1, 2. Eloǃaoǃgâxa khoena tae-i ǃgomsina nētsē ra hōǃâ? (Tsoatsoas ǃnâ hâ ai-īsiga mû re.)

ǂGUI dokteran ge ǂhīǁōba ūhâ khoen ǁaegu ra sîsen. ǁÎn ge ǀaesen hâ khoena ra hui ǁînan a ǀnam amaga, xawen ge nēsan ra dī hîna a ǂan ǁkhaubasenan nîsa în tā ǂhīhe nē ǁōs ǀkha. ǁNās ǁkhās khami da ge sada tsîna khoen hîna ǁgai ǂūga ūhân ǀkha ra hâ ǀhao. Nēs ge sada kaise a ǃgomba ǁkhā.

² Nē ǀuni tsēdi ǃnâ gu ge khoen di ǂūga kaise ǁgaora. Paulub di ǀgamǁî ǂkhanis Timoteuba ǃoab ge xoas ǃnâ i ge ra mîǃā-e matin khoena ǀuni tsēdi ǃnâ nî Eloǃao-oǃnâsa, tsîn mati nî ǁgaiǂnûsa. (Khomai re 2 Timoteub 3:1-5, 13.) Nē hâ ǀgaugu ga ǃhuri kai da xawe, da ge ǃûisen tama da ka io sida tsîna nē ǀgauga a ūhâ ǁkha. (ǂKhm. 13:20) Nē ǁkhāǁkhāǃâs ǃnâ da ge nî ǃhoaǃgao, khoen ǀuni tsēdi ǃnâ ūhâ ǁgai ǀgaub mati eloǃaoǃgâxasiba ūhâ khoen ǀgauga xu ra ǃkharagagu ǀgausa. Nē ǁkhāǁǀkhāǃâs ǃnâ da nî mûs ge mati da nî ǁkhaubasensa. Îda tā nau khoen di ǁgai ǂūgu xa tsâǀkhāhe tsî ǁkhā ǁaeb ai nauna gagasise hui.

3. ǀGaugu hîna 2 Timoteub 3:2-5 ǃnâ a māsa ga ham-e ǃoa ra ǁnaeǁgau?

 ³ Apostel Paulub ge ge xoa “ǀuni tsēdi ǃnâ gu ǃgom ǁaega nîra hā ǃkhaisa.” Tsîb ge 19 ǀgauga ge mî hînan khoena nētsēdi ǃnâ nî ūhâ ga. Nē ǀgaugu ge Romeǁîn 1:29-31 ǃnâ mâsan ǀkha a ǀgui. Xawe i ge Paulub ǂkhanis Timoteuba ǃoab ge xoas ǃnâ nē ǀgauga a ǃnāsa tsî ǀasa testamens ǃnâs ǀnîhâ ǃkhai-i ǃnâ hōhe tama. Paulub ge nē ǁgai ǀgaugu xab gere ǃhoa o, nēti ge tsoatsoa “Khoen nîra . . .” Nēba i ga “khoen” di ga ra mîhe o, o i ge tare khoedi tsî aore khoegu tsîn xa ra ǃhoa-e, hoan nēti i ǀgauga nî ūhâ amaga. Xawe hoa khoe taman ge nēti i ǀgauga ūhâna. Xristeǁîn ge nē ǀgauga xu ra ǀkhara ǀgauga ūhâ.—Khomai re Maleaxib 3:18.

4. ǀGapiǂâixa khoena mati ī?

⁴ Khoen ge nî ǁîǀnamsenxa tsî mariǃgunuxa dib ge mîs khaoǃgâb ge Pauluba ge xoa khoen ge nî, anxa, ǃgurixa tsî ǃkhāǃkhāxa. Nē ǀgaugu ge ǀgapiǂâixasiba ra hā-ū , nēs ge sida ǁkhāsigu, ī ǀgaub, ǃkhūsis tsî ǃharodi xa ra ǃaromahe. Nēti i ǀgauga ūhâ khoen ge ra tura ǀgoreǀîhesa. ǀNî ǂansabeb ge ge xoa khoe-i hîna a ǀgapiǂâixa î ge “ǁî-i ǂgaob ǃnâ altarsa ūhâ aitsâma î ra ǀgoreǀî aisensa.” ǀNî khoen ge ge mî ǂhâbasa tama hâ ǀgaub ǃnâ ǁîǀnamsenxas ge a ǁkhōǁkhōsa di, nēsan ge ǁîǃgôasen ra khoen tsîna nau khoen ǃnâ mû ǂgao tama hâ.

