ǀNî gu ge tarekhoede ra ǃgôaǁnâ ǃhaodi ǃnâ kaikaihe hâ. Aiǁgauseb ge Hans ti ǀon hâ ǃnarimâra mûǂam-aob Boliviab ǃnâ ra hâba ge mî: “ǀNî aorekhoegu kaikaiǃnâhe hâ ǃhaodi ge ra ǂkhâǃnâ, î gu ǀgapiǂâixa ǀgaub ǃnâ tanisen. ǁÎgu ge ra ǂgom tarekhoedi xa gu a ǀgapisa tsî tarekhoede ra ǃgâoǁnâ.” Shengxian ti ǀon hâ ǀhaohâb ǃûi-aob Taiwanni ǃnâ ra hâb ge ra mî: “Tita ra hâba î ge ǂgui aorekhoega ra tsâ tarekhoedi mî xū-e ūhâ tamasa. Aorekhoeb ga tarekhoes dī hâ mîǁguib xa ǃhoa, o i ge nau khoega ǁîba ǃgôa tide tsî ǂkhabusase nî mû.” ǀNî aorekhoegu ge ǀgoraǃgâ ra ǀgaugu ǃnâ tarkhoedi ǀkha ra hâ. Aiǁgause gu ge ǃgôasi-e ūhâ tama ǀgaub ǃnâ ǁîdi ǀkha ra ǃhoa.

Aorekhoeb ge mâ ǃhao-i ǀgui-i ǃnâb ga kaikaihe xawe a dawa ǁkhā. Aorekhoeb tarekhoes xa ǀgapi tamasab ge a ǁkhāǁkhāsen ǁkhā. (Efe. 4:22-24) Nēs ge Jehovab aiǁgausa ǁgaes ǃnâ-ū a īǁkhā. Nē khomaiǃâs ǃnâ da ge Jehovab tarekhoede ra hâ-ū ǀgaus, mati gu ǃgâsaga ǁnāsa xu a ǁkhāǁkhāsen ǁkhās. Tsî mati gu ǀhaohâb ǃûi-aoga ǂgurose ǃgâosiba ǃgâsade nî ǁgau ǀgausa nî ǃhoaǃgao.

JEHOVABA MATI TAREKHOEDE RA HÂ-Ū?

Jehovab ge ǃgâi aiǁgausa ge ǁgau tarekhoedi mati nî hâ-ūhesa. ǀKhomxaǂgao ǁGûb aseb ge ǁîb ǀgôan hoana a ǀnam. (Jhn. 3:16) ǂGomǂgomsa ǃgâsadi hîna ǁîb ǃnâ ra ǂgomdi ge ǀō-aisa ǀgôadi khami ī. Jehovab tarekhoede ǀnammi tsî ǃgôasib tsîna ra ǁgau ǀgausa ǃgaoǃgâ re.

ǀGora-e ūhâ tama ǀgaub ǃnâb ge ǁîde ra hâ-ū. Jehovab ge aorekhoegu tsî tarekhoedi  tsîna ǁîb īsib ǃnâ ge kuru. (Gen. 1:27) Aorekhoegab ge tarekhoedi xa gu ǃnāsa ǂansa ūhâse kuru tama ǀguitikōseb ge hoa khoen xa ǃgâibahe. (2Kro. 19:7) ǁÎb ge aorekhoegu tsî tarekhoedi tsîn hoana ǀgui ǁkhāsib Elobmîs amaba ǁnâuǃā tsî ǁîba ǁgaes dib ǀkha ge kuru. Jehovab ge ǁîb ǃnâ ra ǂgom aogu tsî khoedi tsîn hoana ra ǃgôaǃgâ. Hoanab ge ǀamosib kōse ǃhūbaib ai ûis tamas ka io gaogu tsî pristerse ǀhommi ǃnâ ǂgaeǂguis di ǃâubasensa mā hâ. (2Pet. 1:1) ǃGāsaseb ge Jehovaba tarekhoedi ǃoagu ǀgora-e ūhâ tama.

