1, 2. Mâ ǁaxasiba kai ǀguiǃnâxasiba ǃhūbaib ǂhawase 2018ǁî kurib ǃnâ nî hā-u, tsî mati i io du ti ra mî? (Tsoatsoas ǃnâ hâ ai-īsiba mû re.)

MAARTI 31 2018ǁî kurib dis ai, sores ǂgâb ain ge Jehovab di ǀHûǀguitimî-aon tsî Elobmîsa ra ǁkhāǁkhāsen khoen tsîna Jesub ǁōb ǂâiǂâisens ǃgao nî ǀhao. ǃHūbaib ra dawasen khamin ge khoen ǃkharagagu ǀkharigu ǃnâ hâna saogurase miliundi ǃnâ Jesub ǁōb xa nî ǂâiǂâisen. Kuri korobese i ge nē ǁaxasiba ǃhūbaib ǂhawase ra tsēdīhe.

² Mûnan-ai da ge nî matib Jehovab tsî ǁÎb ǀgôab tsîkha ra tsâ ǀgausa mû gu ga ra o, matin khoena ǂgui miliundi ǃgôab ǃnâ nē tsēsa ra tsēdi ǀgausa ǀams nî hās kōse. Elobmîs ge ra mî: “kai ǂnubis, khoe-i xare-i a ǃgôa ǁoas. [hoa] ǃhaodi tsî ǁaedi tsî gowagu” tsîna xu hân ge nî mî “ǃGâiǃōba ab sida Elob, trons ai ǂnôab di, tsî ǁKhaob di”. (J.ǂHa. 7:9, 10) Jehovab tsî ǁîb ǀgôab tsîkha ge kaise ra ǃgôaǃgâ nē ǁaxasiba du ga kurib hoaba ga ra hâ ǃnâ o.

3. Nē ǁkhāǁkhāǃâs ǃnâ i mâ dîde nî ǃereamhe?

 ³ ǀNî dîdi ge hâ nē ǁkhāǁkhāǃâs nî ǃereamde. (1) Mati da hoada aiǂhomisen ǁkhā îda Jesub ǁōb ǂâiǂâisensa hâ ǃnâ, tsî mati da nē ǁaxasiba hâ ǃnâsa xu nî ǀama? (2) Jesub ǁōba ǂâiǂâisensa mati ǀguiǃnâxasiba ra omkhâi? (3) Mati da sida ǁnā ǀguiǃnâxasib tawa a ǀaro ǁkhā? (4) Nē ǁaxasiba ǀam i nî? ǀAm i nîs ga o, mâǁae?

4. Mati da ǁkhā da an hoana nî dī i da Jesub ǁōb ǂâiǂâisensa hâ ǃnâ?

⁴ ǂHâǂhâsasiba mû re nē ǁaxasiba hâ ǃnâs diba. ǂÂis ǃnâ ūhâ re nē ǀhaode hâ ǃnâs ge sada ǃoabas ǃâ. Jehovab tsî Jesub tsîn ge ra ǃgaoǃgâ sada ǁguiǂgāsensa nē ǂhâǂhâsa ǀhaosa hâ ǃnâs ǃaroma. Sida ge ǁîkha ra ǁgau ǂgao, ǃgomse ǀaesens tamas ka io i ga ǁkhōǁkōsasiba hâ tama io, da ǁkhā da an hoana ra dīsa i da nē ǀhaosa hâ ǃnâ. Sada tanisen ǀgaub ge nî ǁgau matikōse i a ǂhâǂhâsa ǃkhaisa Jehovab ‘ǂâiǂâisen ǂkhanîs’ ǃnâ hâsa, ǁnā ǂkhanîs ǃnâ i ge ǀamo ûiba nî hō khoen di ǀonde a xoa mâisa—Mal. 3:16; J.ǂHa. 20:15.

