•  Jehovab di ǀHûǀguitimî-aona mati a ǂan Elob ǀnî sâtsēde ūǃoa tama hâsa?

•  Jehovab di ǀHûǀguitimî-aon hîna ǀnî sâtsēde tsēdī tamana, noxoba ǁîn omaridi ǁanina a ǀnam?

•  Jehovab di ǀHûǀguitimî-aona khoena ra mîba în tā ǀnî sâtsēde tsēdī?

Jehovab di ǀHûǀguitimî-aon ge aiben nî sâtsē-e tsēdīs aiǃâ Elobmîs ǀapemāsa ra ôa. ǀNî sâtsēdi tsî ǁâudīgu tsîn ge Elomîs mā-amsa ūhâ tama hâ. ǁNāti ī ga ra io, on ge Jehovab di ǀHûǀguitimî-aona ǁhao tama hâ. Xawe sâtsēde tsēdīs tawa i ga ra hā o, o i ge mâ Jehovab ǃoaba-ao-e nî mîǁgui î-i ǁî-i di ǃgâiǂâisa “Elob tsî khoen tsîn aiǃâ” ǃanuse ūhâ.—ǃNaeǃkhaidi 24:16.

Jehovab di ǀHûǀguitimî-aon ge sao ra dîde ra dîsen ǁâudī-e tsēdīs tawa i ga ra hā o. *

• Nē sâtsēde Elobmîs ai ǃgaoǃgaosa tama hâ?

  Elobmîs mîmās: “ǁNā-amaga ǁîna xu ǃgûǂoa, î du khaisen, tib ra ǃKhūba mî; î du ǃanuoǃnâ-i xare-e tā tsâǀkhā.”—2 Korinteǁîn 6:15-17.

  Gagasise ǃanuoǃnâ ǁkhāǁkhāde xu ǀgorasens ge Elobmîs ǃnâ ra ǂgaoǀkhāhe. ǁNā-amagan ge Jehovab di ǀHûǀguitimî-aona sâtsēde tsēdī tama hâ, nēs ge sao ra xūn tsîna ǃkhōǂgā hâ.

  Sâtsēdi hîna ǀGoreǀîs ai a ǃgaoǃgaosadi. Dib ge Jesuba ge mî: “ǃKhūb sa Elob ǀguibats ge nî ǀgoreǀî tsî ǁîb ǀguiba ǃoaba.” (Mateub 4:10) Jehovab di ǀHûǀguitimî-aon ge kresmis, Easters tsî Mei Day’s tsîna tsēdī tama hâ. Nē tsēdi ge ǀnî eloga ǀgoreǀîs ai a ǃgaoǃgaosa, Jehova Elob ais ose.

  • Kwanzaa. “Nē ǀons ge Swahili mîsa matunda ya kwanza di hâsa. Nē mîs ge ra ǂâibasen ‘ǂguro ǂûn’ hîna sâtsē-i di tsoatsoas Afrikab ǃnâ ra ǂguro ūǁnâhe ǂûn tsēdīhesa ǃoa ra ǁnaeǁgau ǃkhaisa.” (Encyclopedia of Black Studies) ǀNî khoen ge Kwanzaasa eloǃoaba-i sâtsēs ase mû tama hâ. Nē mîdi ǂkhanis ge Afrikab ǂgomde, Afrikab ǁâudīgu ǀkha ra ǀgopeǀnō hîna ǂguro ǂûna’ “elogu ǃoa ra ǁguibana. Tsî nēs ǃnâ-ūn ge ǁōǂoa ge kai ǁgûn tsîna ra gangan.” Nē ǂkhanis tsîn ge ǀaro tsî ra mî: “Nēb ge ǁkhā gagab hîna ra ganganheba, ǀkhaegu tsî ûib tsîn ǃgao hîna ǁōǂoa ge kai ǁgûn sâtsēs Kwanzaasa ra kuruǂuisa Afrikaǁîn hîna Amerikab ǃnâ ǁan hân ǃgaos tsîna.

  • Mid-Autumn Festival [sore ǁae ra dīhe ǁâudīb]. “Nē ǁâudīb ge ǁkhâb elosa ǃgôasiba ra ǁgau.” (Sâtsēdi, ǁâudīgu tsî ǃhūbaib mîdi ǂkhanisa tsēdīs) Nēs ge ǁnaetiba ǃkhōǂgā hâ hîna “di tarekhoede oms ǃnâ nî ǃgamǃgâsa, nēs ge tare elos aiǃâ ra dīhe.”—ǃHūbaib di ǂgomdi tsî ǂgomdi tsî sîsengu di ǂkhanis.

