Mututa ue ku pihisa vusamba vua muntu na Njambi, ue ku lingisa muntu a tuameke lika ndzolela yeni ivene na ku yengula ndzolela ya vakuavo, kaha ue ku tengula visinganieka. * Mukua ku linga mututa ue ku mona vakuavo ngue va va tangela lika ku limona ku mivila. Kuli ikeye, ku limona ku mivila ka ca puile cifua ca ku limueselamo cilemo, vunoni ca ku livuisa lika senga na ku litundisa masungu. Kaha senga yaco ya kantsimbu lika. Mua vusunga, mututa ka ue ku tsiha vilio via muvila ku “vupangala, mazilo, lisungu, [na] cizango ca cipi,” vunoni ue ku a katula.—Kolose 3:5.

Kapostolo Paulu ua sonekele ngueni: ‘Vakua cilemo cetu, omo tu li na matavasiano ano, tu lilelesienu ku mazilo ose a ku muvila na a ku cimbembesi, mu ku tantuluisa ku-lela na vuoma kuli Njambi.’ (2 Kolintu 7:1) Nga ku niunga aa mezi ci li na ku mi kaluuila kati mu hilukile mu nima. Yehova ‘ua kala na vuasi mu ku ecela milonga’ na mu ku kuasa. (Visamo 86:5; Luka 11:9-13) Tantekeyenu ngecize ku payesa ca mutima uenu na kapandi ka mue ku lihakela mu ku likela mututa vutuhu mue ku uilamo naua vintsimbu vimo, vie ku muesa ngecize mua tonda mpundu ku likela. Vulukenu nguenu, “Njambi ua hiana mitima yetu, ikeye ua tantekeya viuma viose.” (1 Yoano  3:20) Njambi ke ku tala lika vupi vuetu, vunoni ue ku tala vuntu vuetu vuose. Ku tantekeya vuntu vuetu vuose ce ku lingisa Yehova a tu halakane na ngozi mu tue ku mu lambelela mu vivundilo. Ngeci mukemuo tualelenuho ku tinina kuli Njambi mu civundilo, ngue muana mue ku tinina kuli Ise nga ali mu visoti, kati mu hone. Yehova a mi hana mutima ua ku lela. (Visamo 51:1-12, 17; Isaya 1:18) Vunoni mua pande ku linga vize via litombola na vivundilo vienu. Ngeci mua: ku lihakela kapandi ka ku viana ku tanda, ku halakana ni ku tala nkala viuma via vuntselentsele na ku viana vavusamba va vapi. *

Nga cisoti cenu ca mututa ci tualelelaho, sukulukambu handekenu na cisemi Mukua Kilistu cipue Mukua Kilistu ueka ua ku hia ni kavusamba ua mi haka seho. *— Visimo 1:8, 9; 1 Tesalonika 5:14; Tito 2:3-5.