5. Jesub ǁōb ǂâiǂâisens aiǃâ da mati nî ‘Ôaǃnâsen ǂgoms ǃnâ da hâsa’?

⁵ Jesub ǁōb ǂâiǂâisensa ǃoa garu ǁaeb ǃnâ da ge, ǁaeba nî ǁama ǂui i da ǂorisase sida aitsâma ôaǃnâsen noxoba da ǂgaob hoab ǀkha Jehovab ǃoa ai a ǂgomǂgomsa ǃkhaisa. (Khomai re 2 Korinteǁîn 13:5.) Mati da ǁnāsa a dī ǁkhā? ‘Ôaǃnâsen ǂgoms ǃnā da hâsa’. Nēsa dīs amsi da ge a dîsen ǁkhā ‘Amabes ǃnâ tita ǂgom i ta ra hoaraxu Jehovab di mâ-amsa ūhâ ǀapeǂhomis di ǁani ta asa? ǁKhā ta an hoana ta ra dī khoena Elob Gaosib xa ǁkhāǁkhāsa aoǁnâ sîsenni ǃnâ? Tita ra ûi ǀgausa ǁgau i ra ǂgom ta ra sa ǀunis tsēdi ǃnâ da ûi hâsa? Jehovab tsî Jesub ǃoa ai, ǁkhā ǂgomǃgâba ta ūhâ, ǁāǁnâhē tsî māǁnâsen ta gere ǁaeb ai ta ge ūhâ iba? (Mat. 24:14; 2 Tim. 3:1; Heb. 3:14) Nē dîdi di ǃereamde ôaǃnâs ge nî huida, îda mû ham da asa.

6. (a) Mâba a hoaraxu hâ dao ûib diba? (b) ǀNî ǀhaohâb ǃûi-aoba mati kurib hoaba, Jesub ǁōb ǂâiǂâisens ǃoa ra aiǂhomisen tsî sida tsîna nēsa mati a dī ǁkhā?

⁶ Khomai tsî ǂâiǃgâ re xoadi hîna ǂhâǂhâsasis ǃuiǂûs disa ra ǂoaxa ūde. (Khomai re Johaneb 3:16; 17:3.) Hoaraxu hâ daob hîna ǀamo ûiba ǃoa garub ge Jehovaba ‘ǂans’ tsî Jesub ǁîb di ǀguise ǃnae hâ ǀgôab ǃnâ ‘ǂgomsa’ xu hâ. Aiǂhomisens ǃaroma mati io du ǁkhāǁkhāsen tama xūn hîna Jehovab tsî Jesub tsîkha ǃoa nî ǀgūǀgū du na? Nēs ge aiǁgaus ǀnî ǀhaohâb ǃûi-aob kaxuse amab ǃnâ hâb disa. Kurikab ge Watchtower ǂkhaniba xu ǃâde gere ūǂui Jesub ǁōb ǂâiǂâisens xa gere ǃgû te, ǁgau gere te Jehovab tsî Jesub tsîn ǀnamda hâ ǀgausa. Wekhegu Jesub ǁōb ǂâiǂâisens aiǃâb ge nē ǃâde gere ǃgûǃgâ tsî gere ǂâiǃgâ ǂhâǂhâsasib nē ǃnaeǃkhais diba. ǁÎb ge nē ǂkhaniga hoaǁae ǀgui tamas ka io ǀgam ǁkhāǁkhāǃâdi ǀkha ra ǀaro. Nē ǃgâsab ge ge mûǂan nē ǁkhāǁkhāǃâdi tsî Jesub ǁōb ǂâiǂâisens ǃaroma mâsa Elobmîs ǃâde khomai tsî ǂâiǃgâs ge ǁîba ge hui, kurib hoaba ǀasa xūna ǁkhāǁkhāsensa. Xawe kaise ǂhâǂhâsas ge ǁîb ǀnammi Jehovab tsî Jesub tsînab ūba hâb ge kurib hoaba ra  ǀgai. Sida ǀnammi Jehovab tsî Jesub tsîkha da ūba hâb ge nē ǁkhāǁkhāǃâde xu a ǀgai ǁkhā tsî da ge ǁîkha nî gangan, tsî Jesub ǁōb ǂâiǂâisensa xu a ǀama ǁkhā.

7. (a) Jesuba tae-e ǂguro ǃuiǂûs ai ge ǀgoreba? (b) Tae-e ra ǁgau Jehovab ge Jesub ǀgorede a ǁnâu-amsa?

⁷ ǂGuro ǃuis, ǃuiǂûs dis aib ge Jesuba ge ǀgore ǁîb saosaben nî ǀguiǃnâxasiba ūhâsa, ǁîb tsî ǁîb ǁGûb tsîkha ūhâ ǀguiǃnâxasiba. (Khomai re Johaneb 17:20, 21.) Jehovab ge ǁîb ǀgôab ǀgoresa ge ǁnâu-am tsîn ge nēsi miliundi khoena ra ǂgom Jehovab ge ǁîb ǀgôaba a sî ǃkhaisa. Jesub ǁōb di ǂâiǂâisens ge ǁgauǁgaus ase ī, Jehovab di ǀHûǀguitimî-aon di ǀguiǃnâxasib ǃgao. ǃKharaga ǃnâgu khoen ge ǃhūbaib ǂhawase ǀhû-ommgu ǃnâ ra ǀhao. ǀNî ǃkhaidi tawa i ge nēti i ǀhaode khoen xa ra ǃgôaǁnāhe. Xawe nēti i ǀguiǃnâxasib ge kaise Jehovab tsî Jesub tsîkha mûǁae a ǀō-aisa!