  • Nauru (Nowrus). “Nē ǁâudīb ge ǂgom-i [Zoroastrianism] xu ra hā tsî ǃanu tsēs ase ra mûhe, nē ǂgoms ǃoagu. . . Kharab di gagab hîna Rapithwini di a ǂansab ge ǃhūb ǃnaga hâ gagaba saoǁae kaise i ǃkhai hîna gere ǁkhoreǁhare. Tsî îs Nowrusa gere ǁâudī, nē ǂgoms ǁnaetib ǃoagu khara ǁaeb ǃnâ.”—United Nations Educational, Scientific tsî Cultural Organization.

  • Shab-e Yalda. Nē ǁâudīb ge saob ǃnâ “Mithrab [elo-i] ǀgoreǀîs ǀkha ge ǃkhōǀhaosa i.” Nē ge ǃnâb di eloba Sufism in the Secret History of Persia di ǂkhanis ǃoagu. Mîhes tsîna i ge ra dīhe nē sâtsēs Romeǁîn tsî Grikeǁîn sores di elob ǀkha gere ǃkhōǀhaohesa. *

  • Gangans tsēs. Kwanzaas khamis ge nē sâtsēsa eloga ǀgoreǀîs ai a ǃgaoǃgaosa. “ǁAeb ge ǃkharu khami gu ge Xristeǁî kerkega nē ǁnaetiga ge ūǃoa tsoatsoa.”—A Great tsî Godly Adventure​—The Pilgrims tsî the Myth of the First Thanksgiving.

  Sâtsēdi hîna ǃgaidīb tamas ka io ǃgâiǃgâb ai a ǃgaoǃgaosa.

  Elobmîs ge ra mî, ǁnān hîna ǃgâiǃgâb elob “tāba ra ǁāǁābado” ge ǁnān hîna ǁÎb “ǃanu ǃhomma ra ǀurudo.” (Jesajab 65:11) ǁNā-amagan ge Jehovab di ǀHûǀguitimî-aona sao ra sâtsēde tsēdī tama hâ:

  • Ivan Kupala. “ǂAnǂansa ǂgom ǀgaub ǃoagus ge nēsa ǃgaidīb ǀgaiga ra ore hîna ǀgaib tsî ǃgâiǃgâb tsîkha ra aiǃgû kaikha. Dis ge The A to Z of Belarus di hâ ǂkhanisa ra mî.” Nē sâtsēs ge sore ǁaeb ǃnâ gere tsēdīhe. Dis ge ǀgui mîdi ǂkhanis Encyclopedia of Contemporary Russian Culture sa ra mî. Nēs ge kerke gu sâtsēdi ǀkha ge habahe. Aiǁgause, [ǃanun tsēs Johaneb ǁāǁnâ-aob] dis ge Xristeǁîn ūǃoasa xu ge tsoatsoahe.”

  • ǀAsa kurib Chines khoen dib. “ǀAsa kurib tsoatsoas ǃnâ kaise a ǂhâǂhâsa i ge omaris ǁanin, ǀhōsan tsî ǀaokhoen tsîna. Nēn hoan ge ǃgâiǃgâb, elogu tsî gagaga ǃgôasiba ǁgaus tsî ǃgâiba ǁkhorebagus tsîna ǃkhōǂgā hâ, kurib ǃgao.” (Mooncakes and Hungry Ghosts​—Festivals of China) ǁKhā ǁaeb ais tsînan ge Koreab ǀasa kurib tsîna “ǀgamirode ǀgoreǀîs, ǁgai gagana ǃhaebēs. Tsî ǃgâiǃgâba ǀasa kurib ǃgao ǁkhorebagus tsî ǀasa kurib ǃnâ i tae-e nî īsa tsîna ra dîǃnâ ǃgaidīb ǃnâ-ū.”—Encyclopedia of New Year’s Holidays Worldwide.

  Sâtsēdi hîna ǀoms a ǁō ǁoa ǃkhais ai a ǃgaoǃgaosadi. Elobmîs ge ǃgāsase ra mî, ǀoms ta ǁō ǃkhaisa. (Esegieli 18:4) ǁNā-amagan ge Jehovab di ǀHûǀguitimî-aona ǃnaga a māsa sâtsēde tsēdī tama hâ hîna ra ǀoms ǁō ǁoa ǃkhaisa ra aiǃgû kais ǃnâ:

  • Hoa ǀomdi tsēs (ǁō hân di tsēs). ǁNā tsēs ge a ǃkhōǂuisa “ǁō ge khoen hoana ǃgôasiba ǁgausa.” New Catholic Encyclopedia mîdi ǂkhanis ge ǁnāsa ra mî. “ǃKharu ge ǁaegu hoagas ge nē ǂgom ǀgauba ge ǂanǂansa i. Tsî ǀnoren tsî ǃGai-aon ge ǁîna gere tsūdī khoen ǃgao gere oaǀkhī.”

