Vakaleho va Yehova ve ku soneka na ku havazela ku mbunga makulukazi a viMbimbiliya na mikanda ikuavo ya vuana, muaka ku muaka. Tue ku tunga Vindzivo via Vuangana na vimbetele. Tue ku kuasa vamuanetu va kala ha vimbetele na vaMisionaliu, tue ku kuasa vantu ha vintsimbu via mandunduma na ku va hana vihemba. Halumo u hasa ku li hula nguove kulihi kue ku fuma vimbongo linga va puisemo viuma viose evi?

Ka tue ku fuetesa, ni ku lomba vimbongo ku vantu. Vutuhu kue ku tondeka vimbongo linga cipanga ca ku ambulula ciye ku lutue, ka tue ku lomba vimbongo ku vantu. Mua hiti miaka 100 fume ha va sonekelele mu Vutala vua Kaniungi vua mu civali vuze vua handekele nguavuo Yehova ua pua mukuasi uetu “ka tu ka lambelela vukuasi ku vantu”​—kanda tu lombe vukuasi hanga tua suila!​—Mateo 10:8.

Vuana vua vantu vue ku kuasa vipanga vietu. Vantu va vengi va lema cipanga cetu ca ku longesa Mbimbiliya ku vantu ngeci ve ku hana vuana vuavo. Netu vene Vakaleho va Yehova tue ku hana ntsimbu yetu, ndzili, vimbongo, na vufuko vua ku liseza-seza mu ku panga cizango ca Njambi ha mavu ose. (1 Mizimbu 29:9) Ku ndzivo ya Vuangana, kua kala vikasa via ku haka vuana, vose vaze va tonda ku hakamo vuana, citava va linge ngoco. Kaha citava naua ku hana milambu ku hitila mu site jw.org. Vantu ve ku hana vuana vintsimbu via vingi ka va puile vampite kuahi, vamo va pua ngeci mua uze ntuluue ua ku hutuua ua sangalele Yesu, omo ua mbilile tumbongo tuvali mu cikasa ca mu tembele. (Luka 21:1-4) Muntu uose citava a “tulike” vize via na vezika linga a ka “hane ngue omo na zange ku mutima ueni.”​—1 Kolintu 16:2; 2 Kolintu 9:7.

Tuli na vusunga nguetu Yehova a tualelelaho ku sindiya mitima ya vantu vaze va tonda ku ‘mu singimika na vikuata viavo’ mu ku kuasa vipanga via Vuangana linga vi lipuisemo.​—Visimo 3:9.

• Haka ca litepela cikungulukilo ca Vakaleho va Yehova na vitembele vieka?

• Vati ve ku pangesa milambu ya vuana?