8. Jehovaba mâ haisi-amsa Esegiela ge mā ǀguiǃnâxasib xa?

⁸ Jehovab di ǁaese ǀguiǃnâxasiba ūhâs ge buruburuxa tama. Jehovab ge nēsa ge mîǁgui: ǂÂi re Esegieli kēbos xa ǀgam haikha hînab ge ǀhaobe kha ǀguib “Judab” dib tsî “Joseb” dib tsîna (Khomai re Esegieli 37:15-17.) “Khomai-aon dîdi” hîna ge The Watchtower ǂkhanib Julib 2016 ǁî kurib dib ǃnâ hâ i di ge ge ǁguiǃā: “ Jehovab ge Esegiela ǃgâi ǃâubasensa ūhâ kēbosa ge mā, ǁnās ge Israeli ǀgam gaosikha ǁkhāwa nî ǀguisa Israel ǃhūb ǃnâ oa sī tsî ǀguiǁaes ase ǀguiba ǀguiǃnâxase nî hâsa. Nēs ge sida tsēs ǃnâs tsîna ra ī Elob khoen nētsē ǀguiǃnâxase ǀguiba ra ǃoabasa.”

9. Esegieli kēbosa mati kurib hoaba Jesub ǁōb ǂâiǂâisens tawa ra dīǀoaǀoahe?

⁹ Jehovab ge 1919ǁî kuriba xu ǁîb ǂkhauhesana ǁaeb ǀkha ge ǀguiǀgui tsoatsoa, ǁîn hîna ge “Judab” haib khami ī na. ǁNān hîna ǃhūbaib ai ǀamose hâs di ǃâubasensa ūhân ge ǂgui khami—ǁîn hîna “Joseb” haib khami ī na—Nē ǀgam ǃkharaga ǃâubasende ūhâ ǃgâsan ge ge “ǀgui” ǃhara kai. (Jhn. 10:16; Sax. 8:23) Jehovab ge ge mîǁgui nē ǀgam haikhab nî ǀgui kaisa. (Ese. 37:19) Nē ǀgam ǃkharagagu ǃâubasensa ūhâ khoen ge ǀguiǃnâxase ǀguiba, ǀgui Gaob ǃnāga ra ǃoaba—ǁNāb ge Jesuba ǁîb hîna kēbodi ǃnâ, Elob “ǃgāb Davib” di ra ǂgaiheba. (Ese. 37:24, 25) Nē kaise ǃgom ǀgausa ǀguiǃnâxasib hînab ge Esegiela a kēbob ge ǃgāsase nētsē a mûhe ǁkhā Jesub di ǁōb ǂâiǂâisensan ǂkhauhesan tsî “nau gun” tsîna ǀguiba ra dī o. Sida tae-e a dī ǁkhā nē ǀguiǃnâxasiba ǂkhâǃnâsa?

10. Mati da ǀguiǃnâxasiba Elob khoen ǁaegu nî ūhâ?

¹⁰ ǀGui ǀgaub hîna da ǀguiǃnâxasiba ra ǂkhâǃnâs ge ǃgamǃgamsensa. ǃHūbaib aib ge hâ io, ob ge Jesuba ǁîb ǁkhāǁkhāsabega gere ǃkhâikhom i gu ǃgamǃgamsen. (Mat. 23:12) ǃGamǃgamsen da ga ra o, o da ge ǃhūbaib ǂâi ǀgaub aitsâma ǀgapiǀgapisens diba ūhâ tide. ǃGamǃgamsens ge nî hui da îda ǂgaeǂgui-aoga ǃgôasiba ūhâba tsî nē ǀgaub ge nî huida ǀguiǃnâxasiba ǀhaohâb ǃnâ ūhâsa. Xawe hoan ǂamai i ge ǃgamǃgamsensa Eloba nî ǃgâiaǂgao kai,  ǁîb hîna “ǃguriǂgaoxana ra mâǃoa, xaweb ra ǃgamǃgamsensana ǀkhomma mā xuige.”​—1 Pet. 5:5.