  • Qingming Festival [ǃnâb ǁâudīb] (Ch’ing Ming) tsî Hungry Ghost Festival [ǃâsa ǀnoren ǁâudīb]. Nē ǀgam ǁâudīb tsēra ge ǁōǂoa ge kai ǁgûna ǃgôasiba ra ǁgau. ǃNâb di ǁâudīb xas ge ǀgui ǂkhanisa sao rana ra mî. ǀGôaro-i nî ǃnaehes aiǃâ ǀgamǀkhā tarekhoesa ǁâudī-e dības tsî ǁkhōdi ai i ge “ǂû-i, āxū-i tsî marin tsîna ra ǂhubi-e. În nēs ǀkha tā ǁō hâna ǃâ, ǁgâ tsî mari-e ǂhâ.” Nē ǂkhanis tsîn ge ra mî “ǃâsa ǀnoren ǁkhâb ge ǀoasa ǁkhâb ga ǂoaxa o, o ǀgui ra tsēdīhe. Nēs ge ra ǁgau ǁō hân tsî ûitsaman ǁaegus ǃgaeǀhao-e hâsa, ǁnā ǃui. Tsî kaise a ǂhâǂhâsa ǃkhais ge ǁō hân tsî ǁōǂoa ge kai ǁgûn ge nî ǂkhîǂkhîhe tsî ǃgôasiba nî ǁgauhe.”

  • Chuseok [ǁō hân ǃaroma ǂûna aiǂhomis ǁâudīb]. Nē ǁâudīb tawa i ge Koreab ǂgomdi tsî ǀhûhâsib tsîna ǃkhōǂgāsa. “Nē ǁâudīb tawan ge ǂû-i tsî xûi-i tsîna ǁō hâna ra ǁguibahe. Nē ǁguibas ǃnâ-ūn ge ra ǂgom ǀoms ra ûiǃkharu ǃkhais ǁōb khaoǃgâ.”

  Sâtsēdi ǃgaidīb ǀkha ǃkhōǀhaosadi. Elobmîs ge ra mî: “Sa tawab ge hōhe tide ǁîb ôab kas, ǁîb ôas kas hoasa ǀaesa ra ǃgûǃganu kaib, ǃgai-aob, aimûǀgarusa ra sîsenūb, tsēde ra ūǂuibasenni tsî ani-ās ai ra ǃgaoǃgâb kas tsî ǃgai-aob kas, tsî nūba-aob, nūbasa ra sîsenūb kas, ǃgai-aob, aimûǀgaru ra gaga-e ra dîb kas, ǁgâuaǁāǁāǁkhāsabeb kas, ǁō hâna ra dîb kas hoasa. Nē xūna ga dī-i hoa-i ge ǃKhūba ǁgaiǁgaisase ība xui-ao; tsî nē ǁgaiǁgaisan ǃaromab ra ǃKhūb, sa Eloba ǁîna sa ais aiǃâ ūn hâna xu doeǁgaǂui.”(Deuteronomium 18:10-12) ǃGaidība xu ǂgōsens aimûǀgarus ǀkha dī xū-e ūhâs tsîna ǃkhōǂgā hâ. Jehovab di ǀHûǀguitimî-aon ge Amerikab ǃnâ ra tsēdīhe ǁâudīb Halloweens di ra ǂgaiheba tsēdī tama hâ. Nēs ge sao ra sâtsēdi tsîna ǃkhōǂgā hâ:

  • Sinhala tsî Tamil ǀasa kurib. “ǀAsa kuriba tsēdīs ge ǃhaoǃnâbe xūn ǀkha ra ǃgûǀhao, aiǁgause ǀgamirodi ǃnâ-ū ǃkhūsiba ǁapoǁaposa.”—Encyclopedia of Sri Lanka.

  • Songkran [ǀasa kurib ǁâudīb]. Nē ǁâudīb ǀons ge “Sanskrit ge [Indiab gowa-e] xu ra hā. Nē ǀons ǂâibasens ge ‘gon’ tamas ka io ‘ǀkharaǀkhara’ di hâ. Tsî nē ǁâudīb ge sore ta gon ǀgausa ra ǁgae.—Food, Feasts, tsî Faith​—An Encyclopedia of Food Culture in World Religions.