ǁÎdeb ge ra ǃgâ. Jehovab ge tarekhoedi ra tsâ ǀgaub tsî hōǃâ di ra ǃgomsigu ǃnâ ra tsâba di. Aiǁgauseb ge Raxels tsî Hana hâra ǀgorede ǃgâ tsî ge ǁnâu-am. (Gen. 30:22; 1Sam. 1:10, 11, 19, 20) Jehovab ge Elobmîs xoa-aoga ge ǂkhâǃnâ, î gu tarekhoede ra ǃgâ aorekhoegu aiǁgaudi xa xoa. Aiǁgauseb ge Abrahamma Jehovab di daoǁgausa ge sao, îb ǁîb taras Sarasa ǃgâ. (Gen. 21:12-14) Gao-aob Davib ge Abigailsa ge ǃgâ. ǁÎs ge Jehovab xa sî-e tsî ǁîb ǀkha ǃhoa khamib ge gere tsâ. (1Sam. 25:32-35) Jesub hîna ge ǁîb Dadasab ǀgauga ǀoasase gere ǁgaeb ge ǁîb ǁgûs Mariasa ge ǃgâ. (Jhn. 2:3-10) Nē aiǁgaudi ge ǀgui ǀgaub Jehovab tarekhoede ǃgôasiba ra ǁgauba ra mā, tarekhoede ǃgâs ǃnâ-ū.

ǁÎteb ge ra ǂgomǃgâ. Aiǁgauseb ge Jehovaba Evasa ge ǂgomǃgâ, îs hoa ǃhūbaiba kōǃgâs ǀkha hui. (Gen. 1:28) Nēsa dīs ǃnâ-ūb ge ge ǁgau, ǁîsab Adammi xa ǃgôaǁnâ ra ǀgaub ǃnâ mû tamasa xaweb ǁîsa hui-aos ase ra mûsa. Jehovab ge kēbo-aos Deboras tsî Huldas tsîna ge ǂgomǃgâ î ra ǁîb khoena ǀapemā, ǂhanuǂhanu-aogu tsî gao-aogu tsîna ǃkhōǂgā hâse. (ǂHǂh. 4:4-9; 2Gao. 22:14-20) Nētsēb ge Jehovaba Xristeǁî tarade ra ǂgomǃgâ, î di ǁîb sîsenne dī. Nē ǂgomǂgomsa ǃgâsadi ge aoǁnâ-ao, aimâba-ao tsî sîsabese ra ǃoaba. ǁÎdi ge Jehovab ǃoabas ǃnâ ra sîsenūhe omga oms tsî dī-ūnus ǀkha ra hui. ǀNîti ge Betels tawa ra sîsen tsî ǀnîde ǂnûiǃkhunis bērodi tawa. Nē ǃgâsadeb ge Jehovaba ra sîsenū ǁîb ǂâisa dīs ǃnâ. (Psa. 68:11) ǃGāsa î ge a Jehovab tarekhoede ǂhabusa tamas ka io xū-e di a dīǁoase mû tamasa.

MATI GU ǃGÂSAGA A ǁKHĀǁKHĀSEN ǁKHĀ, TAREKHOEDE JEHOVAB RA MÛ KHAMI MÛSA?

ǃGâsago, Xristeǁî ǃgâsade go Jehovab ra hâ-ū khami ra hâ-ūsa ǂanǂuis ǃaroma, ǂkhauǃnâse sago ǂâiǀgaub tsî dī go ra xūn tsîna ôaǃnâ re. ǁNāsa dīs ǃaroma go ge huiba ǂhâhâ. Khoe-i ǂgaob a ǂurusa kēs ǃaromab doktera masinsa ra sîsenūs. ǁNās ǁkhās khami i ge ǃgâi ǀhōsan tsî Elobmîs tsîna a hui ǁkhā ǂanǂuisa, tarekhoedi xa go ūhâ tsâsib Jehovaba ra ǂkhîǂkhîsa. Tae-e go a dī ǁkhā, î go Jehovab huiba ǃkhōǃoa?

ǃGâi ǀhōsa-e dî re. (ǂKhm. 18:17) ǂGomǃgâ da ra ǀhōsa-i hîna khoexaǃnâ tsî ǀnōsa ǀgauba ūhâ-e da ge a dî ǁkhā. Aiǁgause: “Mati ta ǃgâsade ra hâ-ū? Mû ǁkhā î di a ǃgôasiba ta ra ǁgautisa? Xū-e ta dī ǁkhā î ta ǁîde ǃgôasiba ǁgau?” Sa ǀhōsa î ga sîsen ai ǁkhāts a xū-e mî, o tā ǂnôagu xawe māsenxase ǁnā ǀkharaǀkharana dī re.

