ǃGarise ra sîsen khoe-i ge ǀopesa tama. ǁÎ-i ge ǃgarise sîsen tsî ra kōǃgâsen. Tsî ǂhâsib ǃnâ hâ khoen tsîna ra hui. ǁÎn ge ǃgarise sîsen tama hâ în koahe.

Nēsa da ga ǁnâu tama i xawe. Ûib ǃnâ da ge ǃeream na ūhâ. Nē da ûi ǃnâ hâ ǃhūbaib ǃnân ge ǂgui khoena ǃgarise sîsen ǂgao tama hâ. Xawe ǃgarise sîsens ge ǃgâi ǃēde ra mā​.—Aoǁnâ-aob 3:​13.

“Tita ge ge ǁkhāǁkhāsen, ǃgarisets ga sîsen o, ots ge ǃgâise ra tsâ. ǁNā tsâsib ge ge hui te, î ta ǃgarise sîsensa ǀnam. ǃGari sîsen-aots ga o, ots ge ǃgâi ǀonsa ra ombasen.”​—Reyon.

ELOBMÎS DAOǁGAUDI: “Mâ ǃgom sîsenni hoab ǃnâs ge ǃnāǂamsiba hâ.”—ǂKhoamîdi 14:23.

ǃGâi mûǂuiba omkhâi re sîsenni xa, saora xūna saos ǃnâ-ū.

ǁKhāǁkhāsen re, xūna ǃamkuse dīsa. ǂKhari sîsenni, tamas ka io skol sîsene du ga dī o, ǂgaob hoab ǀkha dī re. Tsî ǀkhara sîsene du ga dīs hoasa, ǁguiǂgāsen re. Xū-e du ga ǃamkuse dī o. O ǀgauga ôa re, ǃnāsase ǁnāsa dīsa. ǃHaese tsî ǃgâise dīsa. Tsî du ge sîsene du ra ǂan khami nî ǁkhoaxabahe.

ELOBMÎS DAOǁGAUDI: “Aob, hîna sîsenni âb ǃnâ a ôasaba mûts ge? ǁÎb ge gao-aogu di ais aiǃâ nîra mâihe; ǁkhoatsama khoegu di ais aiǃâb ge mâihe tide.”​—ǂKhoamîdi 22:29.

ǃNāsan ge hâ ûib xa. Sadu ra dī xūna du ga ǃamkuse dī o, o du ge ǀnî khoena ǃgâiba a hauba ǁkhā. Aiǁgause, oms tawa du ga ǃgarise sîsen o. O du ge omaris ǃnâ hâ khoen sîsene ra supusupu.

ELOBMÎS DAOǁGAUDI: “Mās ge ūs ǃgâ-ai a ǃgâi.”​—ǃNaeǃkhaidi 20:35.

ǃNāsase dī re. Tā ǂkharirose ǀgui sîsen ǂgao re. Xawe ǃnāsase sîsen re. ǁNē ǀgaub ǃnâts ge sa ûiba ra ǂgaeǂgui. Tā ǁgarihe ra khami tsâ re, ǃnāsase dīs ǃgao. Xawe ǂhâba du ra amaga ǁnāsa dī re.​—Mateub 5:41.

ELOBMÎS DAOǁGAUDI: “Xawe sa mā-ams ose xū-e dīsa ta ǂgao tama go hâ i, îs sa ǃgâidīsa tā ǁgaris ase ī, îs māsenxase ī.”​—Filemonni 14.

ǀNōsa mûǂuiba ūhâ re. ǃGarise ra sîsen khoen ge ǀopesa tama. Tsîn ge gaxu ǁaeba hoaǁae sîsen tama hâ. ǁîn ge ǀnōsa mûǂuisa ūhâ. Tsî a ǁkhaoxabahe sîsensa, xawe sâs tsîna ra dī.

ELOBMÎS DAOǁGAUDI: ‘ǃOmǃnāb hîna ra sâb ge ǃgâi, ǃomkha sîsenni xa ǀoa hâb xa.’​—Aoǁnâ-aob 4:6.