  ǁNaetigu hîna Moseb ǂHanub di ǃâgu digu hîna ge Jesub ǁguibas ǀkha a ǀam gu. Elobmîs ge ra mî: “Xristub ge a ǂhanub di ǀam.” (Romeǁîn 10:4) Xristeǁîn ge noxoba Moseb ǂHanuba xu ǃgâiba ra hō. Hîna ge Israelǁaesa māheba. Xawen ge ǁîna ǁnāpa ǃkhōǂgāsa ǁâudīga tsēdī tama hâ. ǀŌ-aisase ǁâudīgu hîna Xristub hîna ge ǀnai a hāba ra ǁnaeǁgaugu. ǁNān ge “ǃgoaxa xūn di som” dis ge Elobmîsa ra mî, “xawe xawe soros ge a Xristub di.” (Koloseǁîn 2:17) Nēsa ǂâis ǃnâ ūhâse, ǀnî ǁâudīgu ge Elobmîs ai ǃgaoǃgaosa tama hâ. ǃNaga māsa ǁâudīgan ge Jehovab di ǀHûǀguitimî-aona tsēdī tama hâ:

  • Hanukkah [Jodeǁîn ǁâudīb]. Nē ǁâudīb ge Jodeǁîn tempeli hîna Jerusalems ǃnâ hâba māǁnâs ǃnâ ra dīhe. Elobmîs ge ra mî, Jesub ge ge ǀgapiprister kai. ‘Kai tsî dītoahesa tabernakeli, ǃomgu ǀkha dīhe tamab, ǁnāb nē kurus di tamaba’ (Hebreǁîn 9:11) Xristeǁîn da ge a ǂan gagasi tabernakeli ge Jerusalems ǃnâ mâ tempela ge ǃkhōǃkhuni.

  • Rosh Hashanah [Jodeǁîn ǀasa kurib ǁâudīb]. Nē tsēs ge Jodeǁîn di kurib di ǂguro tsēsa. ǀOrokamǁaeb ǃnâs ge nē ǁâudība Eloba ǃoa ǁguibasa ge ǃkhōǂgā hâ i. (Numeri 29:1-6) Jesub hîna a Mesiab ge ‘ǂāǁguibas tsî ǂûǁguibas tsîra ge toa kai.’ Tsî nē ge Elob mûǁae xū-e ǂâibasen tama hâ.—Danieli 9:26, 27.

• Sâtsēba ǂgomde ra ǀguiǃnâxa kai?

  Elobmîs mîmās: “Mâ ǃkhō-amgu-eb . . . ǂgomsa-e ǂgomoǃnâ-i ǀkha ūhâ? Tsî mâ ǁnâugu-eb kha Elob tempela ǁgôatsuiǁgoagu ǀkha ūhâ?”—2 Korinteǁîn 6:15-17.

  Jehovab di ǀHûǀguitimî-aon ge ǁîn ǀgūkhoen ǀkha ǂkhîb ǃnâ ra ûi. Tsîn ge Jehovab di ǀHûǀguitimî-aona mâ khoe-i hoa-i ǂgomsa ūhâsa ra ǃgôaǃgâ. Jehovab di ǀHûǀguitimî-aon ge ǁâudīgu ǂgomdi ǀguiǃnâxasiba ra aiǃgû kaina xu ra ǂgōsen.

  ǂGomdi ǁâudīgu hîna ǀgapi ǃgôasa khoe-i tamas ka io ǀguiǃnâxa ǀgoreǀîsa ra ǂkhâǃnân ǃkharagaǃnâgu ǂgomde ūhâ khoen ǀkhas. Elob ge Israelǁaesa ǀasa ǃhū-i ǃoa a ǂgaeǂgui o, ob ge ǁîba sao ra-e ge mîba: “Sats ge ǁîn ǀkhas kas, ǁîn di elogu ǀkhas kas hoasa ǃgaeǀhao-e dī tide. . . . ǁÎn di elogats ga ǃoabao, o i ge ǂanǂansase ǃnôase nî ība tsi.” (Eksodus 23:32, 33) ǁNā-amagan ge Jehovab di ǀHûǀguitimî-aona sao ra sâtsēdi ǃnâ ǁhao tama hâ.