Elobmîsa ǁkhāǁkhāsen. ǃGâsade gu ǃgâi ǀgaub ǃnâ ra hâ-ūsa ǂanǂuis, ǃaroma gu ge ǁîgu tanisen ǀgauba nî ôaǃnâ. Tsî Elobmîsa nî sîsenū î gu mû mâ ǀgauga gu a ǀkharaǀkhara ǁkhāsa. (Heb. 4:12) Elobmîsa da ra ǁkhāǁkhāsen khami da ge ra ǂanǂui, aogu hîna ge tarekhoede ǃgâise gere hâ-ū gu tsî ǁnāgu hîna ge ǃgâise hâ-ū tama hâ i gu xas tsîna. Nē aiǁgaude gu ge ǁîgu tanisen ǀgaub ǀkha a ǀgopeǀnō ǁkhā. ǁNās ǂam-ai Elobmîs xoade ǀgopeǀnōs ge a hui ǁkhā, î gu ǀūǂamsis ǃnâ tā xoade sîsenū tsî ǂâisā tarekhoede gu ra mû ǀgaub nēsa ra ǂkhâǃnâsa. Aiǁgause î ge 1 Petrub 3:7 ǃnâ ra mîhe “î go ǁîde ǃgôasib ǀkha sîsenū, ǁîdi sago xa ǂkhabusa xawe.” b Nēsa ra ǂâibasen ǁîs xu tama tsî ǀoro ǂansa aorekhoeb xa ūhâsa? Hî-i tātsē!  Petrub ǃnâ hâ mîde Galateǁîn 3:26-29 ǃnâ hâ mîdi ǀkha ǀgopeǀnō re. ǁNā xoas ge ra ǁgau Jehovab aorekhoegu tsî tarekhoedi tsîna ǁhûi hâsa în ǀguiba ǀhommi ǃnâ Jesub ǀkha ǂgaeǂgui. Elobmîsa ge ga ǁkhāǁkhāsen tsî ǃgâi ǀhōsana dī o, în mîba ge mati ge tarekhoedi ǀkha ra hâsa. O ge ge a ǁkhāǁkhāsen ǁkhā mati ge ǃgâi tsî ǃgôasib ǃnâ sige ǃgâsadi ǀkhā a hâ ǁkhā ǀgausa.

MATI GU ǀHAOHÂB ǃÛI-AOGA ǃGÔASIBA ǃGÂSADE RA ǁGAU?

ǀHaohâb ǃnâ hâ ǃgâsagu tsîn ge a ǁkhāǁkhāsen ǁkhā mati gu ǃgâsade ǃgôasib ǃnâ a hâ-ū ǁkhāsa, ǀnamxaǃnâ ǀhaohâb ǃûi-aogu aiǁgaude ǁgaes ǃnâ-ū. Mati gu ǀhaohâb ǃûi-aoga ǃgôasiba ǃgâsade ra ǁgau? Saora aiǁgaude ǃgaoǃgâ re.

ǃGâsade gu ge ra koa. Apostel Paulub ge a ǃgâi aiǁgau ǀhaohâb ǃûi-aogu a ǁgae ǁkhāba. Paulub ge ǀnî ǃgâsade ǁîb sîǂkhinis hînab ge Romes ǀhaohâba ǃoa a xoas ǃnâ hārase ge koa. (Rom. 16:12) ǁNā ǃgâsadi gere hōǃâ ǃgâiaǂgoaba mûnanai re Paulub sîǂkhinis ge ǀhaohâb ǃnâ gere khomaihe o. ǁNās ǁkhās khami gu ge ǀhaohâb ǃûi-aoga ǃgâsade, ǁîdi ǃgâi ǀgaugu tsî sîsenni Jehovaba di ra dība gu ǃaroma nî koa. Nēs ge ǃgâsade ra mûǂan kai ǀhaohâb ǃnâ di ra ǃgôaǃgâhesa. ǀHaohâb ǃûi-aogu ǂkhâǃnâ ra mîdi ge ǃgâsadi Jehovaba ǂgomǂgomsase ǃoaba ǀgaras ǃaroma ǂhâhâ ǂkhâǃnâs ase ī.—ǂKhm. 15:23.