5. ǂGomǂgomsa khoena mati ge ǀgapiǂâixa tsoatsoa?

⁵ Jehovab ge ǀgapiǂâixasisa ǃhui hâ. Tsî ‘ǀgapi mûde’ ǃhui hâ (ǂKhm. 6:16, 17) ǀGapiǂâixasib ge Eloba ǃoa ǀgū kai da tide. (Psa. 10:4) Nēgu ge ǁgâuab di ǀgauga. (1 Tim. 3:6) ǀNî khoen hîna Jehovaba ra ǃoaban tsîn ge ge ǀgapiǂâixa tsoatsoa. Usiab, Judab gao-aob ge ǂgui kuriga ǂgomǂgomsase ge hâ. Xawes ge Elobmîsa ra mî “tsî ǀgaib ge ǃnubaib ge ǂgaob âba ge ǀgapi, kāǁōs kōse, tsîb ge ge ǃûǂam ǃKhūb, ǁîb di Elob ǃoagu. ǃKhūb di tempeli ǃnâ ǂgâ tsîb ge ǀanǀanaltars ai ǀanǀan xui-ao.” Egab ge gao-aob Hiskiaba ǂgaoba xu gere ǀgapiǀgapisen, xawes ge nēsa ǁaerob dis ǀguisa ge i.—2 Kro. 26:16; 32:25, 26.

6. Tae-e ǀnîsi ga ǃaroma hâ îb Daviba ǀgapiǂâixa, xawe tae-i ǃaromab ge ti dī tama hâ i?

⁶ ǀNî khoen ge ǁîn anusasib, ǂanǂansasis, ǁkhoaxase ǁnaes, ǀgaib tamas ka io ǀgapi ǃharos xa ra ǂnī kai-e. Davib ge nē xūn hoana ge ūhâ-i, xawe ǁîb ûib hoaba gere ǃgamǃgamsen. Goliabab ge ǃgam toas khaoǃgâb ge Daviba gao-aoba Sauli ǀgôasa ge ǃgame kaihe. Davib ge ge xoa: “Tari ta tita tsî tareba ti ûiba tsî ti îb ommi dina Israeli ǃnâ, o ta nî gao-aob di ǀuiǀgôa kai?” (1 Sam. 18:18) Tae-e Daviba ge hui îb ǃgamǃgamsen? Jehovab ge ǁîba “ǃgamse kō”, tsî ǁîb aiǃâ a ǃgamǃgamsen ǃkhais ǃgaob ge Daviba ǃgâi ǀgaugu, aiǂhanugu tsî ǁkhāsigu tsîna ge ūhâ i. (Psa. 113:5-8) Davib ge ge ǂan i ǃgâi xūn hoan hînab ge ūhâ în ge Jehovaba xu gere hāsa.—ǀGopeǀnō 1 Korinteǁîn 4:7.

7. Tae-e nî hui da îda ǃgamǃgamsen?

⁷ Davib khamin ge nētsē khoena ra ǁgūtsâ în ǃgamǃgamsen. Kaise da ge ra buru mûsa Jehovab hîna a ǃhūbaib  kuru-aob tsîn ǃgamǃgamsensa ra ǁgausa. (Psa. 18:35) Nē ǃkhâikhomsa da ge ǂgaob ǀkhā nî ū mî rasa: “Î du tanibagu, i ǀûbagu, nē-i ga nau i ǃoagu ǀau xū-e ūhâ o; Xristub ge sado ǀûbas ǁkha xase ǁkhati dī.” (Kol. 3:12) Tsî da ge a ǂan “ǀnammi ge koasen tama hâ; ǁîb ge khūkhūsen tama hâ” di. (1 Kor. 13:4) Sida ga ǃgamǃgamsen hâ ǀgauga ūhâ o, on ge khoena Jehovab ǃoa nî ǂgaehe. Aob ǁîb taras ǂūb xa ra ǂgaehe khami i ge nau khoena Elob ǃoa ra ǂgaehe, ǁîba ra ǃoaba khoen ra ǃgamǃgamsen amaga.—1 Pet. 3:1.