  • Loy Krathong [Thailandi ǃnâ ra kurikorobe ǁâudīhe tsēs]. Nē ǁâudīb ǃnân ge khoena xapana haide xu ra kuru. Tsî kersgu tamas ka io ǃnâra haigu tsîna nē kurun ge xapan ǃnâ ǁgammi ai ra ǃnora kai. Mîhe ras ge ǂgaugu ge tsūba ra ǀkhī-ū. Nē ǁâudīb ge amabes ǃnâ Buddha [ǁkhāǁkhā-aob] ǃgao ra tsēdīhe.—Encyclopedia of Buddhism.

  • ǃHūb ǂhawase hâ ǃhobasens tsēs. ǁNān hîna nētsēs ǃnâ ra ǁhaon ge “Xristeǁîn ǃgaoǃgaoba ra ǂanǃgâ.” Papua New Guineab ǂhôaǂkhanib ge sao ra-e ge mî. ǁNā tsēs ge “ǃhūb Xristeǁîn di mîmāsa.”

  • Vesak [Buddhab ǂgoms ǁâudīb]. “Nētsēs ge kaise a ǃanu tsēsa hoa tsēdi xa. ǁNā tsēs ain ge Buddhab ǃnaes, gā-aisib, ǁōb tsî ǁkhawa ǃnaehes tsîna ra tsēdīhe.”​—Holidays, Festivals, and Celebrations of the World Dictionary.

  ǂGomdi ǁnaetigu ai a ǃgaoǃgaosa tsēdi, Elobmîs mā-amsa ūhâ tama di. Jesub ge ǂgomdi ǂgaeǂgui-aoga ge mîba: “Tsî go kom ǁnāti Elob mîsa ge ǁauǁauo, sago di ǂnûiǂgādi ǀkha.” Jesub ge ge mî, ǁîgu ǀgoreǀîs ge a xū-e ǂâibasen tama hâ “khoen di ǂnûiǂgāde” gu ra ǁkhāǁkhā amaga. (Mateub 15:6, 9) Nē mîmāsan ge Jehovab di ǀHûǀguitimî-aona ra ǁnâuǀnam tsî Elobmîs ǀkha ǃgûǀhao tama tsēde tsēdī tama hâ.

  • Epiphany (ǃnona gao-aogu di tsēs, Timkat, tamas ka io Los Reyes Magos). Jesuba ge ǂkharirob a hîna sari ǀgamiro kō-aogu. Tamas ka io Jesub ǁāǁnâs ǃoa ra ǁnaeǁgau. Nē ǁâudīgu ge “Xristeǁîn xa ge ūǃoahe hîna ǂgomsabe taman xa ge tsoatsoahena. ǁÎn ge ǁgammi elob, ǃāb tsî dâu ra ǁgammi tsîna ǃgôasiba gere ǁgau. (The Christmas Encyclopedia) Timkats [ǁāǁnâs ǀkha dī xū-e ūhâ] ge ǁâudīb hîna “ǃhaoǃnâbe tsoatsoasa ūhâsa.”.”​—Encyclopedia of Society and Culture in the Ancient World.

  • Marias ǁâudīb tsēs. Marias Jesub mamas ge ǀhomǃapa amagas ge nē tsēsa ra tsēdīhe. “Nē ǂgom ǀgaub” ge ge ǂansa tama hâ i, ǂgurokamǁaeb kerkeb ǃnâ. Tsî Elobmîs tsîn ge ǁnāsa ǃkhō-am tama hâ.” Dis ge sara mîdi ǂkhanisa ra mî: Religion and Society​—Encyclopedia of Fundamentalism.

  • Marias ǁore-e ūhâ tamas hâs ǁâudīb. “Marias ǁore-e ūhâ tama hâ ǃkhais ge Elobmîs ǃnâ ǁkhāǁkhāhe tama hâ. Nēsab ge kerkeba aitsma ge ǂâiǂui.”—New Catholic Encyclopedia.

  • Lent [khoen ǂû tama hâse ra hâ tsēs]. ǂGuro tsēs nē ǁaxasib dis ais ge ǀgui mîdi ǂkhanisa ra mî: “tsaoba, tsaob wunstaxtsēs ai ǃūs ai ǂkhauhes ge ǃhūbaib ǂhawase a ūǃoasa. Nēs ge Synod of Benevento [ǀapemā ǃnans Rome katolike kerkeb disa] ǁaeba xu 1091ǁî kuriba xu.”

  • Meske (tamas ka io, Maskal ge Ethiopiab ǃnâ ra dīhe ǁâudība). Nē Ethiopiab ǁâudīb ge “Jesub ge ǃgau aihe kruiseba ra ôas ai a ǃgaoǃgaosa. ǁÂudī-aon ge ǀae-e khau tsî ǀaes ǂnamipe ra ǂnā dis ge ǀgui mîdi ǂkhanisa ra mî [the Encyclopedia of Society and Culture in the Medieval World; parentheses theirs]. Xawe Jehovab di ǀHûǀguitimî-aon ge kruiseba ǁîn ǃoabas ǃnâ sîsen-ū tama hâ.

