Ku mukanda 1 Kolintu 6:1-8, kapostolo Paulu ua handekele via Vakua Kilistu ku lituala muaya vindzango mu ku sompa. Paulu ua vuile vusiua mu ku mona ngecize vamo Vakua Kilistu mu Kolintu va kele na ku lituala “kuli vakua vuhenge” mu ku lisompesa. (Cinimbu 1) Paulu ua muesele viuma via kama via pande ku lingisa Vakua Kilistu kati va ka lisompesele ku vindzango via vakua mavu, vunoni va manusuile visoti viaco mu cikungulukilo. Tu hilulenu vimo viuma via handekele Paulu mu cimamuna ca mu tumine Njambi ku soneka, na vimo vikuavo vutuhu ka via kele mu cimamuna caco.

Nga tuli na ku lizunga na umo muanetu ku via mingoso, ha katete tua pande ku vi manusula mu njila ya ya Yehova ku mutima, kati muaya cizango cetu. (Visimo 14:12) Ngue mua handekele Yesu, ca cili ku manusula vimpande vuasi-vuasi ntsimbu kanda vi pue via kama. (Mateo 5:23-26) Vunoni ce ku vuisa vusiua ku mona ngecize vamo Vakua Kilistu ve ku kaluuisa cikumakuma viuma, noho va na lituala ku vindzango via vakua mavu. Paulu ua handekele ngueni: “Yenu mua pihia vene laza, muomu mu li na ku lisompa ha kati kenu.” Omo lia vika? Muomu evi vilinga vie ku pihisa lutsimo lua cili lua cikungulukilo na lizina lia Njambi u tue ku lemesa. Ngeci mukemuo, tua pande ku singanieka cikuma ha cino cihula ca Paulu: “Vikandzo ka mu tavela ku mi linga mua mupi?”—Cinimbu 7.

Paulu ua muesele naua ngecize Njambi ua hana vukuasi vua cili vua ku manusuilamo ku lizunga mu cikungulukilo. Vakuluntu va cikungulukilo va pua va ku hia omo lia ku tantekeya vusunga vua mu Visoneka, kaha Paulu ua handekele ngueni va hasa “ku sompela vana va naye” mu “viuma via muono ua vuovuno.” (Vinimbu 3-5) Yesu ua muesele vinanga vitatu via ku manusula milonga ya kama: ca katete, vantu va pande ku manusula vimpande kua lika liavo; ca mu civali, nga ka va hasele ku vi manusula, va pande ku sanako mukaleho umo ni  vavali; ca mu citatu, nga kasi vimpande viaco ka via huile, kaha va na pande ku vi tuala ku vakuluntu va cikungulukilo.—Mateo 18:15-17.

Vakuluntu va cikungulukilo ka va puile vangazi cipue vakua mingoso kaha ka ve ku lipuisamo. Ngeci, ka ve ku hakela vamuanetu masiko a ku manusuilamo ku lizunga. Vunoni ve ku tonda ku kuasa vose vali mu cimpande va pangese Mbimbiliya na ku manusula cimpande cavo mu vusamba. Nga cimpande caco ca cikalu, halumo ve ku hula kaniungi ua ku zinguluka ni Mbetele ya Vakaleho va Yehova. Vutuhu ngoco, kasi kuli vimo vimpande ka vie ku hua mu ku kava lika cimamuna ca Paulu. Vimpande vika?

Vintsimbu vimo, Vakua Kilistu ve ku lituala ku nguvulu mu ku puisamo lika masiko, ku niunga ciyulo ni ku liniunga ku visoti vi hasa ku soloka nga ka va lingimo. Ca ku muenako, ku lituala ku vakua masiko halumo ikeyo lika njila i va tavesa mu ku tsiha vulo, ku yoya na muana nga vulo vu tsa, ku tambula vimbongo vie ku hana-hana mukua ndzivo ku mukuavo mu nima ya ku tsiha vulo, ku tambula vimbongo via seguro, ku lisonekesa ku ku tambula vimbongo nga cipanga ca pangela muntu ci ua, ni linga a puisemo testamento. Citava naua Mukua Kilistu a hasa ku tuala mukuavo kuli vakua masiko linga a liniunge. *

Nga Mukua Kilistu ka tuala mukuavo kuli vakua masiko na vutumbe vua ku litala ku tunua, kaha kesi na ku tsiha via handekele Paulu mu cimamuna ceni. * Vutuhu ngoco, Mukua Kilistu na pande ku tuameka via ku lelesa lizina lia Yehova na ciyulo na ku likata ca cikungulukilo. Cuma ca katete ce ku solola vandongesi va Kilistu ca pua cilemo, kaha “cilemo . . . ka ce ku lilengeyela viuma via civene.”—1 Kolintu 13:4, 5; Yoano 13:34, 35.