8. (a) ǁGûna ǁnâuǀnamōǃnâsa nētsē mati ra mûhe? (b) Elobmîsa ǀgôana mâ ǃkhâikhomsa ra mā?

⁸ Paulub ge ge ǁgau khoen ǀūni tsēdi ǃnâ nî ǁgaegu ǀgauba. ǁÎb ge ge xoa ǀgôan ge ǀūni tsēdi ǃnâ ǁgûna nî “ǁnâuǀnamoǃnâ”. Nēti i ǀgaugu ge ǂkhanin, muvin tsî ai-īsi ǂhôaǂgares tsîn ǃnâ ǃgâi xū-i ase ra ǁgauǂuihe. ǁNâuǀnamoǃnâsis ge ra ǃaroma is omarisa tā ǃgâi ǃgaeǁgaesa ūhâ. Nēs ge ǀnai ge ǁapoǁapohe. Aibekam ǁaeb ǁnaedib ǃoa ai i ga khoe-e ǁgûra ǁnāǂam o, o i ge ǃāsa xu gere sîbē-e. Tsî Romeǁîn di ǂhanub ge nēsa ǃgams ǀkha ǀguiti gere mû. Hoa Hebreǁî tsî Xrikeǁî xoadi Elobmîs di ti ge ǀgôana ra ǃkhâikhom în ǁgûna ǃgôa.—Eks. 20:12; Efe. 6:1-3.

9. Tae-e ǀgôana nî hui în ǁîn ǁgûna ǁnâuǀnam?

⁹ ǀGôan ge ǁaeba ū tsî nî ǂâiǃgâ, ǁgûra ge dīban ǃgâiba. ǁNās ge nî huin în tā nētsē i hoaǃnâ-aixase ī se, ǁîn ǁgûna ǁnâuǀnamoǃnâ. ǃGôaǃgâsib tsî eloǃaoǃgâxasib tsîn ge ra ǁgau ǁnâuǃāba da ra sîsen-ūsa, Elob di ǂgaoǀkhāsa dīǀoaǀoasa, ǁÎb hîna a sida hoada di Îba. ǀGôan ga ǃgâise ǀhōsan ǀkha ǁgûn xa ǃhoa-o, on ge nau ǀgôan tsîna ǁîn ǁgûna ǃgâiǀgaub ai nî mû. ǁGûn ga ǀgôana ǀnam tama io, o i ge ǀgôana nî ǃgomba ǁgûna ǂgaobaxu ǁnâuǀnamsa. Xawen ga ǀgôana ǁgûn xa ǀnamma ǁgauhe o, o i ge ǁîna kaise nî supuba ǁgûna ǁnâuǀnam-sa ǃgombahen ga os tsîna. “ǁAeb ga hâ o ta ge ra dītsâ xūna ti ǁgûra xu sâusa” tib ge Austina ra mî “ti îra ge ǁnâuǃāxa ǁgaraga ra xubate, tsî ra mî tae-i ǃaroma ra nē ǁgaraga ra māsa, tsî hoaǁae ra ge harase ra ǃhoa-ū te. Nēs ge ra hui te ǁîra ǁnâuǀnamsa. Mû ta ge ra ǁîra tita ra tsâbasa tsî nēs ge tita ra ǁgari î ta ǁîra ǂkhîǂkhî.”

10, 11. (a) Mâ ǀgauga ra ǁgau khoen ǀnamma ūhâ tama hâsa? (b) Mâs kōsen ama Xristeǁîna ǁîn ǀgūkhoena ǀnamma ra ǁgau?