11. Pereb tsî xûi-i tsîn xa ǂâiǃgâsa mati nî hui da ǀguiǃnâxasiba ǂkhâǃnâsa?

¹¹ ǀGamǁî ǀgaub hîna da ǀguiǃnâxasiba a ūhâ ǁkhāb ge pereb tsî ǂauxûib Jesub ǁōb ǂâiǂâisen din xa ǂâiǃgâsa. ǁNā ǃuis aiǃâ tsî ǂhâǂhâsase ǁnā ǃuis ai, da ge pereb tsî xûi-i tsîn di ǂhâǂhâsasib xa nî ǂâiǃgâ. (1 Kor. 11:23-25) Pereb ge Jesub ǁōre oǃnâ sorosa ra ǂnûǁkhaeba tsî xûi-i ge ǁîb ǀaoba ra ǂnûǁkhaeba. Xawe ǁnâuǃās nēn tae-e mâbas ǀguis ge ǂâu tama hâ. ǂÂis ǃnâ ūhâ re Jesub ǁguibas ge ǀgam ǀgaukha hînab ge ǀnamma a ǁgau da ga ǃkhōǂgā hâ—ǀnammi Jehovab ge ǁgaub ǁîb ǀgôabab ge sî o, tsî ǀnammi Jesub ge ǁgaub māsenxaseb ge ǃhūbaib ai hā o. Nē ǀnammi ge nî dī, îda sida tsîna ǁîkha ǀnam. Sida Jehovaba ūba hâ ǀnammi ge tsūrib khami i, ǀguiba ra ǃgae ǀhao daba tsî ǀguiǃnâxasiba ra ǀgai kaiba.

12. Jesuba ǁîb ǂkhōs ǃnâ mati ge ǁgau Jehovab ra ǂgao ǃkhaisa îda ǀûbagu?

¹² !Nonaǁî ǀgaub hîna da ǀguiǃnâxasiba a ǁgau ǁkhab ge khoena da ga mâsenxase ǀûba o. Sida ga ǁnan hîna ra tsūdī da na ǀûba o, o da ge ra ǁgau Jesuba da xoremarib ǃgao ra gangansa. Jesub ǂkhōdi Mateub 18:23-34 ǃnâ xoasa di xa ǂâi re. Dîsen re: Jesub ge ǁkhāǁkhā xūna dī i ta ra? Ti ǃgâsana ǃnūǃnâxasib tsî ǁnâuǃāb tsîna ǁgau i ta ra? Tita ǃoagu ra tsūdī khoena ǀûba i ta ra? ǃKharagagu ǁōren ge hâ tsî ǀnî ǁōren ge kaise a ǃgom ǀoasa kurusa ūhâ tama khoen xa ǀûbahesa. Xawe nē ǂkhōs ge ra ǁgau da Jehovab tae-e ra ǂgaosa. (Khomai re Mateub 18:35.) Jesub ge ge mî Jehovab ge sida ǀûba tide sida di ǃgâsana da ga ǀûba tama io, ǃgâsan ga ra ǁgau o ama ǃhausenhan rasa. Nēs ge kaise a ǃāsa ǂâiǃgâsa! Sida ǀguiǃnâxasiba da ge ra sâu tsî ūhâ ǀkhara nau khoena da ga Jesub ge mî khami ǀûba o.

13. ǂKhixaǃnâsiba ūhâsa mati ǀguiǃnâxasiba ra ǂkhâǃnâ?

 ¹³ Nau khoena da ga ǀûba o, o da ge ra ǁgau ǂkhîxaǃnâ da a sa. Apostel Paulub ge mî “Î du ǁgū, Gagab di ǀguiǂâixasiba ǃkhōǀgaipesa ǂkhîb di ǃgaeǁaresa xu.” (Efe. 4:3) Jesub ǁōb ǂâiǂâisens ǁaeb ǃnâs tsî ǁnā ǃui tsîna da ge ǃgamse nî ǂâiǃgâ nau khoena da ra tanisen ū ǀgaub xa. Dîsen re: Tita ǁgau i ta ra khoena ta xūna taniba tama hâsa? ǂKhîb tsî ǀguiǃnâxasib tsîna ǂkhâǃnâ i ta ra? Nē dîdi ge kaise a ǂhâǂhâsa ǂâiǃgâsa nē ǁaeb ǃnâ.

