1. Nētsēde tae-i ǃaroma a ǀō-aisa?

NĒ ǁAEB hîna da ûi ǃnâ hâb ge kaise a ǀō-aisa. Elobmîs ge mî khamib ge Jehovaba “kai ǂnubis . . , ǀūbeǁaedi tsî ǃhaodi tsî ǁaedi tsî gowagu tsîn hoana” xu khoena ra ǀhaoǀhao. Nēn hîna ra ǀhaoǀhaohen ge a “ǀgaisa ǁae” 8 milliuns xa ǃnāsa khoena ūhâsa, tsîn ge nē khoena “ǁÎba tsēs tsî tsuxub  . . . [tsîna] ra ǃoaba.” (J.ǂHa. 7:9, 15; Jes. 60:22) Nēs ge kaise a buruxa mûsa, khoen hîna Elob tsî ǁîn ǃgâsan tsîna a ǀnamna.

2. Eloba a ǀū khoena mati i ǀnamma ra ǁgau? (Tsoatsoas ǃnâ hâ ai-īsiba mû re.)

² Xoadi ge ge mî sida tsēdi ǃnâ i ge ǀnîhâ ǀnamma nî hâ, khoen hîna a ǁîǀnamsenxan ge nî ǀoa di. Apostel Paulub ge ge xoa “ǀUni tsēdi ǃnân . . . nîra ǁîǀnamsenxa, mariǃgunuxa, . . . turaba Elob ǃgâ-ai ra ǀnamna” nî hâ di. (2 Tim. 3:1-4) Nēti i ǀnammi ge Xristeǁîn ǀnamma xu ra ǀkhara.  ǁÎǀnamsenxasib ge khoena ôan ra ǂkhîba mā tama hâ. Nēti i ǀnammi ge a “ǃgom” tanisa.

3. Nē ǁkhāǁkhāǃâs ǃnâ da tae-e nî ǃhoaǃgao tsî tae-i ǃaroma?

³ Paulub ge ge mî ǁîǀnamsenxasib ge Xristeǁîn ǃaroma a ǁkhōǁkhōsa di. ǁÎb ge ǀaro tsî ge mî, nēti i ǀnamma ra ǁgau khoena xu “ǂgō”. (2 Tim. 3:5) Xawe da ge hoase nē khoena xu a ǂgō ǁoa. Mati da ǃhūbaib di ǀgauga xu nî ǂgō tsî Jehovaba nî ǂkhîǂkhî, ǀnammi di Eloba? Hā re î da elosi ǀnamma 2 Timoteub 3:2-4 ǃnâ ra mîhe ǀnammi ǀkhā kō ǀhao. Nēs ge nî hui da îda ôaǃnâsen mā ǀnamma da nî ǁgaus tsî mā ǀnammi ǂkhîba ra māsa.

4. Tae-i ǃaroma i tsū tama hâ, ǃgâi ǀgaub ǃnâ aitsâma ǀnamsensa?

⁴ Aposteli ge ge xoa “Khoen nîra ǁîǀnamsenxa”. Xawe tsū-e ǁîǀnamsenxasisa? Tsū tama i ge hâ ǀnamsensa ǃgâi ǀgaub ǃnâ. Jehovab ge di ge kuru da. Jesub ge ge mî: “Sa ǀgūkhoebats ge sats ǁkhāts khami nî ǀnam.” (Mrk. 12:31) Sida ga ǀnamsen tama ga ra io, o da ge sida ǀgūkhoeba da a ǀnam di a mî ǁoa. Xoadi ǃnâs tsîna da ge ra khomai: “ǁNāti gu nî aoga ǁîgu tarade ǀnam, ǁîgu sorodi ǂûdi khami. ǁÎb tarasa ra ǀnammi ge ǁî-aitsama a ǀnamsenna. khoe-i xare-i ge tātsē ǁî-i ǁgans ǂûsa ǁkhan tama hâ xui-ao.” (Efe. 5:28, 29) ǃGâi ǀgaub ǃnâ da ge aitsâma nî ǀnamsen.

