1. Mâ ǀkhaega da Jesuba xu ra ǃkhōǃoa?

 JESUB khami ge māxa i khoe-i ge a ǀkhai. ǃHūbaib aib ge hâ i o, ob ge buruxa dīgu ǃnâ-ū khoena gere hui. (Luk. 9:​12-17) Kai ǀkhaeb hînab ge māb ge ǁîb ûiba sida ǃgao māsa. (Jhn. 15:13) ǁŌba xub ge khâi ob ge Jesuba noxopa aiǃgû tsî ra hui da. Mîmâib ge khamib ge Jehovab ai ǃanu gagaba ge ǂgan î da ǁkhāǁkhāhe tsî ǁkhaeǂgaohe. (Jhn. 14:​16, 17; 16:13) ǀHaohâb ǀhaodi ǃnâ-ūb ge Jesuba ǁîb ǁkhāǁkhāsabena ǃhūbaib ǂhawase ra hui în ǁkhāǁkhāsabedī.—Mat. 28:​18-20.

2. Efeseǁîn 4:​7, 8 ǃnâ ra mîhe “māde” ham-e ǃoa ra ǁnaeǁgau?

² Jesub ge ǀnî hâ ǀkhaeb tsîna ge mā da. Apostel Paulub ge ge xoa, Jesub ge ǀhomma ǃoab ge īs khaoǃgâ khoega “māde” a māsa. (Khomai re Efeseǁîn 4:​7, 8 sa.) Paulub ge ge mî Jesub ge nē khoega a māsa, i gu ǀhaohâga ǃkharagaǃnâgu ǀgaugu ǃnâ hui. (Efe. 1:​22, 23; 4:​11-13) Nē ‘mādi’ ge nētsē ǀhaohâb hui-aogu, ǀhaohâb ǃûi-aogu tsî ǃnarimâra mûǂam-aogu tsîna ǃkhōǂgā hâ. a Nē aogu ge ǀoasa kurusa ūhâ tama hâ, ǁnā-amaga gu ge ra dīsā. (Jak. 3:2) Xaweb ge Jesub Xristuba ǁîga ra sîsenū sida huisa, ǁîgu ge sidab ge mā ǀkhaega.

3. ǁGuiǃā re mati da hoa da nē khoega a ǂkhâǃnâ ǁkhā ǀgausa?

³ Jesub ge nē khoega ǂhâǂhâsa sîsen-e ge mā, ǁnās ge ǀhaohâba ǀgaiǀgaisa. (Efe. 4:12) Xawe da ge hoa da ǁîga a hui ǁkhā î gu nē ǂhâǂhâsa sîsen-e dī. Nēsa da ge sala oms ǀkha a ǀgopeǀnō ǁkhā: ǀNî khoen ge oms sîsen-e ra dī. Naun ge sîsen-aona ǂû-e sī-ūba tamas ka io ǀnî hâ ǀgaugu  ǃnâs tsîna ra hui. ǁKhā ǀgaub ǃnâ da ge ǀhaohâb hui-aogu, ǀhaohâb ǃûi-aogu tsî ǃnarimâra mûǂam-aogu tsîna a hui ǁkhā mî tsî da ra dī xūn ǃnâ. Hā re î da ǃgaoǃgâ mati da ǁîgu ra dī sîsen-e xu ra ǀama ǀgauba. Tsî mati da ǁîgu tsî Jesub hîna ge nē ǀkhaeba a ‘māda’ ba ǃgôaǃgâsiba nî ǁgau ǀgausa.

ǀHAOHÂB HUI-AOGU RA ‘HUI’ ǀGAUB

4. ǂGurokam ǁaeb Xristeǁîn ǁaeb ǃnâ ge hâ i ǀhaohâb hui-aoga taena gere dī?

⁴ ǂGurokam ǁaeb ǃnâ gu ge ǃnî ǃgâsaga ǀhaohâb hui-aogu ase gere ǁgaumâihe. (1Tim. 3:8) ǁÎgu ge Paulub ge 1 Korinteǁîn 12:28 ǃnâ a mîgu hîna ge nauna gere ‘hui’ ga ǃoa gere ǁnaeǁgau. (1Kor. 12:28) ǀHaohâb hui-aogu ge ǂhâǂhâsa sîsen-e ra dī. ǁNās ge ǀhaohâb ǃûi-aoga ra hui î gu ǃgâsana ǁkhāǁkhā tsî ǂkhâǃnâs ai ǂâisa ǂnûi. Aiǁgause, ǀhaohâb hui-aogu ge xoade xoaǁnâs ǀkha gere hui tamas ka io xoas ǃaroma gere sîsenūhe xūna gere ǁama.