14. Mati da nî ǁgau “ǀnammi ǃnâ” da ra tanigusa?

¹⁴ Hakaǁî ǀgaub hîna da ǀguiǃnâxasiba ra ǁgaus ge, ǀnamma ǁgausa Jehovaba ǁgaes ǃnâ-ū, ǁîb ge ǀnammi di Elo. (1 Jhn. 4:8) Sida ǃgâsan ǃoagu da ge tā nî mî “ǁîna ta ge nî ǀnam xawe ǁîn xa ǃgâibahe tama”! Nēs ge Paulub ǁnamasa xu ra ǃkhara, ǁîb ge mî xui-ao îda “ǀnammi ǃnâ tanigu” (Efe. 4:2) ǁÎb ge ‘î da tanigu’ di ǀgui ge mî tama hâ, xaweb ge nēsa da ge “ǀnammi ǃnâ” nî dī di ge ǀaro. ǃKharagagusib ge hâ nē ǀgam ǀgaukha ǃnâ. Sida ǀhaohâb ǃnân ge kaise ǃkharagagu ǀgauga ūhâ khoena hâ, hoan hîna ge Jehovab xa ǂgae-e na. (Jhn. 6:44) Jehovab ge nē khoena ǁîb ǃoa ge ǂgae, Nēs ge ra ǁgau ǁîn a ǀnamǀnamsa ǃkhaisa. ǂHâbasa-e khoma sida nî, sida ǃgâsana ǀnam-e ǁoasase ǀgoraǃgâsa? Tā da ge ǀnamma nî ǃkhō oa, Jehovab ra mîba îda nau khoena ǁgau!—1 Jhn. 4:20, 21.

15. Mati da a ǂan ǀuniga Jesub ǁōb ǂâiǂâisens nî hâ ǃkhaisa?

¹⁵ ǀGui tsē i ge ǀuniga ǂâiǂâisens Jesub ǁōb disa nî hâ. Mati da nēsa a ǂan? ǁÎb ǂguro sîǂkhanis Korinteǁîn ǃoas ǃnâb ge Pauluba ǂkhauhesa Xristeǁîna ǃoa ge xoa, Jesub ǁōba mâ kurib hoaba ǂâiǂâisens ǃnâ-ūn ge “ǃKhūb di ǁōba nî aoǁnâ, hāb nîs kōse.” (1 Kor. 11:26) “Hās”ge nēba Jesub ge mî kēbos, ǀuniga tsēdi “hās” xa ra ǃhoa. Kai ǁgâiǀādi hîna nî hā di xab ge ǁîba ge mî: “ǁNāǃnubais ge saos Khoen Ôab disa ǀhommi ai nîra ǂhai, tsî ǁnāǃnubai di ge ǃhūbaib di ǃhaodi hoade nîra ā, tsî Khoen Ôaba ǀhommi di ǀnanudi ai tsî kai ǀgaib tsî ǂkhaisib ǀkha ǃgoaxase nîra mû. Tsîb ge ǀhomǃgāgu âba kai dom-e ūhâ ǀgapadas ǀkha nîra sîǂui; o gu ge ǁîb di ǃkhōǂuibasensana nîra ǀhaoǀhao, haka ǂoade xu, ǀhommi di nē ǀamsa xu naus kōse.” (Mat. 24:29-31) Nē ǀhaoǀhaos ge ra ǂâibasen ǂkhauhesan hîna noxoba ǃhūbaib ai hân ge ǁîn ǂgais ǀhommi disa nî hō di. Nēs ge kai ǁgâiǀāb khaoǃgâ xawe Armagedons aiǃâ nî hā. Tsîn ge nē 144 000 ǂkhauhesana Jesub ǀkha ǀguiba, nē ǃhūbaib gao-aoga nî dīkaka. (J.ǂHa. 17:12-14) Jesub ǁōb ǂâiǂâisens hîna nēs aiǃâ nî hâs ge nî ǀuniga i, Jesub nî hā xui-ao.

16. Tae-i ǃaroma da Jesub ǁōb ǂâiǂâisens tawa nî hâ?

¹⁶ Hāre i da 31 Maart 2018ǁî kuri Jesub ǁōb ǂâiǂâisensa ǃoa ī tsî mû nēsa xu da ra ǀama ǀgausa. Tsî Jehovaba ǂgan îb hui da ǀguiǃnâxasiba ǂkhâǃnâsa! (Khomai re Psalmdi 133:1.) ǂÂis ǃnâ ūhâ re ǀgui tsē i ge ǀuniga ǂâiǂâisens Jesub ǁōb disa nî hâ. Xawe nēsi da ge ǁkhā da an hoana nî dī, nē ǃuisa hâ ǃnâsa tsî nēba ǀguiǃnâxasiba nî hōǃâ.