Tumitamba tua Maninga. Tumitamba tuaco ve ku tu tundisa ku mitamba iuana ya kama—viselula via ku venga, viselula via ku toka, viplaketa na plasma. Ca ku muenako, mu viselula via ku venga mua kala hemoglobina. Vihemba vi ve ku panga na hemoglobina ya vantu ni ya tusitu, ve ku vi sakesa vavezi va vavala cikuma anemia ni va na hitisa maninga a engi cikuma.

Mu Plasma—mua kala viuma ngeci mua muongua na suka, vunoni mema akeo a sulamo cikuma (90%). Mua kala naua viuma vie ku lingisa maninga a konde na vikuavo vie ku luisa mavezi na vikuavo vie ku kolesa muvila ngeci mua albumina. Vandotolo nga va uana vuvezi mu muntu, va hasa ku mu sonekela vinguya via gamaglobulina i ve ku tundisa mu plasma ya muntu ua tambula nguya ya vindika vuvezi vuaco. Kaha mu viselula via ku venga ve ku nonamo viuma vi ve ku pangesa vihemba via ku saka mavezi ngeci mua cancro.

Vuno Vakua Kilistu va pande ku tava ku va saka na vihemba via ku tundisa ku tumitamba tua maninga ni? Mbimbiliya ka ya tumbuile mpundu tumitamba tua na pande ku tava ni ku viana Mukua Kilistu. Ngeci mukemuo, nkala muntu na pande  ku lihanguila ivene ku meso a Njambi. Vamo ve ku viana tumitamba tuose, nguavo muomu Njambi ua hanene Lisiko kuli vaIsaleli, ngueni, maninga va pandele ku “a muaniena ha mavu.” (Ndeutelonomi 12:22-24) Vamo vutuhu ve ku viana maninga ose ni mitamba yao ya kama, va hasa ku tava ku va saka na tumitamba tuao. Muomu nguavo tumitamba tuaco ka tuemanenene mpundu muono ua uze u va na tu tundisa, muomu kati maninga mpundu vunoni tumitamba tuao lika.

Ntsimbu kanda mu hangule ku mi saka na tumitamba tua maninga, mua pande ku lihula nguenu: Nja tantekeya ngecize ku viana tumitamba tua maninga tuose ca lomboloka ku viana nkala vihemba vi va panga na tumitamba tuaco, vi ve ku pangesa mu ku luisa mavezi ni ku lingisa maninga a konde linga a likele ku hita ni? Nja pande ku lomboluela ndotolo vika nja vianena ni ku tava kamo ni tumitamba tukuavo tua maninga ni?

Vinjila via ku tavuilamo muntu. Vimo vievi vinjila via pua hemodiluição na recuperação intra-operatória de células. Hemodiluição ya pua ku tundisa maninga mu muvila ua muntu nga va mu tavula, na ku pangesa mema a vihemba mu cihela cao, kaha mu nima yaco ku a hiluisilamo naua. Kaha recuperação intra-operatória de células ya pua ku kunguiya maninga eku muania nga muntu va na mu tavula na ku a hiluisa mu muvila ueni nga va na mane. Ve ku kunguiya maninga a ha mbandu ni ha cilio ceka na ku a lelesa kaha ve ku a hiluisa mu muvila ua muvezi. Vandotolo ve ku pangesa evi vinjila mua ku liseza-seza,  ngeci mukemuo Mukua Kilistu na pande ku hula ndotolo yeni linga tantekeye vati ue ku vi pangesa ikeye.

Nga mu tonda ku mi saka na imo yevi vinjila, mua pande ku lihula nguenu: ‘Nga mu ku nji saka va tundisa maninga ange na ku a tulikila kumo mu kantsimbu ka kandende, mutima uange u nji tavesa ku a hiluisila mu muvila uange, kati ku ‘a muania’ ni? (Ndeutelonomi 12:23, 24) Vuno mutima uange ua ku longesa ku Mbimbiliya u nji tavesa, nga va nji fumisa  maninga va a pesula kaha va a hiluisila mu muvila uange ni? Nja tantekeya nguange nga nji viana ku saka cose ce ku pangesa maninga ange, nji li na ku viana seteko ya maninga, ku lelesa maninga ni ku pangesa likina ni?

Nkala Mukua Kilistu na pande ku lihanguila vati vandotolo va pande ku pangesa maninga eni nga va tonda ku mu tavula. Na pande naua ku lihanguila seteko ya maninga ngeci mua ku mu tundisa amo maninga ku a pesula na vihemba ni ku tundisako vimo kaha na ku a hiluisa mu muvila.