Tue ku ivua ku vavala ca kama ku mutima nga kavusoko ni kavusamba ketu a ua mu cikungulukilo omo lia ku linga vupi ca ku hona ku liveya. Cifua ci tue ku muenamo vimamuna via Mbimbiliya ku tuala ha cimpande eci, ce ku muesa vukama vua cilemo cetu kuli Njambi na kasingimiko ku viuma via tumbika. * Tu hilulenu vimo vihula vie ku katuka ha cimpande eci.

Vati tua pande ku yoya na muntu ua kuua mu cikungulukilo? Mbimbiliya nguayo: “Kati mu liendele na uze i va tumbula muanoko, nga ikeye na pu mukua vupangala, cipue mukua cipululu, cipue mukua mahamba, cipue mukua ku tuka, cipue mukua ku penda, cipue mukua milami, ua ngecize cipue ku lia kati mu lie neni.” (1 Kolintu 5:11) Ku tuala kuli uose a “tanguka kaha ka kala-kala mu luhande lua Kilistu,” Mbimbiliya naua nguayo: “Kati mu mu tambule mu zindzivo zienu, kaha kati mu mu sambelele: Muomu ou a mu sambelela a lipandakana neni ku vilinga vieni via vipi.” (2 Yoano 9-11) Ka tua pandele ku likata na muntu ua kuua, cipue ku via lutsilielo ni ku vieka. A Sentinela 15 de Dezembro de 1981, ha lifo 21, ya handeka nguayo: “Cipue ku meneka lika muntu mu kanua, ci hasa ku pua vuputukilo vua vusamba. Vuno tu tonda mpundu ku lingamo na muntu ua kuua ni?”

Citondeka mpundu ku likela ku likata neni mu viose ni? Eyo, kuli viuma via vingi vi tu lingisamo. Ca katete, ku lingamo ci muesa ngecize tua singimika Njambi na Lizi lieni. Ka tue ku ononoka lika Yehova mu vintsimbu via viasi, vunoni na mu vintsimbu via vikalu. Ku lema Njambi ce ku tu lingisa ku ononoka masiko eni ose, muomu tua tantekeya nguetu ikeye cilemo na mukua vuoloke kaha masiko eni eku tu kuasa cikumakuma. (Isaya 48:17; 1 Yoano 5:3) Ca mu civali, ku tsiha  vusamba na uze na vulumuna ce ku tu ohiela na ku niunga cikungulukilo cose linga ci tualeleleho ku pua ca ku lela ku meso a Njambi. (1 Kolintu 5:6, 7) Ca mu citatu, lukakatela luetu ku vitume via mu Mbimbiliya lu hasa ku kuasa uze ua kuua. Nga tu niunga viuma vi ci na hangula civunga ca vakua ku sompa mu cikungulukilo, tu hasa ku lingisa uze ua vulumuine a tave vukuasi vu va li na ku mu hana vakuluntu. Ku zimbalesa vusamba vua cili na vantu va tua lema, ci hasa ku mu ‘pasula ku mutima’ linga a mone vukama vua vupi vuana lingi, na ku puisamo viose vitondeka linga a hiluke kuli Yehova.—Luka 15:17.

Vatico nga muntu uaco ua pua kavusoko ketu? Mua vusunga, ha ntsimbu eyi, ku ononoka masiko a Yehova ce ku kaluua cikuma muomu muntu uaco ua pua kavusoko ketu. Vati tua pande ku yoya na kavusoko ua kuua? Mu cilongesa cino tu ka handeka ha vitanga viose vie ku katuka ha ntsimbu yaco, vunoni tu simutuilenuho vivali via seho ya kama.

Vintsimbu vimo, kavusoko ua kuua a hasa ku pua muntu u tua yoya neni mu ndzivo imo, ngeci mua muana ni muntu u tua liambata neni. Kuua ceni ka ce ku tsiha vusoko, citava ku tualelelaho ku linga neni viuma via tangua na tangua mu vusoko. Vunoni omo lia vupi vua na lingi, na hangula ku tsiha ku likata ceni na vusoko mu viuma via mu lutsilielo. Ngeci mukemuo, vavusoko vueni ka va pandele naua ku linga hamo neni viuma via mu lutsilielo. Ca ku muenako, nga ntsimbu ya ku lemesa mu vusoko i na puho, vutuhu hali hembo ka pandele ku kalako. Vunoni nga muanike, kasi ali mu kapandi ka visemi vieni ka ku mu longesa na ku mu sungamesa. Ngeci mukemuo visemi va hasa ku putuka ku mu endesela cilongesa ca Mbimbiliya. *—Visimo 6:20-22; 29:17.

Vintsimbu vikuavo, kavusoko ua kuua halumo ka kele mu ndzivo imo na va vusoko vueni. Vutuhu kuli vimo via mu vusoko vi va pande ku linga hamo, va pande ku kehesa ku likata  caco. Vavusoko vaze vali mu vusunga, ka va pandele ku tonda vukovelelo vua ku likata na kavusoko kavo ua kuua ua kala ku ndzivo yeka. Vunoni ku ononoka kuli Yehova na lukungulukilo lueni, ce ku va lingisa ku niunga vitume via Mbimbiliya ku tuala ha muntu ua ua mu cikungulukilo. Kaha ku ononoka cavo ku vitume via Yehova ce ku kuasa muntu ua kuua a uane vukuasi mu ku sungamesa ca na tambula. *—VaHevelu 12:11.