• Nē sâtsēsa khoe-e ra ǀgapiǀgapi, khoesi ǃnansa tamas ka io ǃhūb di ǃkhauba?

  Elobmîs mîmās: “Nētib ra ǃKhūba mî: ǀÂxarexūhesab ge ǁnā aob, khoeb ai ga ǂgomaiǂnûib, ǁgansa ǁôab âb ase ga ǂnûib tsî ǂgaob âb ǀkha ǃKhūba xu ga ǁnāǁgôaba.”—Jeremiab 17:5.

  Jehovab di ǀHûǀguitimî-aon ge hoa khoena ra ǃgôaǃgâ tsî khoen tsîna ǁîn ǀgoredi ǃnâ ra ǃkhōǂgā. Jehovab di ǀHûǀguitimî-aon ge ǃnaga māsa ǁâudīgu ǃnâ ǁhao tama hâ:

  Sâtsēdi ǂgaeǂgui-ao-i tamas ka io ǀgapiǃgôasa khoe-i ra koa aihe i. “Sada di ǃgâib ǃgaos” ge Elobmîsa ra mî, “ǁNāxū ǁnā khoeb ǀommi âb ǁîb ǂguis ǃnâ hâba, matikōseb a ǀgapiǃgôasasa du a ǀū xuige.” (Jesajab 2:22) Aiǁgausen ge Jehovab di ǀHûǀguitimî-aona Presidengu tamas ka io ǂamkhoegu di ǃnaetsēde tsēdī tama hâ.

  ǃHū di ǃkhaub ǁâudīb ǃnâ ǁhao tama hâ. Jehovab di ǀHûǀguitimî-aon ge ǃkhaub di tsēsa tsēdī tama hâ. Tae-i ǃaroma? Elobmîs ge ra mî: “ǁÎ-aitsama ǃûisen ǁgôatsuiǁgoana xu!” (1 Johaneb 5:21) ǀNî khoen ge ǃkhauba ǁgôatsuiǁgoa ǃoabas ase mû tama hâ. ǃKhaub ge ǀgoreǀîs ǃâba ra kuruǂui. ǀGui ǃnaeǃkhaidi xoa-aob Carlton J. H. Hayesi ge ge mî: “Kai ǃnâ da ge ǃhūb dana ǀgoreǀîhe ra xūb ge ǃkhauba.”

  Sâtsēdi hîna ǃanuna ra ǀgapiǀgapen. Tae-e a īǁkhā eloǃaoǃnâxa khoeb ge apostel Petruba ǃonǁgoaba o? Elobmîs ge ra mî: “Ob ge Petruba ǁîba ǃkhōkhâi, tsî ge mî: Khâi, tita on a khoe.” (ǃNaeǃkhaidi 10:25, 26) Apostel Petrub tsî nau apostelgu ge khoen xa ǀgoreǀîhesa ge ūǃoa tama hâ i. Jehovab di ǀHûǀguitimî-aon ge ǃanuna ǀgoreǀîs tamas ka io ǁîn ǁâudīb ǃnâ ǁhao tama hâ:

  • ǃAnun tsēs. “Nē ǁâudīb ge hoa ǃanun ǃgao ra dīhe. . . Nē ǁâudīb di ǃgaoǃgaob ge a ǀūsa.”—New Catholic Encyclopedia.

  • Fiesta of Our Lady of Guadalupe. Nē ǁâudīb ge “Mexikob ǃanus ǂkhâǃnâsa” ǃgôasiba ra ǁgau. Nēs ge Marias Jesub mamasa ǃoa ra ǁnaeǁgau. ǁÎs ge ǂgomhe ras ǃoa 1531ǁî kurib ǃnâ ǃgaroǃā i tawa ge a ǂhai.​—The Greenwood Encyclopedia of Latino Literature.

  • ǀOn tsēs. “ǀOndi tsēs ge ǁâudīb hîna ǃanun ǃgao ra dīheba. ǀGôaro-i hîna ra ǁāǁnâhe i ge ǁnā ǃanu-i di ǀons ǃoagu ra ǂgaihe.” Dis ge ǂkhanis Celebrating Life Customs Around the World​—From Baby Showers to Funeralsa ra mî. Nē ǂkhanis ge ǀaro tsî ra mî, “eloǃoabas ge ǁnā tsēs ǀkha ra ǃgûǀhao.”