5. Tae-e a mîhe ǁkhā ǁîǀnamsenxa khoen xa?

⁵ Aitsâma ǀnamsens hîna 2 Timoteub 3:2 ǃnâ ra mîhes ge ǃgâi tama hâ. Nēs ge ǃgâi tama ǀgaub ǃnâ ǀnamsensa. ǁÎǀnamsenxa khoen ge ǁîn xa ǀgui ra ǂâi. (Khomai re Romeǁîn 12:3.) ǁÎn ge hoaǁae ǂgurose ra mâisen. Tsî nau khoen ǀkhā ǁae tama hâ. Xūn ga ǃgâise ǁîn ǀkha ǃgû tama io, o nau khoena ǀhapisa ra mâ. ǀNî Elobmîs xa ra ǃhoa ǂkhanis ge ra mî ‘ǁîǀnamsenxa khoen ǃnoab khami tsaura ǀkhāba ǁîn ǀkhāb-ai ūhâ tsî nau khoena ǁkhūxa ǀkhāba ra mā’ di. ǁÎǀnamsenxasis ge khoena ǂkhîba mā tama hâ.

6. Eloba ǀnamsa xu-i tae-i ǀkhaega hâ?

⁶ Elobmîs ǁkhāǁkhā-aon ge ge mî ǁîǀnamsenxasis ge ǂgurose apostel Paulub xa mâihe hâ nau ǀgaugu hoaga xu, ǁîǀnamsenxasisa xu-i ge nau ǀgaugu hoaga ra hā. Xawe Eloba a ǀnam khoen ge ǀnîhâ ǀgauga ūhâ. Elobmîs ge elosi ǀnamma saora ǀgaugu ǀkhā ra ǀgopeǀnō: “ǃgâiaǂgaob, ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǀgausib tsîna.” (Gal. 5:22, 23) Psalmdi xoa-aob ge ge xoa “ǃgâiǃōs ge ǁnā ǁaes, ǃKhūba Elose ūhâsa.” (Psa. 144:15) Jehovab ge ǂkhîb di Eloba tsîn ge ǁîb ǃoaba-aon tsîna nē ǀgauba ra ǁgae. Khoen hîna a ǁîǀnamsenxan khamin ge Jehovaba ra ǃoaba khoena ī tama hâ, xawe kaise ra ǃgâiaǂgao māsenxan ga o, nēs ǁîn ǃgâib ǃoagu ra ǃgû xui-ao.—ǃNǃkh. 20:35.

7. Mâ dîde nî hui sida ǀnammi Eloba da ūba hâba ôaǃnâsa?

⁷ Mati da nî ôaǃnâsen ǁîǀnamsenxasis Eloba da ūba hâ ǀnammi xa ǀgaisa tama hâsa? Filipeǁîn 2:3, 4 ǃnâ a māsa ǃkhâikhoms xa ǂâi re nēti ra mîsa: “Xū-i xare-e tā ǂnīǂnīsens tsî  ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa. A i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.” Dîsen re: Nēsa tita dīǀoaǀoa i ta ra ti ûib ǃnâ? Elob ǂâisa ta hoaǁae ra dī? Khoena hui i ta ra ǀhaohâb tsî aoǁnâ sîsenni tsîn ǃnâ? Māsenxase māsens ge supu tama hâ. Nēs ge kaise sida xu ǂgan hâ. Xawe tae-e kaise nî ǂkhî kai da, ǂansa Jehovab xa da ge ra ǃkhō ǃoahe di?

8. Eloba ǀnamsa tae-e ǀnî khoena ge dī kai?

⁸ Eloban a ǀnam amagan ge ǀnî khoena ǃgâise ra mātarehe sîsen-e ūǃoa tama hâ tsî Jehovab sîsenni ǃnâ ǃnāsase ra dī. Erikas hîna Amerikab ǃnâ ǁnan hâs ge a dokter. ǃGâise ra mātare sîsen-e ôas xas ge ǁîsa aimâba-aose ra sîsen tsîs ge aiǂhanuba ge ūhâ i ǃkharagagu ǃhūgu ǃnâ ǁîs di aob ǀkha aimâba-ao sîsen-e dīsa. ǁÎs ge ra mî: “Nē aiǂhanub hînam ge ūhâ īb ǀnîhâ ǃhūb ǃnâ sī aoǁnâs dīb ge kaise ge huim ǂgui ǀhōsana dīsa nēs ge kai ǂkhîba ge mā mi. Tita ge noxoba a dokter xawe ti ǁaeb tsî ǀgaib tsîna Jehovab sîsenni ǃnâ ra sîsen-ū, nēs ge tita kaise ra ǂkhî kai.”

