1-2. (a) Mâ xūn xan Jehovab ǃoaba-aona ra ǂâiǂhansen? (b) Nē ǁkhāǁkhāǃâs ǃnâ da tae-e nî ǃhoaǃgao?

 HOA da ge kairan tsî ǂkham-an tsîna ǃkhōǂgā hâse ra îganǀgē Jehovab aiǃâ da a ama-aisa. a Aiǁgause, ǂkhamkhoe-i ge ǀnîsi a ǂâi ǁkhā Jehovab ǁî-i ǀkha amase ǁae hâsa. ǁNās ǀkha i ge a ǀū Jehovab ǁî-i ǀkha ama ǁae hâsa. Nē aiǁgaus xa ǂâi re, ǀnî ǂkham ǃgâsab ge Jehovaba ǂgurose ǁîb ûib ǃnâ ge mâi, mari-e kurus xa. Xaweb ge kaisis ǃnâ go mûǂan mari-eb ǂhâ hâsa îb omarisa kōǃgâ. ǁÎb ge ǀnîsi ǂkhamsis ǃnâb ge dī mîǁguib ge ǂhanu is xa ra ǂâi tsoatsoa. Tamas ka ios ge kaira ǃgâsas tsîna ra ǂkhâbuǂâi ǀgaibas ūhâ tama amaga. ǂKhams ge ī os gere dī hō xūnas ge nēsi dī hō tama. Sao ra dîde du dîsen tsâ hâ: ‘Jehovaba tita ǀkha ǁae hâ? Jehovaba dība bi ta ge ǁguibāte ra ǃgôaǃgâ? Jehovab xa ta noxoba sîsenūhe ǁkhā?’

² Nē dîdi ǃereamde du ga hō tama ī, os ge nēsa nî īǁkha kai sida ǂgomsa Jehovab ǃnâ ǂoaǃnâ tsî da ǁîba a ǃoaba ǀû ǁkhāsa. Nē ǁkhāǁkhāǃâs ǃnâ da ge nî ǃhoaǃgao, matis Elobmîsa nî hui dasa, (1) Jehovab sida ǀkha ǁae tama ti ta ga tsâs, (2) dī da ge mîǁguigu ǃgâi tamas, (3) tsî da ga tsâ Jehovab xa da sîsenūhe ǁoasa.

 TAE-E NÎ HUI DA ÎGANǀGĒ DA GA O?

3. ǂÂiǂhansen kai da ra dîde da ga ūhâ o da tae-e nî dī?

³ Îganǀgē tamas ka io da ga dîde ūhâ, o i ge kaise a ǂhâǂhâsa î da ǃereamde Elobmîs ǃnâ ôa. Nēsa da ga dī, o i ge Jehovab ǃnâ da ūhâ ǂgoms tsî ǁîb ǀkha da ūhâ ǀhōsagusis tsîna nî ǀgai. Nēs ge nî hui da, î da “ǂgoms ǃnâ ǁaposase” mâ.—1Kor. 16:13.

4. Mati da “xūn hoana ra ǃâitsâ”? (1 Tesalonikaǁîn 5:21)

⁴ Khomai re 1 Tesalonikaǁîn 5:21 sa. Elobmîs ge ra mîba da î da “hoa xūna ǃâitsâ.” Nēsa da mati a dī ǁkhā? Xū-e da ga ǀū, o da ge Elobmîs tae-e nēs xa ra mîsa nî ôaǃnâ. Aiǁgause, ǂkhamkhoe-i hîna Jehovab ǁî-i ǀkha ǁae tama ti ra ǂâi i xa ǃgaoǃgâ re. Nē dîsab ôaǃnâ tamase nî ǁnāxū tsî nî ǂâi Jehovab ǁîb ǀkha ǁae tama ti? Hî-î, ǁîb ge Elobmîsa nî ǁkhāǁkhāsen tsî Jehovab amase ra ǂâiǀgauba nî ôaǃnâ.

5. Jehovaba xu da mati sida dîdi ǃereamde nî hō?

⁵ Elobmîsa da ga khomai, o i ge Jehovab sida ǀkha ra ǃhoa khami ī. Elobmîsa khomais xa da ge ǃnāsa-e nî dī, Jehovab sida dîde nî ǃereamsa da ga ǂhâba o. Xoade da ge nî ôaǃnâ, î da ǁnā dîdi ǃereamde hō. Nēsa dīs ǃaroma da ge Elobmîs ai ǃgaoǃgaosa ǂkhanin ǃnâ ôaǃnâde nî dī. (ǂKhm. 2:​3-6) Jehovaba ǃoa ǀgore tsî da ge nî ǂgan, îb hui da sida dîdi ǃereamte hōsa. Elobmîs tsoatsoadi tsî sida mâsib ǀkha a hui da ǁkhā ǃgāsasib tsîna da ge nî ôa. ǃGâiba da ge nî hō sida khami ī mâsiba gere ǃkharuǃnâ khoen xa Elobmîs ǃnâ khomaisa.

