gere ǂâiǂâiǃnâte Jehovab tita ra kōǃgâ ǃkhaisa. Hoaǁae ta ge Jehovaba ra gangan, nē ǀnamǀnamxa omarisab māte hâ ǃkhais ǃaroma.”

17. Tae-i ǃaromab ge Davida “xū-i xare-e ǃao tama hâ i”?

¹⁷ “Xawe ta xū-i xare-e ǃao tide sats tida ǀkha hâ xui-ao.” Davidi ûib ge hoaǁae ǁkhōǁkhōsa mâsib ǃnâ ge hâ i. ǁÎb ge ǂgui ǀgaisa khākhoena ge ūhâ i. Xaweb ge Jehovab ǀnamma ǃnorasa tsî sâuhe hâse gere tsâ kaibi. Davidi ge gere hōǃâ Jehovab ge hoaǁae ǁîb ǀkha hâ isa. Tsî ǁnās ge ǁîba ǂgomǃgâsiba gere mā. ǁNā-amagab ge saorase ge ǁnae ǁkhā i: “[Jehovab] ge hoaraga ǃaob tiba xu ge ore te.” (Psa. 34:4) Davidi ge kaise ǀnî ǁaen ai gere ǃao, xawe Jehovab ǀnammi ge ge ǀgaisa i ǁîb ǃaob ǂam-ai.

18. ǃAo du ga ob Jehovab ǀnammi ǂgomǃgâsiba mati a ǀgaiǀgai du ǁkhā?

¹⁸ Jehovab di ǀnammi ǃnâ ǂgomǃgâsiba ūhâsa mati ra ǀgaiǀgai da, ǃao kai da ra mâsiga da ga hōǃâ o? Susi ti ǀon hâ  aimâba-aos ge ra ǁguiǃā, mati ra ge ǁîs tsî ǁîs aob tsîna gere tsâsa ǁîra ôab ge ǃgamsen o: “ǁNāti ī ǁgai tsûaǂgaoxa xū-i ga sa ûib ǃnâ ī, o i ge kaise ra tsâǀkhā tsi. Hui-ose tsâ tsîts ge ra ǃao ǂgui ǁgai xūn nî īsa. Xawe Jehovab di ǀnamxaǃnâsib ge ǃnōrasa tsî sâuhe hâse ge tsâ kai mî.” Raxels ais ai da go ǃhoaǃgao hâ is ge ra ǂâi-oa: “ǀgui ǃoe ta ge kaise tsuaǂgao, ǂâiǂhânsen, ǃao tsî gere ā, ǃgarise ta ge Jehovaba ǃoa ge ǀgore. ǁNā ǁaeb ai ta ge ti ǂgaobab ra ǃnom kai tsî khoakhoasa ge hōǃâ, ǁgûs ǁîs ǀgôaro-e ra kōǃgâ khami. ǁNāpaxu ta ge ǃgâise ge ǁom, ǁnāsa ta ge tātsēs tsîna ǀuru tide.” Tasos ti ǀon hâ ǀhaohâb ǃûi-aob ge haka kurina ǃkhō-oms ǃnâ ge ǂnûa i, soldat kai ǂgao tamab ge hâ i amaga. Matib ge Jehovab ǀnammi tsî kōǃgâs tsîna hōǃâ? ǁÎb ge ra mî: “Jehovab ge ti ǂhâsin tsî ǁnās xa ǃnāsase ge kōǃgâ te. Nēs ge ti ǂgomǃgâsib Jehovab ǃnâ ta ǀoasase nî ǂgomǃgâsa ge ǀgaiǀgai. ǁNās xōǀkhāb ge Jehovaba ǁîb ǃanu gagab ǀkha ge huite, î ta ǃgâiaǂgaoba ūhâ tsûtsûsa ǃkhais ǃnâ ta ge hâ i xawe. Nēs ge ge mûǂan kaite ǁîb ǀgūse ta ra sîsen khami da ǁîb ǀnamma nî hōǃâ ǃkhaisa tsî ta ge ǃkhō-oms ǃnâ ge ǁnaetisa aimâba-ao kai.”   

SA ǀNAMXAǃNÂ ELOBA ǀGŪ

19. (a) Jehovab a ǀnam da ǃkhaisa ǂansa mati sida ǀgoredi ǃnâ da ra mî xuna ra tsâǀkhā? (b) Jehovab ǀnammi xa tae ra tsâǀkhā du? (“ Jehovab ǀgamsa ǀnamma ra hōǃâ kai da mîdi” ti hâ boksisa kē re.)

¹⁹ Nē da goro ǃhoaǃgao xūn ǃgâsan gere ǃkharuǃnân ge ra ǁgau, Jehova “Elob ǀnammi” sida ǀkha hâ ǃkhaisa! (2Kor. 13:11) ǁÎb ge mâ ǀguiǀguibe khoe-i hoa-i ǃnâ ǃgâiǃgâibasensa ūhâ. ǂGomǃgâ da ge ra “ǁîb di hâhâ ra ǀnammi” sida ǂnamipe hâ ǃkhaisa. (Psa. 32:10) ǁÎb ǀnamma ra ǁgau da ǀgausa da ra ǂâiǃgâ khami da ge nî hōǃâ matikōseb ra tsâba da ǃkhâisa. ǁÎb ǀgūse da hâ khami da ge nî tsâ. ǃAo tamase da ge harase ǁîb ǃoa nî ǀgore tsî nî mîbabi matikōse da ǁîb ǀnamma ǂhâhâsa. Sida ǂâiǂhânsendi hoade da ge ǁîb ǀkha nî ǀgoragu. ǂGomǃgâxasiba da ūhâ amaga ǁîb ra ǁnâuǃā tsî sida hui ǂgao ǃkhaisa.—Psa. 145:​18, 19.

20. Matib Jehovab ǀnamma ǁîb ǃoa ra ǀgū kai da?

²⁰ ǀGamsa ǀaes ǀgūse da ǃkhai tsēs ai ra hâ khami da ge Jehovab di ǀgamsa ǀnammi ǃgao ǁîb ǀgūse ra hâ. Jehovab di ǀnammi ge kaise ǀgaisa tsî ǀnamxaǃnâ. ǁNā-amaga ǃgâiaǂgao Jehovab ǀnam du amaga. A da hoada “tita ge [Jehovaba] ǃKhuba ǀnam ti mî”!—Psa. 116:1.