5. ǀHaohâb hui-aoga mâ sîsen-e nētsē ra dī?

⁵ ǀNî ǂhâǂhâsa xūn ǀhaohâb hui-aogu sadu ǀhaohâb ǃnâ ra dīn xa ǂâi re. (1Pet. 4:10) ǁÎgu ge ǀhaohâb mariǁkhōgu tamas ka io aoǁnâǃnâhe ra ǂkharis ǂkhanin tsî ǃgâsana ǂkhanina mās ǃnâs tsîna ra ǁgaumâihe. ǁÎgu ge audio tsî vidio xūn ǀkha ra sîsen, sali tawa ra ǀkhīna ra ǁkhoreǁhare tamas ka io sala kōǃgâs ǀkhas tsîna ra hui. Nē ǂhâǂhâsa sîsenan ge ra īǁkhā kai î-i ǀhaohâba ǃgâi ǀhaode ūhâ tsî aoǁnâ sîsen-e ǃgâi ǀgaub ǃnâ dīhe. (1Kor. 14:40) ǁNās ǂamai gu ge ǀnî ǀhaohâb hui-aoga, Ûib tsî aoǁnâ sîsenni ǀhaos tawa ǃhoade mā tsî wekheb ǀams ais tsîna ǃhoade ra mā. ǀHaohâb hui-aob ge ǀnî ǁaega ǁgaumâihe ǁkhā îb aoǁnâ sîsen-i mûǂam-aoba hui. ǀNî ǁaegab ge ǀhaohâb ǃûi-aoba ǀhaohâb hui-aoba a ǂgan ǁkhā îb ǃgâsanab ga sī ǂkhâǃnâ o sao-aibi.

6. Tae-i ǃaroma da ǀhaohâb hui-aogu ra dī ǃgari sîsen-e ra ǃgôaǃgâ?

⁶ ǀHaohâb hui-aogu ra dī sîsen ga xu i mati ǀhaohâba ǃgâiba ra ǀama? “ǀHaohâb hui-aogu ǃgari sîsen-i ǃaroma ta ge ǀhaodi xa kaise ǃgâibahe” tis ge Beberli,  b ti ǀon hâ ǃgâsas Boliviab ǃnâ ra hâsa ra mî. “ǁÎgu sîsen-i ǃaroma ta ge ǁnae, ǃeream, ǃhoade ǃgâ tsî vidion tsî ai-īsina xu ǁkhāǁkhāsen ǁkhā. ǁÎgu ge ra kōǃgâ î-i ǀhaode ra hâǃnâna ǃnorasa tsî gu ge ǀhaodi ai a hâ ǁoana ra hui în Zooms ǃnâ-ū ǀhaosa hâǃnâ ǁkhā. ǀHaos khaoǃgâ gu ge ǃanu, marin ǀkha hui tsî ra kōǃgâ î da ǂhâ da hâ ǂkhanina ūhâ. Kaise ta ge ǁîga ra ǃgôaǃgâ.” ǀHaohâb ǃûi-aob taras Leslies hîna Kolombiab ǃnâ ra hâs ge ra mî: “Ti aob ge ǀhaohâb hui-aogu ra dī ǃkharagagu sîsenga xu ǂkhâǃnâsa ra hō. ǁÎgu oseb ge ǂgui sîsen-e ga ūhâ. ǁNā-amaga ta ge ǁîgu ôasasib tsî māsenxa huib tsîna ra ǃgôaǃgâ.” Hoa da ge kaise ra gangan ǀhaohâb hui-aogu ra dī sîsengu ǃaroma.—1Tim. 3:13.