9. Mari-e a ǀnam khoena mati i io ǂkhîba ūhâ tide?

⁹ Paulub ge ge xoa khoen ge nî “mariǃgunuxa.” di. Kuriga ǃkharu hâseb ge aimâba-aoba ǀnî khoeb ǀkhā Elob xa ge ǃhoa. ǁNā khoeb ge mari-i ǃoa ǂnīsase ge mî: “Nēb ge ti Eloba!” ǃHūbaib ge ǂgui khoena ūhâ hîna a mariǃgunuxana tsî mari-i ǀkhān a ǁama ǁkhā xūn tsîna a ǀnamna. Xawes ge Elobmîsa ra mî “Mariba ǀnam hâ-i ge marib xa ǂâu tama hâ; tsî ǃnāǂamsasiba ǀnam hâ-i ge hōbasens xa ǂâu tama hâ.” (Aoǁn. 5:10) Nēti ī khoen ge hoaǁae ǂgui mariba ra ǂgao tsî ǁkhān an hoana ra dī în mari-e hō ǁkhā, nēs ge ǁîna “ǂgui tsûn” ǃnâ ra ǂgā.—1 Tim. 6:9, 10.

10. Gao-aob Salomoba tae-e ǃkhūsib tsî ǀgâsib tsîn xa ge mî?

¹⁰ Hoada ge mari-e ǂhâ hâ, maris ge ǃnorasib tsî ǁkhaubas ase ī. (Aoǁn. 7:12) Xawe khoe-e amabes ǃnâ ǂkhî ǁkhā i a, ǂhâ i hâ xūna ǂâuhâ maris ǀguisa i ga ra ūhâ o? Î, ǂkhî ǁkhā a! (Khomai re Aoǁnâ-aob 5:12.) Aguri, Jakeb ôab ge ge xoa: “ǀGâsib tsî ǃkhūsib tsîkha tā mā te: Îts ǂhâ ta hâ tsēkorobe pereba mā te.” ǁÎb ge, tae-i ǃaroma ǀgâsiba ǂgao tama hâ i ǃaromasa da ge nēsi ra ǁnâuǃā. ǁÎb ge ge ǁguiǃā ǃnari ǂgao tamab ge hâ īsa, nēs ge Eloba ǃgôasiba ga ǁgau tama hâ. Xawe tae-i ǃaromab ge ǃkhūsisa ǀgoreba tama hâ i? ǁÎb ge ge xoa: “Î ta tā ǁâ hâse ǀoa tsi tsî: Tariba ǃKhūba? ti mî’” (ǂKhm. 30:8, 9) ǀNîsi du ge khoen hîna ǃkhūsib ai ra ǂgomaiǂnûin tsî Elob ai ǂgomaiǂnûi taman xa ra ǂâi.

11. Jesuba tae-i ǃkhâikhomsa mari-i xa ge mâ?

¹¹ Khoen hîna mariǃgunuxan ge Eloba a ǃgâiaǂgao kai ǁoa. Jesub ge ge mî: “Khoe-i xare-i ge ǀgam ǀhonkhoekha a sîsenba ǁoa; ǀguiba i ge nî ǁkhan, tsî nauba i ge nî ǀnam, tsî ǀguib ai i ge nî ǂgāmâisen, tsî nauba i ge nî ǃharaxū. Elob tsî ǃkhūsib tsîkha du a sîsenba ǁoa.” Nēs aisib ge nēti ge mî: “ǁUiba ǃhūbaib ai tā ǀhaoǀhaobasen, nēpa di ge ǁgurib tsî ǀgūb tsîkha xa ra  hapuhe, tsî ǃnari-aon xa khaoǃkhopaǃgâhe tsî ǃnarihe. Î du ǁuiba ǀhommi ǃnâ ǀhaoǀhaobasen, ǁnāpa di ge ǁgurib tsî ǀgūb tsîkha xa hapuhe, tsî ǃnari-aon xa khaoǃkhopaǃgâhe tsî ǃnarihe tide.”—Mat. 6:19, 20, 24.