ǀHaohâb ǃûi-aob ge ǃgâsadeb ga koa o, ǁîdi ra dī ǃgâi xūn ǃaroma nî koa di. Tae-i ǃaroma? Jessica ti ǀon hâ ǃgâsas ge ra mî: “Kaise î ge a ǃgâi ǃgâsab ga ‘ǃgâises ge go dī’ ti ga ra mî o, ǃgōsases ge ra ǃgôaǃgâ ǀhaohâb ǃûi-aob ga ǀnîsi sise ti ǀgôan ǀhaos ǃnâ ǃnōsase ra ǂnû ǃkhais ǃaroma koase. Tamas ka iose  sise ǁaeba ǁamaǂui tsî Elobmîsase ra ǁkhāǁkhā khoe-e ǀhaosa ǃoa ǀkhī-ū o.” ǀHaohâb ǃûi-aogu ga ǃgâsate dī di go xū-i ǃaroma koa, o di ge ǂhâhe tsî ǃgôahe hâ khami ǀhaohâb ǃnâ ra tsâ.

ǃGâsade gu ge ra ǃgâ. ǃGamǃgamsenxa ǀhaohâb ǃûi-aogu ge ra mûǂan ǁîgu ǀguigu ǃgâi ǀapemāde ūhâ tamasa. ǁNāti i ǀhaohâb ǃûi-aogu ge ǃgâsade ǁîdi ǂâi ǀgauba ra ǂgan tsî ǃhaodi ga o ǃgâise ra ǃgâ. Nēsa dīs ǃnâ gu ge ǀhaohâb ǃûi-aoga ǃgâsade ra ǂkhâǃnâ tsî ǁîgu tsîna ǃgâiba ra hō. Mâ ǀgaub ǃnâ? Gerardo ti ǀon hâ ǀhaohâb ǃûi-aob Betels tawa ra ǃoabab ge ra mî: “Hōǃâ ta ge ge ǃgâsade ǁîdi ǂâi ǀgaub xa dîs ra huitesa î ta ti sîsenne ǃgâise dī. ǁÎdi ǀnî ǁaega ǃgâsagu xa ǁnā sîsenne ǀhapese dī hâ amaga.” ǀHaohâb ǃnâ di ge ǂgui ǃgâsade aimâba-aose ra ǃoaba, ǁnā-amaga di ge ǂgui khoen ǁnā ǃās ǃnâ ra hâna a ǂan. Bryan ti ǀon hâ ǀhaohâb ǃûi-aob ge ra mî: “Sida ǃgâsadi ge ǂgui ǃgâi ǀgaugu ǀapeǂhumis ǂhâhâ ga ūhâ. ǁNā-amaga ǁîdi ǂansa xu ǃgâiba ǀama re.”

Gā-ai ǀhaohâb ǃûi-aogu ge ǃhaese ǃgâsadi ra mî xū-e kē ǃkharu tama. Tae-i ǃaroma? “ǃGâsadi ǂâiǀgaub tsî hōǃâ di ge xūn tsîn ge ǃgâsaga nî hui, î gu ǃgāsase nau khoen tsâsiga ǁnâuǃā,” tib ge Edward ti ǀon hâ ǀhaohâb ǃûi-aoba ra mî. (ǂKhm. 1:5) ǀHaohâb ǃûi-aob ga ǁîs ǂâiǀgauba sîsenū tama ga i, xaweb ge noxoba ra gangan ǁîs ǂansas ra ǀgoragu ǃkhais ǃaroma.

