Lizi Mbetele lia lomboloka “Ndzivo ya Njambi” mu ciHevelu. (Njenisisi 28:17, 19) Lizi liaco lia litombola na vipanga vi ve ku panga Vakaleho va Yehova ku vihela evi mu mavu ose mu ku tuamenena cipanga ca kuambulula. Vakua Civunga ca Vantuamena ca Vakaleho va Yehova ku Nova York, E.U.A., vakevo ve ku endesa na ku kavangeya vipanga vi vali na ku panga ku viMbetele viose. Mu ku pua civunga vamuanetu ve ku pangela ku vihela evi ve ku va sana nguavo vusoko vua Mbetele. Omo lia vika? Muomu va yoya hamo, ku pangela hamo, ku-lia hamo na ku lilongesa Mbimbiliya hamo lika.​—Visamo 133:1.

Mbetele ca pua cihela ca ku viuka cikuma muomu vose va kalako va pua vantu va ku lihana. Ku viMbetele viose kua kala Vakua Kilistu vamala na vampuevo va lihana mu ku linga cizango ca Njambi na Vuangana vueni ntsimbu yose. (Mateo 6:33) Na umo uahi ueku tambula fueto ni zimbongo ha kati kavo, vunoni vose ve ku va hana vihondo via ku kala na via-ku-lia kaha na vumo vukuasi vua ku landa vize vi tondeka ku muvila ua muntu. Uose ua kala ha Mbetele ve ku mu hana vipanga, vamo ve ku pangela mu seketa, ku ku teleka, ni ku hondo ya ku lila. Vakuavo ve ku pangela kuze kue tuhukila mikanda, ku ku komba, ku ku kusa vuzalo, ku ku vuahesa makalu na vikuavo via ku liseza-seza.

Cihela ce ku tuala ku lutue cipanga ca ku ambulula Vuangana vua Njambi. Vutumbe vua kama vua viMbetele viose vua pua ku tuala vusunga vua Mbimbiliya ku vantu vose. Kano ka mukanda ka na pu cimueso ca vutumbe vua viMbetele. Civunga ca Vantuamena cikeco ca tumine ku soneka uno mukanda, na ku ka tuma ku hitila mu internete ku viMbetele via ha mavu ose linga va ka langulule mu malimi a engi. Kaha va ka tuhuile ku viMbetele via vingi na ku ka tepela mu Vikungulukilo via ku tuvakana 110.000. Mu vipanga viose evi, vakua vusoko vua Mbetele va hanene vukuasi ku cipanga eci vuasi-vuasi cikuma​—ca ku ambulula muzimbu ua cili.​—Mako 13:10.

• Veya ve ku pangela ku Mbetele, kaha vati ve ku va lela?

• Cipanga cika ca vuasi-vuasi ci ve ku panga vaze va kala ha Mbetele?