12. Ûiba supusupusa mati a hui ǁkhā Eloba ǃoabas ǀkha? Aiǁgausa mā re.

¹² ǂGui khoen ge ge mûǂan ûiba supusupus ge ǂkhîb ǀguiba mâ nî tama hâ xawen ge Jehovab sîsen-e ǁaeba ra ūhâba. Jacki hîna Amerikab ǃnâ ǁan hâb ge ǁîb kai ommi tsî ǂharugu tsîna ge ǁamaxu. ǁÎb ge ge ǂan i nēs nî dīsa îb ǁîb tsî ǁîb taras tsîna aimâba-ao sîsen-e dī. ǁÎb ge ra mî: “Kaise i ge ge ǃgom-i sim îsa, kai omma ǁamaxusa. Nēs ge supu tama hâ i xawe ta ge kaise ge ǂkhî nēsa ta ge dī o. Nēs ge tsûadanab ǀguiba gere ǃaroma amaga. Ti taras hîna ge aimâba-ao sîsen-e gere dīs ge hoaǁae ge ǂkhî-i. ǁÎs ge gere mî Tita ge kaise ‘ǃgâi ǀhonkhoeba ūhâ!’ Tita tsîn ge nēsi aimâba-aose ra sîsen. Hoam ge ǀgui ǀhonkhoeb Jehovaba ra sîsenba.”

13. Mati da sida mari-e ra mû ǀgauba nî ôaǃnâsen?

¹³ Sida mari-i xa mati ra tsâsa ôaǃnâsens ǃaroma da ge saora dîde ǂhauǃnâse nî ǃeream: ‘Tita Elobmîs mari-i xa ra mî xūna ǂgom i ta ra tsî ǁnās ǃoagu ra ûi? Mari-e kurusa ǂgurose ti ûib ǃnâ ra hā? ǃKhūsisa ta Jehovab tsî khoen tsîna ta nî ūhâba ǃgôasiba ūba hâ? Jehovab ti ǂhâsiga nî kōǃgâsa ǂgom i ta ra?’ Jehovab ge ǁîb ai ra ǂgomaiǂnûi khoena ǃharaxu tide.—Mat. 6:33.

14. Mati da ǃgâi ǁaeba ūhâsa nî mû?

¹⁴ Xoasa i a khami i ge nētsē “turaba  . . ǀnamna” nî hâ. ǃGâi ǀgaub ǃnâ ǀnamsens tsî tsēs ǂhâsiga nî dīǀoaǀoa mari-e ūhâs tsū tama hâ, khami i ge tsū tama ǃgâi turaga ūhâsa. Jehovab ge ǀûǃnâsen tsî da ǁkhoa-o ûiba nî ûisa ǂkhaba tama hâ. ǁKhoaxa xūna da ge a dī ǁkhā khoakhoa da ra na. Elobmîs ge ǂgomǂgomsa khoena ra hōhōǃnâ: “ǃGû, îts ǁnâi pereb âtsa ǂû ǃgâiaǂgaob  ǀkha, îts sa ǂauxûiba ā ǃgâiǂâis ǀkha.”—Aoǁn. 9:7.

15. 2 Timoteub 3:4 sa tae-i turagu xa ra ǃhoa?

¹⁵ ǀGamǁî Timoteub 3:4 ge turagu hîna Eloba ra ǃkhōǂuin xa ra ǃhoa. Nēpa da ge ra mû xoas ge mî tama hâ, khoen ge turaga Elob ǃgâ ai nî ǀnam di, ǁgau rase ǁîn ǁîba ǂkharirose nî ǀnamsa. Xawe ra mî Eloban nî ǀnams xa di. ǀNî ǂansabe i ge ge xoa: “Nē xoas ge ra ǁgau ǁîn Elob tsîna a ǀnam ti. Xawe ra ǁgau Eloban ǀnam tama hâsa.” Nēs ge kaise a ǃgâi ǃkhâikhom, khoen hîna turaga Elob ǃgâ ai ǀnam-an ǃaroma! “turaba  . . ǀnamna” di i ga mîhe o, o i ge ra ǂâibasen khoen ge “tura-ain ûib din ǃnâ ra ǃgû.”—Luk. 8:14.

16, 17. Jesuba mā aiǁgausa ge mā turagu xa?