ǃGâsade gu ge ra ǁkhāǁkhā. Gā-ai ǀhaohâb ǃûi-aogu ge ǀgauga ra ôa, ǃgâsade ǁkhāǁkhāsa. Aiǁgause gu ge ǃgâsaga, ǃgâsade ra ǁkhāǁkhā mati ti aoǁnâ sîsenni ǀhaode nî dīsa, ǁāǁnâsa ǃgâsab ga ǀkhai o. ǁÎgu ge a hui ti ǁkhā mati di masin di ǀkha a sîsen ǁkhāsa, î di om sîsenni tsî dī-ūnus sîsenni ǀkha ǀapeǂhumisa hui. Betels mûǂam-aogu ge ǃgâsade ra ǁkhāǁkhā, î di ǃkharagagu ǁgaumâide kōǃgâ. Nēs ge dī-ūnus, ǁamas, marin ǀkha sîsens, komputer programan tsî ǀnî sîsengu tsîna ǃkhōǂgā hâ. ǀHoahâb ǃûi-aogu ge ǃgâsade gu ra ǁkhāǁkhā o ra ǁgau, ǁîdi ǁkhāsib tsî ǂgomǂgomsasib tsîna gu ra mû ǃkhaisa.

ǂGui ǃgâsadi ge ǀhaohâb ǃûi-aoga xu di ra hō ǁkhāǁkhāde ra sîsenū, î di ǃnāsana hui. ǂGui ǃgâsadi ge om sîsengu ǃnâ di ra hō ǂansa ra sîsenū tsî ǃnāsana ra hui ǁîn omde oms ǀkha tsūkēǃgâgu khaoǃgâ. Nau ǃgâsadi ge aoǁnâ sîsenni hîna di ge ǁkhāǁkhāsen-e ra sîsenū î di nau ǃgâsana hui în ǁîn tsîna ǁkhā sîsenne dī. ǃGâsade mati ra tsâ ǀhaohâb ǃûi-aogu hîna ge ǁkhāǁkhādi gu xa? Jennifer ti ǀon hâ ǃgâsas ge ra mî: “ǀGui saali om sîsenga ta gere dī, ob ge mûǂam-aoba ǁaeba ge ǁama ǂui îb ǁkhāǁkhāte. ǁÎb ge sîsen ta ra ǀgauba mû tsî ge koate. Kaise ta ge ǁîb ǀkha sîsensa ge ǀnam i. ǁÎb ge ǃgôahe tsî ǂgomǃgâsase gere tsâ kaite.”

ǃGÂIB HÎNA DA RA HŌB ǃGÂSADE OMARIS KHOE-I KHAMI HÂ-Ū SA XU

Jehovab khami da ge sida ǃgâsade a ǀnam. ǁNā-amaga da ge ǁîde sida omaris khoe-i khami ra hâ-ū. (1Tim. 5:1, 2) ǁÎde ǃgôa tsî da ge ǁîdi ǀkha ǀguiba ǃoabas ai kaise a ǂnīsa. Tsî da ge a ǂkhî, ǀnam-e tsî di ga ǃgôaǃgâhe di ra ǃkhaisa hōǃâ o. Vanessa ti ǀon hâ ǃgâsas ge ra mî: “Kaise ta ge Jehovaba ra gangan ǁîb ǀapeǂhumis di ǃâ ta asa, kaise ra ǂkhâǃnâte ǃgâsan xa ǀoa hâsa.” Taiwanni ǃnâ hâ ǃgâsas ge ra mî: “Kaise ta ge ra gangan Jehovab tsî ǁîb ǀapeǂhumis ǀgapi ǃgôasiba tarekhoese tsî sise tsâsigu tsîna ra māsa. Nēs ge ti ǂgomsa ra ǀgaiǀgai tsî ta ge Jehovab ǀapeǂhumis ǃâ ta a ǃkhais di aiǂhanuba kaise ra ǃgôaǃgâ.”

Matikōseb Jehovaba a ǂnīsa ǂgomǂgomsa Xristeǁî aogu, tarekhoede ǀnam tsî ra ǃgôa ǀgausab ga mû o ǁîb khami. (ǂKhm. 27:11) “ǂGui aorekhoegu ge nētsē ǃhūbaib ai tarekhoede ǃgôasiba ūhâba tama,” tib ge Benjamin ti ǀon hâ ǀhaohâb ǃûi-aob Skotlandi ǃnâ ra hâba ra mî. “ǁNā-amaga ge ge ra ǂhâba, î di sige ǃgâsade sali tawa ǀnamhe tsî ǃgôahe hâse nî tsâsa.” A ge hoa ge ǁkhā ge a-e dītsâ tsî Jehovaba ǁgae tsî sige ǃgâsade anudi hâ ǃgôasiba ǁgau.—Rom. 12:10.