NĒSA ǂÂI RE: Musemsa du ra sari, ǃkharu ge ǁaeb ǂgui ǃkharagagu xūna ani ǃnâhe hâsa. Nē xūn ge ǀoro tsî ega sîsen-ūhe ǁoa. Tsî ǀnîn ge ǃâga ūhâ tama hâ. Xawe ǀgui xū-i ge ǁîn ge ǃamkuse a sâusa. Tsî ǁîn ǃamku ǀgaub ǃnâ a kurusa tsî a ǃanu. “Nē-e a ǀasa nau i xa?” di du ge sari-aona ǁgaumâ khoeba ra dî. “Hî-î,” dib ge ra ǃeream, “hoan xa a ǀoro tsî dī-unuhe tama.” “Nēsa ge sâusa i?” di du ge ra dî. “Hî-î,” dib ge ǁgaumâ du ra khoeba ra mî. “ǁÎs ge ǀgaisa ǀanub tsîn ǂoab xa ge hōhe. Tsî ǂgui khoen ge gere dītsâ ǁgaiǁgaisisa.” ǀNîsi du ge kaise ra buru ‘nēs tae-e xu a kurusa ǃkhaisa?’

Nēs khamis ge Elobmîsa a ǂoaǂamsa. Elobmîs ge kaise a ǀoro tsî ǀhapese hâ ǂkhanisa. ǀNî hâ ǀoro ǂkhanidi tsîn ge hâ. Xawe ǀnanu tamas ka io ǂoab xa ǁgaiǁgaihe hâna. ǀNai ge xoahe xūn ge ǁaeb ra ī khami ra ǁgai. Aiǁgause, ǁîn ra mî xūn ge ǀasase xoahe hâ xūn ǀkha ǃgûǀhao tama hâ. Tsî ra ǃkhōǃkhunihe ǀasa ǂans ǀkha. ǁîn ǀaeǃkhōs ǃgao hâ ǀapemādi ge a ǃaoǃaosa. Tsî ǀorokamǁaeb ǂkhanin ǀnîn ge ǀnai ǁgai, dīkākāhe tsî kā hâ.

Xawe ǂoaǂamsase ra mâǂoa. Elobmîs ge ǂgui kurin ǃkharu hâse ge xoahe. Xawe ǂuru mâsib ǃnâ hâ. ǁNāǂamhes gere xawe. Tsî kurin gere ī khamis ge ǂhubihe, mā-amhe tama i tsî xū tamase gere mûhe. Xawe Elobmîs ra mî xūn ge a ama. ǁÎs a ǀoro xawes ge ǂoaǂamsa ǂansa ǃkhōǂgā hâ. Tsî hānî xūn xas tsîna ra ǃhoa.—Boksisa khomai re, “ǀOro tamas ka io ǁîs ǁaeb aisi hâ?”

ǀNîsi du ge ra ǂâi, ‘Elobmîs ǁkhāǁkhāde ǂhâǂhâsa-e nētsē?’ ǃEreamsa ǃgao, dîsen re: ‘Mâ ǁgai ǃgomsinan khoena nētsē ra hōǃâ? Mâna ǃnāsase a ǃaoǃaoxa?’ ǀNîsi du ge saoran xa ra ǂâi, torob, ǀurib, ǂkhabadīb, tsî ǁgaisib tsîn xa. A da Elobmîs ra ǁkhāǁkhā xūn xa ǃhoa re. Aitsama dîsen re, ‘hoa khoen ga Elobmîs ǂhanugu ǃoagu ga ra ûi o, o ǃhūbiaba ga ǃgâi tama hâ?’

ǀNAMMI TSÎ ǂKHÎB

“ǃGâiǃōn ge hâ ǂkhîxaǃnâna ǁîn Elob ôan ti nîra ǂgaihe amaga.” (Mateub 5:9) “Ī ǁkhā i kao, sadu tawa i hâs kōse, hoa khoen ǀkha ǂkhîb ǃnâ ûi re.”—Romeǁîn 12:18.

ǀKHOMXAǃNÂ TSÎ ǀÛBAS

“ǃGâiǃōn ge hâ ǀkhomxaǃnâna ǁîn nîra ǀkhomxaǃnâhe amaga.” (Mateub 5:7) “î du tanibagu, î du ǀûbagu, nē-i ga nau-i ǃoagu ǀauxū-e ūhâo;” Jehovab * “ge sado ǀûbas ǁkhās xase sado ǁkhāti dī.”—Koloseǁîn 3:13.

ǃHAODI ǀGUIǃNÂXASIB

Elob ‘ge ǀguib khoeba xu, hoa ǃhaode ge kuru, ǃhūbaib ai.’ (ǃNaeǃkhaidi 17:26) ‘Elob ge ǃhao ǀgora tama hâ. xawe mâ ǁae-i hoa-i ǃnâ ga ǁîba ǃaoǃgâ tsî ǂhanu-aisiba dī-i ge ǁîb di ǃkhōǃoasabe-e.’—ǃNaeǃkhaidi 10:34, 35.

ǃGÔAǃGÂSIBA HŪBAIBA ŪHÂBA

“Tsî ǃKhūb [Jehovab, NW] Elob ge khoeba ū tsî Edenǃhanab ǃnâ ge ǂnûi, ǁîbab nî sîsense tsî ǁîbab nî ǃûise.” (Genesis 2:15) Elob ge ‘ǃhūbaiba ra hîǀhuruna nî hîkākā.’—ǂHaiǂhais 11:18

KAI ǂGAOXASIB TSÎ ǁGAUOǃNÂSIBA ǃHUIS

“Kō, î du hoa xūǃgunuxasib [kai ǂgaoxasib] xa ǃûisen; khoe-i di ûib ge ǃnāǂamsase i ūhâ xūn ǃnâ hâ tama hâ.” (Lukab 12:15) “Xawe ǀaib tsî mâ ǃanuoǃnâsib hoab tsî xūǃgunuxasib tsîna an sadu ǃnâ tā ǂgaihe, ǃanuna i a anu khami.”—Efeseǁîn 5:3.