¹⁰ Paulub ge noxoba ǀgaugu xa gere ǃhoa, ǁgau ra ga ǀnamgu tama da hâsa. Ganganoǃnâsib ge “ǁgûna ǁnâuǀnamoǃnâs” khaoǃgâ hâ. Nēs ge ra ǁgau khoen dībahen ra xūna ǃgôaǃgâ tamasa. Khoen ge nî ǃanuoǃnâ. ǁÎn ge nî ǂkhîbaguoǃnâ tsî nau khoen ǀkhā ǂkhîbagu ǂgao tide. Tsî nî Eloǃkhāǃkhā-ao tsî ǀapexū-ao kai tsî ǁgai mîde nau khoen tsî Elob ǃoa nî mî. ǃHoaǀkhāxa khoen ge nî hâ i, hîna nau khoen ǀgauga ra ǁgai kaina. *

¹¹ Khoen hîna nētsē ǀnamma ǁgau  taman, khamin ge Jehovaba ra ǃoaba khoena ī tama hâ, ǁîn ge nau khoena ǀnamma ra ǁgau. Nēs ge hoaǁae a ama. Jesub ge ge mî sida ǀgūkhoeba ǀnams a·ga’pe ǀnammi ge ǀgamǁî kai mîmā Moseb di ǂhanub ǃnâ, xawe Eloba ǀnams ǀguis ge ǁîs xa a ǀgapi (Mat. 22:38, 39) Jesub ge ǀaro tsî ge mî ǀnammi ge nî ama Xristeǁîn di sao ī di. (Khomai re Johaneb 13:34, 35.) Nē ǀnamma da ge sida khākhoeb tsîna nî ǁgau.—Mat. 5:43, 44.

12. Jesuba ǀgūkhoena mati ǀnamma gere ǁgau?

¹² Jesub ge ǁîb ǀgūkhoena ǀnamma gere ǁgau. ǁÎb ge ǃāsa xu ǃās ǀkhā gere ī khoena Elob Gaosib ǃgâiǂhôasa sī mîbas ǃgao. ǁÎb ge ǂgīhân, ǃhoran, ǃomamaxan tsî ǃgommen tsîna gere ǂgauǂgau. ǁŌhânab ge khâisa gere mā. (Luk. 7:22) Jesub ge ǁîb ûiba khoen ǃgao ge mā, ǂguin ge ǃhuibi hâ i xawe. Jesub ge ǃgâi ǀgaub ǃnâ ǁîb îb ra ǁgau ǀnamma gere ǁgae. ǃHūbaib ǂhawasen ge Jehovab di ǀHûǀguitimî-aona elosi ǀnamma ǁîn ǀgūkhoena ra ǁgau.

13. ǀGūkhoena da ra ǁgau ǀnamma mati ǁîna Jehovab ǃoa nî ǂgae?

¹³ Sida ǀgūkhoena da ra ǁgau ǀnammi ge ǁîna Jehovab ǃoa ra ǂgae. Thailandi ǃnâ hâ aob ge kaise ge tsâǀkhāhe ǃgâsasi ǀnammab ge sida ǀkharib kai ǀhaos tawa a mû o. Omsa ǃoab ge oa o, ob ge Elobmîs ǁkhāǁkhāsa ǀgam ǃnâde wekheb ǃnâ ge ǂgan. ǁÎb ge hoa khoena gere aoǁnâba tsî ǃnani ǁkhâga kai ǀhaos khaoǃgâ ǂguro ǃnâsa ǃâ-e ge ūhâ i Elobmîsa ǀhaohâb ǃnâ khomaisa. ǀGūkhoena da mati ǀnamma ra ǁgausa ôaǃnâsens ǃaroma da ge sao ra dîde nî dîsen: ‘Tita khoena hui î da ra ti omaris ǃnâs, ǀhaohâb ǃnâs tsî aoǁnâ sîsenni ǃnâs tsîna? ǀGūkhoena  ta Jehovab ǁîna ra mû khami ra mû?’

14, 15. ǂGui khoena mati xamanin khami ra tanisen, xawen ǀnîna mati ge dī-ūnusen?

¹⁴ ǀNîhâ ǀgaugu hînan khoena ūhâgu ge ra ǃaroma în Xristeǁîna ǁîna xu ūbēsen. Eloba a ǀū khoen ge “ǀgauoǃnâ tsî ǃkhausa. ǀNîn ge nî ǂgabaǂgaoxa tsî ǁaetamase nî ī.

¹⁵ Khoen hîna nē ǁgai ǀgauga ūhân ge ǃgâi ǀgauga ǃoa ra ǀkharaǀkharasen. Nē ǀkharaǀkharan ge Elobmîsa kēbos ǃnâ īsase ra ǁguiǃāhe. (Khomai re Jesajab 11:6, 7.) ǁNāba da ge ǃaub xamanin xa ra khomai matib ǂhīras tsî ǂkham xam-i tsîna ǀguiba ǂkhîb ǃnâ nî hâ ǀgauba. Nēti i xūn ge nî ī “ǃhūbaib ǃKhūb di ǂans xa nîra ǀoa xui-ao.” (Jes. 11:9) Xamanin Jehovab xa a ǁkhāǁkhāsen ǁoa amaga î ge nēsa khoen ǃoa ra ǁnaeǁgau.