7. Mati da sida ǀhaohâb hui-aoga ǃgôaǃgâsiba a ǁgau ǁkhā? (Ai-īsiba mû re.)

⁷ Sida di ǀhaohâb hui-aoga da ga ǃgôaǃgâ xawes ge Elobmîsa ra ǂkhâǃnâ da, î da ǁîga noxopa ǁgau “ganganxa” da a sa. (Kol. 3:15) Krzysztof ti ǀon hâ ǀhaohâb ǃûi-aob Finlandi ǃnâ ra hâb ge ǁîb ǃgôaǃgâsiba saura ǀgaub ǃnâ ra ǁgau, “karkies tamas ka io sms ǃnâ ta ge xoas tamas ka io ǀhaohâb hui-aob go dī tsî a ǂkhâǃnâte xū-i xa ra xoa. Tamas ka io tae-i ǃaroma ta ǁîb go dī sîsen-e ra ǃgôaǃgâsa.”  Paskali tsî Jael hâra ge New Kaledonias ǃnâ ra hâ. ǁÎra ge ǀhaohâb hui-aoga ra ǀgoreba. Paskali ge ra mî: “Kaisem ge sida ǀhaohâb hui-aoga ra ǀgoreba tsî Jehovaba ra gangan tsî ra ǂganbi îb ǁîgu ǀkha hâ tsî ǁîga hui.” Jehovab ge ǁnāti ī ǀgorede ra ǁnâu, tsî i ge hoa ǀhaohâba ra ǀama.—2Kor. 1:11.

ǃGARISE “SADU ǁAEGU RA SÎSEN” ǀHAOHÂB ǃÛI-AOGU

8. Tae-i ǃaromab ge Pauluba mî ǁkhā i ǂgurokam ǁaeb ǀhaohâb ǃûi-aogu ge ǃgarise gere sîsensa? (1 Tesalonikaǁîn 5:​12, 13)

⁸ ǂGurokam ǁaeb ǀhaohâb ǃûi-aogu ge ǀhaohâb ǃnâ ǃgarise gere sîsen. (Khomai re 1 Tesalonikaǁîn 5:​12, 13 sa; 1Tim. 5:17) ǁÎgu ge ǀhaohâba “ǂgaeǂgui,” ǀhaode dī tsî mîǁguiga gere dī. ǃGâsan tsîna gu ge ǀnamxaǃnâ ǁnamade gere mā, în ǀgaisase hâ ǀgara ǁîn ǂgoms ǃnâ. (1Tes. 2:​11, 12; 2Tim. 4:2) Nē khoegu ge ǃgarises tsîna gere sîsen î gu ǁîgu omaride ǂūmâ tsî ǁîgu ǂgoms tsî ǀhōsagusis Jehovab ǀkha gu ūhâs tsîna ǀgaisase ūhâ ǀgara.—1Tim. 3:​2, 4; Tit. 1:​6-9.

9. Mâ ǀnî ǁgaumâide gu ǀhaohâb ǃûi-aoga nētsē ūhâ?

⁹ ǀHaohâb ǃûi-aogu ge nētsē ǂgui xūna ra dī, ǃgâiǂhôasa gu ge ra aoǁnâ. (2Tim. 4:5) ǃGâi aiǁgause gu ge ī ôasase aoǁnâ sîsen-e dīs ǃnâ. Sida ǂkharis ǃnâ gu ge aoǁnâ sîsen-e ra kōǃgâ tsî gu ge ra hui da î da ǃgâise aoǁnâ tsî ǁkhāǁkhā. ǀKhomxaǂgao tsî ǀkhā-e ǁhûi tama ǀgoraǃgâ-aos tsîna gu ge ī. Khoe-i ga ǀhaohâb ǃnâ ǀgaisa ǁoreba dī, o gu ge ǀhaohâb ǃûi-aoga ǁî-e ra hui î-i ǁî-i ǀhōsagusisa Jehovab ǀkha ǁkhapa omkhâi. ǁKhā ǁaeb ai gu ge ǀhaohâba ǃanuse ra ūhâ. (1Kor. 5:​12, 13; Gal. 6:1) Hoan ǂamai gu ge ǃûi-aogu ase a ǂansa. (1Pet. 5:​1-3) ǃGâise aiǂhumisa ǃhoadi, Elobmîs ai ǃgaoǃgaosade gu ge ra mā. ǃGarise gu ge ra dītsâ î gu hoa khoena ǀhaohâb ǃnâ ǂan tsî ǁîna omdi ai sari. ǀNî ǀhaohâb ǃûi-aogu ge salga om tsî ra dī-ūnu, ǀkharib kai ǀhaode aiǂhomi tsî ǀaeǃkhōdi ǀkha ra sîsen komites ǃâ. Tsî ǀae-oms ǃnâ ǁgoe ǃgâsana ra sari nau ǁgaumâidi xōǀkhā. ǀHaohâb ǃûi-aogu ge ǃgarise ra sîsen sida ǃaroma.

