Lizina lia “Pioneiro” lia lomboloka muntu uze ue ku tonda vihela via viha linga a sokoluele vakuavo njila ya ku ka ambuluilako. Yesu ua puile pioneiro ua kama. Va mu tumine ha mavu linga a ku sangumuke cipanga ca ku ambulula na ku sokoluela vantu njila ya vuovoke. (Mateo 20:​28) Lelo lino, Vakua ku kava Yesu navo vali na ku kava lungano lua Yesu mu ku pangesa ntsimbu yavo mu ‘ku puisa vantu vandongesi.’ (Mateo 28:​19, 20) Vamuanetu vamo va kovela mu vipanga via vupioneiro.

Pioneiro ua pua mukua ku ambulula ua ntsimbu yose. Vakaleho va Yehova vose va pua vakua ku ambulula muzimbu ua cili. Vunoni vamo va na asiuisa miono yavo linga va pue vapioneiro va ntsimbu yose, ve ku hana mu ngonde vi ola 70 via kuambulula. Linga va puisemo evi vi ola vapioneiro vavengi ve ku tepulula ku vipanga viavo via ku tonda via ku lisuka. Vakuavo ve ku hangula ku pua vapioneiro va ku lifuila kaha ve ku va tuma ku vihela kuze kuli vakua ku ambulula va vandende ni vahiko, ve ku hana mu ngonde vi ola via ku pua 130. Vapioneiro va asiuisa miono yavo na tuvikuata tua tundende kaha va kulahela nguavo Yehova a va tondela vi na lisupu. (Mateo 6:​31-​33; 1 Timoteo 6:​6-8) Kua kala vaze ka va hasa ku panga ntsimbu yose vunoni ve ku pua vapioneiro va ku kuasa mu ku hana vi ola 30 ni 50 mu ngonde.

Ku lema Yehova na ku lema vantu ce ku lingisa pioneiro ku ambulula. Ngeci mua lingile Yesu, tue ku vuila vantu cikeketima omo lia vuhutu vuavo mu sipilitu. (Mako 6:​34) Vunoni tua kala na vusunga vuze vu hasa ku va kuasa na ku va hana ku lavelela ca cili ca ku lutue. Omo lia ku lema vantu, pioneiro ue ku pangesa ntsimbu na ndzili yeni mu ku kuasa vakuavo mu sipilitu. (Mateo 22:39; 1 Tesalonika 2:8) Omo lia cipanga eci ue ku kolesa lutsilielo lueni na vusamba vueni muli Yehova na ku viukilila ca kama.​—Vilinga 20:35.

• Vati u hasa ku lombolola, iya ua pua pioneiro?

• Vika vie ku lingisa vamo ku pua vapioneiro va ntsimbu yose?