Yehova ua lavelela vaze va liambata va kakateye ku litavasiano liavo lia vulo. Ngeci mukemuo, mua pandakanene yala na mpuevo va katete, ua handekele ngueni: “Yala a ka . . . kakatela mpuevo yeni, kaha va ka pua ntsitu imo lika.” Yesu Kilistu neni ua handekele naua mezi aco na ku vuezako ngueni: “Ava Njambi na va pandakana, muntu kati a ka va hangunune.” (Njenisisi 2:24; Mateo 19:3-6) Aa mezi a muesa ngecize, Yehova na Yesu va mona vulo ku pua lizitiko lia pande lika  ku lenga nga umo ua vaze va liambata a tsa. (1 Kolintu 7: 39) Vulo vua pua vua ku lela, ka vua pandele ku vu tsiha ngoco. Mua vusunga, Yehova ua zinda ku tsiha vulo mu njila i ya vindika Mbimbiliya.—Malakiya 2:15, 16.

Ku liya na Mbimbiliya, vika via pande ku tsiha vulo? Yehova ua zinda vupangala na vukoyi. (Njenisisi 39:9; 2 Samuele 11:26, 27; Visamo 51:4) Mua vusunga, Yehova ua zinda cikumakuma vupangala ngeci ua tavesa ku tsiha vulo omo lia vupi vuaco. (Linga mu uane mizimbu ikuavo ya lombolola vukoyi, talenu mu Kapitulu 9, cinanga 7.) Yehova ua hana uze kesi na mulonga mpoko ya ku hangula nga a tualelelaho ku yoya na mukua ndzivo yeni na lingi mulonga ni a tsiha vulo. (Mateo 19:9) Ngeci mukemuo, uze kesi na mulonga nga a hangula ku tsiha vulo, ka lingile vupi ku meso a Yehova. Vunoni, vantu mu cikungulukilo ka va pandele ku mu sindiya ku tsiha vulo. Muomu, kua kala vimo vi hasa ku lingisa uze kesi na mulonga, a tualeleleho ku yoya na mukua ndzivo yeni na lingi vupi, cikumakuma nga a litavela vupi vueni na ku likela. Vutuhu ngoco, vaze vali na mpoko ya ku tsiha vulo ngue mu ya handeka Mbimbiliya, va na pande ku lihanguila vavene nga va tsiha vulo ni kuahi na ku tava nkala viuma vi kezamo.—Ngalata 6:5.

Kuli vimo visoti via vikalu cikumakuma, vie ku lingisa vamo Vakua Kilistu ku litepa na mukua ndzivo yavo vutuhu ka lingile vupangala. Vunoni Mbimbiliya nguayo uose a lingamo ‘kati a somboke naua, nga kuahi a lihambe’ na mukua ndzivo yeni. (1 Kolintu 7:11) Muomu kesi na mpoko ya ku ambata ni ku somboka ku muntu ueka. (Mateo 5:32) Tu talenu vimo viuma via vikalu cikumakuma vi hasa ku lingisa vaze va liambata ku litepa.

Ku viana ku lela vakua ndzivo ku cizango. Vusoko vu hasa ku kala mu vuhutu vua kama cikumakuma, muomu yala kesi na ku vu lela vutuhu ali na ngolo ya ku lingamo. Mbimbiliya nguayo: ‘Vunoni nga umosi ka lengeya . . . via vakua ndzivo yeni ivene, na viana ku-tsiliela, kaha na hiana uze ka tsililielele mu ku pihia.’ (1 Timoteo 5:8) Yala ua cifua eci nga a viana  ku alulula cifua ceni, mpuevo citava a hangule ku litepa neni, linga a liohiele na ku ohiela vana. Vakuluntu va cikungulukilo va na pande ku hilula vuino, nga vevua nguavo umo Mukua Kilistu na viana ku lela vakua ndzivo yeni. Ku viana ku lela vakua ndzivo ci hasa ku uisisa muntu mu cikungulukilo.

Vukenia. Mukua ku tingula mukua ndzivo yeni, a hasa ku haka cihindu na muono ua mukua ndzivo yeni mu vusonde. Nga cikenia uaco ua pua Mukua Kilistu, vakuluntu va cikungulukilo va na pande ku hilula vuino, nga vusunga mpundu ni kuahi. Vutenu na vilinga via vukenia vi hasa ku uisisa muntu mu cikungulukilo.—Ngalata 5:19-21.

Ku vindika mukua ndzivo ku lemesa Yehova. Muntu a hasa ku kaluuisa cikumakuma viuma linga mukua ndzivo yeni kati a lemese Yehova ni a hasa ku mu kakateya ku tsiha amo masiko a Njambi. Mu cisoti eci, uze ali mu vusonde na pande ku hangula nga ku tsiha vulo ikeyo lika njila ya na lisupu nayo mu “ku ononoka kuli Njambi ku hiana ku vantu.”—Vilinga 5:29.

Mu visoti via vikalu cikumakuma ngue evi vi tu na simutuila hano, na umo uahi na pande ku sindiya uze ka lingile vupi ku litepa ni ku kala hamo na mukua ndzivo yeni. Vutuhu vavusamba va ku hia mu lutsilielo na vakuluntu va hasa ku va kuasa na ku va handekela ku liya na vimamuna via mu Mbimbiliya, ka va hasa ku tantekeya viuma viose via soloka ha kati ka yala na mpuevo. Yehova lika a hasa ku vi mona. Ngeci mukemuo, nga mpuevo ni yala Mukua Kilistu a vueza visoti via mu vulo linga a uane vukovelelo vua ku litepa na mukua ndzivo yeni, kesi na ku muesa kasingimiko kuli Njambi na ku vuana vua vulo. Yehova ue ku mona vutumbe vuose vu ve ku panga vantu mu ku tonda vukovelelo vua ku litepa, ambe va vu sueke vati. Cili vene, “viuma viose vi li vuntselentsele, via ku fukuka ku meso” a Njambi. (VaHevelu 4:13) Vunoni nga vusonde vua kama vu tualelelaho, na umo uahi na pande ku paya Mukua Kilistu a hangula ku litepa na mukua ndzivo yeni. Kaha tangua “etu vose tu ka mana ku citumamo ca ku sompela ca Njambi.”—Loma 14:10-12.