  ǂGīǂgōsi tsî ǀhûhâsiba ra ǃkhamba ǃnandi ǁâudīb. “ǃGâi i ge a ǃKhūb ǃoa ǁhaiǁhâsa [huiba hōsa]” dis ge Elobmîsa ra mî, “khoe-i ai ǂgomaiǂnûis xa.” (Psalmdi 118:8, 9) Jehovab di ǀHûǀguitimî-aon ge khoe-i ai ǂgomaiǂnûisa xu ra ǂgōsen, ǂan ân a amaga Elob nî ǃhūbaib ǃgomsinga ūbē amaga. ǁNā-amagan ge Jehovab di ǀHûǀguitimî-aona ǂkhamkhoen tsî tarekhoen di tsēde tsēdī tama hâ. ǁNā ǁâudīgu ǂgīǂgōsi xūn tsî ǀhûhâsiba ra ǃkhamba ǃnandi ai a ǃgaoǃgaosa xui-ao. Jehovab di ǀHûǀguitimî-aon ge ǁkhā ǂâibasena ūhâ ǁâudīgu ǃnâ ǁhao tama hâ. Jehovab di ǀHûǀguitimî-aon ge Elob Gaosib ai ra kō hîna ǃhao ǀgoras tsî ǂhanuoǃnâsib tsîkha nî ūbēba.—Romeǁîn 2:11; 8:21.

• Nē sâtsēsa nē ǁaesa naus ǂama ra ǀgapiǀgapi tamas ka io nau ǃhaosa naus ǂam-ai?

  Elobmîs mîmās: “Elob khoe-i aisa ǃkhōǃoa tama ǃkhaisa; xawe mâ ǁae-i hoa-i ǃnâ ga ǁîba ǃaoǃgâ tsî ǂhanu-aisiba dī-i ge ǁîb di ǃkhōǃoasabe-e.”—ǃNaeǃkhaidi 10:34, 35.

  Jehovab di ǀHûǀguitimî-aon kaikhâin ge ǃhūba a ǀnam xawen ge ǁaedi tsî ǃhaodi ǀgorasa ra aiǃgû kai ǁâudīgu ǃnâ ǁhao tama hâ. ǃNaga māsa aiǁgaudi khami.

  Toroǃkham-aogu ra ǃgôasiba ǁgauhe ǁaxasib. Toroǃkhamsa aiǃgû kais xab ge Jesuba sao ra-e ǁîb saosabena ge mîba: “Xawe ta ra mîba du, sadu khākhoena ǀnam, î ǀâxare du rana ǀkhae, î ǁkhan du rana ǃgâidība, î ǁguiǂam tsî ra ǃgôaǃgon duna ǀgoreba.” (Mateub 5:44) ǁNā-amagan ge Jehovab di ǀHûǀguitimî-aona soldagu ra ǀō-aisase ǃgôasiba māhe tsēde tsēdī tama hâ. Sao ra sâtsēde ǃkhōǂgā hâse:

  • Anzac Day [Australiab tsî New Zealandi toroǃkham ǃnans tsēs]. “Nē mîs anzac ge Australiab tsî New Zealandi ”toroǃkham ǃnans ǃoa ra ǁnaeǁgau. Nētsēsa tsēdīs ǃnâ-ūs ge torob ǃnâ ge ǃgamhe khoen xa ra ǂâiǂâisenhe.—Historical Dictionary of Australia.

  • Torob ǃnâ ǂansa ūhân tsēs (ǂâiǂâisens tsēs). “Nētsēs ain ge ǁnān hîna ge torob ǃnâ a ǃgamhena ra ǃgôasiba ǁgauhe.”—Encyclopædia Britannica.

  ǃHūb di ǃnorasasib tsēsa ǁâudīs. Jesub ge ǁîb saosaben ge mîba: “ǃHūbaiba xun ǁîna hâ tama, tita on ǃhūbaiba xu hâ tama khami.” (Johaneb 17:16) Jehovab di ǀHûǀguitimî-aon ge kaise a ǂkhî ǁîn ra kaiǃnâ ǃhūb ǃnaeǃkhaidi xa ǁkhāǁkhāsensa xawen ge ǃnaga a māsa ǁaxasiga ǁhao ǃnâ tama hâ:

  • Australiab tsēs. ǀGui mîdi ǂkhanis ge ra mî, “1788ǁî kurib ǃnâ gu ge ǀaobaǃao soldaga ǁîgu ǃkhauba ūkhâi tsî Australiaba ǀasa ǃhūb ase ge ǂanǃgâ.”

