1-2. Tae-e Jesub di ǁkhāǁkhāsabe kha ǀkha ge ī Emmaus ti ǀon hâ ǃāsa ǃoa kha garu hîna?

 NISAN 16, 33 gu ge Jesub ǁkhāǁkhāsabega kaise tsûaǂgao tsî gere ǃao. ǀGam kha ge Jerusalemsa xu ge ǃgû Emmaus ti ǀon hâ ǃâsa ǃoa, 11 kilometerga Jerusalemsa xu a ǃnūsa. Nē khoegu ge gere ǂkhabuǂâi Jesub ge ǃgamhe amaga. ǁÎgu ge gere ǃâubasen Mesiab kaise ǂgui ǃgâi xūna Jodeǁîna nî dībasa xaweb ge ge ǃgamhe. ǃÂubasen tama gu ge hâ i xū-i ge ge ī.

² ǀŪkha a khoeb ge daob ai kha garu hîna ǀhao-ū kha tsî ǁîkha ǀkha ge ǃgû tsoatsoa. ǁKhāǁkhāsabe kha ge nē khoeba Jesub ǀkha ge ī xūna ge ǁgamba. Nē khoeb ǀūkha ge īb ge tātsē kha ǀuru tide xūna ge ǁgamba kha tsoatsoa. ǁÎb ge “Moseb di ǂkhanidi ǀkha tsoatsoa tsî kēbo-aogu di ǂkhanidi kōse ǁîkha ge ǁguiǃāba” tae-i ǃaromab Mesiaba nēti ī ǀgaub ai ǃgoma tsâ tsî nî ǁōsa. Emmaus tawa gu ge sī o kha ge ge mûǂan, nēb a Jesu ǃkhaisa Elob xa ge khaisa māheba. Kaise kha ge ge ǃgâiaǂgao hâ i mûǂan kha ge o, Mesiab a ûitsama ǃkhaisa.—Luk. 24:​13-35.

3-4. Tae-e Jesub di ǁkhāǁkhāsabegu ǀkha ge ī tsî tae-e da nē ǁkhāǁkhāǃâs ǃnâ nî ǁkhāǁkhāsen? (ǃNaeǃkhaidi 1:3)

³ Jesub ge 40 tsēde ǃhūbaib ai ge hâ i ǀhomma ǃoab nî oas aiǃâ. Tsîb ge ǂgui ǃkharagagu ǃādi ai ǁîb ǁkhāǁkhāsabegu aiǃâ ge ǂhai. (Khomai re ǃNaeǃkhaidi 1:3 sa.) Jesub ge ǁîb ǁkhāǁkhāsabega gere ǂkhâǃnâ tsûaǂgao tsî ge ǃao hâ i ga. Nēs xa ǃaromahe hâse gu ge kai ǂkhîba ge hōǃâ tsî gu ge ǁkhoaǂgaosiba  ge hō î gu aiǃgû tsî aoǁnâ tsî khoena ǁkhāǁkhā ǃgâiǂhôas Elob Gaosib dis xa. a

⁴ ǃGâiba da ge a ǀama ǁkhā ǁkhāǁkhāsen da ga o, Jesub ge tae-e a dīsa ǁnā hakadisi tsēdi ǃnâ. Nē ǁkhāǁkhāǃâs ǃnâ da ge nî mû Jesub ge mati ǁîb ǁaeba sîsenūsa. (1) Îb ǁîb ǁkhāǁkhāsabega ǂkhâǃnâ, (2) îb ǁîga hui î gu xoade ǃgaise ǁnauǃā tsî (3) ǁîga ǁkhāǁkhāsa hānîǁaeb ǃnâ gu nî dī sîsenni ǃaroma. Mâ mâsib hoab ǃnâ da ge nî mû mati da sida Jesub di aiǁgausa a ǁgae ǁkhāsa.

