Ntsimbu ika Mukua Kilistu ua Mpuevo na pande ku fuika ku mutue mu cipanga ca Njambi, kaha omo lia vika? Tu ci talenu mezi a ku huimina a sonekele Paulu ha cimpande eci. Ua sonekele vitume vi hasa ku tu kuasa mu ku hangula viuma vi muesa kasingimiko kuli Njambi. (1 Kolintu 11:3-16) Paulu ua sonekele viuma vitatu via seho ya kama: (1) Vipanga via pande ku lingisa mpuevo ku fuika ku mutue. (2) Ntsimbu na cihela ca na pande ku fuikila ku mutue kaha na (3) Vusunga vua pande ku mu lingisa ku fuika ku mutue.

Vipanga. Paulu ua sonekele vipanga vivali: Ku vundila na ku handeka via vupolofeto. (Cinimbu 4, 5) Ku vundila, ca pua ku handeka na Yehova mu kasingimiko. Ku handeka via vupolofeto lelo lino ci hasa ku lomboloka ku longesa ce mana ha Mbimbiliya ce ku linga Mukua Kilistu. Vuno aa mezi a Paulu a lomboloka ngecize mpuevo na pande ku fuika ku mutue nkala ntsimbu ya vundila ni ku longesa vusunga vua Mbimbiliya ni? Houe. Ci nayi ku ntsimbu na cihela ca vundilila ni ku longesa.

Ntsimbu na cihela. Aa mezi a Paulu a muesa vihela vivali kue ku hitila vipanga viaco—ha ndzivo na mu cikungulukilo. Ua sonekele ngueni: “Yala ikeye mutue ua mpuevo;. . . vunoni mpuevo uose omo a vundila cipue a handeka via vupolofeto,  kaha ku mutue ueni ka zalele, a sahuisa mutue ueni.” Cinimbu 3, (55) Yehova ua hangula yala ku pua mutue ua mpuevo ha ndzivo. Nga mpuevo ka muesa kasingimiko ku mpoko ya yalieni ha ndzivo, a ka sahuisa yalieni mu ku linga cipanga ca hana Yehova kuli yala. Ca ku muenako, nga ci tondeka ngecize mpuevo a longese via Mbimbiliya oku na yalieni hali, a ka muesa kasingimiko ku mpoko ya yalieni mu ku fuika ku mutue. Mpuevo na pande ku lingamo ambe nga yalieni ua ku mbatiza ni kuahi. * Nga a vundila ni ku longesa via Njambi ha meso a muaneni ua mundende ua yala ua ku mbatiza, kasi na pande ku fuika ku mutue, kati muomu kanike na pu mutue ua ndzivo, vunoni omo lia mpoko i va kala nayo vamala va ku mbatiza ya ku longesa mu cikungulukilo ca Vakua Kilistu.

Paulu ua sonekele via mu Cikungulukilo ngueni: “Vunoni nga kuli yala umo a hianga ku kandula zimpata, yetu cilika cize ka tuesi naco, cipue zimbunga (vikungulukilo) zia Njambi.” (Cinimbu 16) Mu cikungulukilo ca Vakua Kilistu, vamala va ku mbatiza vakevo va kala na mpoko ya ku endesa viuma. (1 Timoteo 2:11-14; VaHevelu 13:17) Vamala lika vakevo va ve ku hangula ku pua vakuluntu na vakua ku kuasa vipanga linga va puisemo citeli ca va hana Njambi ca ku niunga vutanga vueni. (Vilinga 20:28) Vunoni, vintsimbu vimo Mukua Kilistu ua mpuevo va hasa ku mu lania a linge cipanga ca pande vamala va ku mbatiza. Ca ku muenako, muanetu ua mpuevo a hasa ku endesa ciuano ca mu ku ambulula nga ka kuesi muanetu ua ku mbatiza ni kezile. Kaha citava endese cilongesa ca Mbimbiliya ci va likuminyine laza, oku na muanetu ua ku mbatiza hali. * Mu ku linga evi vipanga viaco via likuata na ku lemesa ca Vakua Kilistu, muanetu ua mpuevo na pande ku fuika ku mutue mu ku muesa ngecize na tantekeya ngueni cipanga ci ali na ku linga ca pande vamala.

 Kua kala vipanga vikuavo via vingi via ku lemesa, vize ka vi tondeka muanetu ua mpuevo a fuike ku mutue, nga a vi linga. Ca ku muenako, ka tondeka ku fuika ku mutue nga a kumbulula ku viuano, a ambulula ku ndzivo na ndzivo na yalieni ni na muanetu ueka ua ku mbatiza, cipue nga a longesa ni ku vundila na vana veni va ku hona ku mbatiza. Mua vusunga, vihula vikuavo vi hasa ku katuka ha cimpande eci, nga muanetu ua mpuevo ka tantekeya vuino via na pande ku linga, na pande ku tondesesa. * Vunoni nga hanga kesi na vusunga, kaha mutima ueni u mu tavesa ku fuika ku mutue, citava a lingemo kati vupi, ngue mu ci na muesa cikupulo ci li hano.

Via na pande ku fuikila ku mutue. Ha cinimbu 10, tu uanaho viuma vivali via pande ku lingisa Mukua Kilistu ua mpuevo a fuike ku mutue, nguaco: “Mpuevo ca mu pande ku kala na citantekeyeso ca mpoko eyi ku mutue ueni, omo lia tungelo.” Ha katete, talenu lizi “citantekeyeso ca mpoko.” Mpuevo nga a fuika ku mutue ali na ku muesa ngecize na tantekeya mpoko ya hana Yehova ku vamala va ku mbatiza mu cikungulukilo. Kaha mu ku lingamo, ue ku muesa cilemo na ku ononoka ceni kuli Yehova Njambi. Vusunga vua mu civali tu vu uana mu mezi “muomu tungelo.” Vati ve ku ivua tungelo mu ku mona vampuevo va na fuika ku mitue?

Tungelo va lema ku mona ngecize vukama vua Njambi vali na ku vu singimika mu lukungulukilo luose lua Yehova, muilu na ha mavu. Ve ku lilongesa naua via vingi ku lungano lua vantu ka va tantulukile. Muomu navo va pande ku likehesa ku vukama vua Yehova—cuma ka va hasele ku linga vamo tungelo ku ntsenkulu. (Yunda 6) Tungelo va hasa ku mona Mukua  Kilistu ua mpuevo ua ku hia, ua mana, kaha ua vutongue ku hiana umo yala ua ku mbatiza mu cikungulukilo; vunoni ue ku ononoka na mutima uose ku mpoko i ali nayo yala uaco. Vamo Vakua Kilistu va vampuevo va ku vuavesa kaha va ka pua vamiangana hamo na Kilistu. Vampuevo vaco tangua va ka kala ha vukama vua hiana na vua tungelo, mu va ka sika na Kilistu muilu. Ngeci mukemuo, ku likehesa cavo ntsimbu ino, ce ku pua lungano lua cili cikuma ku tungelo. Cili vene, vamuanetu va vampuevo va kala na civezikiso ca kama ca ku muesa ku ononoka na ku likehesa cavo ku meso a makulukazi na makulukazi a tungelo!