“ǂHAUǃNÂ TSÎ ǃGARI SÎSEN-AO”

Xūn hoan ǃnâ da ge ǂhauǃnâse ra “tanisen ǂgao.” (Hebreǁîn 13:18) ǃNari ra-e, “a-i tā ǃnari, î-i ǃomkha ǀkha ǃgâi xū-e sîsen.”—Efeseǁîn 4:28.

ǂHÂSIB ǃNÂ HÂ KHOENA HUIS ǂHÂǂHÂSASIB

“ǂKhabuǂâi hâna ǁkhaeǂgao, ǂkhabusana ǂkhâǃnâ î du ǃnūǃnâxa hoan ǃoa.” (1 Tesalonikaǁîn 5:14) ‘ǃOaǀgôan tsî ǃoataradets ge ǁîn di ǁgâiǀāb’ ǃnâ nî kēǃgâ.—Jakobub 1:27.

Nē xūn ge Elobmîs ǃnâ xoamâihes ǀguisa dī tama. Elobmîs ge nē xūna ǁkhāǁkhā das ǀguisa hî tama. Xawe ra ǁkhāǁkhā da, î da nē xūna tsēs hoasa ûiǂui. ǀHapiga goro ǃhoaǃgaohe xūnan ga khoena ǁnâuǀnam tsî ga ra ûiǂui o. On khoena noxoba ǀgaisa ǃgomsina nî hōǃâ? Amabes ǃnâs ge Elobmîsa a ǂhâǂhâsa tsî ǃgâi ǁaeb ai xūna ra mîba da. Elobmîsa hui du ǁkhā-e ǂhanu xū-e dīs ǀkha?

ǀGui gā-ai khoeb ge ge mî: “Xaweb ge gā-aisiba ǁîb di ôan xa ǂhanu-ai kaihe hâ.” (Mateub 11:19) ǂGom î du ra? Gā-aisiba ǁgaus ge ra ǂâibasen, dī du ra xūn ǃnâ-ū ǁgau bias. Nēti du ge a mî ǁkhā: ‘Elobmîs ga ûiǂuihe o, o ǁîsa ti ûiba ǀkharaǀkhara i nî? Matis Elobmîsa nēsi ta ra hōǃâ ǃgomsin ǀkha ra hui te. ’Aiǁgause, saora-e khomai re.

Delphines * ge kaise gere sîsen tsî ǃgâi ûiba ge ūhâ. ǁÎsa ra saogurase tsâǀkhā xū-i ge ge ī. ǁÎs ǀgôa-i ge ge ǁō. ǁÎs ǃgameb ge ge kôa. Tsîs ge mari ǃgomsiba ge hōǃâ tsoatsoa. ǁÎs ge ge mî: “Tita a hamsa ta ge a ǀū. ǀGôas xa ǁōxūhe, aob xa ǀgora xūhe tsî ta ge ti omsa ge a ǂoaǃnâ. Khoe tamase ta ge gere tsâ. Ham ta asa ǀū, ǀgaio tsî ta ge ǃâubase-e ge ūhâ tama hâ i.”

Delphines ge amab saora xoas disa ge ǀū i: “Sida ûiǁaeb ge hûdisi kuriga [70], tsî khoe-i ga kaise ǀgaisao, ǁkhaisadisi kuriga [80]; tsî dana xūkha âb ge ǀhupub tsî ǃoab tsîkha; ǃhaeseb ra ǃgû-ī, ǁkhanagaru-i khami da ī amaga”—Psalmdi 90:10.

Delphines ge huiba Elobmîsa xu ge a hō, ǁîs ǃgom ǁaegu ǃnâ. Nēb ge ge mûǃāsa hui i. Saora ǃnona ǁkhāǁkhāǃâdi ǃnâ du ge nî mû. Matin ge ǂguina  Elobmîs ǂhanuga sîsen-ū tsî ǃgâina a hō ǀgausa. ǃGomsinan gere hōǃnâ ǁaeb ai. ǁÎn ge ge mûǂan Elobmîs anisa khami ǀgui ī tamasa. ǁÎs ge ǂgui ǂkhanin tsî ǀoro hân khami ī tama. ǁÎsa ǀkhara dise a kurusa? ǁÎsa Elob di ǂâidi ǃkhōǂgā hâ tsî khoen didi ose?—1 Tesalonikaǁîn 2:13.

ǀNîsi du ge sadu tsîna nēsa ge hōǃâ, ûib a ǃnuburo tsî ǃgomsin xa ǀoa hâsa. ǃGomsin ga kaise ǂgui o. O mapa du ǁkhaeǂgao, ǂkhâǃnâ tsî ǂgomǂgomsa huiba a hō ǁkhāǁkhā?

A da ǃnona xūna ǃhoaǃgao hîna ra ǁgauna, Elobmîs hui da ǁkhāsa. Nēs ge nî ǁkhāǁkhā du, î du

1. ǃgomsina ra ǃaroma xūna xu bē.

2. ǃgomsin ga hā o, o ǀam-e ūhâba.

3. ǀkharaǀkhara ǁoa du a xūna tani ǁkhā.

Saora ǁkhāǁkhāǃâdi ge ǃnona xūna nî ǃhoaǃgao.