  • Guy Fawkes tsēs. “Nētsēs ge Englandi ǃnâ ǃhūb ǂhawase ra tsēdīhe, Guy Fawkes tsî ǀnî mâǃgâ-aon Katolies din hîna gere Gao-aob Jakobub tsî Englandi Parlementsa a boom gu xawe ge ǃgâiǃgâ tama în tsēs ge, 1605ǁî kuri.”—A Dictionary of English Folklore.

  • Independence tsēs. “Nētsēs ge ǂgui ǃhūgu ǃnâ ra ǂnûiǂuihe tsî ǃhūb ǂhawase ra tsēdīhe.”—Merriam-Webster’s Unabridged Dictionary.

• Nē sâtsēsa ǁgauoǃnâsiba ra aiǃgû kai?

  Elobmîs mîmās: “ǂÂuba da i kom hâo, ǃgôa-ī ge ǁaeb ûib diba da ǀūben di ǂâisa gere dīǀoaǀoasa, ǁgaiǁgaisa ǂūǁoasigu tsî turagu tsî āǀhorosigu tsî ōgu tsî āǃansengu tsî ǁgaisi ǁgôatsuiǁgoaǃoabagu tsîn ǃnâ da gere ûi ǃnubai.”—1 Petrub 4:3.

  Nē mîmās ǀkha ǀguiǃnâxasen ge Jehovab di ǀHûǀguitimî-aona ǁaxasigu hîna ra kaise ra ā aihe gu tsî ǁgaiǁgaibe ǂnās tsîn ǃnâ ǁhao tama hâ. Jehovab di ǀHûǀguitimî-aon ge kaise a ǃgâibahe ǁîn ǀhōsan ǀkha hâǀhaosa. Tsîn ge ǀnōsa ǀgaub ǃnâ ra ā, ān nîs ga o. ǁÎn ge Elobmîs ǀapemāsa ra sao mî rasa: “ǁNâi ǂû du karao, ā du karao, tsî dī du kan hoan, ǁîna Elob di ǃgôasib ǃoa dī re.”—1 Korinteǁîn 10:31.

   ǁNā-amagan ge Jehovab di ǀHûǀguitimî-aona ǁâudīgu hîna ǁgauoǃnâsiba ra ǂkhâǃnâgu ǃnâ ǁhao tama hâ tsî Elobmîs mā-amsa ūhâ taman ǃnâ. Nēs ge Jodeǁîn ǁâudīgu tsîna ǃkhōǂgā hâ Purims [Jodeǁî sâtēs] khami. Nē sâtsēs ge Jodeǁîn xa Jesub nî ǃnaehes aiǃâ ge tsēdīhe tsoatsoahe. Jodeǁîn ge ǃnora kaihe ǂâiǂâisens ase. “Nē ǁaxasib ge Jodeǁîn di ǁâudīb ase a ǂansa.” Dis ge the book Essential Judaism di hâsa ra mî. Nē ǁaxasib “ǃnâ gu ge aorekhoega tarekhoedi khami ra ana, ǁgaiǁgaibese tanisen, kaise xûi-e ā tsî kaise ra ǂkhupi.”

 Î. Elobmîs ge ra mî, î da hoa khoena ǀnam tsî ǃgôasiba ǁgau. Nēs ge sida ǀaokhoena ǃkhōǂgā hâ. ǀNî hâ ǂgomǀgauban ga ra ūhâ xawes tsîna. (1 Petrub 3:1, 2, 7) Mâ hâ ǃkhais Jehovab di ǀHûǀguitimî-aon di ǀgui-i ga ǁîn ǁâudī i ǃnâ ga ra ǁhao o, o i ge ǁî-i di ǀaokhoena a ǁaixa ǁkhā. Tamas ka io a tsûtsûsase a tsâ ǁkhā. ǁNā-amagan ge Jehovab di ǀHûǀguitimî-aona ǁîn ǀaokhoena ǀnamma ra ǁgau. Tsî ǁîn di mîǁguiga ǃgâi ǀgaub ǃnâ ra mîǃā. Tsî ǁîn ǀaokhoen tsîna ra sari.

Hî-î. ǁÎn ge ra ǂgom mâ khoe-i hoa-i ge ǁî-i mîǁguiba aitsama nî dībasen. (Josuab 24:15) Jehovab di ǀHûǀguitimî-aon ge “Mâ-i hoa-e” ra ǃgôa, ǀnî hâ ǂgomsan ūhâ xawe.—1 Petrub 2:17.