6. ǀHaode mati ra hui da îganǀgēs tsâsiga dansa?

⁶ ǀHaodi tawa da ge Jehovab sida ǀkha ra ǃhoa ǀgauba ra “ǁnâu.” Hoaǁae da ga ǀhaode hâǃnâ, o da ge ǃhoas tamas ka io ǃereamdi ǃnâ-ū, sida ūhâ dîdi ǃereamde a hō ǁkhā. (ǂKhm. 27:17) Nēsi da ge nî ǃhoaǃgao mati da saora dîdi ǃereamde a hō ǁkhā ǀgausa.

JEHOVAB SATS ǀKHA ǁAE TAMA TITS GA ǂÂI OS?

7. Mâ dîden ǀnîna a dî ǁkhā?

⁷ Dîsen tsâ îts hâ, ‘Jehovaba tita ǀkha ǁae i hâ?’ ǂHâǂhâsa tamats hâ tits ga tsâ, ots ge ǃhūbaib Kuru-aob ǀkhats a ǀhōsa ǁoa ti a tsâ ǁkhā. Gao-aob Davidi tsîn ge ti gere tsâ. ǁÎb ge ge buru mûǂan i ge o Jehovab khoen ǀkha ǁae hâsa. ǁÎb ge ge mî: “ǃKhūtse tare xū-e khoe-e ots ra ǁî-i xa ǂâi? Tsî khoen ôa-e, ots ǁî-i ai ǂâisa ǂnûi?” (Psa. 144:3) Mâpats nē dîs di ǃereamsa a hō ǁkhā, “Jehovaba mâ khoe-i hoa-i ǀkha ǁae hâ?”

8. 1 Samueli 16:​6, 7, 10-12 ǃoagub Jehovaba tae-e khoen ǃnâ ra mû?

⁸ Elobmîs ge ra ǁkhāǁkhāda, Jehovab ǁnān hîna xū tamase ra mûhena ra ǃgaoǃgâsa. Aiǁgause, Jehovab ge Samuela ge sî îb Isaib ǀgôaga xu ǀgûiba gaob ase ǁhûi. Isaib ge 8 ǀgôaga xu 7 ǀgôagu ǀguiga ge ǂgai tsî Davida ge ǂgai tama hâ i, ǂkham-i ge ī amaga. b Xawe Jehovab ge Davida ge ǁhûi hâ i. (Khomai re 1 Samueli 16:​6, 7, 10-12 sa.) Jehovab ge ge ǂan-i Davidi a hamsa. ǁÎb ge ge ǂan-i nē khoeb kaise a ǀnambisa.

9. Tae-i ǃaroma da nî ǂgomǃgâ Jehovab sida ǀkha ǁae hâsa? (Ai-īsiba mû re.)

⁹ Jehovab ge ǀnai sats ǀkhab ǁae hâ ǀgausa a ǁgau ǀgaub xa ǂâi re. ǁÎb ge ǃgâi  ǀapemāsa sa mâsib xa nî mā tsi. (Psa. 32:8) Nēs ge ra ǁgau, ǁîb satsa ǃgâise a ǂansa. (Psa. 139:1) Jehovab ǀapemāsats ga sîsenǂui tsî mû o matib ra hui tsi ǀgausa, ots ge a ǂgomǃgâ ǁkhā Jehovab sats ǀkha ǁae hâsa. (1Kro. 28:9; ǃNǃkh. 17:​26, 27) Jehovab ge ǁîba ǃoaba tsîts ra ǁnâuǀnambi ǀgaus ǁgūtsâde ra mû. ǁÎb ge sa ǃgâi ǀgauga ra mû tsî nēs ǀkha ra sa ǀhōsa kai ǂgao. (Jer. 17:10) Jehovab ge kaise nî ǂkhî ǁîb ǀhōsa kai ǂgao du ga o.—1Jhn. 4:19.

ǂHANU MÎǁGUIGATS GE DĪ TAMA HÂ I TITS GA TSÂ OS?