¹⁶ Jesub ge turagu xa ǃgâi aiǁgausa ge mâ. ǁÎb ge ‘ǃgame ǁâudib’ tsî ‘kai ǂûǁaes’ tsîna ǃoa ge ī. (Jhn. 2:1-10; Luk. 5:29) ǃGameb aib ge buruburuxase ǁgam-e xûi-i ǃnâ ge ǀkharaǀkhara. Tsî ǀnîhâ ǃnās aib ge khoen hîna ge ǁîb xa ǁgaise gere ǃhoana ǂû tsîb gere ā ǃkhais ǃaroma ge ǀūxu.—Luk. 7:33-36.

¹⁷ Jesub ge turaga ǁîb ûib ǃnâ ge mā-am tama hâ i. ǁÎb ge Jehovaba ǂgurose gere mâi tsî ǁkhāb an hoana gere dī nau khoen ǃgâib ǃaroma. ǂGui khoen nî ûi amagab ge ǁîba ǁgai ǁōba ge ǁō. ǁÎb daoba ra sao khoen ǃaromab ge ge mî: “ǃGâiǃō du ge hâ, khoen ga sado ǁgui-ai tsî ǃgôaǃgon, tsî ǂhumib ǀkha hoa ǂkhaba xūna sadu ǃoagu gowao tita ǃaroma. ǃGâiaǂgao î du dâ, amǃnâs âdu ǀhommi ǃnâ a kai xuige; ǁnātin kom sada aiǃâ ge hâ i kēbo-aoga gere ǃgôaǃgono.” Mat. 5:11, 12.

18. Mâ dîde nî hui da ôaǃnâsensa, mati kōse da turaga a ǀnamsa?

¹⁸ Mati da nî ôaǃnâsen turaga da a ǀnamsa? Dîsen da ge nî: ǀHaodi tsî aoǁnâ sîsenni tsîna ta ǂgurose ti ûib ǃnâ ra mâi? Dī ǂgao ta ra ǃgâi xūna xu î ta nî, Eloba ta ra ǂkhîǂkhî ǂgao amaga? Xū-e ta nî dīs aiǃâ ta aibe ra ǂâi Jehovab tae-e nēs xa ra ǂâisa? Eloba da ga ǀnam o, o da ge ǁÎb ǃhui hâ xūn hoana xu nî ūbēsen ǁîb di mîba da tama hâ xawe.—Khomai re Mateub 22:37, 38.

19. Hamna ǂkhî tama hâ?

¹⁹ Khoen ge 6000 kuriga ge ǂkhîoǃnâ i, xawe i ge ǁgâuab ǂgaeǂguisa ǀae nî ǀam. ǃHūbaib ge ǁîǀnamsenxa, mariǃgunuxa tsî turaga ūhâ khoen xa ǀoa hâ. ǁÎn ge hoa xūn ǃnâ ǂgurose ra mâisen tsî ǁîn ra ǂgao xūn ǀguina ra ǂgao. Nēti i khoen ge ǂkhîba ūhâ tama hâ. Psalmdi xoa-aob ge ge mî “ǃGâiǃō i ge ǁnā-i, Jakob di Eloba ǁî-i di huise ūhâ-e, ǃâubasens â-i ǃKhūb, ǁî-i di Elob ai hâ-e.”—Psa. 146:5.

20. Eloba ǀnamsa mati ǂkhîba ge mâ du?

²⁰ Jehovab khoen ge kaise kai ǀnamma ǁîba ūba hâ tsî nē ǀnammi ge hoaǁae ra kai. Nēs ge ra ǁgau Elob Gaosib ra ǂgaeǂguisa tsî ǀgūǁae ǀkhaega ǃhūbaib ai nî hā-ūsa. Ama ǂkhîba da ge Jehovab di ǂâisa da ga ra dī o, o ra hō tsî da ge a ǂan ǁîba da ra ǂkhîǂkhî ǃkhaisa. Jehovaba a ǀnam khoen ge ǀamosib kōse nî ǃgâiaǂgao! Saora ǁkhāǁkhāǃâs ǃnâ da ge nî mû ǀgaugu hîna da nî hōga, ǁîǀnamsenxa da ga ra o tsî nē ǀgaugu mati Jehovab ǃoaba-aona xu ra ǀkharasa.