10. Mâ ga a ǀnî ǃaroma ǃgôaǃgâsiba da a ǁgau ǁkhā ga ǃgarise ra sîsen ǀhaohâb ǃûi-aogu ǃaroma?

¹⁰ Jehovab ge ge mîmâi ǃûi-aogu ǃgâise nî kōǃgâ dasa tsî da “ǃaruǀî ǃao tide tsî ǃhuri” tidesa. (Jer. 23:4) Johanna ti ǀon hâ ǃgâsas Finlandi ǃnâ ra hâs ge mamasas ge ǀaesens khaoǃgâ ǁnāsa ge hōǃâ. ǁÎs ge ra mî: “Kaise i ge a ǃgombate tsâ ta ra ǀgaub xa ǃhoasa. Xaweb ge ǃgâise ta ǂan tama ǀhaohâb ǃûi-aoba tita ǀkha ge ǃnūǃnâxa i. Tita ǀkha ǀgore tsîb ge Jehovab a ǀnamte ǃkhaisa gere hōhōǃnâ te. ǁÎb ge mî xū-e ta ge ǂâihō tama, xawe ta ra ǂâihōs ge ǃnorasase ta ge gere tsâ. ǂGom ta ge ra Jehovab ge ǁîba tita ǃoa a sîsa, ǂhanu ǁaeb ai.” ǀHaohâb ǃûi-aoga mati sadu ǀhaohâb ǃnâ ge hui du?

11. Mati da ǃgôaǃgâsiba ǀhaohâb ǃûi-aoga a ǁgau ǁkhā? (Ai-īsiba mû re.)

¹¹ Jehovab ge ra ǂhâba î da ǀhaohâb ǃûi-aoga ǃgôaǃgâsiba ǁgau ǁîgu ‘sîsen-i’ ǃaroma. (1Tes. 5:​12, 13) Henriettas, Finlandi ǃnâ ra hâs ge ra mî: “ǀHaohâb ǃûi-aogu ge māsenxase nauna ra hui xawes ge nēsa ǂâibasen tama ǁîgu ǃnāsa ǁaeb tsî ǀgaib tsîna ūhâsa. Tamas ka io gu ǁîgu ûib ǃnâ ǃgomsiroga ūhâ tamasa. ǀNî ǁaegu ai ta ge ǁîga ra mîba, ‘ǂan i du go ī kaise du ge a ǃgâi ǀhaohâb ǃûi-ao. ǁNā-i ǀgui-e ta ge go ro mîba du ǂgao.’” Turkib ǃnâ ra hâ ǃgâsas Sera ti ǀon hâs ge ra mî: “ǀHaohâb  ǃûi-aogu ge ǂkhâǃnâhesa ǂhâhâ î gu ǁîgu sîsen-e dī ǀgara. ǁÎga da ge karkisa xoaba, ǂûǀhaos ǃaroma ǁkhau tsî ǁîgu ǀkha ǀguiba aoǁnâ sîsen-e a dī ǁkhā.” ǀHaohâb ǃûi-ao-e hâ ǃgôaǃgâ du ra-e dīb ra ǃgari sîsen-i ǃaroma ǀhaohâb ǃnâ? Dīb ra xū-i ǃgao du ra ǃgôaǃgâ bi ǃkhaisa ǁgaubi re.—1Kor. 16:18.