10. Dī da ge mîǁguigu xa da ga ǂâi, o da mâ dîde ǀnîsi a dîsen ǁkhā?

¹⁰ ǀNîn ge ǃkharu ge ǁaen ge dī mîǁguigu xa ǂâi tsî ra îganǀgē ǃgâi mîǁguigan ge dī tama hâ isa. ǀNîsin ge ǃgâise ra mātare-e sîsen-e ge ǁnāxū în Jehovaba ǀoasase ǃoaba, nēs ge kuriga ǃkharu hâse ge ī. ǁÎn xa ge ǀkhara mîǁguiga dī khoen xan ge ǀnîsi a ǂâi ǁkhā, hîna mari-e ūhâ tsî ǃgâi ûiban ūhâ khami ra mûsena. ǁÎn ge ǀnîsi nî dîsen: ‘Jehovaba ta ge dība mîǁguiga ge ǂhanu-i? Tamas ka io ta ga ǃgarise sîsen hâ î ta ǂâusa mari-e ūhâ?’

11. Psalmdi 73 xoa-aoba tae-i xa gere ǂâiǂhansen?

¹¹ Sadu tsîn ga ǁkhā dîde ūhâ, o ǃgaoǃgâ re Elobmîs ge tae-e Psalmdi 73 xoa-aob xa a mîsa. ǁÎb ge Jehovaba ǃoaba tama khoen hîna ge ǃgâi ǂurusib, ǃkhūsib tsî ǃgomsinan ūhâ tama khami gere ǁgausena ge mû. (Psa. 73:​3-5, 12) ǁÎn ǁkhoaxase ra ûi ǀgaubab ge mû, ob ge Jehovaba ǃoabas mîǁguib ge ǃgâi tama hâ-i ti gere tsâ. ǁÎb ge “tsēs hoasa” nē xūn xa gere ǂâiǂhansen. (Psa. 73:​13, 14) Matib ge nē ǃgâi tama ǂâiǀgauba sîsenǂam?

12. Psalmdi 73:​16-18 xoa-aoba mati ǁîb di ǁgai ǂâiǀgauba ge sîsenǂam?

 ¹² Khomai re Psalmdi 73:​16-18 sa. Nē psalmdi xoa-aob ge Jehovab tempela ǃoa ge ī. Jehovab khoen ǁaegub ge ǃgāsase ge ǂâi ǁkhā i. ǁÎb ge ge mûǂan, khoen ge ǃgâi ûiban ūhâ khami gere mûsen xawe ǃâubasensa ūhâ tama hâ isa. ǁNās xab ge ǁîba ge ǂâiǂhansen ǀû, ǂgomǃgâb ge amaga Jehovaba ǃoabas a ǃgâi mîǁguisa. ǁÎb ge ge mîǁgui aiǃgû tsîb Jehovaba nî ǃoaba ǀgarasa.—Psa. 73:​23-28.

13. ǃKharuge mîǁguigu xats ga ǂâiǂhansen, ots tae-e dī ǁkhā? (Ai-īsiba mû re.)

¹³ Psalmdi xoa-aob khamits ge sats tsîna ǁnā ǂâiǀgauga sîsenǂam ǁkhā. Mâ ǀgaub ǃnâ? Ūts hâ ǃgâi xūn xa ǂâi re, nēs ge Jehovab xa ūǃoahes tsîna ǃkhōǂgā hâ. ǂÂis ǃnâ ūhâ re Jehovaba ǃoaba taman ge ǁîb huiba ūhâ tama. Jehovaba ǃoaba tama hân ge ǁkhoaxa ǁaeba ūhâs xa ǂhâǂhâsaba-e, ǃâubasensan ūhâ tama amaga. Sats ge nēsi ǀgui ǂgui ǀkhaega Jehovaba xu hō tide xaweb ge ǁîba ra mîmâi, ǂgui ǀkhaegats hānîǁaeb ǃnâ nî hōsa. (Psa. 145:16) Nēs xas tsîna ǂâi re. ǀŪts ge a sa ûib ga mati ī hâsa ǀnî hâ mîǁguigats ga dī hâ o. ǀGui xū-i ǃnâ da ge ǂgomǃgâsiba ūhâ ǁkhā: Elob tsî khoen tsîna ǀnams ai ǃgaoǃgaohe hâse da ga mîǁguiba dī, o da ge hoaǁae ǃgâiaǂgaoba ra māda xūna ūhâ.

ELOB SÎSENŪ TSI ǁOA TITS GA TSÂ OS?

14. ǀNî ǃgâsana tae-i ǃaroma xū taman hâ khami ra tsâ?

¹⁴ ǀNî ǃoaba-aon Jehovab din ge kairasis, ǃgâi tama ǂurusib tamas ka io  sorosi ǃnubusigu ǀkha ûis di mâsigu xa ra tsâǀkhāhe. Nēs ge ǁîna Jehovab aiǃân ǂhâǂhâsa tama khami a tsâ kai ǁkhā. ǁÎn ge ǀnîsi a dîsen ǁkhā, ‘Jehovaba noxoba nî sîsenūte?’