NAU KHOENA ǂKHÂǃNÂ RE

5. Tae-i ǃaroma gu ge Jesub di ǁkhāǁkhāsabega ǂkhâǃnâsa ǂhâ hâ i?

⁵ Jesub ǁkhāǁkhāsabegu ge ǂkhâǃnâhesa ge ǂhâ hâ i. Tae-i ǃaroma? ǀNîgu ge ǁîgu omdi, omaridi tsî ǂharugu ǃkhaiga ge ǁnāxu î gu Jesuba sao. (Mat. 19:27) ǀNîgu ge khoen xa ǃgâi tamase gere hâ-ūhe Jesub di ǁkhāǁkhāsabe kai gu ge o. (Jhn. 9:22) Māsenxase gu ge nē ǁguibade dī tsî ǃgoma gere hōǃâ, ǂgomǃgâ gu ge amaga Jesub a mîmaisa Mesia ǃkhaisa. (Mat. 16:16) Jesub ge ǃgamhe o gu ge kaise tsûaǂgao tsî ge ǂkhabuǂâi, ǀū gu ge ī amaga tae-i nî īsa.

6. Jesuba tae-e ge dī khâisab ge hōs khaoǃgâ?

⁶ Jesub ge ge ǁnâuǃā tsū tama i ge hâ īsa, ǁîb di ǁkhāǁkhāsabega tsûaǂgaosa ǁîb ge ǁō o. Tsîb ge ge ǂan i ǁîgu ǂkhabuǂâis ge ǂkhari ǂgoms xa ǃaromahe tama hâ isa. ǁNā-amagab ge khâisab ge hō tsēs ǂûs ai ǁîb di ǀhōsana ge ǂkhâǃnâ tsoatsoa. Aiǁgauseb ge Maria Magdalenas aiǃâ ge ǂhai, ǀhobas tawas ǂnû tsî ra ā hîna. (Jhn. 20:​11, 16) Nē ǀgam ǁkhāǁkhāsabe kha Emmaus ǃoa ge garu īkha tawas tsînab ge ge ǂhai. Tsîb ge Apostel Petrub tawas tsîna ge ǂhai. (Luk. 24:34) Tae-e da Jesub aiǁgausa xu ra ǁkhāǁkhāsen? ǃGaoǃgâ re tae-i ge īsa Maria Magdalenas aiǃâb ge ǂhai o.

7. Jesuba Marias tae-e ra dīsa ge mû tsî ǁîsab ge tae-e dība? (Johaneb 20:​11-16) (Ai-īsiba mû re.)

⁷ Khomai re Johaneb 20:​11-16 sa. Nisan 16 ai i ge ǁgoaga tarekhoede Jesub di  ǀhobasa ǃoa ge ī. (Luk. 24:​1, 10) Hā re î da kō tae-i ge Maria Magdalenas ǀkha a īsa. ǀHobas tawas ge sī o i ge Jesub sorosa ge ǀkhai i tsîs ge Petrub tsî Johanneb tsîkha sī ge mîba. Nē ǀgam aokha ge ǀhobasa ǃoa ge ǃkhoe tsîs ge Mariasa ge sao kha. Nē khoekha ge mû Jesub soros a ǀkhaisa ǀhobas ǃnâ, o kha ge omsa ǃoa ge oa. Xawe Marias ose, ǀhobas tawas ge hâ tsî gere ā ǀūs ge ī amaga Jesub ǁnāba hâsa. ǁÎb ǃaromas ra āsa mû tsîb ge gere ǁkhaeǂgaosi ǂgao. Marias aiǃâb ge ǂhai tsî ǀgui ǃgupu xū-e ge dī ǁîsa ge kaise ǂkhâǃnâ-e. ǁÎsab ge ge mîba îs Jesub di ǃgâsaga ǃoa ī tsî kaise ǂhâǂhâsa haisi-amsa sī mîbagu. ǁÎs ge sī ga mîba gu hâ Jesub ǁkhapa ûitsama ǃkhaisa.—Jhn. 20:​17, 18.