ǃNARIMÂRA MÛǂAM-AOGU ǂKHÂǃNÂS

12. Mâ ǂnûiǂgāsa ǂgurokam ǁaeb Xristeǁîna gere hui? (1 Tesalonikaǁîn 2:​7, 8)

¹² Jesub ge ǀnî khoega ge ǁgaumâi î gu ǀhaohâba ǀnî ǀgaugu ǃnâ hui. ǁÎb daoǁgaus ǃnāga i ge ǀhaohâb ǃûi-aoga Jerusalems ǃnâ Paulub, Barnabasi tsî nau gu tsîna ǃnarimâra mûǂam-aogu ase gere sîǂui. (ǃNǃkh. 11:22) Tae-i ǃaroma? ǁKhā ǃaromas ǀhaohâb hui-aogu tsî ǀhaohâb ǃûi-aogu gere ǁgaumâihes î gu ǀhaohâga ǀgaiǀgai. (ǃNǃkh. 15:​40, 41) Nē aogu ge ǂgui ǁguibade ge dī, î gu nē sîsen-e dī. ǀNî ǁaegu ai gu ge ǁîgu di ûiba ǁkhōǁkhōsa mâsib ǃnâ ge mâi, î gu nauna ǁkhāǁkhā tsî ǂkhâǃnâ.—Khomai re 1 Tesalonikaǁîn 2:​7, 8 sa.

13. ǃNarimâra mûǂam-aoba mâ ǃereamde ūhâ?

¹³ ǃNarimâra mûǂam-aogu ge kaise ra ǃnarimâ. ǀNî gu ge ǂgui īrga ra ǃnari î gu ǀhaohâga sī sari. Mâ wekheb hoaba i ge ǃnarimâra mûǂam-aoba ǃhoade mā, ǃgâsana omdi ai sari, aimâba-aon ǀhaosa dī, ǀhaohâb ǃûi-aogu ǀkha ǀhaosa ūhâ tsî aoǁnâ sîsen-i ǀhaode ra dī. ǁÎb ge ǃhoadi, ǀkharib kai ǀhaodi tsî ǂkharis kai ǀhaodi tsîna ra aiǂhumi. ǁÎb ge aimâba-aon skola ǁkhāǁkhā, ǁîb ǂkharis ǃnâ hâ aimâba-aon ǀkha ǀo-aisa ǀhaosa ūhâ tsî ǁnān ǂam-ai ǀnî hâ ǂhâǂhâsa xūn tsîna ra kōǃgâ ǁnâub berosa xub ra hōna.

14. Tae-i ǃaroma da ǃgarise ra sîsen ǃnarimâra mûǂam-aoga ra ǃgôaǃgâ?

 ¹⁴ ǀHaohâga mati ǃnarimâra mûǂam-aogu ra dī ǀō-aisa sîsen-e xu ǃgâiba ra ǀama? ǃNarimâra mûǂam-aob saridi xab ge Turkib ǃnâ ra hâ ǃgâsaba saorase ra mî: “Mâ saris hoas ge ra ǂkhâǃnâte î ta ǃnāsa ǁaeba sîsenū ti ǃgâsana huis ǃnâ. ǂGui ǃnarimâra mûǂam-aoga ta ge ge ǀhao-ū, xaweb ge ǀguib tsîna kaiseb a ǀhape tamas ka iob tita ǀkha ǃhoa ǂgao tama khami ge tsâ kaite tama hâ i.” Johannas, ais ai da goǃhoaǃgaos ge ǃnarimâra mûǂam-aob ǀkha aoǁnâ sîsen-i ǃnâ gere sîsen, xawe ra ge khoe-e oms ai ge ǀhao-ū tama hâ i. Xawes ge ra mî: “ǁNā tsēsa ta ge tātsē ǀuru tide. Ti ǃgâsara ge omsa xu ge doe tsî ta ge kaise gere ǁkhore ra. ǃNarimâra mûǂam-aob ge ge ǂkhâǃnâte tsî ge huite î ta mû Jehovab di ǃoabas ǃnâ i ǃnūguse hâsa ǁaerob dis ǀguisa isa. Tsî da ǀasa ǃhūbaib ǃnâ ǂguiǃēde nî ūhâsa ǀguiba hâs tisa.” ǂGui da âda ge ra ǃgôaǃgâ mati gu ge ǃnarimâra mûǂam-aoga hui da ǀgausa.—ǃNǃkh. 20:37–21:1.

15. (a) 3 Johaneb 5-8 ǃNâ da ra khomai khami da mati ǃgôaǃgâsiba ǃnarimâra mûǂam-aoga ǁgau ǁkhā? (Ai-īsiba mû re.) (b) Tae-i ǃaroma da ǃgôaǃgâsiba ǃgarise ǀhaohâb ǃnâ ra sîsen ǃgâsagu ǁgaumâihe hâgu tarade a ǁgau ǁkhā tsî mati da ǁnāsa a dī ǁkhā? (“ ǁÎgu tarade ǂâihō” ti hâ boksisa mû re.)

