Mûnan-ai re Jesub ǁaeb ǃnâts Galileab ǃnâ ûi hâ ǃkhaisa. Jerusalemsa ǃoats ge go ī, îts ǁkhaogu di kaitsēsa tsēdī. Tsîs ge ǃāsa ǃgâsan hîna ǃnūseba xu sari hân xa ǀoa hâ. Jehovabats ge ǁguiba-e ra mā ǂgao. Tsîts ge pirisa ūhâse ǃās di ǂgarogu [daorob] ǃnâ ra ǃgû. Tempeli ǃnâts ra ǂgâ khamits ge ra mû, khoen hîna ǁguibasa ra dī ǂgaon ǀoa hâ ǃkhaisa. ǀAms ai i ge sa ǃēsa go ǀkhī îts sa ǁguibasa pristerga mā. ǁNā ǁaebaits ge go ǂâihō sa ǃgâsa-i hîna ǁî-i ona ǁguibas ǃaroma sī hâ i ge tsūdī tsi ǃkhaisa. Jesub ge tae-ets nî dīsa ra mî. (Khomai re Mateub 5:24.) Jesub ra mî khamits mati sats tsî sa ǃgâsa-i hînats ge tsūdī-e ǂkhîba nî sauruǃgon? Sao ra ǃâb ǃnâ ǂhanu ǃereamsa ǂgaeǃgao re.

SATS A DĪ ǁKHĀN . . .

• sa ǃgâsa-i ǀkha ǃhoa re ǂants ga ra o ǃgâi ǃaromasa i ge ǁî-e ūhâ isa ǁaixas ǃgao

• ǁî-e hui re î-i ǂhanu ǂâi ǀgauba ūhâ, ǁî-i ǃhaese ra ǁaixasats ga ǂan o

• ǂōrisase ǃgâ re, ǀoasasets ga ǁnâuǃā tama i xawe ǀûbaba ǂgan re tsūb hînats go ǃaromab ǃgao

SA ǃGÂSA-I A DĪ ǁKHĀN . . .

• sa ǃgâsa-ets go tsūdī ǀgauba ǁnān hîna ǀhaohâb ǃnâ hâna mîba re, îts ǁnā ǀgaus ai ǀhaohâb ǂkhâǃnâsa hōǁkhā

• ôaǃnâsen tsî ǂanǃgâ re sats a ǀhapixa ǃkhaisa

• ǂanǃgâ re matikōse kai ǃgamǃgamsens tsî ǁkhoaǂgaoxasib tsînats ge ǂhâ hâ i ǃkhaisa tsîts go māsenxase ǀûba ǃkhaisa

Nētsēs sada ǃoabasa ǀgurun ǁguibasa ǃkhōǂgā tama, xaweb ge Jesuba tae-e ǃgâsan ǁaegu hâ ǂkhîb tsî ūǃoasa ǃoabas Eloba ǃoa hâs xa gere ǁkhāǁkhā?