8. Mati da Jesuba a ǁgae ǁkhā?

⁸ Mati da Jesuba a ǁgae ǁkhā? Jesuba da ge ra ǁgae sida ǃgâsana da ga ǂkhâǃnâ o, în aiǃgû tsî Jehovaba ǃoaba ǀgara. Jesub khami da ge ǁîn ǃgomsina ǃgaoǃgâ, tsân ra ǀgauba ǁnauǃā tsî nî ǁkhaeǂgao nî. Joselin ti ǀon hâ ǃgâsas aiǁgaus xa ǂâi re, ǁîs ǃgâsasas ge ǁkhōǁkhōsa tsūkeǃgâb ǃnâ ge ǂoaǃnâ. ǁÎs ge ra mî: “Hoaǁae ta ge kaise tsûaǂgaohâse gere tsâ.” Xawe i ge khoe-aogu ra ǁîra omsa ǃoa ge ǁkhausi tsî ge mā-amsi îs tsâs ra ǀgaub xa ǃhoa. ǃGaoǃgâxase ra ge ǃgâ tsî ǃgâi ǀgaub ǃnâ hâ-ūsi tsî ǁîsa ge mîba Jehovab mûǁaes kaise a ǀō-aisa ǃkhaisa. Joselins ge ra mî: “Kaise ta ge gere ǂkhabuǂâi, ǃgam hurib ǃnâ ra āǁō khami ta ge gere tsâ. Xaweb ge Jehovaba nē ǃgâsa ra ge sîsenū îb huite. ǁÎra ge ge huite î ta ǁnā turaba hō-oa Jehovaba ǃoabas tiba.” Sida tsîn ge nauna a ǂkhâǃnâ ǁkhā ǁîna da ga mā-am, în tsân ra ǀgauba ǁâiǂûisen tsî da ga ǃgaoǃgâxase mîn ra xūna ǃgâ o. Nēti da ga dī o da ge ǁîna a ǂkhâǃnâ ǁkhā în aiǃgû tsî Jehovaba ǃoaba.—Rom. 12:15.

NAU KHOENA HUI ÎN ELOBMÎSA ǁNÂUǃĀ

9. Jesub ǁkhāǁkhāsabega mâ ǃgomsina gere hōǃâ tsî Jesuba ǁîga mati ge hui?

⁹ Jesub ǁkhāǁkhāsabegu ge Elobmîs ǃnâ gere ǂgom tsî ǁkhā gu a i hoa-e gere dītsâ î gu Jehovaba ǁnâuǀnam. (Jhn. 17:6) Xawe gu ge ge ǁnâuǃā tama hâ i mati ī ob ge Jesuba ǁore-aob khami a ǃgamhesa. Jesub ge ge ǂan i ǁîb ǁkhāǁkhāsabegu ǂgomsa ūhâsa tsî gu Jehovaba a ǀnamsa. Xaweb ge ge mûǂan ǁîgu xoade ǃgâise nî ǁnâuǃāsa. (Luk. 9:​44, 45; Jhn. 20:9) ǁNā-amagab ge ǁîga ge hui î gu ǁnâuǃā tae-e gu ra khomaisa Elobmîs ǃnâ. ǃGaoǃgâ re matib ge ǁnāsa a dīsa, ǀgam ǁkhāǁkhāsabekhab ge Emmaus ǃoa garu daob ai ǀhao-ū o.

10. Jesuba mati ǁîb ǁkhāǁkhāsabega ge hui î gu ǁnâuǃā ǁîb a ama Mesia ǃkhaisa? (Lukab 24:​18-27)

¹⁰ Khomai re Lukab 24:​18-27 sa. ǃGaoǃgâ re Jesub ge ǁkhā ǁaeb ai ge mîba gu tama hâ i, ǁîb a hamsa xaweb ge dîna gere dî. Tae-i ǃaroma? ǀNîsib ge gere ǂhâba, î gu ǁîba mîba mati gu ra tsâ ǀgauba tsî gu ge ǁnāsa ge dī. ǁÎgu ge Jesuba ge mîba ǃâubasen gu ge hâisa Jesub nî gao-ao kaisa Israeli ǃnâ tsî ǁîna nî ǂgaeǂguisa Romeǁîn ose. Jesub ge ge mā-amgu î gu tsâ gu ra ǀgauba ǃhoa tsîb ge Jesuba xoade ge sîsenū îb nē khoega hui î gu ǁnâuǃā ǂgui kēbodi dīǀoaǀoahe hâ ǃkhaisa. ǁKhā ǃuis aib ge nau ǁkhāǁkhāsabegu ǀkha ge ǀhao tsî ǁîgu tsîna ge ǁguiǃāba nē kēbodi tae-e ra ǂâibasensa. (Luk. 24:​33-48) Tae-e da nē ǃnaeǃkhaisa xu a ǁkhāǁkhāsen ǁkhā?

