Civunga ca Vantuamena ca Vakaleho va Yehova:

Yesu ua handekele ngueni: “Mu ka tantekeya vusunga na vusunga vu ka mi patula.” (Yoano 8:32) Aa mezi eku tu lembezieka cikuma! Muomu vutuhu tuli ku ‘matangua a ku kotokela’ kaha mavu ose a na sulu na makuli, citava ku tantekeya vusunga. (2 Timoteo 3:1) Mu vuluka ntsimbu ya ku livanga i mua nongonuene vusunga ngue mu va vu lombolola mu Mbimbiliya ni? Mua vusunga mua vuile ndzolela ya kama cikumakuma!

Cili vene, ca pua ca seho ku tantekeya mpundu vusunga na ku vu ambulula ku vakuetu ntsimbu yose. Vunoni ca pua naua ca seho, ku yoya mu njila ya litombola na vusunga. Vunoni linga tu hase ku lingamo, noho tu kale mu cilemo ca Njambi. Vika ca lomboloka? Cikumbululo tu ci uana mu mezi a handekele Yesu tele kua lisupu vutsiki vumo linga va mu tsihe. Ua lekele vapostolo veni ngueni: ‘Nga mu niunga mezi a lisiko ange, mu ka kala mu cilemo cange; ngue omo nji na niunga mezi a lisiko a Tata, kaha nja kala mu cilemo ceni.’—Yoano 15:10.

Ngue mu tua mono mu mezi aa, Yesu ua kele mu cilemo ca Njambi mu ku ononoka masiko a Ise. Netu tua pande ku lingamo lelo lino. Linga tu kale mu cilemo ca Njambi, tua pande ku pangesa vusunga vu tue ku lilongesa tangua na tangua. Ku vutsiki vuze vene, Yesu ua handekele ngueni: “Nga mu tantekeya viuma evi, mu vezika nga mu vi linga.”—Yoano 13:17.

Tua lavelela nguetu lino livulu lika mi kuasa ku tualelelaho ku pangesa vusunga mu muono uenu na ku kala mu “cilemo ca Njambi na ku lavelela . . . muono ka ue ku hua.”—Yunda 21.