¹⁵ Apostel Johaneb ge Gajuba ge ǂkhâǃnâ îb sari ra ǃgâsaga ǃhaokhoeǃkhōǃoaxasiba ǁgau tsî ǁîna “Eloba i a ǃgâiba” khami ǃgûs an ǃnâ hui. (Khomai re 3 Johaneb 5-8 sa.) ǀGui ǀgaub ǁnāsa da a dī ǁkhāb ge ǃnarimâra mûǂam-aoba ǂûǀhaos ǃaroma ǁkhausa. ǀNî hâ ǀgaub ǁîba da a ǂkhâǃnâ ǁkhāb ge aoǁnâ sîsen-i ǀhaode hâǃnâsa. Leslies ais ai da go ǃhoaǃgaos ge ǁîs ǃgôaǃgâsiba ǀnî hâ ǀgaugu ǃnâs tsîna ra ǁgau. “ǀGore ta ge ra îb Jehovaba ǁîn di  ǂhâsiga khōǃgâ” tis ge ra mî. “Ti ao ham ge ǁîna sīǂkhanide ge xoaba tsî ge mîba nî matikōse i ǁîn saride ra hui mîsa.” ǂÂis ǃnâ ūhâ re ǃnarimâra mûǂam-aogu tsîn ge ǃgomsiga ra hōǃâ tsî sida khami ra tsau. ǀNî ǁaegu ai gu ge ǀaesen, xūn xa ǂâiǂhansen tsî ra ǂkhabuǂâi. ǀNî ǁaegu ai gu ge sadu ǃgâi mîdi tamas ka io ǂkhari ǀkhaeba ǃnarimâra mûǂam-aob ǀgoredi ǃereams ase īǁkhā.—ǂKhm. 12:25.

NĒ “MĀDE” DA GE ǂHÂHÂ

16. ǂKhoamîdi 3:27 ǃoagu i ǃgâsaga mâ dîna a dîsen ǁkhā?

¹⁶ ǃHūbaib ǂhawase da ge ǃnāsa ǃgâsaga ǂhâhâ nēti ī “māde” ūhâ ga. ǁĀǁnâsa ǃgâsats ga o, “ǁnāsa dīs di ǁkhāsibats” ūhâ? (Khomai re ǂKhoamîdi 3:27 sa.) Māsenxa its a its ǀhaohâb hui-aob ase ǁgaumâihe? ǀNaits ga ǀhaohâb hui-ao o, māsenxa its a ǃgâsana ǀhaohâb hui-aob ase ǃoabasa? c ǀKharaǀkharanats sa ûib ǃnâ dī hâ its Gaosib aoǁnâ-aon skoli ǃaroma xoaǂgāsen? ǁNā skoli ge nî ǁkhāǁkhā tsi its ǃnāsase Jesub xa sîsen-ūhe. Nē xūnats dīhō ǁoa khamits ga tsâ o, Jehovaba ǃoa ǀgore re. ǁÎb ǃanu gagaba ǂgan re its huihe mâ ǁgaumâi i hoa-i māhets ra i ǃnâ.—Luk. 11:13; ǃNǃkh. 20:28.

17. Nē “māde” tae-e ra ǁgau sida Gao-aob Jesub Xristub xa?

¹⁷ ǃGarise ra sîsen ǃgâsagu Jesub ge ‘mādi’ ase a ǁgaumâi gu ge ra ǁgau Jesub ǀuniga tsēdi ǃnâ ra ǂgaeǂguisa. (Mat. 28:20) Kaise da ge ra ǃgôaǃgâ ǀnamxaǃnâ tsî māxa Gao-aoba da ūhâsa, ǁîb ge ǂan tae-e da ǂhâhâsa tsî ǃgâsaga ra māda î da huihe. ǃĒna ôa re i sadu ǃgôaǃgâsiba ǃgarise ra sîsen ǃgâsaga ǁgau. Tā ǀuru Jehovaba gangansa ǁîb “mâ ǃgâi tsî dīǀoaǀoasa mās” hoasa ra mā xui-ao.—Jak. 1:17.