11-12. (a) Tae-e da ra ǁkhāǁkhāsen Jesub ge Elobmîs amaba a ǁkhāǁkhā ǀgaub xa? (Ai-īsiga mû re.) (b) ǀGui ǃgâsaba mati Elobmîsab gere ǁkhāǁkhā khoeba ge hui?

¹¹ Mati da Jesuba a ǁgae ǁkhā? Khoe-e da ga Elobmîsa ǁkhāǁkhā, o da ge ǁîna dîde nî dî în hui-e tsân ra ǀgauba ǁgâiǂûisa. (ǂKhm. 20:5) ǁÎn di tsâsiga du ga ǁnâuǃā toa, o  ǁgau nî re matin Elobmîs xoade a hō ǁkhāsa ǁîn di mâsigu ǃnâ a hui nî ǁkhāna. Tā ǁîna mîba tae-en nî dīsa. Nē Elobmîs xoadi ai ǃgaoǃgaosa dîde dî re. ǂKhâǃnâ nî re în khomain go xūna ǂâiǃgâ tsî kō matin nē xūna a sîsenū ǁkhāsa ǁîn ûigu ǃnâ. Nortei ti ǀon hâ ǃgâsab Ghanab ǃnâ ra hâb aiǁgaus xa ǂâi re.

¹² Norteib ge 16 kurixab a hîna Elobmîsa ge ǁkhāǁkhāsen tsoatsoa. ǃNūbu ǁaerobab ǁkhāǁkhāsen tsoatsoa hâs khaoǃgâb ge ǁîb omaris ǁanin xa ge mâǃoahe tsoatsoa. Tae-e ge huibi îb aiǃgû Elobmîs ǁkhāǁkhās ǀkha? ǁÎba Elobmîsa gere ǁkhāǁkhā ǃgâsab ge Mateub 10ǁî danaǃâsa ge ǁgaubi tsî ge mîba bî ama Xristeǁîn nî mâǃoahesa. “Nē mâǃoadi ge tsoatsoa o ta ge ge ǂan i amaba ta ge hōsa” tib ge Norteiba ra mî. ǁÎba ra ǁkhāǁkhā ǃgâsab ge Mateub 10:16 sa ge ǁgau bi mîrasa ǂanbasen da ge nî ti. Tsîkha ge ge ǃhoaǃgao nē xoas mati Norteiba a hui ǁkhāsa îb ǁîb ǂgomsa ǁîb omarisa ǁguiǃāba ǁkhā ǃgôasib ǃnâ. ǁĀǁnâhe toab ges khaoǃgâb ge Norteiba gere aimâba-ao kai ǂgao xawe ǁîb dadasab ge gere ǃâubasen îb ǀgapi ǁkhāǁkhāsensa ǃoa ī. ǁÎba Elobmîsa gere ǁkhāǁkhā ǃgâsab ge ge mîba bi tama hâ i tae-eb nî dīsa. ǁÎb ge Norteiba dîna gere dî, îb huibi Elobmîs xoadi xa ǂâiǃgâsa tsî ǃgâi mîǁguiga dīs ǀkha. Norteiba tae-e ge dī? Norteib ge ge mîǁgui îb ǀoasase Jehovaba ǃoaba. Dadasab ge ge mîba bi îb omsa xu ǂoa. Norteiba mati ra tsâ ǁîb ǀkha ge ī xūn xa? “ǂGomǃgâ ta ge ra ǂhanu mîǁguiba ta ge dīsa” tib ge ra mî. Nauna da ga ǂkhâǃnâ o în xoadi xa ǂâiǃgâ, o da ge ra hui nî în ǁîn ǂgomsa ǀgaiǀgai tsî aiǃgû Jehovaba ǃoabas ǀkha.—Efe. 3:​16-19.

