Ku miaka ya ku nima, Vakaleho va Yehova navo va tuhuile na ku pangeziela ku vantu viMbimbiliya via ku liseza-seza. Vunoni tua muene ngecize kua tondekele Mbimbiliya i va na langulula mua cili, linga i kuase vantu ku lilongesa “ku tantekeya mpundu vusunga” muomu eci cikeco cizango ca Njambi hali muntu uose. (1 Timoteo 2:​3, 4) Mu muaka ua 1950, tua putukile ku langulula kamandende-kamandende mitamba ya Mbimbiliya ya Tradução do Novo Mundo, ili mu handekesi ya lelo. Mbimbiliya yaco va i langulula na vunongotima na vutongue mu malimi a ku tuvakana 130.

Kua tondekele Mbimbiliya ya yasi ku ivuisisa. Mu ku hita ca miaka malimi eku aluluka, ngeci mu viMbimbiliya via vingi mua kala mezi a ku kaluua ku evuisisa muomu a laza. Kua solokele imo mikanda ya laza ize i lombolola mua cili visoneka ngue mu via puile mu Mbimbiliya kaha ya asiuisile ku ivuisisa malimi a ciHevelu, ciAlamaiku, na ciNgelengu.

Kua tondekele Mbimbiliya ize ya langulule mu vusunga lizi lia Njambi. Vakua ku langulula Mbimbiliya ka va pandele ku hakamo visinganieka viavo, va na pande ku langulula viose muze mu via fuile mu ciHevelu, ciNgelengu na ciAlamaiku. Vunoni mu viMbimbiliya via vingi lizina lia Njambi, Yehova, va li tundisa mu Visoneka via ku lela.

Kua tondekele Mbimbiliya ya sangaziala Iveneyo, Yehova. (2 Samuele 23:2) Mu Mbimbiliya ya Tradução do Novo Mundo, lizina lia Yehova va li hingisamo lua ku pua 7.000 ngue mu lia kele mu visoneka via Mbimbiliya via laza ngue mu va na muesa ha cikupulo ci li kuintsi. (Visamo 83:18) Evi vikevio via solokele mu ku fuitangana ca ku lengeya, ino Mbimbiliya ya yasi ku i tanda ya neha ceke ca visinganieka via Njambi. Nga ua kala na Mbimbiliya ya Tradução do Novo Mundo mu lilimi liove, ni yahi, tu ku lania nguetu tanda lizi lia Njambi ntsimbu yose.​—Yehosua 1:8; Visamo 1:2, 3.

• Omo lia vika kua tondekele Mbimbiliya i va langulula mua vusunga?

• Vika na pande ku linga Muntu uose uze a tonda ku tantekeya cizango ca Njambi?