16. Elobmîsa khoena mati ge hui în ǁîn ǀgauga ǀkharaǀkhara?

¹⁶ ǂGui khoen ge ǂguro ǂhīras khami ge ǂkhabaǂgaoxa i xawe nēsi ǀgūkhoen ǀkhā ǂkhîb ǃnâ ǁnan hâ. ǁÎn xa du ge “The Bible Changes Lives,” di hâ ǃâb jw.orgs ai a khomai ǁkhā. ǁÎn hîna Jehovaba nēsi ǂan tsî ra ǃoaban ge nau khoen hîna eloǃaoǃgâxasib di īsiga ūhâ, xawe ǀgaib âba ra ǀoan khami ī tama hâ. Xawe ǁnā ǀgauga ge ūhâ i khoen ge “ǀasa khoeb, Elob ǃoa kuruhe hâba ama ǂhanu-aisib tsî ǃanusib” tsîn ǃnâ ra ana. (Efe. 4:23, 24) Khoen ge Elob xan ra ǁkhāǁkhāsen khami ǁîb di ǁgaraga ra sao tsoatsoa. Tsî ǁîn ǂgoms, ǂūgu tsî tanisen ǀgaugu tsîna ra dī-ūnu. Nē ǀkharaǀkharan ge supu tama hâ, xawe da ge nēsa Elob gagab huib ǀkhā nî dī, ǁÎb gagab ǂgaoba xu ra dī-ūnusen ǂgao khoena ra hui xui-ao.

17. Mati da eloxoresa ǀgauga ūhâ khoena xu a ǂgōsen ǁkhā?

¹⁷ Eloba ra ǃoaba khoen tsî ǁîba ǃoaba taman tsîn ǁaegu hâ ǃkharagagusib ge nēsi ra mûǂanhe. Sida hîna Eloba ra ǃoaba da ge nî ǂan, îda tā nau khoen ǁîba ǃoaba taman di ǀgauga ūhâ. ǃKhâikhomhe da ge ra 2 Timoteub 3:2-5 ǃnâ îda nēti ī khoena xu ǂgō. Xawe da ge nē khoena xu hoaǃnâ-aixase a hâbē ǁoa. ǀNîsi da ge ǁîn ǀkhā ra sîsen, ǀguiba skola ra ǂgâ tamas ka io ǀguiba ǁnan hâ. Sida ge ǁîn di dī xūna xu a ǂgōsen ǁkhā. Nēsa da ge a dī ǁkhā, Elobmîsa da ga ǁkhāǁkhāsen tsî Jehovaba ra ǃoaba khoen ǀkhā ǀguiǃnâxa o.

18. Sida tanisen ǀgaub tsî ǃhoa ǀgaub tsîna mati nau khoena gagasise a hui ǁkhā?

¹⁸ Nau khoen tsîna da ge gagasise nî hui. Hoaǁae da ge nî aoǁnâ tsî Jehovaba nî ǂgan îb hui du ǃgâi mîde ǃgâi ǁaeb ai mîsa. Khoena da ge nî mîba Jehovab di ǀHûǀguitimî-aon di ǀgui da asa. ǁNā ǀgausi i ge sida tanisen ǀgauba Eloba ǃgôasib hînab anu hâba nî mā. Tsîb ra ǂgōǀau da “eloxoresasib tsî ǃhūbaib di turagu tsîna ǀūxū, tsî da nî tanisen tsî ǂhanu-aise tsî eloǃaoǃgâxase nē ǃhūbaib ai ûi ǃkhaisa.” (Tit. 2:11-14) Eloǃaoǃnâxasib ǀgauga da ga ūhâ o, on ge khoena nēsi nî mû tsî nî mî, sida ge “sadu ǀkha nî ǃgû, Elob sadu ǀkha hâ, ti ge go ǁnâu xui-ao.”—Sax. 8:23.