ǃGÂSAGA ǁKHĀǁKHĀ RE

13. Jesuba tae-e ge dī î-i aoǁnâ sîsen-e aiǃgû ǁîb ga ǀhomma ǃoa ī toas khaoǃgâ? (Efeseǁîn 4:8)

¹³ ǃHūbaib aib ge hâ i, ob ge Jesuba ǁîb Îb xab ge ǂgaoǀkhāhe xūna ǂōrisase ge dī. (Jhn. 17:4) Xaweb ge Jesuba ge ǂâi tama hâ i ǁîb ǀguib Jehovab ra ǂgaoǀkhā xūna a dī ǁkhāsa. ǃHūbaib aib ge ǃnona tsî ǃkhare kurina aoǁnâ, ob ge nauna gere ǁkhāǁkhā. Jesub ge ǁîb ǁkhāǁkhāsabega gere ǂgomǃgâ. ǃEreamsab ge ge mā gu î gu aoǁnâ tsî ǃgâiǂhôasa khoena ǁkhāǁkhā tsî Jehovab ǀō-aisa khoena kōǃgâ. Tsî ǀnî ǁkhāǁkhāsabegu ǁîb di gu hîna ǂgaeǂguisa gere ū gu ge 30 kurin xa ge ǂkham i. (Khomai re Efeseǁîn 4:8 sa.) Nē khoegu ge ǃgarise Jesub ǀkha gere sîsen tsî ǁîb ǃoagu ge ǂgomǂgomsa i. ǀHomma ǃoab nî īs aiǃâb ge ǃnāsase ǁîga ge  ǁkhāǁkhā î gu khoena ‘mādi’ ase ība. Matib ge ǁîga ǁkhāǁkhā?

14. Jesuba tae-e ǁîb ǁkhāǁkhāsabega ge ǁkhāǁkhā ǁîb ǀuniga 40 tsēdi ǃhūbaib aib ge hâ i di ǃnâ? (Ai-īsiba mû re.)

¹⁴ Jesub ge ǁîb ǁkhāǁkhāsabega gere ǁnama îb huigu xaweb ge nēsa ǃgâi ǀgaub ǃnâ gere dī. Aiǁgauseb ge ge mûǂan ǀnî ǁkhāǁkhāsabegu ge ǂgom tama hâ isa ǁîb ge ǁō tsî khâisa māhesa. ǁNā-amagab ge ǁîga ge hui î gu amaba ǂan ǁîga ǁnamas ǃnâ-ū. (Luk. 24:​25-27; Jhn. 20:27) ǁÎgu tsînab ge ge mîba î gu Jehovab khoena kōǃgâs ai ǂâisa ǂnûi, mari-e kurus ais ose. (Jhn. 21:15) ǁÎgab ge ge ǂâiǂâiǃnâ î gu tā ǀgōpeǀnōsen naun ǀkha Jehovab ǃoabas ǃnâ. (Jhn. 21:​20-22) Ū gu ge hâ i ǃgâi tama ǂâiǀgaub tsînab ge ge mî-unuba gu tsî ge hui gu î gu mûǂan Gaosib haisi-ams ai gu ǁîgu ǂâisa nî ǂnûisa. (ǃNǃkh. 1:​6-8) ǀHaohâb ǃûi-aoga tae-e Jesuba xu a ǁkhāǁkhāsen ǁkhā?

15-16. (a) Mâ ǀgaub ǃnâ gu ǀhaohâb ǃûi-aoga Jesuba a ǁgae ǁkhā? ǁGuiǃā. (b) Petrika mati ǁnamasa xu ǃgâiba ge ǀama?

¹⁵ ǀHaohâb ǃûi-aoga mati Jesuba a ǁgae ǁkhā? ǃGâsaga gu ge nî ǁkhāǁkhā ǂkham gu ga xawes tsîna î gu ǃnāsa sîsen-e ǀhaohâb ǃnâ dī. b ǀHaohâb ǃûi-aogu ge ra ǁnâuǃā nē ǃgâsagu ǂgui xūna nî ǁkhāǁkhāhesa. ǂKham ǃgâsaga ǁnama tsî gu ge ǀnamxaǃnâ ǀgaub ǃnâ ǁîga nî ǁkhāǁkhā. Î gu ǃgamǃgamsenxasiba ǁkhāǁkhāsen, ǂgomǃgâhe ǁkhā tsî nauna huis di turaba ūhâ.—1Tim. 3:1; 2Tim. 2:2; 1Pet. 5:5.

