U tonda ku tantekeya vilongesa vimo, linga u vuezelele ku mana ove a ku tantekeya mua cili Mbimbiliya? Kuli umo mukanda ka ua ku lombolokele mua cili, ni muntu umo u va soneka mu Mbimbiliya? Halumo u li na vimo visoti kaha u tonda linga lizi lia Njambi li ku kuase. Ya mu cisete ca mikanda linga u ka uane vukuasi.

Mu cisete mua kala mikanda ya ku liseza-seza. Citava halumo ka ua kele na imo ya Vakaleho va Yehova mu lilimi liove. Vunoni mu cisete ca mikanda mu Ndzivo ya Vuangana mua kala mikanda ya ku liseza-seza. U hasa ku uana vi Mbimbiliya vi va lombolola mu malimi a ku liseza-seza na vindisionaliu, na mavulu eka na eka a seho. U hasa ku pangesa mikanda mu cisete ntsimbu kanda tu ci likungulule ni mu nima ya kuli kungulula. Nga mu cisete ca mikanda mua kala komputador u hasa ku uanamo plongalama ya Watchtower Library. Plongalama yaco ya kala na mikanda ya ingi cikuma kaha ya pua ya yehu cikuma mu ku ku kuasa ku uana mikanda i u tonda.

Cisete ca mikanda ce ku kuasa vandongesi va mu Ciuano ca Muono Uetu Vakua Kilistu na Vipanga Vietu. U hasa ku pangesa cisete ca mikanda omo u liviukisila vimpande viove. Mukuluntu ua Ciuano ca Muono na Vipanga ikeye ue ku tala via cisete ca mikanda. Ue ku kala na kapandi ka ku mona nga mikanda yose va li na ku i niunga mua cili. Ntuamena ua sikola ni mulongesi uove ua Mbimbiliya a ka ku kuasa linga u uane vimpande vi u tonda. Mikanda ya mu cisete ka ya pandele ku i fumisa mu Ndzivo ya Vuangana. Tu na pande naua ku niungako mua cili mikanda yetu ka tua pandele ku sonaziekamo.

Mbimbiliya nguayo ha “ku uana mana a ku tantekeya Njambi,” tu na pande ku a lengeya ngue “vupite vua ku sueka.” (Visimo 2:​1-5) Cisete ca mikanda ci hasa ku ku kuasa linga u putuke ku tondesesa cove.

• Mikanda ika ya kala mu cisete ceni ca mikanda?

• Iya a hasa ku ku kuasa linga u uane vi u tonda mu cisete ca mikanda?