Hî-i. Jehovab di ǀHûǀguitimî-aon ge Xristeǁîna. Xawe da ge sida Protestant ǂgoms di tama hâ. Tae-i ǃaroma?

Protestant ǂgoms ge “Rome Katolik kerkheba ra māǃoa.” Jehovab di ǀHûǀguitimî-aon tsîn ge Katolike kerkheb ra ǁkhāǁkhā xūna ǂgom tama hâ. Xawe da ge sao ra xūn ǃaroma Protestant ǂgoms di ǁanin ase ǃgôasen tama:

1. ǀNî xūn hînan Protestant kerkheb di khoena ra ǂgoman ge Elobmîsa xu ǂoaxa tama hâ. Aiǀgause, Elobmîs ge ra mî “ǀgui Elob ǀguib hâ” ti. Tsî ǃnonaǀguira elo-i xa ǁkhāǁkhā tama. (1 Timoteub 2:5; Johaneb 14:28) Tsî ǃgāsase ra ǁgau Elob eloxoresa khoena nî dīkākāsa. În tā ǁkhapa ûi. ǁÎn ǀamoǀaeb ǃnâ nî dīkākāhe ti mî tama.​—Psalmdi 37:9; 2 Tesalonikaǁîn 1:9.

2. Katolik kerkheb tamas ka io ǀnî hâ kerkheba da ge māǃoa tamas ka io dawa ǂgao tama hâ. ǁNāsa dis xa da ge ǃgâiǂhôasa ra aoǁnâ. Tsî khoena ra hui în ǃgâiǂhôas ǀkha ǁîn ǂgomsa omkhai. (Mateub 24:14; 28:19, 20) Sida ge nau ǂgomde mâǃoas tsî dawas ǃnâ ǃgâiǃgâibasensa ūhâ tama hâ. Xawe mâ ǀguiǀguibe khoe-i hoa-e amab Elob xa hâb tsî ǁîb mîs xa hâba ra ǁkhāǁkhā.​—Koloseǁîn 1:9, 10; 2 Timoteub 2:24, 25.