15. Psalmdi 71 xoa-aoba mâ ǂgomǃgâsiba ge ūhâ i?

¹⁵ Psalmdi 71 xoa-aob ge ǁkhā mâsiga gere hōǃâ, ǀgaioǃnâseb gere tsâ amaga. ǁÎb ge ge ǀgore: “Ti ǀgaib ga toaxū te, o tā ǁnāxū te re.” (Psa. 71:​9, 18) ǀGaioǃnâseb gere tsâ xaweb ge psalmdi xoa-aoba gere ǂgomǃgâ Elobab ga ǂgomǂgomsase ǃoaba, ob nî huihesa. Nē psalmdi xoa-aob ge ge ǁkhāǁkhāsen, Jehovab ǁnān hîna ǁîn di ǁkhāsiba ra sîsenū tsî ǁîba ra ǃoaban ǀkha a ǂkhîsa.—Psa. 37:​23-25.

16. Mâ ǀgaugu ǃnâb Jehovaba kaira khoena sîsenū ǁkhā? (Psalmdi 92:​12-15)

¹⁶ Kaira du ga, o Jehovab sadu xa ra tsâ ǀgaub xa ǂâi re. ǁÎb ge nî hui du, ǁîba ǂgomǂgomsase ǃoabasa sorosise du ga ǂkhabusa xawe. (Khomai re Psalmdi 92:​12-15 sa.) Dīhō ǁoats an xa ǂâis xa, dīhō ǁkhāts an xa ǂâi re. Aiǁgause, sa ǂgomǂgomsa aiǁgausa xuts ge nau khoena a hui ǁkhā. Jehovab ge ǂgui kuriga a kōǃgâ du ǀgaub xas tsîna du ge nau khoena a mîba ǁkhā. Tsî hānîǁaeb ǃnâ du mâ Elobmîs mîmâide ǃoa ra mûǂuisa. Tā ǀuru re khoena ǀgorebas kai huib ase īsa. (1Pet. 3:12) Sida mâsib ga mati ǀgui ī xawe da ge Jehovab tsî khoen tsîna xū-e a dība ǁkhā.

17. Tae-i ǃaroma da nau khoen ǀkha ǀgopeǀnōsen tide?

¹⁷ Jehovabats ga ǀnaits gere ǃoaba bi khami ǃoaba tama ī xawe ǂâis ǃnâ ūhâ, ǁîb aiǃâts a ǀō-aisa ǃkhaisa. Tā dīts ra xūna nau khoen a dī ǁkhān ǀkha ǀgopeǀnō. Tae-i ǃaroma? Jehovab ge ǀgopeǀnō  tama hâ. (Gal. 6:4) Aiǁgause, Marias ge kai marisa ra ǂgan hamham oli-e Jesuba ge mā. (Jhn. 12:​3-5) Xawes ge ǀgâsa ǃoatarasa, ǀgam ǁau mariro ra ge aoǂgā. (Luk. 21:​1-4) Jesub ge nē ǀgam khoera ge ǀgopeǀnō tama hâ i, ǁîb ge mûs ge hoa ra ge ǂgomsa gere ǁgau. Jesub ge ǀoasase ǁîb di ǁGûba ge ǁgae, ǁnā-amagats ge ǂgomǃgâsiba ūhâ ǁkhā Jehovab ra mûsa matikōsets ǁîb ǃnâ ǂgomsa ǁgau tsî a ǀnambisa. ǂKhariro i ga xawes ge ǁnāsa ǁîba a ǀō-aisaba.

18. Tae-e nî hui da îganǀgēs ǃoagu ǃkhamsa? (“ Elobmîs ge nî hui tsi îganǀgēs ǃoagu dansa” ti hâ boksisa mû re.)

¹⁸ Hoa da ge ǀnî ǁaegu ai ra îganǀgē. Xawe ǁkhāǁkhāsen da go khamis ge Elobmîsa nî hui da, î da ǁnāsa sîsenǂam ǁkhā. ǁNā-amaga ǁkhāts a na dī, îts sa dîdi ǃereamde hō ǁkhā. Nēs ge nî hui its ǂgomǃgâsen tsî tā ǂkhabuǂâi. Jehovab ge amase ǃgâise a ǂan tsi. Jehovab ge kaise ra ǃgôaǃgâ ǁîbats ge ǂgurose sa ûib ǃnâ a mâi o tsîb ge nî madawa-am tsi. ǂGomǃgâsiba ūhâ re Jehovab ge ǁîb ǂgomǂgomsa ǃoaba-aon hoana ǀnam tsî ǁîn ǀkha ǁae hâ.