¹⁶ ǃGaoǃgâ re Petrik ti ǀon hâ ǃgâsab ge mati ǁnamahesa xu ǃgâiba ǀama ǀgausa. ǂKhamsis ǃnâb ge ǃgâi tamase ǃhoas di ǁnaetiba ge ūhâ i tsîb ge ǃgâi tamase ǃgâsadi ǃoagu gere tanisen. ǀHaohâb ǃûi-aob ge ge mû Petriki ǀkharaǀkharana dīsa ǂhâ hâsa tsî ǁîba ǃgāsa ǁnamasa ge mā xawe nēsa ǀnamxaǃnâ ǀgaub ǃnâ ge dī. “Kaise ta ge ǂkhî, nē ǀhaohâb ǃûi-aob ge ǁgautesa mâ ǀkharaǀkharana ta nî dīsa” tib ge Petrika ra mî. “Tita gere ǂhâba aiǂhanuga gu ge nau ǃgâsaga gere hō, o ta ge gere ǂkhabuǂâi. Xawe  nē ǀhaohâb ǃûi-aob ǁnamas ge ge hui te î ta mûǂan ǃgamǃgamsenxa tsî ta ǀnamma ti ǃgâsana nî ǁgausa, aiǂhanu-i ai ti ǂâisa ǂnûis xa.” ǁNās xa ǃaromahe hâseb ge Petrika ǀhaohâb ǃûi-aob ase ge ǁgaumâihe 23 kurixab a hîna.—ǂKhm. 27:9.

17. Jesuba mati ge ǁgau ǁîb ǁkhāǁkhāsabegab ra ǂgomǃgâsa?

¹⁷ Jesub ge ǃereamsa ǁîb ǁkhāǁkhāsabega ge mā î gu nauna ǃgâiǂhôas xa mîba tsî xoade ǃgāsase ǁîna ǁguiǃāba. (Mat. 28:20) ǁKhāǁkhāsabegu ge ǀnîsi gere ǂâi Jesub xa gu ra ǂgaoǀkhāhe xūna gu a dī ǁoa ǃkhaisa. Xaweb ge Jesuba ge ǂgomǃgâ ǁîgu ǁnā sîsen-e nî dī hō ǃkhaisa tsîb ge ti ge mîba gu. ǁÎgab ra ǂgomǃgâ ǃkhaisab ge ge mîba gu mîb ge o: “Ti Îb ge tita sîs ǁkhās khami ta ge ra sî go.”—Jhn. 20:21.

18. Mati gu ǀhaohâb ǃûi-aoga Jesuba a ǁgae ǁkhā?

¹⁸ ǀHaohâb ǃûi-aoga mati Jesuba ǁgae ǁkhā? ǂAnsa ūhâ ǀhaohâb ǃûi-aogu ge nau ǃgâsaga ra ǁkhāǁkhā i gu hui ǀnî hâ ǃereamdi ǁkhā. (Fil. 2:​19-22) Aiǁgause gu ge ǀhaohâb ǃûi-aoga ǂkham khoena a ǂgan ǁkhā în ǀhû-omma ǃanu tsî ǃamkuse ūhâsa. ǀHaohâb ǃûi-aogu ge ǃgâsaga sîsen-e a mā ǁkhā tsî a ǁkhāǁkhāgu ǁkhā mati gu ǁnā sîsenne nî dīsa tsî nî ǂgomǃgâ gu î gu ǁnā sîsen-e dīǀoaǀoa. ǀAsase ǁgaumâisa ǀhâohâb ǃûi-aob Mateub ti ǀon hâb ge kaise ra ǃgôaǃgâ ǂansa ūhâ ǀhaohâb ǃgâsagu ge ǁkhāǁkhābisa, ǃkharagagu sîsenan ǃnâ ǀhaohâb ǃnâ tsî gere ǂgomǃgâbisa ǁnā sîsen-eb nî dīsa. “Dīsā ta gere, o gu ge gere huite î ta mû mati ta ǁkhāǁkhāsen ǁkhāsa ǁnā dīsāde xu tsî ta ǀkharaǀkharana a dī ǁkhā ǀgauba” tib ge ra mî. c

19. Tae-e dīsa da nî mîǁgui?

¹⁹ Jesub ge ǁîb ǀuniga 40 tsēde ǃhūbaib ai ge sîsenū îb nauna ǂkhâǃnâ tsî ǁkhāǁkhā. Hā re î da mîǁgui ǁîb di aiǁgausa saosa. (1Pet. 2:21) ǁÎb ge ǁnā-e dīs ǀkha nî hui da. Mîmâib ge ge: “Tsî ta ge tita hoaǁae sago ǀkha nî hâ, ǃhūbaib di ǀunis kōse.”—Mat. 28:20.