ǁÎn hîna ge Jehovab di ǀHûǀguitimî-aon ase ǁāǁnâhe hâ în xawe nēsi aoǁnâ sîsenni ǃnâ ǁhao tamas ka io nau ǃgâsan ǀkha ǀguiba hâǀhao tama hân ge ǃharaxū-e tama hâ. Xawe da ge ra dītsâ ǁîna ôa tsî huisa în gagasise ǁkhawa omkhâisen.

Khoe-i hîna ra ǁore-e da ge ǀhaohâba xu ǂnûiǂuis ǀguisa dī tama hâ. Xawe î ga ǁāǁnâsa ǃgâsa-e ǃnās hoasa Elobmîs tsoatsoadi ǃoagu ga ra ǁore tsî ǃhausen tama io, o î ge ǁî-e nî ǂnûiǂuihe ǀhaohâba xu. Elobmîs ge ǃamkuse nēsa ra ǁguiǃā: “Nē ǂkhaba khoeba sadu ǁaeguba xu ǂoa kai.”—1 Korinteǁîn 5:13.

Tae-e taras tsî ǀgôan hîna a ǀHûǀguitimî-aon ǀkha nî hā oms aob ga ǂnûiǂuihe o? ǁÎn ge ǀguiba omaris ase gere dī gagasi xūn ǃnâb ge ǁîba ǁhao tide, xawen ge omaris ase noxoba ǀguiba nî hâǀhao. ǃGame ûib tsî omaris asen ǀguiba hoaǃnâ-aixase gere dī xūn ge nî aiǃgû.

ǂNûiǂuihe hân ge sida ǀhaode a hâ ǃnâ ǁkhā. Tsîn ge ǂhâban ga o, o gagasi huiba ǀhaohâb ǃûi-aoga xu a hōǁkhā. Nēs ge ǁîna nî hui în ǁîn di ǁgaumâide hō-oa tsî ǁkhawa Jehovab di ǀHûǀguitimî-aon di ǀgui kai. ǁÎn hîna ǂnûiǂuihe hân tsî ra dītsân ǁkhawa Elobmîs tsoatsoadi ǃoagu ûisan ge hoaǁae a oaǀkhī ǁkhā ǀhaohâba ǃoa.