ose Ndzivo ya Vuangana ya Vakaleho va Yehova ye ku ambulula lizina lia ku lela lia Njambi. Ngeci mukemuo, ku i komba, ku i lelesa na ku i niunga mua cili ca pua seho ya kama mu ku lemesa cetu. Vose va hasa ku kuasa ku vipanga via ku viukisa Ndzivo ya Vuangana.

Vamuanetu ve ku lihana ku komba, mu ce ku hua ku likungulula. Mu tue ku manusula ku likungulula, vandolome na vandokazi ve ku hitisamo vusakulo linga Ndzivo ya Vuangana i tualeleho ku lela. Lumo mu simano ve ku i komba mu vutuntu. Umo mukuluntu ni mukua ku kuasa vipanga ue ku tuamenena cipanga caco oku a kavangeya ha lista viuma vi va na pande ku linga mu ku komba. Vamo vamuanetu ve ku lihana ku komba, na ku kusa ha mavu nga mua ku salimba, ku kukumuna likungu, kutumbika vialo mua cili, ku haka vihemba via ku tsiha tulongolo mu tundzivo tua kuli hengela, na ku nona visuasua mu citali. Ve ku hangula litangua limo mu muaka lia ku vuahesa mua cili hose ha tondeka. Mu ku hana vanike vimo vipanga, via ku komba tue ku va longesa ku singimika cihela cetu ca ku lemesela.​—Ekelesiaste 5:1.

Nove u hasa ku hana vukuasi. Muaka ku muaka, ve ku hituluka na ku tala mu kati na ha mbandza ya Ndzivo ya Vuangana linga va mone vati ili. Cipanga eci ca ku niunga mua cili Ndzivo ya Vuangana ce ku tu kuasa linga kati tu sanduole zimbongo zia zingi. (2 Mizimbu 24:13; 34:​10) Ndzivo ya Vuangana ya pua cihela ca ku viuka cikuma ca ku lemesela Njambi. Nga tu kuatesa ku vipanga via ku komba ci ka muesa ngecize tua lema Yehova na ku cihela ci tue ku mu lemesela. (Visamo 122:1) Eci ce ku lingisa vantu va vengi ku handeka mua cili via cihela cetu.​—2 Kolintu 6:3.

• Omo lia vika ka tua pandele ku ecelela Ndzivo yetu ya Vuangana i kale na mazilo?

• Vika tue ku linga mangana Ndzivo ya Vuangana i pue ya ku lela ntsimbu yose?