Vakaleho va Yehova ve ku tuma vuasi-vuasi vukuasi kuli vamuanaye, nga va kovela mu visoti. Ngozi ya cifua eci ye ku muesa vukama vua cilemo ci va kala naco kuli umo na mukuavo. (Yoano 13:34, 35; 1 Yoano 3:17, 18) Vati tue ku hana vukuasi vuaco?

Tue ku tuma zimbongo. Ku Yundeya omo kua hitile ndzala ya kama, Vakua Kilistu va tumine zimbongo mu ku kuasa vamuanaye mu lutsilielo. (Vilinga 11:27-30) Netu naua mu tue ku tambula mizimbu i lekesa ngecize vamuanetu ku cihela cimo va na kovela mu vukalu, tue ku va tuma vukuasi ku hitila mu cikungulukilo cetu linga va ka likuase navuo.​—2 Kolintu 8:13-15.

Tue ku tuma vukuasi vua ku muvila. Vakuluntu va mu vikungulukilo va ku cihela ku na soloka vukalu ve ku tonda vamuanetu vose valiko na ku tala nga vali mua cili. Kue ku kala civunga ca vakua ku kuasa ce ku vuahesa na ku tepela via-ku-lia, mema a ku nua, vuzalo, vindzivo via ku va haka na vihemba. Vakaleho va Yehova vaze va kala na vumesene vua ku liseza-seza ve ku lihana kaha na ku fueta mangendzi avo mu ku ka kuasa vantu na ku tungulula Vindzivo via Vuangana na vindzivo via vamuanetu vize vi na puzuka. Ku lipandakana ci tua kala naco mu ku pua cikungulukilo na vutongue vu tua uana mu ku panga hamo vie ku tu kuasa ku vuahesa na ku tuma vukuasi ku vamuanetu vose va kovela mu visoti. Vutuhu tue ku kuasa “vaze va na pandama ku vusoko vua ku tsiliela,” nga tu puisamo tue kuasa vantu veka, cipue nga va ku vulombelo vueka.​—Ngalata 6:10.

Tue ku lembezieka vantu ku hitila mu Mbimbiliya. Vaze ve ku vetua ni ku hutuua omo lia mandunduma va tonda ku va lembezieka. Ha vintsimbu viaco tue ku vundila ngolo kuli Yehova, “Njambi ua ku-lembezieka cose.” (2 Kolintu 1:3, 4) Tue ku ambulula na ndzolela vikulaheso via mu Mbimbiliya kuli vaze kavesi na lulavelelo, na ku va muesa vusunga nguetu vuovuno Vuangana vua Njambi vu ka manusulako vi mponde viose muomu vie ku neha ku vavala na tuyando.​—Ku-Solola 21:4.

• Vika Vakaleho va Yehova ve ku hasela ku kuasa vuasi-vuasi nga ku na soloka mandunduma?

• Ku-lembezieka cika ca mu lutsilielo va tonda vaze ve ku ovoka ku mandunduma?