Ambe mu niondzi, masika, mutana ni vusonde, kasi tue ku likungulula mu ku lemesa Njambi hamo na vamuanetu Vakua Kilistu ntsimbu yose. Cipue mu visoti via muono na vikato omo lia ku tonda via ku lisuka, Vakaleho va Yehova ve ku liendela na vamuanaye Vakua Kilistu, omo lia vika?

Ce ku tu kuasa ku yoya vuino. Ku tuala hali vaze va tue ku lemesa navo Paulu ua sonekele ngueni ‘tu liyongolienu umo na mukuavo.’ (VaHevelu 10:24) Mezi ano a lekesa ngecize, tua pande ku litantekeya mua cili umo na mukuavo. Ngeci mukemuo ano mezi a Paulu a tu kolesa ku lilema na vakuetu. Mu ku likuata vusamba na vamuanetu Vakua Kilistu, tue ku uana ngecize vamo va na hiti mu vieseko vi na lifu na vietu, eci ce ku tu kaniamesa mu lutsilielo.

Ce ku kolesa vusamba. Ku vikungulukilo vietu ka tue ku kala lika hamo na vandambo vunoni na vavusamba va ha mutima. Vintsimbu vimo, tue ku simutuila na ku-lia hamo navo. Vika tue ku uana ha vusamba vua ngecize? Tua lilongesa ku lisingimika umo na mukuavo, eci ce ku kolesa cilemo cetu. Nga vamuanetu va na kovela mu visoti, tue ku va kuatesa na ndzili yose muomu va pua vavusamba vetu va ha mutima. (Visimo 17:17) Mu ku likuata na vamuanetu va mu cikungulukilo, tue ku lekesa ngecize “tue ku liniunga umo na mukuavo.”​—1 Kolintu 12:25, 26, NW.

Tu ku mamuna nguetu likate vusamba na vaze ve ku linga cizango ca Njambi. U hasa ku uana vavusamba vaco ha kati ka Vakaleho va Yehova. Kati u tave ku ku tangula omo u likuata netu vusamba.

• Vika ca puila ca seho ya kama ku likungulula ntsimbu yose?

• Tangua lika u ka likungulula netu linga u tu tantekeya mua cili?