Vati u mona Vakaleho va Yehova va li mu vikupulo via kano kamukanda? Omo lia vika tua lihakela kapandi ka ku zala mua cili ntsimbu yose?

Tue ku muesa kasingimiko kuli Njambi. Tua tantekeya nguetu Njambi ke ku tala ku cifua ca muntu. (1 Samuele 16:7) Vunoni, mu tue kuya mu ku mu lemesa cizango cetu ca pua ku muesa kasingimiko kuli Njambi na vamuanetu. Uose muntu nga va mu sana mu ndzango, ue ku zala vize vi muesa kasingimiko ku vangazi. Netu mukemuo, ku zala cetu nga tuya mu ku kunguluka, ce ku muesa kasingimiko kuli “Ngazi ya mavu ose” Yehova Njambi na ku cihela ci tue ku mu lemesela.​—Njenisisi 18:25.

Ce ku lekesa masiko a tue ku kavangeya. Mbimbiliya ya nangula Vakua Kilistu ku zala “vuzalo vua va pande na ntsoni na ku lipokuesa” ngue vaze “vakua ku lemesa Njambi.” (1 Timoteo 2:9, 10) Ku zala na “ntsoni” ca lomboloka ku viana vuzalo vuze vu katula masungu a api ku vantu. Cikuavo naua, “ku lipokuesa” ce ku tu kuasa ku hangula vuzalo ka vue ku neha kasahuntu. Vutuhu tue ku kavangeya masiko a Mbimbiliya, muntu ku muntu a li na mpoko ya ku hangula vuzalo vua lema. Ku zala cetu ca cili, ce ku talika “luhande lua Muovole uetu” na “ku zumbangeya Njambi.” (Tito 2:10; 1 Petulu 2:​12) Ambe nga ka tua handekele, ku zala cetu nga tuya mu ku likungulula ce ku lingisa vantu ku zumbangeya Yehova.

Kati u likele kuya ku Ndzivo ya Vuangana mu ku kunguluka netu omo lia vuzalo. Citava u zale mua cili ambe nga vuzalo vuove vua ndando ya indende, ca kama ku kusako.

• Seho ika ya kala ha ku zala mua cili nga tuya mu ku lemesa Njambi?

• Masiko aka tue ku kavangeya nga tu hangula vuzalo?